Bütün qlobal layihələr diqqət mərkəzindədir

Son 16 il ərzində həyata keçirilən uğurlu daxili və xarici siyasət əhalinin həyat tərzinin yaxşılaşdırılması istiqamətində əsaslı dönüş yaratmaqla yanaşı, Azərbaycanın beynəlxalq aləmdəki mövqeyinin daha da möhkəmləndirilməsi mənafeyinə xidmət göstərmişdir. Prezident İlham Əliyev bu müddət ərzində müstəqil və milli maraqlara əsaslanan xarici siyasət kursunu sürətlə dəyişən dünyanın geosiyasi reallıqlarına adekvat olaraq çevik və hücum taktikasına əsaslanmaqla davam etdirir. Məhz bunun nəticəsidir ki, hazırda Azərbaycan dünyada etibarlı tərəfdaş kimi tanınır və beynəlxalq münasibətlər sistemində mövqeyi getdikcə güclənir. Eyni zamanda, ölkəmiz müstəqil dövlətlərin suverenliyi və milli maraqlara hörmət prinsipi əsasında inkişafının tərəfdarı kimi çıxış edir.

Həm Cənubi Qafqaz regionunda, həm də Avrasiya geosiyasi məkanında baş verən hadisələr Azərbaycanın həm beynəlxalq hüquq normaları çərçivəsində fəaliyyət göstərdiyini, həm də regional və qlobal təhlükəsizliyin təmin olunmasında müstəsna rol oynadığını sübuta yetirir. Bütün bunlar beynəlxalq ictimaiyyətin ölkəmizə olan inamını daha da artırır və Azərbaycanın çox etibarlı tərəfdaş kimi tanınmasında və bölgədə sabitləşdirici rol oynamasında mühüm əhəmiyyət kəsb edir.

Sosial layihələr uğurla icra olunur

Son illər dünyada baş verən mürəkkəb hadisələrin -- münaqişələrin daha da alovlanmasının, miqrant axınının güclənməsinin, hətta inkişaf etmiş dövlətlərdə belə qarşıdurmaların geniş vüsət alması müqabilində Azərbaycanın sabitlik adasına çevrilməsi, nüfuzlu beynəlxalq təşkilatların tədbirlərinə evsahibliyi etməsi bir daha təsdiqləyir ki, ölkəmiz müstəqillik yolunda inamla irəliləyir. Prezident İlham Əliyevin düzgün müəyyənləşdirdiyi siyasi kurs ölkəmizin beynəlxalq münasibətlərdə uğurla təmsil olunmasını təmin edir.

Son bir neçə ayda bəşəriyyətin başı üzərini almış koronavirus pandemiyası, demək olar ki, bütün sahələri silkələyib. Əksər ölkələrin iqtisadi vəziyyəti xeyli zəifləmiş, xəstəlik nəticəsində ölüm halları artmış, diplomatik münasibətlərdə və digər sahələrdə müəyyən fasilələr yaranmışdır. Pandemiya Azərbaycandan da yan keçmədi. İş yerləri, tədris müəssisələri, nəqliyyat sektoru bir neçə ay öz fəaliyyətini dayandırdı. Ancaq dövlət başçısının rəhbərliyi ilə qabaqlayıcı tədbirlərin düşünülmüş şəkildə həyata keçirilməsi əhalinin həyat tərzinə mənfi təsirinin qarşısını aldı. Ölkə Prezidenti də çıxışlarında bildirdi ki, heç bir maneə sosial layihələrin icrasını dayandıra bilməz. Son iki ay ərzində dövlət başçısının və Birinci vitse-prezident Mehriban xanım Əliyevanın reallaşdırılan sosial layihələrin açılış mərasimlərində iştirakı da bundan xəbər verir. Son iki ay koronavirus pandemiyasının tüğyan etdiyi dövr olduğundan, bu müddət ərzində keçirilən tədbirləri xüsusilə vurğulamaq istərdik.

Ümumiyyətlə, sosial layihələrin icrası hər zaman prioritet vəzifə kimi qarşıya qoyulub. Dövlət başçısının rəhbərliyi ilə həyata keçirilən sosialyönümlü siyasət Azərbaycan cəmiyyətində böyük razılıqla qarşılanır. Çünki bu siyasət müxtəlif sosial qrupların həyat tərzinin daha da yaxşılaşdırılmasına , insan amilinə hörmətin formalaşdırılmasına, siyasi sabitliyin bərqərar olmasına etibarlı zəmin yaradan konseptual inkişaf yoludur. Bu, həm də ölkədə etibarlı sosial müdafiə sisteminin yaradılmasını gerçəkləşdirir.

Prezident İlham Əliyev dövlətin yeritdiyi bu siyasətin mahiyyətindən bəhs edərkən dəfələrlə onun mərkəzində məhz insan amilinin, Azərbaycan vətəndaşının dayandığını diqqətə çatdırıb və əhalinin sosial təminatının, maddi vəziyyətinin daha da yaxşılaşdırılması üçün pandemiyanın ciddi təhlükə yaratmasına baxmayaraq, bundan sonra da genişmiqyaslı sosial-iqtisadi islahatların həyata keçirilməsinin prioritet vəzifə kimi hər zaman aktual olaraq qalacağını bildirib.

Gərgin iş qrafiki

Son iki ayda hətta dövlətlərarası əməkdaşlıqda da müəyyən fasilələr yaranıb. Həmin fasilələr hələ də aradan qaldırılmayıb. Bütün bunlara baxmayaraq, Azərbaycanda nəzərdə tutulan sosial proqramlar icra olunmuş, bir sıra beynəlxalq tədbirlər videokonfrans formatında keçirilmiş, yeni istifadəyə verilmiş müəssisələrin açılış mərasimləri keçirilmişdir. Açılışların, demək olar ki, hamısında ölkə Prezidenti, əksəriyyətində isə Birinci vitse-prezident Mehriban xanım Əliyeva iştirak etmişdir. Ümumilikdə, son iki ayda dövlət başçısının iş qrafiki çox gərgin olmuşdur. Belə ki, Prezident İlham Əliyev 20 tədbirdə iştirak edib. Bu tədbirlərin 14- ü sosial proqramların icrası ilə əlaqədar olmuşdur. Bunlardan bəzilərini diqqətə çatdırmaq istərdik:

Prezident İlham Əliyev aprelin 3-də Bakı--Sumqayıt yolunun genişləndirilməsi çərçivəsində görülən işlərlə tanış olub. Aprelin 6- da ölkə Prezidenti və birinci xanım Mehriban Əliyeva Sumqayıt Kimya Sənaye Parkında “Bakı Tekstil Fabriki” MMC tərəfindən yaradılan tibbi maska istehsalı müəssisəsinin açılışında iştirak ediblər.

Həmin ayın 24-də Abşeron rayonunun ərazisində Xızı rayonunun Ağdərə kəndindən Sumqayıt şəhərinə çəkilən magistral qaz kəmərinin açılış mərasimində dövlət başçısı şəxsən iştirak edib. O gün möhtərəm Prezidentimiz daha bir tədbirə qatılıb--Sumqayıt şəhərindəki yataqxanalarda müvəqqəti məskunlaşan 3042 məcburi köçkün ailəsi üçün Abşeron rayonu ərazisində yaşayış binalarından ibarət məhəllələrdə tikinti işlərinin gedişi ilə tanış olub.

Koronavirusa tutulmuş xəstələrin müalicəsi məqsədilə qısa müddət ərzində tikilib istifadəyə verilmiş modul tipli xəstəxana kompleksinin açılışında Prezident İlham Əliyev və birinci xanım Mehriban Əliyeva iştirak ediblər. Paytaxtda istifadəyə verilən modul tipli ilk xəstəxana kompleksinin tikinti və quraşdırma işləri 3 həftə ərzində tamamlanıb. Sahəsi 3000 kvadratmetr olan , üç korpusdan ibarət, ümumilikdə, 100 palatada 200 çarpayı yeri olan modul tipli xəstəxana kompleksində orta-ağır simptomlu infeksion xəstələrin qəbulu və müalicəsi üçün hərtərəfli şərait yaradılıb. Ehtiyac yaranacağı təqdirdə, əlavə avadanlıqlar təchiz olunmaqla palataların reanimasiyaya çevrilməsi mümkündür.

Azərbaycan Respublikasının Prezidenti İlham Əliyev və birinci xanım Mehriban Əliyeva mayın 12-də Sumqayıtda “Gilan Tekstil Park” Məhdud Məsuliyyətli Cəmiyyətinin tibbi maska fabrikinin və tikiş fabrikinin nəzdində fəaliyyət göstərən qoruyucu kombinezonların istehsalı müəssisəsinin açılışında iştirak ediblər.

Bir həftə sonra -- mayın 19- da ölkə başçısı və Birinci vitse- prezident Əmək və Əhalinin Sosial Müdafiəsi Nazirliyinin tabeliyində olan Dayanıqlı və Operativ Sosial Təminat Agentliyinin Bakının Nizami rayonunda yerləşən 3 saylı DOST mərkəzinin açılışında iştirak ediblər. Mayın 25-də isə Prezident İlham Əliyev və birinci xanım Mehriban Əliyeva Şamaxı rayonuna səfərə gəliblər. Bu səfər zənginliyi ilə diqqət mərkəzində olub. Çünki həm Prezident, həm də Birinci vitse-prezident Pirsaat Baba ziyarətgahının yenidən qurulması çərçivəsində görülən işlərlə tanış olublar. Daha sonra Pir Ömər Sultan ziyarətgahında olublar. Heydər Əliyev Fondunun təşəbbüsü ilə burada zəruri konservasiya və bərpa işləri aparılmaqla ərazinin arxeoparka çevrilməsi planlaşdırılır. Həmçinin Şamaxı rayonunda bir sıra müəssisələrin açılış mərasimlərində iştirak ediblər.

Mayın 28- də həm Prezident İlham Əliyev, həm də birinci xanım Bakının Qaradağ rayonunda məcburi köçkünlər üçün salınmış “Qobu Park-3” yaşayış kompleksinin açılış mərasimində iştirak ediblər. “Qobu Park-3” yaşayış kompleksində onmərtəbəli 13 yaşayış binası inşa olunub və mənzillərin ümumi sayı 1336-dır. Qeyd edək ki, “Qobu Park-3” yaşayış kompleksi qaçqın və məcburi köçkünlər üçün salınmış 111-ci qəsəbədir. Kompleksin ərazisində istehsalat sahələri, ticarət obyektləri və digər zəruri infrastruktur yaradılıb. Ərazidə sakinlərin asudə vaxtının səmərəli təşkili məqsədilə istirahət parkı salınıb, uşaq əyləncə meydançaları quraşdırılıb, geniş yaşıllıq və işıqlandırma işləri görülüb. Burada həm də 3 idman meydançası və 360 yerlik açıq avtomobil dayanacağı sakinlərin ixtiyarına veriləcək.

Beynəlxalq tədbirlər

Koronavirus xəstəliyi sərhəd tanımayaraq dünya boyunca yayıldığı və faciəvi nəticələrə gətirib çıxardığı bir vaxtda Prezident İlham Əliyevin təşəbbüsü ilə mühüm əhəmiyyətli beynəlxalq tədbirlər də keçirilib. Əvvəlcə Türkdilli Dövlətlərin Əməkdaşlıq Şurasının sədri, Prezident İlham Əliyevin təşəbbüsü ilə aprelin 10-da Türk Şurasının videokonfrans vasitəsilə fövqəladə Zirvə görüşü keçirilib. Dövlət başçısının da qeyd etdiyi kimi, fövqəladə zirvə görüşünün əsas məqsədi milli səviyyədə atılan addımlara dair təcrübə mübadiləsinin aparılması, lazım olan anda bir-birinə dəstək göstərilməsi və xalqlar arasında həmrəyliyin möhkəmləndirilməsi olub. Qeyd edildi ki, qlobal pandemiya şəraitində Türk Şurasının üzv dövlətləri özlərinə qapanmayıblar. Təşkilat olaraq Türk Şurası digər beynəlxalq təşkilatlarla əməkdaşlığa hazır olduğunu bəyan edib. Həmçinin, Azərbaycanın ayrı-ayrı ölkələrə də öz dəstəyini göstərməsi də diqqətə çatdırılıb.

Qoşulmama Hərəkatının sədri kimi Prezident İlham Əliyevin təşəbbüsü ilə Qoşulmama Hərəkatının Təmas Qrupu formatında mayın 4-də videokonfrans vasitəsilə koronavirusla mübarizəyə həsr edilmiş “COVID-19-a qarşı birlikdəyik” mövzusunda Zirvə görüşünün keçirilməsi də beynəlxalq aləmin diqqət mərkəzində olub.

Qoşulmama Hərəkatında 120 dövlətin təmsil olunduğunu nəzərə alaraq, zirvə görüşü coğrafi təmsilçilik prinsipi əsasında Avropa, Asiya, Afrika və Latın Amerikasında yerləşən ölkələrin iştirakı ilə təmas qrupu formatında keçirildi. Qırxdan çox üzv ölkənin dövlət və hökumət başçılarının qatıldıqları videokonfransda BMT-nin Baş katibi, BMT Baş Assambleyasının prezidenti, Afrika İttifaqının sədri, Ümumdünya Səhiyyə Təşkilatının baş direktoru, Avropa İttifaqının ali nümayəndəsi də iştirak etdi.

Bundan başqa, CISCO şirkətinin təşəbbüsü ilə Prezident İlham Əliyevlə bu şirkətin icraçı vitse-prezidenti və baş maliyyə direktoru xanım Kelli Kramer, vitse-prezidenti Qay Ditrix və CISCO rəhbərliyinin digər nümayəndələri arasında videokonfrans keçirildi. Bir həftə sonra dövlətimizin başçısı daha bir tədbirə qatıldı. Mayın 22-də “Signify” (əvvəlki adı “Philips Lighting”) şirkətinin təşəbbüsü ilə Prezident İlham Əliyevlə bu şirkətin baş icraçı direktoru Erik Rondolat, MDB üzrə baş meneceri Erik Benedetti və “Signify” rəhbərliyinin digər nümayəndələri arasında videokonfrans keçirildi.

Göründüyü kimi, son iki ayda dövlət başçısının iş qrafiki çox zəngin və gərgin olmuşdur. Bəşəriyyətin başı üzərini almış koronavirus kabusunun ciddi fəsadlar törətdiyi bir vaxtda Prezident İlham Əliyev həm daxili, həm də xarici siyasət kursunun, eləcə də sosial proqramların həyata keçirilməsi prosesində prinsipiallıq və qətiyyət nümayiş etdirir.

Əliqismət BƏDƏLOV,

Xalq qəzeti. - 2020.- 21 iyun.- S.1.