Dövlətimizin başçısı Ermənistanın işğalçılıq siyasətini ifşa etmişdir

Bu il iyunun 18-də Şərq Tərəfdaşlığı ölkələrinin videokonfrans formatında Sammiti keçirilib. Prezident İlham Əliyev tədbirdə dərin məzmunlu, parlaq çıxış etmişdir. Dövlətimizin başçısının çıxışında səslənən dəyərli fikir, təklif və mülahizələr ölkə ictimaiyyətinin ən müxtəlif təbəqələrinin nümayəndələri, o cümlədən, tarixçi alim və siyasi ekspertlər tərəfindən dərin məmnunluq hissilə qarşılanmışdır. Bakı Dövlət Universitetinin dosenti, tarix üzrə fəlsəfə doktoru Atamoğlan Məmmədli bu barədə fikirlərini bizimlə bölüşərək dedi:

– Mən tədbiri televiziyadan dərin maraqla izlədim. Prezident İlham Əliyev çıxışında qeyd etdi ki, Azərbaycan Şərq Tərəfdaşlığının fəal tərəfdaş ölkəsidir. Avropa İttifaqı ilə əməkdaşlıq Azərbaycanın xarici siyasətinin əsas prioritetlərindəndir. Ölkəmiz bu qurumun 9 üzvü ilə strateji tərəfdaşlıq haqqında sənəd imzalayıb.

Qeyd etmək lazımdır ki, iki il bundan əvvəl Brüsseldə Azərbaycan və Avropa İttifaqı arasında “Tərəfdaşlıq Prioritetləri” sənədi paraflanıb ki, burada hər iki tərəfin müstəqillik, suverenlik, ərazi bütövlüyü və beynəlxalq səviyyədə tanınmış sərhədlərin toxunulmazlığı prinsiplərinə sadiqliyi xüsusi vurğulanıb.

Prezident İlham Əliyev sonra haqlı olaraq vurğuladı ki, Ermənistan və Azərbaycan arasında olan münaqişə, məhz, yuxarıda qeyd olunan prinsiplər əsasında həll edilməlidir. Lakin, bu gün dünya birliyinə məlum olduğu kimi, Ermənistan Azərbaycanın beynəlxalq səviyyədə tanınmış ərazisinin 20 faizinin işğalını davam etdirir. Dağlıq Qarabağ və Azərbaycanın daha 7 rayonu 30 ilə yaxındır ki, Ermənistanın işğalı altındadır. Ermənistanın etnik təmizləmə siyasəti nəticəsində 1 milyondan artıq azərbaycanlı qaçqın və məcburi köçkünə çevrilmişdir. İrəvan beynəlxalq hüquq normalarını kəskin şəkildə pozmaqda davam edir. Belə ki, BMT Təhlükəsizlik Şurasının 4 qətnaməsi Ermənistan qoşunlarının Azərbaycanın işğal edilmiş bütün ərazilərindən qeyd-şərtsiz və tam çıxarılmasını tələb edir. Lakin Ermənistan iqtidarı həmin sənədləri yerinə yetirməkdən boyun qaçırır.

Dövlətimizin başçısının Sammitdə növbəti dəfə nümayiş etdirdiyi prinsipial mövqe Ermənistanın baş naziri Nikol Paşinyanı şok vəziyyətinə salmışdır. O, beynəlxalq ictimaiyyətin diqqətini Dağlıq Qarabağ probleminin həllindən yayındırmağa can ataraq, ölkəmizə şər və böhtan atmağa cəhd etmiş və özünü bir daha biabır etmişdir.

Bundan sonra, Prezident İlham Əliyev yenidən söz alıb Paşinyanı dərin arqumetnlərlə tam yerində oturtdaraq demişdir: “Çıxışımda dediklərim beynəlxalq təşkilatların qətnamələrinə əsaslanan tarixi həqiqətdir. Birincisi, bu, hər kəsə bəlli olan bir faktdır ki, Ermənistan Azərbaycanın ərazisini işğal edib. İkincisi isə, Ermənistanın baş nazirinə irqçilik haqqında danışmağı məsləhət görməzdim, çünki erməni terrorçuları dünyaca məşhurdurlar”.

Hesab edirəm ki, Azərbaycan Prezidenti ölkəmizin haqq səsini bir daha nüfuzlu beynəlxalq platformadan səsləndirməklə, Ermənistanın işğalçılıq siyasətini ifşa etmişdir. Dövlətimizin başçısı dünya ictimaiyyəti qarşısında ortaya qoyduğu tutarlı faktlar və dəlil-sübutlarla faktiki olaraq Ermənistanın faşizm ənənələrinə söykənən dövlət siyasətini yerlə-yeksan etmişdir.

Sonda bildirmək istəyirəm ki, Azərbaycan dövləti, Milli Ordumuz Ali Baş Komandanın rəhbərliyi altında ən yaxın gələcəkdə erməni işğalçılarını doğma torpaqlarımızdan birdəfəlik qovub çxaracaqdır. Bununla da tarixi ədalət tamamilə bərpa olunacaq!

Söhbəti qələmə aldı:

M.HACIXANLI,

Xalq qəzeti. - 2020.- 20 iyun.- S.3.