Prezidentin müsahibələri erməni
yalanlarını ifşa edir
Prezident İlham Əliyev sentyabrın 27-dən ötən müddətdə bir sıra xarici media orqanlarına müsahibələri ilə qərəzli suallar qarşısında müdriklik nümayiş etdirir, qətiyyətli cavablar verərək həm Azərbaycanın haqlı tərəf olduğunu sübut edir, həm də Ermənistanın yalanlarını ifşa edir. Dövlət başçımız noyabrın 2-də İtaliyanın “La Repubblica” qəzetinə verdiyi müsahibədə də yenə mövzu ilə, mövcud durumla bağlı jurnalistin təxminən eyni səpkili suallarına cavab verərkən təmkinini pozmadan, Azərbaycanın bu müharibədə haqlı tərəf olduğunu, ərazi bütövlüyünü bərpa etdiyini dəlillərlə sübut etdi.
Noyabrın 4-də, Dağlıq
Qarabağdakı müharibənin altıncı həftəsində
İspaniyanın EFE informasiya agentliyinə
verdiyi müsahibədə cəbhədəki
vəziyyətlə bağlı suallara cavablarda ordumuzun
üstünlüyünə diqqət çəkdi. 30 il işğal altında olan ərazinin böyük
hissəsinin bir – birinin
ardınca azad edildiyini, Azərbaycan Ordusunun
uğurlu hücum əməliyyatlarının
davam etdiyini
vurğuladı. Qeyd etdi
ki, biz güclü
ölkəyik və öz
torpağımızda döyüşməklə, Azərbaycanın
beynəlxalq səviyyədə tanınan ərazi bütövlüyünü bərpa edirik. Ermənistan tərəfin
yaydığı feyk xəbərlərə
baxmayaraq, BMT Təhlükəsizlik
Şurasının Ermənistan qoşunlarının bizim ərazilərimizdən
çıxarılmasını tələb edən, lakin ötən illər ərzində əməl
olunmayan qətnamələrini icra edirik.
Dövlət başçısı hər iki müsahibədə faktiki olaraq, ya tamamilə, ya da qismən azad edilən ərazilərimizi qeyd edərək, digər rayonların işğaldan azad edilməsinin aktiv mərhələdə olduğunu bildirdi. Müharibə başlayandan xarici media qurumlarına verdiyi bütün müsahibələrində olduğu kimi, yenə jurnalistlərin atəşkəslə bağlı verdiyi suallara geniş açıqlama verdi. Bu atəşkəslərin işləməməsinin səbəblərindən biri kimi Ermənistanın azad edilmiş ərazilərimizi geri almağa cəhd göstərdiyini, buna nail ola bilməyəndə, Ermənistan ərazisindən Azərbaycanın ikinci böyük şəhəri olan Gəncəyə ballistik raketlə iki dəfə hücum etdiklərini, üçüncü atəşkəsdə dinc şəhər olan Bərdəyə hücum etdiklərini göstərdi. Bərdədə bir gündə 21 nəfər mülki şəxsin qətlə yetirildiyini, 70 nəfərin yaralandığını, beləliklə, hər 3 dəfə atəşkəsin Ermənistanın tərəfindən pozulduğunu deməklə erməni yalanlarına diqqət çəkdi.
Ermənistanın kompromisə
hazır olduğu fikrinə münasibət
bildirən dövlət başçısı onun yenə yalanlar, uydurmalarla bağlı olan
kompromis fikirlərinə diqqət çəkdi:
“İlk növbədə, bizim
mövqeyimiz demək olar
ki, bu 40 gün ərzində artıq dəfələrlə
bəyan edilib. ...Əgər Ermənistan
bizə qulaq assaydı və məntiqlə
davransaydı, bu gün
biz hazırda qarşılaşdığımız
vəziyyətdə olmazdıq. Müharibə bəlkə də
bir ay əvvəl bitərdi”.
Prezident bildirdi ki, Ermənistan tərəf həqiqətən
də Kəlbəcər, Laçın və Ağdamın qalan hissəsini boşaldacaqlarını
açıq şəkildə deməsə, hərbi variant qaçılmaz olacaq.
Paşinyanla bir masa arxasında oturmağın mənasızlığını, son iki il ərzində onunla çoxsaylı görüşləri olduğunu, lakin onların hamısının tamamilə səmərəsiz olduğunu qeyd edən dövlət başçımız bir daha onun yalanlarından söz açdı: “O, mənə söz vermişdi ki, ...Ermənistanda siyasi cəhətdən öz mövqeyini gücləndirəcək və sonra əsas prinsipləri yerinə yetirmək üçün konstruktiv şəkildə işləməyə hazır olacaq. ...Lakin bir ildən sonra o, tamamilə fərqli sözlər dedi. O dedi ki, Azərbaycana qaytarılası bir santimetr belə torpaq yoxdur. Dedi ki, “Qarabağ Ermənistandır”. ...Beləliklə, o, danışıqlar prosesini pozmaq üçün hər şeyi etdi. Ona görə də hazırda mən onunla görüşməkdə bir məna görmürəm”.
Jurnalistlərin Azərbaycan Ordusu ilə birlikdə Ermənistana qarşı döyüşən muzdluların mövcudluğu barədə sualına, “Bu müddət ərzində, bir aydan çox vaxtda mən artıq dəfələrlə bu məsələyə diqqət çəkmişəm və demişəm ki, bu, doğru deyil”, -- deyə cavab verdi və bunun münaqişənin ilk günlərində və yalan söyləndiyini, doğru məlumat olmadığını bildirdi. Bununla erməninin daha bir yalanının açıqladı. Həmçinin qeyd etdi ki, “əvvəla, o vaxtdan sonra biz bu cür bəyanatlar eşitməmişik, ikincisi, əlavə döyüşçüyə ehtiyac yoxdur”. Prezident, eyni zamanda, əlimizdə Ermənistan tərəfindən əcnəbilərin döyüşdüyünə dair kifayət qədər dəlillər olduğunu, onların öz dediklərinə görə, erməni əsilli olduqlarını bildirdi və əlavə etdi ki, əgər əcnəbi vətəndaş bir ölkə tərəfindən digər ölkəyə qarşı döyüşürsə, o, muzdludur. Həmçinin onların hamısının erməni olmasına dair bizdə 100 faiz dəlil olmadığını, və başqalarının orada döyüşdüyü haqda məlumatımızın olduğunu dedi: “Bilirik ki, PKK oradadır. Bilirik ki, Yaxın Şərqdən bəzi terrorçular qondarma “Dağlıq Qarabağ ordusu”na qoşulublar. Ona görə də, əfsuslar olsun ki, bu məsələ qətiyyən müzakirə mövzusu deyil”.
Beləliklə, Azərbaycan Prezidenti İlham Əliyevin qeyd etdiyi kimi, erməni tərəf nə qədər yalanlar söyləsə də, biz öz ərazimizdə, işğalda olan torpaqları azad etmək üçün vuruşuruq, mülki əhaliyə atəş açmırıq. Amma onlar dinc şəhərlərə atəş açmaqla qalmır, hətta dəfn mərasiminə toplaşanları da hədəfə alırlar. Yetərincə silah – sursatımız, ordumuz var. Bizdə heç bir muzdlu döyüşmür və onlara ehtiyacımız yoxdur. Bizi ittiham etməyə çalışan ölkə rəhbərləri rəqib tərəfdəki əcnəbi döyüşçüləri görmək istəmirlər. Amma əldə əcnəbi pasportları olan zərərsizləşdirilmiş insanların siyahısı var. Hazırda müharibənin aktiv fazası olduğuna və Ermənistan ordusunun yaşayış məntəqələrini davamlı atəşə tutmasına, mülki şəxslərin həlak olmasına baxmayaraq, cəbhə bölgəsində olan rayonlarda – Tərtər, Ağdam, Bərdə, Goranboy, Ağcabədi və digər rayonlarda həyat öz axarı ilə davam edir. Xalqımız müharibənin tezliklə və zəfərlə bitəcəyinə əmindir.
Məşhur
MƏMMƏDOV, Milli Məclisin
deputatı
Xalq qəzeti 2020.- 8 noyabr.- S.4.