“Nizami Gəncəvinin əsərləri dünya kitabxanalarında”

Milli Kitabxanada bu mövzuda videokonfrans keçirilib. Konfransda çıxış edən kitabxananın direktoru, professor Kərim Tahirov bildirmişdir ki, Prezident İlham Əliyevin sərəncamı ilə 2021-ci il Azərbaycanda “Nizami Gəncəvi ili” elan edilmişdir. O, mütəfəkkir şairin zəngin yaradıcılıq yolundan danışmış və qeyd etmişdir ki, kitabxana tərəfindən hələ 2012-ci ildə “Azərbaycanın görkəmli şəxsiyyətləri” seriyasından “Nizami Gəncəvi” biblioqrafiyası nəşr edilmiş, bu ilin sonuna kimi isə yeni fundamental bir biblioqrafik vəsaitin də nəşr ediləcəyini nəzərə çatdırmışdır.

Sonra diqqətə çatdırmışdır ki, “Milli-mənəvi dəyərlərimizin Vətənə qayıdışı” layihəsi çərçivəsində dünyanın milli kitabxanalarında və muzeylərində mühafizə edilən Azərbaycan ədəbiyyatının klassiklərinə mənsub olan qiymətli əlyazmaların müəyyən olunaraq onların elektron və kağız nüsxələrinin Milli Kitabxanaya gətirilməsini həyata keçiririk. Son iki ildə bu layihə çərçivəsində 58 ədəd əlyazmanın surətlərinin Milli Kitabxanaya gətirilməsi təmin olunmuşdur ki, bunların içərisində dahi Nizaminin də əlyazmaları yer almışdır və Milli Kitabxana bu işi bu il “Nizami Gəncəvi ili” çərçivəsində də davam etdirməkdədir. Artıq Çexiya, Rumıniya, Misir, Rusiya, Türkiyə, Bosniya və Hersoqovina, İran və digər ölkələrin milli kitabxanaları ilə danışıqlar gedir və bu kitabxanalarda olan əlyazmaların digital nüsxələrinin Azərbaycana gətirilməsi istiqamətində addımlar atılır.

Daha sonra Türkiyənin Kastamonu Universitetinin professoru Vüsalə Musalı çıxış edərək Milli Kitabxananın fəaliyyətinə, ziyalılara, alimlərə göstərdiyi xidmətdən danışaraq öz təşəkkürünü bildirmişdir. O, Milli Kitabxana tərəfindən tərtib olunan biblioqrafiyaları dəyərləndirərək, onların tədqiqatçılar üçün mühüm informasiya mənbəyi olduğunu bildirib. Daha sonra o, öz axtarışları nəticəsində əldə etdiyi dünyanın müxtəlif kitabxanalarında saxlanılan əlyazmalar barədə məlumatları Milli Kitabxana ilə bölüşüb və əldə etdiyi Nizami əlyazmalarının Mançestr nüsxəsini də Milli Kitabxanaya elektron versiyada göndərəcəyini bildirmişdir. Professor V. Musalı çıxışı zamanı bir sıra dünya kitabxanalarından əldə etdiyi Azərbaycan ədəbiyyatının klassiklərinə və eləcə də Nizami Gəncəviyə dair əlyazmaların videogörüntülərini nümayiş etdirmişdir.

Videokonfransın davamında Bakı Dövlət Universitetinin Kitabxanaçılıq-informasiya fakültəsinin dekan vəzifəsini icra edən dosent Ələmdar Cabbarlı çıxış edərək Nizami Gəncəvinin yaradıcılığından, onun Azərbaycan ədəbiyyatında tutduğu mövqedən danışaraq bu ilin dahi Azərbaycan şairinə həsr olunmasının əhəmiyyətini vurğulamışdır. O, Nizami Gəncəvi ilə bağlı universitetdə də tədbirlərin təşkilini qeyd edərək bu istiqamətdə Milli Kitabxananın həyata keçirdiyi layihələri alqışladığını bildirmişdir.

M.MÜKƏRRƏMOĞLU

Xalq qəzeti 2021.- 3 aprel.- S.7.