Ermənistan terrorçu dövlət kimi dünyada rüsvay oldu

Prezident İlham Əliyev tərəfindən ADA Universitetində keçirilən “Cənubi Qafqaza yeni baxış: münaqişədən sonra inkişaf və əməkdaşlıq” adlı beynəlxalq konfransın iştirakçılarının suallarının dolğun cavablandırılması Azərbaycan həqiqətlərinin bir daha dünyaya çatdırılması, regionda yaranmış yeni reallıqlara aydınlıq gətirilməsi baxımından mühüm əhəmiyyəti ilə diqqət çəkdi. Bu cavablarda Azərbaycan həqiqətləri ilə yanaşı, dünya ictimaiyyətinə olduqca mühüm mesajlar da yönləndirildi. Azərbaycanın birmənalı mövqeyi yenidən ortaya qoyuldu, dövlətimizin və regionun gələcəyi ilə bağlı konkret istiqamətlər göstərildi.

Bu beynəlxalq konfrans, eyni zamanda, dövlətimizin başçısının yeni informasiya strategiyasının İkinci Qarabağ müharibəsinin qalibi olan Azərbaycanın informasiya məkanında da Ermənistanın yalan siyasətinə son qoyduğunu təsdiqlədi. Prezident, Ali Baş Komandan İlham Əliyevin müdrik və uzaqgörən siyasəti Azərbaycanı qalib etməklə dünyada və regiondakı mövqelərini tarixdə görünməmiş dərəcədə möhkəmləndirdi.

Konfransda dövlətimizin başçısının qətiyyətli siyasəti ilə müharibənin Ermənistan və onun havadarlarının acı məğlubiyyəti ilə nəticələnməsi, Azərbaycanın uzun illər çəkən bu ədalətsiz siyasi-hərbi mübarizədən qalib çıxması, eyni zamanda, haqq savaşında döyüşçülərimizin vətənpərvərlik ruhunun yüksək olması barədə ətraflı bəhs edilib.

Prezident İlham Əliyev bütün bunlar barədə ətraflı bəhs edərək, bildirib ki, Birinci və İkinci Qarabağ müharibələri arasındakı fərqdən də bu, aydın görünür: ”İnsanlar növbələrdə dayanırdı. Biz qismən səfərbərlik elan etmişdik və buraya müəyyən yaş kateqoriyasına aid vətəndaşlar daxildir. Həmin meyara cavab verməyən vətəndaşlarımız isə gileylənir, məktublar yazırdı ki, məni niyə aparmırlar? Mən də gedib döyüşmək, Vətənimizi qorumaq istəyirəm. Hesab edirəm ki, bu, qələbəmizi şərtləndirən əsas amil idi. Əlbəttə, biz güclü ordu qurmuşduq, təlimlər keçirirdik, müasir silahlar əldə etmişdik ki, bu, müharibədə bizə qələbə qazanmağa və əsgərlərimizin həyatını qorumağa kömək etdi. Bu silahlar olmasaydı, itkilərimizin sayı daha çox olardı. Ermənistan ordusu ilə müqayisədə bizim itkilərimiz 2.5-3 dəfə az olmuşdur…”.

Azərbaycan Prezidentinin vurğuladığı kimi, Vətən müharibəsindəki qələbəmizdə döyüşçülərimizin vətənpərvərlik ruhunun son dərəcə yüksək olması ilə bərabər, Silahlı Qüvvələrin güc-qüdrəti də önəmli rol oynayıb. Çünki ordumuz ən müasir silahlarla, hərbi texnika və müdafiə təyinatlı qurğularla tam təchiz edilib. Silahlı Qüvvələrimizin hərbi-texniki və döyüş hazırlığının yüksək səviyyədə inkişafı istiqamətində son 18 ildə uğurlu siyasət həyata keçirilib. Azərbaycan ən müasir silahları almaqla yanaşı, onların bir çoxunu özü istehsal etmək kimi mühüm vəzifəni də uğurla reallaşdırıb.

Ordu quruculuğu istiqamətində həyata keçirilən sistemli və məqsədyönlü tədbirlərin nəticəsidir ki, bu gün Azərbaycan güclü orduya, təkmilləşmiş hərbi sistemə və inkişaf etmiş müdafiə sənayesinə malikdir. Azərbaycan Silahlı Qüvvələri quruda, suda və havada döyüş tapşırığını yerinə yetirmək, ölkəni istənilən hücumdan müdafiə etmək qüdrətinə malikdir.

Dövlətimizin başçısı Azərbaycan Ordusunun güc-qüdrətinin indiki səviyyəyə çatmasının təsadüfi olmadığını da xüsusi vurğulayıb: “Ordu quruculuğu mənim fəaliyyətimdə həmişə birinci yerdədir. Hərbçilər də, Azərbaycan xalqı da bunu bilir. Həmişə demişəm ki, ordumuz üçün nə lazımdırsa, biz onu da edəcəyik. Biz güclü, iradəli ordu yaratmışıq. Bizim bütün silahlı birləşmələrimiz müasir standartlara cavab verir və müharibədə tapşırığı şərəflə, vicdanla, cəsarətlə yerinə yetirdi. İkinci Qarabağ müharibəsində əks-hücum əməliyyatı zamanı bizim Silahlı Qüvvələrimiz vahid komandanın rəhbərliyi altında əks-hücum əməliyyatını uğurla reallaşdırdı. Bütün silahlı birləşmələr arasında koordinasiya tam şəkildə təmin edildi”.

Dövlətimizin başçısı çıxışında Paşinyanın təxribatlarına da toxunub: “Ermənistanın keçmiş rəhbərləri Paşinyanı orduda xidmət etməmiş, zəif, cəsarəti olmayan insan kimi təqdim edirdilər. Bu səbəbdən o, hərbi qələbə əldə etmək arzusunda idi, xüsusilə də onun hakimiyyətə gəlməsindən bir ay sonra Naxçıvan istiqamətində məğlub olmasından sonra…”.

Ümumiyyətlə, Ermənistanın baş naziri tərəfindən onun hakimiyyətə gəldiyi ilk gündən etibarən Azərbaycana qarşı həm sözdə, həm də əməldə təxribatlar törədilib. Bununla da Ermənistan–Azərbaycan münaqişəsinin nizama salınması üzrə danışıqlar prosesinə ardıcıl zərbələr vurulub və beləliklə, regiondakı gərginliyin ciddi şəkildə artmasına bilərəkdən şərait yaradılıb. Bundan başqa, işğalçı dövlət rəhbərinin təşəbbüsü ilə Ermənistanda “yeni ərazilər üçün yeni müharibə” konsepsiyasını nəzərdə tutan və bu ölkənin danışıqlar prosesində strateji məqsədini müharibənin nəticələrini qoruyub saxlamaq kimi müəyyənləşdirən hərbi doktrina və milli təhlükəsizlik strategiyası qəbul edilib.

Ermənistan İkinci Qarabağ müharibəsindən əvvəl Azərbaycan–Ermənistan dövlət sərhədinin Tovuz rayonu istiqamətində daha bir məqsədyönlü təcavüzkar hərəkət törədib. Bu silahlı hücum təsadüfi bir hərbi insident olmayıb, Ermənistanın Azərbaycan Respublikasına qarşı qanunsuz güc tətbiqinin növbəti açıq təzahürü kimi diqqət çəkib və ölkəmizin yeni ərazilərini zəbt etmək məqsədi daşıyıb.

Bədxah düşmənin təcavüzü Silahlı Qüvvələrimiz tərəfindən layiqincə cavablandırılmasına baxmayaraq, Ermənistan yenə də növbəti işğalçı siyasətini həyata keçirmək iddiasından əl çəkmədi. Bunun üçün hazırlıqlara başlayıb, külli miqdarda silah və sursat tədarük edib, qüvvələrini təmas xətti boyunca cəmləşdirdi. Həmçinin Azərbaycana qarşı müharibə aparmaq üçün on minlərlə mülki şəxsdən ibarət hərbi dəstələr yaradıldığını elan etdi.

Bütün bunlar Ermənistan rəhbərliyinin iç üzünü açıb göstərdi, baş nazir Nikol Paşinyanın işğalçı mövqeyindən çəkilmədiyini, daim təxribatlar törətdiyini ifadə etdi. Eyni zamanda, Ermənistanın terrorçu dövlət olduğunu təsdiqlədi.

Onu da qeyd edək ki, ümumiyyətlə, Nikol Paşinyan Ermənistanın baş naziri seçiləndən etibarən daim təxribatçı fəaliyyət göstərib. Belə ki, o, hələ baş nazir seçilməzdən əvvəl, Ermənistanın Parlamentinə müraciətində Azərbaycanın işğal olunmuş ərazilərində qurulan qanunsuz rejimin danışıqlarda iştirak etməsi məsələsini qaldırıb. Belə bəyanatı ilə Paşinyan danışıqların formatını şübhə altına salıb, baş nazir kimi fəaliyyəti dövründə də bunu dəfələrlə təkrarlayıb.

İşğalçı ölkənin rəhbəri baş nazir kimi fəaliyətə başladığı gün, yəni 2018-ci ilin mayın 9-da həyat yoldaşı ilə birlikdə Azərbaycanın işğal edilmiş Dağlıq Qarabağ bölgəsinə səfərə gələrək, Xankəndidə Azərbaycanın Şuşa şəhərinin işğal günü ilə bağlı keçirilən tədbirdə iştirak edib. Eyni zamanda, “düşmənin qarşısının alınması” mexanizminin təkmilləşdirilməsi məsələsinin müzakirəsini aparıb.

Nikol Paşinyanın dəfələrlə işğal olunan Azərbaycan ərazilərinə gələrək, qanunsuz rejim “rəsmiləri” ilə hərbi məsləhətləşmələr aparması, oğlunu özünün dediyi kimi, bir jest olaraq daha çox erməninin orduya cəlb edilməsi məqsədilə Azərbaycanın işğal altındakı ərazilərdə yerləşdirilən Ermənistan silahlı qüvvələrinin bölmələrində hərbi xidmətə göndərməsi, ayrı-ayrı vaxtlarda “Artsax Ermənistandır, nöqtə” kimi təcavüz xarakterli şüarlar səsləndirməsi də onun nasizm siyasətinə sadiqliyindən xəbər verib.

Vaqif BAYRAMOV

Xalq qəzeti 2021.- 20 aprel.- S.4.