ISESCO pandemiya ilə mübarizəyə həsr olunmuş tədbirlərini davam etdirir

İslam Dünyası Təhsil, Elm və Mədəniyyət Təşkilatı (ISESCO) koronavirus pandemiyası ilə bağlı cəmiyyətin təhsil və mədəni həyatını davam etdirmək məqsədilə “Rəqəmsal ev” layihəsi çərçivəsində interaktiv platforma yaradıb. Təşkilatın saytında Mərakeşin Məhəmmədiyyə Alimlər Liqası ilə birlikdə platformanın məzmunu yerləşdirilib. Karantin rejimində evdə oturanlar üçün dini biliklər, ekstremizmə qarşı maarifləndirici əsərlər, elmi və mədəniyyət muzeyləri ilə virtual tanışlıq təqdim edilir. Bundan başqa, İslam aləminin ən zəngin kitabxanalarının linkləri vasitəsilə müxtəlif kitabları oxumaq mümkündür.

ISESCO bütün üzv ölkələri bu təşəbbüsə qoşulmağa, rəqəmsal texnologiyalar vasitəsilə təhsil və mədəni həyatın davam etdirilməsini təmin etməyə çağırıb. Təşkilatın “Rəqəmsal ev” layihəsi çərçivəsində ərəb dili kursları da keçirilir. Bu məqsədlə, “YouTube” sosial şəbəkəsində xüsusi kanal açılıb.

Bu günlərdə ISESCO bir sıra regional və beynəlxalq təşkilatların nümayəndələrinin də iştirakı ilə videokonfrans keçirdi. Konfransın açılış sessiyasında təşkilatın baş direktoru Salim əl-Malik, Birləşmiş Ərəb Əmirliklərinin Mədəniyyət və Bilik naziri Nura əl-Kəəbi, İslam Əməkdaşlıq Təşkilatının baş katibi Yusif bin Əhməd Əl-Osaymin və BMT-nin Sivilizasiyaların Alyansı üzrə ali nümayəndəsi Migel Angel Moratinos çıxış etdilər.

Konfransın gündəliyinə COVID-19 pandemiyası dövründə mədəniyyət sahəsinin üzləşdiyi çətinliklər, pandemiyadan sonrakı dövrdə mədəniyyət, mədəni turizm sahəsində yeni trendlər mövzuları barədə müzakirələrin aparılması və ISESCO-nun Rəqəmsal Mədəniyyət Strategiyası layihəsinin təqdimatı daxil idi.

Virtual konfransda ölkəmizi Azərbaycan Respublikası Mədəniyyət nazirinin birinci müavini Vaqif Əliyev və ISESCO üzrə Azərbaycan Respublikası Milli Komissiyasının baş katibi Vasif Eyvazzadə təmsil edirdi. Azərbaycan nümayəndə heyəti çıxış zamanı COVID-19 pandemiyası dövründə ölkəmizdə mədəniyyət sahəsində həyata keçirilən layihələr barədə məlumat verdi, həmçinin Azərbaycanın ISESCO tərəfindən təsis edilmiş Qlobal Humanitar Koalisiyaya dəstək verdiyini qeyd etdi.

M.MÜKƏRRƏMOĞLU,

Xalq qəzeti. - 2020.- 20 iyun.- S.6.