“Sizin sayənizdə bu çətin günlər tezliklə keçəcək”

Vətəndaşlar koronavirusla uğurlu mübarizəyə görə Prezidentə təşəkkür edirlər

Qlobal koronavirus pandemiyası bütün ölkələri ciddi sınağa çəkir. Bəşəriyyəti əsir almış yeni bəla ilə mübarizədə hər bir ölkənin qarşılaşdığı çətinliklər və xəstəliklə aparılan mücadilədə verilən ciddi itkilər belə deməyə əsas verir. Heç bir iqtisadi və siyasi ittifaqın üzvü olmayan Azərbaycan da öz resurslarına arxalanaraq pandemiyaya qarşı müstəqil və ardıcıl şəkildə mübarizə aparır. Xüsusilə qeyd etmək lazımdır ki, digər ölkələrlə müqayisədə operativ həyata keçirilən tədbirlər nəticəsində ölkəmiz pandemiyanın nəzarətsiz inkişafının öhdəsindən gəlməyi və sağalanların sayı üzrə müsbət statistikaya nail olmağı bacardı. Bütün bu nailiyyətin əsasında da, təbii ki, Prezident İlham Əliyevin qabaqlayıcı addımları və düşünülmüş siyasəti dayanır. Məhz dövlət başçısının qətiyyətli addımları nəticəsində ölkədə koronavirus xəstəliyi ilə bağlı vəziyyəti nəzarət altına almaq mümkün oldu. Azərbaycan liderinin qəbul etdiyi qərarların və uzaqgörən siyasətin ölkə həyatına müsbət təsirini müşahidə edən vətəndaşlarımız da koronavirus pandemiyasından xalqımızın xilas olması üçün göstərilən diqqət və qayğıdan razılıqlarını bildirir, Prezident İlham Əliyevə ünvanladıqları minnətdarlıq məktublarında ölkə liderinin daxili və xarici siyasətini dəstəklədiklərini də vurğulayırlar.

Koronavirusla mübarizə çərçivəsində hökumət Azərbaycanda əhalinin müxtəlif təbəqələrinin, biznes subyektlərinin iqtisadi cəhətdən dəstəklənməsinə yönəlmiş bir sıra ciddi kompleks tədbirlər görür. Bütün bunların nəticəsidir ki, bu gün hər bir azərbaycanlı dövlət dəstəyini hiss edir. Belə ki, ölkəmizdə koronavirus pandemiyasına qarşı mübarizə tədbirləri çərçivəsində aztəminatlı ailələrin sosial müdafiəsi diqqətdə saxlanılır.

Bundan başqa, koronavirus pandemiyasından zərər çəkmiş sahibkarlara və onların muzdla çalışan işçilərinə maliyyə dəstəyi göstərilir. Fərdi sahibkarlara isə birbaşa maliyyə dəstəyinin göstərilməsi təmin edilir. Sahibkarlıq subyektləri ilə yanaşı, dövlət vətəndaşın sosial rifah halının yaxşılaşdırılması istiqamətində də işsiz insanlara kifayət qədər vəsait ayırır. Belə ki, dövlət iki ay – aprel və may ayları ərzində 600 min işsiz insana 190 manat yardım göstərəcək. Aprel ayı üzrə ödənişlər artıq həyata keçirilmişdir. Bütün bunlar, əlbəttə ki, dövlət siyasətinin əsasında humanizm prinsiplərinin dayandığını göstərir. Ölkə başçısına göndərilən məktublarda da Prezident İlham Əliyevin siyasətinin mərkəzində insan amilinin dayandığı xüsusilə vurğulanır.

Gəncə sakini, Azərbaycan Dövlət Aqrar Universitetinin professoru, SSRİ idman ustası Adil Ramazanov və Neftçala rayonu, Xəzər kənd sakini Zərnişan Hüseynova məktublarında Prezidentin qabaqlayıcı tədbirləri nəticəsində vətəndaşlarımızın bu bəlanı yüngül itkilərlə keçirdiyini vurğulayır, ölkə başçısının uzaqgörən siyasəti, yüksək intellektual səviyyəsi və qabaqcadan düşünülmüş ağıllı, müdrik siyasəti sayəsində bu günlərdə baş verən dəhşətli pandemiyadan Azərbaycan xalqının ən az itkilərlə çıxmaq ərəfəsində olduğu qeyd edilir. Qəhrəman ana Zərnişan Hüseynova yazır: “Mən on iki uşaq anasıyam. Nəvələrim, nəticələrim var. Karantin rejimində onları görməmək mənə çətin olsa da, qaydalara riayət edib evdə qalıram. Bilirəm ki, Sizin sayənizdə bu çətin günlər tezliklə keçəcək”.

Prezident İlham Əliyevin əhalinin rifah halının yaxşılaşdırılması və sosial müdafiəsinin gücləndirilməsi istiqamətində qəbul etdiyi hər bir qərar ölkədə razılıqla qarşılanır. Bu gün Azərbaycanda hamı müşahidə edir ki, qabaqlayıcı tədbirlər nəticəsində sosial-iqtisadi sahələrdə yaranacaq bir sıra problemlərin qarşısı alındı. Xüsusilə qeyd etmək lazımdır ki, pandemiyadan zərər çəkən fəaliyyət sahələrinə məqsədli maliyyə dəstəyi göstərildi və əhalinin aztəminatlı hissəsinin maddi vəziyyətinin yaxşılaşdırılması üzrə qəbul olunan operativ proqramlar bu gün uğurla icra edilir.

Ağdam rayonu, Qiyaslı kənd sakini İsmayıl Qaçaylı, Sumqayıtdan Müslüm Abbasov, Zaqataladan Zakir Cabbarov ölkə başçısına ünvanladıqları məktublarında koronavirus pandemiyasının Azərbaycanda geniş yayılmasının qarşısının alınması, sosial sahəyə dəymiş zərərin minimuma endirilməsi, virusdan zərər çəkmiş sahələrdə çalışan işçilərin əməkhaqqının ödənilməsi, əhalinin sosial cəhətdən həssas təbəqələrinə yardım edilməsi, eləcə də iqtisadiyyatın qorunması üçün Prezidentin verdiyi tapşırıqların ölkəmizin bu bəladan ən az itkilərlə çıxması ilə nəticələndiyini, bu infeksiyanın ölkəmizdə geniş yayılmasının qarşısını almaq istiqamətindəki bütün təşəbbüslərini dəstəklədiklərini bildirirlər. Şəhid atası Müslüm Abbasov yazır: “Siz həmişə Azərbaycan vətəndaşının sağlam və xoşbəxt yaşaması üçün əlinizdən gələni əsirgəməmisiniz. Köməyə, dəstəyə ehtiyacı olan hər kəsin yanında olmaq Sizə xas olan xüsusiyyətdir”.

Sumqayıtın Corat qəsəbəsindən olan şəhid anası Nargilə Mədinova isə koronavirus pandemiyasının yaratdığı bu çətin günlərdə şəhid və imkansız ailələrə göstərdiyi diqqətə, verilən sosial yardımlara, göndərilən ərzaq sovqatlarına görə Corat qəsəbəsinin bütün qadınları adından Prezident İlham Əliyevə dərin minnətdarlığını bildirir.

COVID-19 infeksiyasının geniş vüsət almasına baxmayaraq, hazırda ölkə vətəndaşlarının normal həyat şəraitinin pozulmaması və insanların təhlükəsizliyinin təmin edilməsi Azərbaycan dövləti üçün prioritet məsələdir. Bu baxımdan ölkəmizdə əhalinin sosial müdafiəsinin gücləndirilməsi və məsələnin mənfi təsirlərini minimuma endirmək məqsədilə mühüm tədbirlər həyata keçirilir. Prezidentin tapşırığı ilə xüsusilə də yaşlı insanlara yardımların edilməsi, onların gündəlik qayğıları ilə yaxından maraqlanılması ölkə vətəndaşlarında böyük məmnuniyyət hissilə qarşılanır.

Şəki şəhər sakini, Sosialist Əməyi Qəhrəmanı, Prezident təqaüdçüsü Baba Səmədov koronavirusun dünyanı çənginə aldığı dövrdə ölkəmizdə bu bəlaya qarşı gördüyü qabaqlayıcı tədbirlərə görə ölkə başçısına minnətdarlığını bildirir: “Mən fəxr hissi keçirirəm və qürrələnirəm ki, Sizin Prezidenti olduğunuz dövlətdə yaşayıram. Siz xalqınızı, millətinizi canınızdan da çox istəyirsiniz. Əminik ki, bu şərəfli işinizi bundan sonra da uğurla davam etdirəcəksiniz”.

Neftçala rayonu, Boyat kənd sakini, ikinci dərəcəli əmək ordenli Əlihüseyn Hacıyev isə yazır: “Mən Sizin vətəndaşa necə dəyər verdiyinizin canlı şahidi olmuşam. 2017-cl ildə Neftçalaya səfəriniz zamanı mənim fermer təsərrüfatımda oldunuz, təsərrüfatın üzvləri ilə səmimi görüş keçirdiniz, müvafiq tövsiyələr verdiniz. Biz Azərbaycan xalqı fəxr edirik ki, Sizin kimi liderimiz var. Bu işləriniz bir daha sübut edir ki, Siz Azərbaycan xalqının dahi lideri Heydər Əliyevin davamçısısınız”.

Prezident İlham Əliyev çıxışlarında xüsusilə qeyd edir ki, həssas təbəqənin diqqət mərkəzində saxlanılması indiki şəraitdə ən vacib məsələdir. “Biz onlara sahib çıxmalıyıq, onlara dəstək verməliyik, onlara kömək göstərməliyik”,- deyən bövlət başçısı bildirir ki, Azərbaycan xalqının əsrlər boyu yaşatdığı bu gözəl xüsusiyyətləri bu gün bütün xalqımız nümayiş etdirməlidir və nümayiş etdirir. Bu ağır günlərdə, dünya koronavirus bəlasıyla mücadilə etdiyi bir vaxtda Azərbaycan dövləti aztəminatlı ailələrə, karantin qaydalarının tətbiqi ilə iş yerini müvəqqəti itirənlərə dəstək verir.

Beyləqan rayonundan Səkinə Hüseynova xəstəliklə mübarizə zamanı Prezidentin xalqımıza göstərdiyi köməyin – əhalinin həssas qrupuna aid insanlara edilən yardımların, tələbələrin illik təhsil haqlarının dövlət büdcəsi hesabına ödənilməsinin, 190 manat məbləğində birdəfəlik müavinətin verilməsinin işsiz və həssas əhali qrupuna böyük dəstək olduğunu vurğulayır. Ölkəmizdə koronavirusdan sağalanların sayında müsbət dinamikanın qeydə alınmasının Prezidentin yüksək idarəçilik qabiliyyəti, hər bir insana qayğıkeş münasibəti sayəsində mümkün olduğunu vurğulayan Səkinə Hüseynova əlavə edir ki, atası 2-ci qrup əlil, anası isə şəkər xəstəsidir. “Siz bizim kimi həssas əhali qrupuna aid olan valideynləri və tələbələri sevindirdiniz. Biz də üzərimizdə çalışaraq, seçdiyimiz ixtisasdan asılı olmayaraq, hər birimiz öz sənətimizi sevərək öyrənib dövlətimizə, xalqımıza şərəflə, layiqli şəkildə xidmət edəcəyik”, – yazan S.Hüseynova məktubunu bu ifadə ilə bitirir: "Biz birlikdə güclüyük!" çağırışınız işimizdə bizə stimul olacaq”.

Ağstafanın Eynallı kəndindən olan Nəzrin Rüstəmova isə yazır ki, işsiz olsa da, karantin rejimində çətinlik çəkmədi: “190 manat birdəfəlik ödəməni də aldım. Sizin sayənizdə karantin günlərini daha rahat keçirdik. Bütün bunlara görə Sizə "Çox sağ olun!" deyirəm”.

Beləliklə, çətin və məsuliyyətli pandemiya dövründə xalq Prezident İlham Əliyevə koronavirusla mübarizədə əldə edilmiş uğurlara görə öz minnətdarlığını bildirir, öz güclü dəstəyini nümayiş etdirir. Belə dəstəyin və birliyin nümayiş etdirilməsi, əlbəttə ki, Prezidentin rəhbərliyi altında koronavirusla mübarizə dövründə olduğu kimi, postpandemiya mərhələsində də taleyüklü və məsuliyyətli vəzifələrin uğurla həyata keçiriləcəyinə olan inamı daha da artırır.

Səbuhi MƏMMƏDOV,

Xalq qəzeti.-2020.-1 may.-S.3.