2020-ci ildə bütün dünya Azərbaycanın
qüdrətinin bir daha
şahidi oldu
Mən demişdim ki, tarixi Azərbaycan torpaqlarında heç vaxt ikinci erməni dövləti yaradılmayacaq. Mən demişdim ki, heç vaxt Dağlıq Qarabağa müstəqillik verilməyəcək. Mən demişdim ki, Azərbaycan xalqı bu vəziyyətlə heç vaxt barışmayacaq. Demişdim ki, biz bu məsələni istənilən yolla həll edəcəyik və etdik...
İlham Əliyev
Azərbaycan Respublikasının Prezidenti
2020-ci il bizim leksikonumuzdan “Ermənistan – Azərbaycan, Dağlıq Qarabağ münaqişəsi” ifadəsini çıxartdı. Artıq bu münaqişə yoxdur. Dövlətimiz, ordumuz və xalqımız həmin münaqişəni necə həll edilməli idisə, o şəkildə də həll etdi. Artıq “status-kvo” da yoxdur. “Təmas xətti” də yoxdur, Azərbaycan – Ermənistan sərhədləri var. “Danışıqlar davam edir” imitasiyası da keçən illərdə qaldı. “Həmsədrlər tərəfləri öz aralarında güzəştə getməyə çağırır” kimi absurd, cəfəng, məzmunsuz bəyanatlar da o biri ifadələrin dalınca getdilər və qayıtmayacaqlar. Çünki Azərbaycan ərazilərinin 20 faizini tarixin heç bir dönəmində, heç bir ölkədə görünməmiş səviyyədə xarabazara çevirmiş vəhşi qəbilələrə hansı güzəştlər edilə biləcəyini həmin tezisin müəllifləri də bilmirdilər.
2020-ci ildə bütün dünya Azərbaycanın
qüdrətinin bir daha
şahidi oldu
Amma
mətbuatımızın leksikonuna “Füzuli – Şuşa
yeni avtomobil yolu”, “Azərbaycan tankları Xankəndidə daha
möhtəşəm görünür”, “Televiziya əməkdaşları
Hadruta çəkilişə getdilər”, “Şuşada əsgərlər
üçün konsert verildi”, “Suqovuşandan ətraf ərazilərə
su verilməsinə başlanıldı” kimi yeni ifadələr
daxil oldu və biz bu tendensiyanın uğurla davam edəcəyinə
və daha da genişlənəcəyinə tam əminik.
Çünki bu, Azərbaycan Prezidentinin qətiyyəti,
silahlı qüvvələrimizin hünəri,
xalqımızın əzmi və iradəsi, dövlət
büdcəmizin imkanları deməkdir.
Türkiyəli
həmkarlarımız yazırlar ki, Azərbaycanın 2020-ci
ilin son baharında gerçəkləşdirdiyi 44
günlük əməliyyatlar regiondakı və
dünyadakı separatçılıq əməllərinin
qarşısının alinması yollarını göstərdi.
Rusiyalı politoloqların fikrincə, Azərbaycan həmin əməliyyatlarla
təkcə öz ərazi bütövlüyünü təmin
etmədi, həm də regionun böyük ehtiyac hiss etdiyi “inkişaf
naminə əməkdaşlıq” platformasına zəmin
yaratdı. Azərbaycan Ordusu ifadəsini olduğu kimi yox,
“İlham Əliyevin əsgərləri” şəklində
yazan erməni ekspert Akop Badalyan isə acınacaqlı bir
etiraf dilə gətirdi: “İlham Əlievin əsgərləri
bizi 200 illik yuxudan oyatdılar. Bizə iki əsr yalan və
nağıl danışanlardan fərqli olaraq onlar bizə
reallığı göstərdilər. Bəs bizim
nağıldanışanlar da oyandılarmı?”
Bütün
bunlar müasir Azərbaycan reallıqlarının cüzi bir
hissəsidir. Həmin reallıqların daha mükəmməl
və möhtəşəm nümunələrini isə
xalqımız, dostlarımız və bədxahlarımız,
məhz Azərbaycan Silahlı Qüvvələrinin Ali Baş
Komandanı, Prezident İlham Əliyevin dilindən eşitdilər.
Dövlət başçımız 2020-ci ilin yekunlarına
həsr olunmuş videoformatda keçirilən müşavirədəki
nitqində çox məqamlardan, həm də açıq və
konkret şəkildə söz acidı.
Bu zəfər
30 ilin əsas yekunudur
Dövlət
başçımız xatırlatdı ki, keçən ilin
və nəinki keçən ilin, son 30 ilin əsas yekunu
torpaqlarımızın işğaldan azad olunmasıdır.
Azərbaycan 44 gün ərzində tarixi qələbə
qazanaraq öz torpaqlarını azad etdi, düşmənə
sarsıdıcı zərbələr endirdi, Ermənistanı
məğlub etdi: “Bu məğlubiyyət nəticəsində
Ermənistan məcbur olub kapitulyasiya aktına imza atıb, təslim
olub və biz 3 rayonumuzu bir güllə atmadan, bir şəhid
vermədən siyasi yollarla geri qaytardıq. Beləliklə,
Ermənistanın 30 il davam edən
işğalçılıq siyasətinə son qoyuldu. Biz
bunu hərbi yollarla həll etdik. Baxmayaraq, uzun illər ərzində
beynəlxalq vasitəçilər, demək olar, bütün
aparıcı beynəlxalq təşkilatlar bizə deyirdilər
ki, münaqişənin hərbi həlli yoxdur. Biz də
deyirdik ki, əgər belədirsə, onda münaqişə
sülh yolu ilə həll olunsun, biz də bunun tərəfdarıyıq”.
Amma
nəinki Ermənistan rəhbərliyi və onlara havadarlıq
edənlər, hətta özünü beynəlxalq aləmdə
söz sahibi hesab edən qüvvələr də Azərbaycanın
haqq səsini eşitmirdilər. Biz o səsi dünyaya
eşitdirdik.
Qələbəmiz
tarixdə əbədi qalacaq
Dövlət
başçımız belə dedi və əlavə etdi ki,
bizim sözümüzlə əməlimiz arasında heç
bir fərq yoxdur: “Mən demişdim ki, tarixi Azərbaycan
torpaqlarında heç vaxt ikinci erməni dövləti
yaradılmayacaq. Mən demişdim ki, heç vaxt
Dağlıq Qarabağa müstəqillik verilməyəcək.
Mən demişdim ki, Azərbaycan xalqı bu vəziyyətlə
heç vaxt barışmayacaq. Demişdim ki, biz bu məsələni
istənilən yolla həll edəcəyik və etdik,
bütün təzyiqlərə, təhdidlərə baxmayaraq.
Baxmayaraq ki, dünyada kifayət qədər güclü erməni
lobbisi var. Dünyada bir çox aparıcı dövlətlər
Ermənistanı dəstəkləyir və müharibə
dövründə biz bunu açıq-aşkar
görürdük, bəzi ölkələr bunu gizlədə
bilmirdilər”.
Bəs
anti-türk, anti-Azərbaycan, anti-islam dairələrin
açıq, gizli, xəyanətlərlə yoğrulmuş dəstəyi
Ermənistana nə verdi? Təbii ki, heç nə. Siyasətimizin
və hərbi gücümüzün qarşısında həmin
dəstəklər sıfıra bərabər oldu: “ Hər kəs
gördü ki, bizi heç kim və heç nə
dayandıra bilməz. Mən deyəndə ki, biz axıra qədər
gedəcəyik, sözümə əməl etdim. O vaxt
dayandıq ki, Ermənistan öz alçaldıcı məğlubiyyətini
etiraf etdi, diz çökdü, ağ bayraq qaldırdı, təslim
oldu. Hesab edirəm ki, bu, Ermənistan üçün tarixi dərs
oldu”.
Düşmən
təxribat və təhriklərdən əl çəkməsə...
Yeni ilin ilk günlərində məlumat verildi ki, Ermənistanın xarici işlər naziri Xankəndiyə gedib. Ermənilik xəstəliyinin sağalmaz fəsadlarından əziyyət çəkən bu adamlar sözün həqiqi mənasında öz xalqlarının düşməninə çevriliblər. Dövlət başçımızın bir neçə il qabaq dilə gətirdiyi “Erməni əsgəri ölmək istəmirsə, onun Qarabağda nə işi var?” – sualından sonra erməni ziyalıları yazmışdılar ki, erməni əsgəri ölmək istəmir, onu zorla Qarabağa – ölümə göndərirlər.
Onu başa
düşdük. Əsgəri zorla göndərirdilər. Bəs qaniçən
xalqın quldur dövlətinin baş diplomatını oraya
kim göndərir? Dövlət
başçımız bu məsələyə
çox sərt reaksiya
verdi: “ Sənin orada nə
işin var? Müharibə
onların yadından çıxmasın. Unutmasınlar ki, dəmir yumruq yerindədir.
Bu səfərlərə son
qoyulmalıdır. Biz xəbərdarlıq
edirik, əgər belə təxribat xarakterli addımlar atılacaqsa, Ermənistan daha da peşman
olacaq”.
Xatırladaq
ki, indi münasibətlərin normallaşdırılması
istiqamətində addımlar atılır. Rusiya öz vasitəçilik
imkanlarını tərəflərə təqdim edib. Bu
yaxınlarda Ermənistana və Azərbaycana səfər
etmiş Rusiya hökumət nümayəndələrindən
ibarət heyət əsasən bu mövzular haqqında
söhbətlər aparmışdır. Belə bir vaxtda
diplomatın təxribatla məşğul olması
keçinin çomağa sürtünməsindən başqa
bir şey deyil.
Funksiyanı unutma ki...
Azərbaycanın
qalibiyyət döyüşündən əvvəlki illərdə
rusiyalı diplomat və dövlət rəsmiləri deyirdilər
ki, biz tərəflərin hər ikisinə sərf edən həll
variantının tapılması üzərində işləyirik.
Açığı, həmin tezis tərəflərin hər
ikisində narahatlıq və hətta narazılıq hissləri
yaradırdı. Ancaq Azərbaycanın öz ərazi
bütövlüyünü bərpa etmək
üçün apardığı hərbi əməliyyatların
məlum məqamında, sözün həqiqi mənasında,
tərəflərin hər ikisinə sərf edən həll
variantı ortaya çıxdı.
Rusiya
Prezidentinin vasitəçiliyi ilə imzalanmış 10 noyabr
bəyanatının icrası zamanı Azərbaycanın ərazi
bütövlüyü bərpa edilir, ermənilər isə
Azərbaycanın Dağlıq Qarabağ bölgəsində
yaşamaq hüququnu qoruyurlar. Yəni həmin bəyanat ərsəyə
gəlməsəydi, Xankəndidə yaşayan ermənilər
də Cəbrayıl, Qubadlı və Suqovuşanda yaşayan
soydaşlarının aqibəti ilə üz-üzə
qalacaqdılar. Deməli, həmin bəyanat tərəflərin
hər ikisinə sərf edir və hər kəsin üzərinə
müəyyən funksiyalar qoyurdu.
Çox
təəssüf ki, erməni tərəfi kimi, oraya yerləşdirilmiş
sülhməramlılar da bəzən öz
funksiyalarını özfəaliyyət şəklində
“artırırlar” və ona görə də Azərbaycan
Prezidentinin iradlarını eşitməli olurlar: “Sülhməramlı
qüvvələr. Onların orada funksiyası var. Noyabrın
10-da bu funksiya təsbit edildi. Baxmayaraq ki, indi onlar orada
humanitar işlərlə məşğuldurlar, halbuki,
noyabrın 10-da imzalanmış bəyanatda bu funksiya təsbit
edilməyib, biz buna, necə deyərlər, göz yumuruq. Nə
üçün? Çünki başa düşürük
ki, orada insanlar yaşayır, başa düşürük ki,
indi qış gəlib, hava soyuqdur. Orada müəyyən
işlər görülməlidir ki, bu qış orada
yaşayan ermənilər üçün problem yaratmasın.
Ona görə biz imkan verdik. İndi yüklərin
böyük hissəsi oraya Azərbaycan ərazisindən
gedir”.
Dağlıq
Qarabağda yaşayan insanlar bizim vətəndaşlarımızdır
Təkcə
qələbədən sonra deyil, geridə qalan on illər boyu
da hamı bilirdi ki, Ermənistan 30 il bizim suyumuzu kəsərək
100 min hektar torpağı susuz qoymuşdu. Unudurdular ki,
onların işğal atında saxladıqları Sərsəng
və Suqovuşan su anbarları 70-ci illərdə ulu öndər
Heydər Əliyevin təşəbbüsü ilə və
onun fəaliyyəti nəticəsində inşa edilmişdi.
Bütün
tarixi unutduqları kimi bu faktı da unudan ermənilər Azərbaycanın
suyunu kəsmişdilər. Biz isə dövlət
başçımızın dediyi kimi heç vaxt onların
səviyyəsinə düşməməliyik və
düşməmişik. Prezident xatırladır: “Bu gün
Dağlıq Qarabağda yaşayan insanlar bizim vətəndaşlarımızdır.
Mən demişəm, onlar görəcəklər ki, Azərbaycan
rəhbərliyi altında onlar yaxşı yaşayacaqlar...
Hesab edirəm ki, noyabrın 10-da imzalanmış bəyanat gələcək
fəaliyyət üçün əsas olmalıdır. Bu bəyanatdan başqa, hər
hansı bir digər sənəd imzalanmayıb”.
Region inkişafa doğu
gedir, bəs Ermənistan?
Bəli, noyabrın 10-da imzalanmış bəyanat region ölkələrinin gələcək fəaliyyəti üçün əsas olmalıdır və inanırıq ki, olacaq. Azərbaycan – Rusiya – Türkiyə, Azərbaycan – Rusiya – İran, Azərbaycan – Türkiyə – Gürcüstan əməkdaşlıq platformaları region ölkələrinin hərtərəfli inkişafına öz töhfələrini verəcək. Əgər Ermənistan da işğalçılıq və seperatçılıq əməllərindən əl çəkərək bu əməkdaşlıq platformalarına qoşularsa, onda həmin ölkənin əhalisi də normal insan kimi yaşayacaqdır. Bunu hamı bilir. Ermənilər də həmçinin. Qalır vəziyyəti normal məcraya yönəltmək üçün müvafiq addımlar atılması. İrəvan belə addımları atacaqsa da, atmayacaqsa da, öz işidir. Biz isə haqq yolumuzdan dönməyəcəyik. Çünki Qarabağ Azərbaycandır!
İttifaq MİRZƏBƏYLİ
Xalq qəzeti 2021.- 10 yanvar.- S.1;2.