İndi hər kəsdən ikiqat məsuliyyət tələb olunur

Karantin qaydalarının yumşaldılmasından sonra ölkəmizdə yoluxma sayının artması təkcə biz həkimləri deyil, bütövlükdə cəmiyyətimizi, dövlətimizi narahat edir. Odur ki, karantin rejiminin ölkəmizdə avqustun 1-nə qədər uzadılması doğru addımdır. Bu fikirləri ATU-nun Tədris-Cərrahiyyə Klinikasının şöbə müdiri, tibb üzrə fəlsəfə doktoru Nurlana Əliyeva pandemiyaya qarşı mübarizədə ölkəmizin gördüyü işlərlə bağlı “Xalq qəzeti”nə fikir bildirərkən deyib. O, daha sonra əlavə edib:

– Karantin rejiminin məhdudiyyətlərinin aradan qaldırılması, sanki, bəzi vətəndaşlarda bir arxayınlıq yaratdı. Park və restoranların, ticarət mərkəzlərinin açılmasından sonra gigiyenik qaydalara tam əməl edilməməsi, insanların çox olduğu yerlərdə tibbi maskalardan istifadə olunmaması, eləcə də sosial məsafənin qorunmaması xəstələrin sayının artmasına gətirib çıxardı ki, bu da hamımızı narahat edir. Nəticədə pandemiyanın qarşısının alınması üçün karantin rejiminin uzadılması və qərarların sərtləşdirilməsi məsələsi gündəmə gəldi. Odur ki, Nazirlər Kabineti yanında operativ qərargah karantin rejiminin avqustun 1-ə kimi uzadılması barədə qərar verdi. Məqsəd ölkəmizdə ola biləcək mümkün yeni dalğa təhlükəsinin qarşısının vaxtında alınması, yoluxmanın mümkün qədər azaldılmasına nail olmaqdır.

Düşünürəm ki, bu, həqiqətən də düzgün və önəmli addımdır. Çünki cənab Prezident İlham Əlievin də dəfələrlə vurğuladığı kimi, insanların, əhalinin sağlamlığı hər şeydən öndə gəlir. COVID-19 pandemiya elan edildikdən və koronavirus infeksiyasının ölkəmizdə qeydə alınmasından sonra cəmiyyətin sağlamlığının keşiyində dayanan həkimlərimizin məsuliyyəti daha da artdı. İstər Bakıda, istərsə də bölgələrimizdə çalışan tibb işçiləri gecə-gündüz fədakarcasına pandemiya ilə mübarizə aparır, virusa yoluxmuş və müxtəlif vəziyyətlərdə olan vətəndaşlarımızın xilas edilməsi üçün əlindən gələni əsirgəmirlər. Hər bir vətəndaşımızın həyatı bizim üçün dəyərlidir. Onları çarpayıda “ölüm-qalım” çarpışmasını görmək həm həkim kimi, eləcə də insan kimi bizi narahat edir. Lakin nə qədər çətin də olsa, hər birimiz “Biz birlikdə güclüyük!”– devizi ilə öhdəmizə düşən vəzifəni və peşə borcumuzu yerinə yetirir, bu bəlanın tezliklə ölkəmizdən və dünyamızdan sovuşmasına çalışırıq.

Bunun üçün isə hər bir vətəndaşımız üzərinə düşən vəzifəni dərk etməli, qoruyucu maska taxmalı, sosial məsafəni gözləməlidir. Statistika göstərir ki, epidemiya qurbanlarının sayı gündən-günə artmaqda davam edir. Ən güclü ölkələr COVID-19 epimediyasının qarşısında acizdir. Hələ ki, müxtəlif ölkələr və aparıcı elmi-tibbi mərkəzlər COVID-19-un qarşısının alınması üçün vaksinlərin hazırlanması üzərində çalışırlar. Lakin, bu, uzun zaman tələb edən işdir. Ona görə də vətəndaşlar iyunun 21-dən iyulun 5-nə qədər davam edən sərtləşdirilmiş karantin günlərində məsuliyyətli olmalı, müəyyən edilmiş qaydalara riayət eməlidirlər. Bu zaman kəsiyi hər birimiz üçün bir sınaq dövrüdür. Çünki pandemiyanın ayağının ölkəmizdən kəsilməsi bizim hər birimizdən asılıdır. Bunun üçün dövlət üzərinə düşən vəzifəni yerinə yetirir. Modul tipli xəstəxanaların təşkili, həkim və tibb işçilərimizin, polislərimizin və digər peşə sahiblərinin fədakarcasına çalışması ondan ötrüdür ki, hamılıqla bu bəlaya qalib gələ bilək. Pandemiya üzərində qələbə çala bilməyimiz üçün vətəndaşlar da bizə kömək etməli, ilk növbədə, öz sağlamlıqlarını düşünməli, qaydalara əməl etməlidirlər. Əks halda, hər bir məsuliyyətsiz hərəkət onlarla, yüzlərlə insan həyatının itkisinə səbəb ola bilər. İnanırıq ki, müəyyən edilmiş müddətdə ölkəmizdə yoluxma sayının azalmasına, daha çox xəstənin sağalaraq, evə buraxılmasına nail olacağıq.

Əfsanə BAYRAMQIZI,

Xalq qəzeti. - 2020.- 20 iyun.- S.4.