Prezident İlham Əliyev: Azərbaycanın suverenliyi və ərazi bütövlüyü tam şəkildə bərpa edilməlidir

Dağlıq Qarabağ qədim və tarixi Azərbaycan torpağıdır. Qarabağ Azərbaycandır!

Dayanıqlı İnkişaf Məqsədlərinin 2030-cu il Gündəliyinə əsasən, “sülh olma­dan dayanıqlı inkişaf, dayanıqlı inkişaf olmadan isə sülh mümkün deyil”. Dayanıqlı beynəlxalq sülhün və təhlükəsizliyin təmin edilməsi üçün işğala son qoyulmalıdır. Beynəlxalq hüququn norma və prinsiplərinə riayət olunması və BMT Təhlükəsizlik Şurasının qətnamələrinin icrası təmin edilməlidir.

Azərbaycan Respublikasının Prezidenti İlham Əliyevin BMT Baş Assambleyasının 75-ci sessiyasının ümumi debatlarında videoformatda çıxışından

24 sentyabr 2020-ci il

Dilçi mütəxəssislər bildirirlər ki, elmi-texniki tərəqqinin sürətlənməsi, yeni fəaliyyət sahələrinin yaranması, siyasətçi və diplomatların ənənəvi leksikonunun müasirləşdirilməsi, eləcə də, digər bu kimi məsələlər istənilən xalqın dilinə yeni söz və ya ifadə gətirir və bu, tamamilə qəbulediləndir. Son zamanlar jurna­list və ekspertlərin leksikonunda daha çox işlədilən “inanılmaz həqiqət” ifadəsi də, məhz, həmin prosesin nəticələrindən biridir. Əvvəllər belə düşünürdük ki, inanılmazdırsa, deməli, həqiqət deyil, həqiqətdirsə, nə üçün ona inanmayaq?

Azərbaycan Respublikasının Prezidenti İlham Əliyevin BMT Baş Assambleyasının 75-ci sessiyası­nın ümumi debatlarında videofor­matda olan çıxışına baxarkən “ina­nılmaz həqiqət” ifadəsini bir neçə dəfə xatırladım. Birinci, dövlət baş­çımız Ermənistan – Azərbaycan, Dağlıq Qarabağ münaqişəsi haqqında dünya siyasətçilərinə tarix dərsi keçirmiş kimi dəfələrlə əsaslandırılmış, təkzibi qətiyyən mümkün olmayan faktlardan və çoxsaylı arqumentlərdən bəhs etdi. Bu, birinci “inanılmaz həqiqət” idi ki, dünya ictimaiyyəti bu fakt və rəqəmlərin hamısından xəbərdar olsa da, son 30 ildə Ermənistana öz yerini göstərən olmayıb. Həqiqətən inanılmazdır və təəssüf ki, həqiqətdir.

İkinci, Prezident İlham Əliyev BMT Baş Assambleyası kimi mötəbər beynəlxalq tribunadan səsləndirilən yığcam çıxışda bu qədər faktı və hadisələri necə ümumiləşdiə bildi, o qədər arqumentləri bir neçə dəqiqədə necə ifadə etmək mümkün oldu? Həqiqətən inanılmaz idi və şükürlər olsun ki, həmin çıxı­şın bütün cümlə, fikir və sözləri təkzibolunmaz həqiqətlərdən ibarət idi.

Üçüncü: Azərbaycan Prezidenti xatırlatdı ki, bəzi hallar­da BMT Təhlükəsizlik Şurasının qətnamələri bir neçə gün ərzində icra edilir. Ermənistan isə təqribən 30 ildir ki, BMT Təhlükəsizlik Şurasının qətnamələrinə məhəl qoymamaqda davam edir.

Həqiqətən inanılmazdır və çox təəssüf ki, həqiqətdir.

Dördüncü: BMT-nin ən mühüm qurumlarından biri olan UNESKO dünya xalqlarının mədəni dəyərlərinin, xüsusən, maddi mədəniyyət nümunələrinin məhv edilməsinin qarşısını almaq üçün genişmiqyaslı tədbirlər həyata keçirir və kifayət qədər vəsait sərf olunur. Ermənistanda isə… Prezident xatırladır: “Bu­günkü Ermənistan ərazisində Azərbaycan xalqına məxsus mədəni miras dağıdılmış və talan edilmişdir. Ermənistan işğal edilmiş ərazilərimizdə də Azərbaycanın tarixi və dini abidələrini dağıtmışdır. Məqsəd isə orada azərbaycanlıların bütün izlərini silməkdir”. Yəni, daha bir inanılmaz həqiqət yada salınır.

Dövlət başçımız müasir Azərbaycanın yeganə problemi olan Ermənistan – Azərbaycan, Dağlıq Qarabağ münaqişəsinin indiyədək həll edilməmiş qal­masının səbəbini Ermənistanın beynəlxalq hüququn norma və prinsiplərinə hörmətsizlik etməsi ilə əlaqələndirdi: “Azərbaycan ərazisinin təqribən 20 faizi 30 ildən artıqdır ki, Ermənistanın işğalı altındadır. Ermənistan BMT Nizamnaməsini kobud şəkildə pozaraq Azərbaycana qarşı hərbi güc tətbiq etmiş, Azərbaycanın Dağlıq Qarabağ və ətraf yeddi rayonunu işğal etmişdir. Bir mil­yondan artıq azərbaycanlı qaçqın və məcburi köçkün vəziyyətinə düşmüşdür”.

Beşinci: Dünya ictimaiyyətinə yaxşı məlumdur ki, Azərbaycan planetin ən sabit və multikultural ölkələrindən biridir. Bu cümlədəki həqiqətin təsdiqini dilə gətirmək üçün təkcə “Bakı prosesi” kimi tarixə düşmüş sivilizasiyala­rarası dialoq ənənəsini və ya paytaxtımızda BMT missiyası altında keçirilən dialoq tədbirlərini yada salmaq kifayətdir. Bəs Ermənistanda vəziyyət necədir?

Dövlət başçımız dünya ictimaiyyəti qarşısında bu sualın cavabını növbəti dəfə verdi: “Ermənistan işğal etdiyi ərazilərdə azərbaycanlı əhaliyə qarşı etnik təmizləmə həyata keçirmişdir. Bütün azərbaycanlı əhali işğal edilmiş ərazilərdən qovulmuşdur. Ermənistan azərbaycanlı mülki şəxslərə qarşı bir sıra müharibə və insanlıq əleyhinə cinayətlər törətmişdir. Torpaqlarımızın işğalına görə məsuliyyətdən yayın­maq məqsədilə Ermənistan həmin ərazilərdə cinayətkar, terrorçu, qon­darma rejim yaratmışdır”.

Dünya ictimaiyyəti Heydər Əliyev Fondunun vitse-prezidenti Leyla Əliyevanın təşəbbüsü ilə reallaşdı­rılan “Xocalıya ədalət!” beynəlxalq kampaniyası çərçivəsində çoxsaylı layihələrdən də, tarixi materiallardan da bilir ki, ermənilər – çox təəssüf ki, uzun illər bu işğalçı ölkəyə rəhbərlik etmiş Serj Sarkisyanın başçılığı ilə Xocalı soyqırımını törətmişlər. Həmin soyqırımı nəticəsində Xocalının 106-sı qadın və 63-ü uşaq olmaqla 613 dinc sakini qətlə yetirilmişdir. Ondan artıq ölkə Xocalı soyqırımını tanımışdır. BMT Təhlükəsizlik Şu­rasının bütün bunları nəzərə alaraq qəbul etdiyi 4 qətnaməsi Ermənistan silahlı qüvvələrinin Azərbaycanın işğal edilmiş ərazilərindən dərhal, tam və qeyd-şərtsiz çıxarılmasını tələb edir. Ermənistan isə bu çağırışlara nəinki əməl etmir, heç məhəl də qoymur. İnanılmaz olsa da, həqiqətdir.

Altıncı: Mütərəqqi təfəkkürlü dünya siyasətçiləri və müdrik ziyalılar az qala hər gün həyəcan təbili çalırlar ki, nəinki dövlət başçıları və siyasətçilər, hətta, istənilən fərd öz fəaliyyətində təhrik və təxribatlardan uzaq olsun ki, dünyanın başı üstündə qara bulud kimi fırlanan müharibə kabusunu yaxına buraxmayaq. Çünki bu gün dünyanın demək olar ki, əksər ölkələrində külli miqdarda silah-sursat toplanmışdır və istənilən etinasızlıq dünyanın alovlan­masına səbəb ola bilər. Ərazilərinin 20 faizi 30 il namərd qonşusunun işğalı altında olan Azərbaycanın münaqişənin ədalətli həllinə nail olmaq üçün hərb yolunu seçməməsi də məhz dünyada yeni müharibə alovunun qalxmaması niyyətinə xidmət edir.

Azərbaycan Prezidenti qeyd edir ki, Ermənistan təmas xətti və Ermənistan–Azərbaycan sərhədi boyu mülki vətəndaşları məqsədyönlü şəkildə hədəfə alır və təxribatlar törədir. 2016-cı ilin aprel ayında Ermənistan Azərbaycana qarşı genişmiqyaslı hərbi hücum həyata keçirmişdir. Həmin hücum nəticəsində biri uşaq olmaqla, 6 dinc sakin qətlə yetirilmiş, 26 mülki vətəndaş isə yaralanmışdır. Azərbaycan Silah­lı Qüvvələri əks-hücum tədbirləri həyata keçirmiş və işğal olunmuş torpaqların bir hissəsini azad etmişdir. 2020-ci il iyulun 12-də Ermənistan dövlət sərhədi istiqamətində növbəti təxribata əl atmışdır. Azərbaycanın Tovuz rayonunun artilleriya atəşinə tutulması nəticəsində hərbçilərimiz və 76 yaşlı mülki vətəndaşımız həlak olmuş, mülki infrastruktura ciddi zərər dəymişdir: “Təxribatın məqsədi regionda yeni gərginlik mənbəyi yaratmaq, Azərbaycan ərazilərinin Ermənistan tərəfindən iş­ğalı məsələsini ikinci plana keçirmək, üçüncü dövlətləri münaqişəyə cəlb etmək və Azərbaycanın strateji infrastrukturuna zərər vurmaqdan ibarət idi”.

Yeddinci: Bu gün Azərbaycan özünün ixrac neft-qaz kəmərləri ilə Avropanın enerji təminatında mü­hüm rol oynamaqla yanaşı, həm də Londondan Şanxaya qədər – Avra­siya ölkələrinin hamısının iqtisadiy­yatını bir-birinə qovuşduran nəhəng nəqliyyat-logistika layihəsinin əsas halqalarından biri kimi çıxış edir. Bakı – Tbilisi – Qars dəmir yolu və Transxəzər Beynəlxalq Nəqliyyat Dəhlizi dünyanın demək olar ki, hər yerində maraqla qarşılanır və dəstəklənir.

Ermənistan isə dünyanın maraq dairəsində olan Azərbaycanı yeni müharibə ilə hədələyir və beynəlxalq iqtisadi layihələrə zərbə endirəcəyini söyləyir. Prezident deyir: “Ermənistanın baş naziri Azərbaycana qarşı hərbi əməliyyatlarda iştirak etməyə məcbur ediləcək on minlərlə mülki vətəndaşdan ibarət silahlandırılmış mülki könüllü dəstələrinin yaradıl­masını elan etmişdir. Ermənistanın müdafiə naziri “yeni ərazilər uğrunda yeni müharibəyə” çağırır. Ermənistan Azərbaycanın böyük şəhərlərinə və mühüm mülki infrastrukturuna – Mingəçevir su anbarı və Bakının yaxınlığında yerləşən dünyanın ən iri neft-qaz terminallarından biri olan və onlarla dövlətin enerji təhlükəsizliyini təmin edən Səngəçal terminalına zərbə endirməklə hədələyir”.

İlk baxışda, oxucuya elə gəlir ki, Azərbaycan Prezidenti bu çıxışıyla sadəcə mövcud reallıqları dünya ictimaiyyətinə çatdırdı. Ancaq bəzi ekspertlərin fikrincə, İlham Əliyev bu faktları dilə gətirməklə, nə zamansa, ermənilərin başına gələcək bəlaların günahkarının məhz Ermənistan rəhbərliyinin olacağı barədə xəbərdarlıq edib.

 

İttifaq MİRZƏBƏYLİ

Xalq qəzeti  2020.- 27 sentyabr.- S.1;2.