Prezidentin bayraq sevgisi

Xoşbəxt adamam ki, anda sadiq oldum və bu gün Qarabağ azaddır. Bu gün Qarabağda və Zəngəzurda Azərbaycan bayrağı dalğalanır. Arxamdakı inzibati binanın damında Şuşanın alınmasından sonra Azərbaycan Bayrağı qaldırılmışdır və binanın damından müzəffər Azərbaycan əsgərləri Şuşanın azad olunması ilə bağlı mənə raport vermişlər.

İlham ƏLİYEV

Azərbaycan Respublikasının Prezidenti

Şuşa, 10 may 2022-ci il

Azərbaycan Siahlı Qüvvələrinin müzəffər Ali Baş Komandanı, Prezident İlham Əliyev Dövlət Bayrağımızla bağlı fikirlərini 2003-cü ilin payızından etibarən dəfələrlə dilə gətirmişdir. Ancaq bu arqumentin 2016-cı ildəki Aprel döyüşlərindən sonra Cəbrayıl rayonunun Cocuq Mərcanlı kəndində səsləndirilməsi daha böyük məmnunluq hissi yaratmışdı.

Bu sətirləri qələmə almaq istəyərkən dövlət başçımızın Şuşada, Ağdamda, Füzulidə, Kəlbəcərdə, Laçında bayrağımızı ucaltdığı barədə məlumatlara yenidən nəzər salmaq istədik. Məlum oldu ki, həmin şəhər və rayonlarımızda bayraq ucaldılmasından xeyli əvvəl – Azərbaycan Respublikası Regionlarının sosial-iqtisadi inkişafı Dövlət proqramlarının icrası çərçivəsində cənab Prezident rayonlarımızda yaradılan bayraq meydanlarının bir çoxunun açılışında iştirak etmiş və bayrağımızı ucaltmışdır. Bundan başqa, yeni hərbi hissələrin və sərhəd zastavalarının açılış mərasimləri də hamımızın yadındadır.

Yəni Prezident İlham Əliyevin bayraq sevgisi gənc müstəqil Azərbaycan dövlətinin çoxsaylı uğurlarının təməl daşlarından biridir. O, işğaldan azad edilmiş şəhər və rayonlarımızda dövlət bayrağımızı ucaldarkən, özünün məşhur ifadəsini təkrar deməyi də unutmur: “Azərbaycan bayrağı işğaldan azad edilmiş torpaqlarımızda əbədi dalğalanacaq”. Biz buna əminik!

Bu sətirləri hazırlayarkən, rast gəldiyim materiallardan biri – daha doğrusu, dövlət başçımızın işğaldan azad edilmiş bölgəmizə səfəri ötən ilin məhz bu gününə təsadüf etdiyinə görə həmin faktı da xatırlatmaq istədim. Belə ki, ötən il avqustun 16-da Kəlbəcərdə səfərdə olan dövlət başçımız işğaldan azad edilmiş ərazilərdə Dövlət Bayrağımızın əbədi dalğalanmasını təmin etmək üçün qarşımızda duran vəzifələri xatırlatmışdı: “İndiki mərhələdə bizim əsas vəzifəmiz müharibənin nəticələrini möhkəmləndirməkdir, azad edilmiş torpaqlarda möhkəmlənməkdir. Azərbaycan – Ermənistan sərhədində bundan sonra da mövqelərimizi gücləndirməkdir. Yenidənqurma, bərpa işlərinə artıq start verilib, bu da əsas vəzifələrdən biridir. Keçmiş məcburi köçkünləri azad edilmiş torpaqlara tədricən qaytarmaq da gündəlikdə duran məsələdir”.

Başqa bir məlumatda isə oxuyuruq ki, Azərbaycan Respublikasının Prezidenti İlham Əliyev, birinci xanım Mehriban Əliyeva və qızları Leyla Əliyeva 2021-ci il fevralın 14-də Füzuli, Zəngilan, Laçın və Cəbrayıl rayonlarında olublar. Dövlət başçısı Laçında Azərbaycan Bayrağını qaldırıb. Bizim üçün maraqlı olan məqamlardan biri isə odur ki, cənab Prezidentin bu qəbildən olan addımları barədə xəbərləri mətbuatdan tez Azərbaycanın Birinci vitse-prezidenti Mehriban Əliyeva özünün instaqram səhifəsində paylaşır.

…Mən Aprel döyüşlərindən sonrakı yazılardan birində qeyd etmişdim ki, milliliyi, dini inancımızı və müasirliyi təcəssüm etdirən bayrağımız azərbaycanlılara öz soykökünü xatırladır, üzərində dalğalandığı torpağın qədimliyini göstərir. Bu gün ən yüksək zirvələrdə dalğalanan üçrəngli bayrağımız Azərbaycan dövlətinin gücünü və xalqımızın milli birliyini nümayiş etdirir. İşğal altında olan torpaqlarımız Prezident, Ali Baş Komandan İlham Əliyevin rəhbərliyi ilə tezliklə azad ediləcək və üçrəngli bayrağımız Xankəndidə, Şuşada, Ağdamda, Laçında və digər rayonlarımızda əzəmətlə dalğalanacaq.

Nə xoşdur ki, biz bir zaman arzu etdiyimiz həmin günlərin şahidiyik. Bu gün artıq Azərbaycan Bayrağı işğaldan azad edilmiş torpaqlarda dalğalaraq ömrümüzü bəzəyir və inanırıq ki, həmin bəzəyimiz əbədi olacaq.

Mən bu məqamda dövlət başçımızın və onun ailəsinin mərdanəliyini və cəsarətini də xatırlatmaq istərdim. Belə ki, 44 günlük İkinci Qarabağ müharibəsinin Ermənistanın kapitulyasiya sənədini imzalamasından cəmi bir həftə sonra Prezident İlham Əliyev və Mehriban xanım Əliyeva düşmən işğalından yenicə təmizlənmiş rayonlarımıza getmişdilər və cənab Prezident həmin ərazilərdə bayrağımızı ucaltmışdı. Arqumentimi daha da gücləndirmək üçün rəsmi sənədlərdən birinin sərlövhəsini yada salmaq istəyirəm: “İlham Əliyev və birinci xanım Mehriban Əliyeva 2020-ci il noyabrın 16-da işğaldan azad edilmiş Füzuli və Cəbrayıl rayonlarında, o cümlədən, Füzuli və Cəbrayıl şəhərlərində olublar”.

Dövlət başçımızın həmin gün Füzulidə olarkən səsləndirdiyi fikirlərə diqqət yetirək: “Bu gün artıq biz quruculuq işlərinə başlamışıq. Qələbə Günündən 8 gün və Ermənistanın kapitulyasiyasından 6 gün keçəndən sonra artıq bu yerdən – Alxanlı qəsəbəsindən Füzuli – Şuşa avtomobil yolu çəkilir. Bu yol çox rahat və geniş olacaq. Bu yol imkan verəcək ki, Şuşaya rahat gedib-gələ bilək”.

Prezident həmin günün sevincini yaşadığını gizlədə bilmirdi ki, İkinci Qarabağ müharibəsi bizim şanlı qələbəmizdir, işğal edilmiş torpaqlar işğalçılardan azad edilib. Düşmən tərəfindən vurulmuş ziyan hazırda hesablanır və dəqiq hesablanacaq. Zərərçəkmiş bütün insanlar dövlət dəstəyi hesabına öz dədə-baba torpaqlarına qayıdacaqlar. Bu işləri biz planlı şəkildə aparacağıq – ilk növbədə, ziyanın hesablanması, dəqiq uçotun aparılması, ondan sonra bərpa-yenidənqurma işləri.

Bu sətirləri Prezident İlham Əliyevin 2022-ci il mayın 10-da Şuşa şəhərindən Azərbaycan xalqına ünvanladığı müraciətlə yekunlaşdırmaq istəyirik: “2003-cü ildə Azərbaycan xalqı ilk dəfə mənə etimad göstərərək bir daha ulu öndərin siyasətinə sədaqətini nümayiş etdirdi. Mən isə öz növbəmdə, demişdim ki, əgər xalq etimad göstərərsə, mən prezident kimi Heydər Əliyev yolu ilə gedəcəyəm, bu yoldan dönməyəcəyəm və ölkəmizin ərazi bütövlüyünü bərpa edəcəyəm. Buna and içmişdim. Xoşbəxt adamam ki, bu anda sadiq oldum və bu gün Qarabağ azaddır. Bu gün Qarabağda və Zəngəzurda Azərbaycan Bayrağı dalğalanır. Arxamdakı inzibati binanın damında Şuşanın alınmasından sonra Azərbaycan Bayrağı qaldırılmışdır və binanın damından müzəffər Azərbaycan əsgərləri Şuşanın azad olunması ilə bağlı mənə raport vermişlər. Bu gün mayın 10-da mən yenidən ulu öndərin xatirəsinə Azərbaycan xalqının ehtiramını ifadə edərək Azərbaycan xalqını əmin etmək istəyirəm ki, bundan sonra da xalqımızın, dövlətimizin inkişafı, müstəqilliyimizin möhkəmləndirilməsi üçün əlimdən gələni əsirgəməyəcəm”.

Onu da əlavə edim ki, Prezident İlham Əliyevin bayraq haqqında hələ 12 il əvvəl dediyi bir ifadə heç zaman, heç birimizin yadından çıxmayacaq: “Bizim bayrağımız canımızdır, ürəyimizdir... Azərbaycan ərazi bütövlüyünü bərpa edəndən sonra milli dövlət bayrağımız bu gün hələ də işğal altında olan torpaqlarda qaldırılacaqdır. Bizim bayrağımız Dağlıq Qarabağda, Xankəndidə, Şuşada dalğalanacaqdır. O günü biz hər an öz işimizlə yaxınlaşdırmalıyıq və yaxınlaşdırırıq. Eşq olsun, Azərbaycan Bayrağına!”

İttifaq MİRZƏBƏYLİ

Xalq qəzeti.- 2022.- 17 avqust.- S. 4.