Azərbaycan Ordusu işğala son qoyacaqdır!

Tarixi ədalət bizim tərəfimizdədir. Çünki bu, bizim doğma, dədə-baba torpağımızdır. Beynəlxalq hüquq bizim tərəfimizdədir. Bütün beynəlxalq təşkilatlar Azərbaycanın ərazi bütövlüyünü tanıyır. Bütün ölkələr Azərbaycanın ərazi bütövlüyünü tanıyır. Beynəlxalq təşkilatlar çərçivəsində qəbul edilmiş qərar və qətnamələr Dağlıq Qarabağın Azərbaycana məxsus olduğunu açıq-aydın təsbit edir.

Azərbaycan Respublikasının Prezidenti İlham Əliyevin xalqa müraciətindən

27 sentyabr 2020-ci il

Dövlət başçısının cəbhə bölgəsində törədilmiş erməni təxribatı və bölgədə yaranmış hərbi -siyasi vəziyyətlə bağlı Azərbaycan xalqına ünvanladığı müraciəti dinləyəndə mən təxminən iki ay yarım əvvəl cənab Prezidentin söylədiyi fikirləri xatırladım. Bu il iyulun 15-də Nazirlər Kabinetinin 2020-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında geniş nitq söyləyən Prezident demişdi: “Mən Azərbaycan xalqı ilə bütün vacib məsələləri həm bölüşürəm, həm məsləhətləşirəm, həm öz fikirlərimi, öz siyasətimi deyirəm və eyni zamanda, xalqı narahat edən problemləri dərindən təhlil edirəm. Təsadüfən deyilmir ki, xalqın gözü tərəzidir. Ona görə, bizim hakimiyyət xalq hakimiyyətidir, xalqın iradəsinə əsaslanan hakimiyyətdir.”

Bəli, cənab Prezident həqiqətən bütün vacib məsələlərdə xalqla məsləhətləşir, heç bir məsələnin xalqdan gizli saxlanılmasına imkan vermir. Bu isə ulu öndər Heydər Əliyevin yaratdığı aşkarlıq və demokratiya prinsiplərinin tərkib hissələrindən biridir. Heydər Əliyev dövlət və xalq üçün mühüm əhəmiyyət kəsb edən hadisələrin hamısında ölkə əhalisinə müraciət edir, xalqın möhtəşəm dəstəyini qazanırdı. Müstəqilliyin ilk illərində yaşadığımız xaos və anarxiya ölkədə elə bir çaşqınlıq mühiti yaratmışdı ki, insanlar kimin arxasınca gedəcəklərini müəyyənləşdirməkdə çətinlik çəkirdilər. Heydər Əliyev insanları müraciətlərlə haqqa doğru istiqamətləndirirdi.

Azərbaycan xalqı son 17 ildə sözün həqiqi mənasında Prezident İlham Əliyevin ətrafında sıx birləşmişdir və onun bütün addımlarını sidq-ürəklə dəstəkləyir. Dövlət başçımızın sentyabrın 27-dəki müraciətinin ölkə miqyasında yaratdığı möhtəşəm əks-səda da elə ona olan inam və etimaddan yaranan dəstək idi.

Müraciətin mətni və orada qaldırılan məsələlər artıq hamıya məlum olduğuna görə biz bu sətirlərə daha çox qabartmaq istədiyimiz bir məqamı yada salmaqla başlamaq istəyirik. Sentyabrın 28-də -- erməni təxribatından və məlum hadisələrdən sonrakı gün qonşu ölkələrdən birinin aparıcı kütləvi informasiya vasitəsi sayılan xəbər saytında oxuduq ki, guya Azərbaycan Silahlı Qüvvələri Ermənistan ordusuna qarşı hücuma başlayıb. Təbii ki, ilk növbədə bu haqsız və ədalətsiz mövqeyə görə həmin müəllifə və onun şər-böhtanını yayan informasiya vasitəsinin rəzilliyinə heyrət etdim. Çünki cənab Prezident xalqa müraciətinin əvvəlində qeyd etmişdi ki, heç kəsə sirr deyil ki, ilk atəşi, o cümlədən artilleriya atəşini Ermənistan açıbdır və ilk həlak olanlar da məhz Azərbaycan hərbçiləri olmuşdur.

Sanki dövlət başçımız istənilən məsələdə erməniləri müdafiə edən nakəslərin dərhal bizə qarşı qarayaxmalar söyləyəcəyini bilirdi və ona görə də müraciətin əvvəlində təxribatçının kim olduğunu deyir. Ancaq Prezident təkcə həmin məsələdə deyil, müraciəti ilk eşidəcək Azərbaycan auditoriyasını da ustalıqla nəzərə alır. Dövlət başçımız işlətdiyi “ermənilər təxribat törətdilər, artilleriyadan atəş açdılar, ölən və yaralananlar var” cümlələrinin ürəklərdə yaratdığı narahatlıq özünə yer eləməmiş xoş xəbərləri dilə gətirdi: “Azərbaycan düşmənə layiqli cavabını verdi və düşmən bir santimetr irəliyə gedə bilmədi. Düşmən dayandırıldı, ölkəmizin ərazi bütövlüyü qorundu. Sarsıdıcı zərbələr nəticəsində Ermənistan tərəfi məcbur olub acı məğlubiyyətlə razılaşdı. Mən bu barədə demişəm, bir daha demək istəyirəm, əgər bizim istəyimiz olsaydı, hərbi döyüşləri Ermənistan ərazisinə keçirə bilərdik. Ancaq bizim Ermənistan ərazisində hərbi hədəflərimiz yoxdur”.

Prezident ermənilərin bu təxribatı törətməklə güddükləri məqsədi də xalqa açıqladı və bildirdi ki, onlar ilk növbədə, Azərbaycan torpaqlarının işğalını planlaşdırırlar və bunu gizlətmirlər. Ermənistan rəhbərliyi Azərbaycanı yeni işğalla hədələməyə çalışırdı, yeni ərazilər uğrunda yeni işğal siyasəti yeridirlər: “ Budur, bu gün Ermənistan hərbi-siyasi rəhbərliyinin siyasəti. Digər səbəb Ermənistanda mövcud olan çox ciddi sosial, iqtisadi və siyasi məsələlərdən ölkə əhalisinin fikrini yayındırmaq və Azərbaycandan düşmən obrazı yaratmaqdır. Daha bir səbəb isə ondan ibarətdir ki, Ermənistan hər vəchlə çalışır ki, danışıqlar prosesi pozulsun və deyə bilərəm ki, buna nail olub”. Xatırladaq ki, məhz Ermənistanın riyakar, qeyri-konstruktiv və yalançı siyasəti nəticəsində hazırda danışıqlar faktiki olaraq dayanıbdır.

Ermənilərin danışıqları dayandırması, sülh prosesini dalana dirəndirməsi az imiş kimi, onlar işğal edilmiş torpaqlarda qanunsuz məskunlaşma siyasəti aparır, Azərbaycan xalqının əsəbləri ilə oynayır və beynəlxalq aləmin çağırışlarına heç bir məhəl qoymurlar. Prezident xatırladır ki, bu yaxınlarda Livan ermənilərindən ibarət bir neçə ailə Dağlıq Qarabağa, o cümlədən Azərbaycanın qədim şəhəri olan Şuşaya yerləşdirildi: “Bu, hərbi cinayətdir. Bu, Cenevrə Konvensiyasına tamamilə ziddir. Bu cinayətə görə Ermənistan cavab verəcəkdir. Bu, bizə qarşı növbəti təxribatdır. İşğal edilmiş torpaqlarda məskunlaşma aparmaq cinayət hesab olunur və bu siyasət Ermənistan tərəfindən uzun illər ərzində aparılır. İş burasındadır ki, Ermənistanda mövcud olan ağır iqtisadi, siyasi və sosial vəziyyətə görə ölkə əhalisi azalır. Ermənistanda demoqrafik böhran yaşanır və onlarda insan resursları yoxdur ki, işğal edilmiş torpaqlarda öz adamlarını yerləşdirsinlər. Ona görə xaricdə yaşayan ermənilərə ümid edirlər”.

Bütün bəşəri mədəniyyət nümunələrinə, o cümlədən, İslami dəyərlərə daim önəm verən Azərbaycan Prezidenti ermənilərin işğal etdikləri qədim türk torpaqlarında dini ibadət yerlərinin təhqir edilməsindən ciddi şəkildə narahat olur: “Bizim işğal edilmiş bəzi ərazilərimizdə rayonlarımızın, kəndlərimizin adları dəyişdirilir. Azərbaycanlıların tarixi irsi silinir. Bizim tarixi abidələrimiz dağıdılır. Azərbaycan məscidləri dağıdılır, təhqir edilir. Bizim məscidlərimizdə Ermənistan inək, donuz saxlayır. Bu, bütün müsəlman aləminə ən böyük təhqirdir. Bizim əcdadlarımızın qəbirləri traktorla dağıdılır. Bunu edən faşistlərdir, vandallardır, vəhşilərdir”.

Fikrimizcə, dövlət başçımızın bu müraciətinin əsas qayələrindən biri də odur ki, beynəlxalq aləm Ermənistanı məhz Ermənistan kimi – yəni terrorçu, təxribatçı, separatçı, işğalçı, İslam düşməni, insan düşməni, uşaq qatili, mədəniyyət düşməni kimi tanısın və hamı bilsin ki, Türkiyə, İran, Gürcüstan və Azərbaycana ərazi iddialarından əl çəkməyən bu vandallar regiondakı sülhün və inkişafın qatı düşməni olduqlarını gizlətmirlər: “ Bütün dünya Dağlıq Qarabağı Azərbaycanın ayrılmaz hissəsi kimi tanıyır… BMT Təhlükəsizlik Şurasının dörd qətnaməsində deyilir ki, erməni silahlı qüvvələri dərhal, tam və qeyd-şərtsiz işğal edilmiş torpaqlardan çıxarılmalıdır”. Ermənilər isə özgə torpaqlarına görə hər cür namərdlik etməkdən və qan tökməkdən əl çəkmirlər.

Yeri gəlmişkən, dövlət başçımız bilavasitə Dağlıq Qarabağ münaqişəsinin həll edilməsi məqsədilə yaradılmış ATƏT-in Minsk qrupunun fəaliyyətsizliyindən də ciddi narazı olduğunu Azərbaycan xalqının diqqətinə çatdırır: “Otuz ilə yaxındır ki, Minsk qrupu çərçivəsində danışıqlar aparılır və bunun sonunda Ermənistan müntəzəm olaraq hərbi təxribatlar törətməklə danışıqlar prosesini iflic vəziyyətə salıbdır…Bu gün Azərbaycan Ordusu öz torpağında Azərbaycanın ərazi bütövlüyünü qoruyur, müdafiə edir”.

Dövlət başçısı həm daxili auditoriyada əminlik, inam və ümid yaratmaq üçün, həm də Ermənistana himayədarlıq edən ikili standart müəlliflərinə mesaj göndərmək məqsədilə müraciətini konkret və qətiyyətli notlarla başa vurur: “Biz haqq yolundayıq. Bizim işimiz haqq işidir. Biz zəfər çalacağıq! Qarabağ bizimdir, Qarabağ Azərbaycandır!”

İttifaq MİRZƏBƏYLİ

Xalq qəzeti 2020.- 29 sentyabr.- S.5.