Azərbaycan Sərhəd Mühafizəsinin yaranmasının 103 illiyi münasibətilə mətbuat konfransı

Bu gün Azərbaycan Sərhəd Mühafizəsinin yaranmasının 103-cü il dönümü münasibətilə Dövlət Sərhəd Xidmətinin (DSX) Akademiyasında mətbuat konfransı keçirilib.

DSX rəisinin müavini, general-leytenant Abbas Xəlilovun və DSX Aparatının rəhbəri, general-mayor Elçin İbrahimovun iştirakı ilə keçirilən mətbuat konfransında əvvəlcə Azərbaycan Sərhəd Mühafizəsinin yaranmasını və Vətən müharibəsindəki DSX-nin şəxsi heyətinin döyüş fəaliyyətini əks etdirən videoçarx nümayiş etdirilib.

Sonra general-leytenant Abbas Xəlilov və general-mayor Elçin İbrahimov jurnalistlərin suallarını cavablandırıblar.

General-leytenant A. Xəlilov bildirib ki, DSX-nin şəxsi heyəti 44 günlük Vətən müharibəsində düşmənə sarsıdıcı zərbələr vuraraq, Azərbaycanın dövlət sərhədlərinə tam nəzarətin həyata keçirilməsinə və sərhədlərin mühafizəsinə nail olunması yolunda əsl qəhrəmanlıq və şücaət göstərib.

O, Azərbaycan-Ermənistan dövlət sərhədində atəşkəs rejiminin mütəmadi olaraq pozulması hallarının qeydə alındığını, hətta bir neçə halda Ermənistan silahlı qüvvələri tərəfindən terror-pozuculuq fəaliyyətinə də yol verildiyini diqqətə çatdırıb və qeyd edib ki, bölmələrimizin adekvat tədbirləri nəticəsində onların qarşısı alınıb.

General-mayor E. İbrahimov jurnalistlərin sualına cavab verərkən, Qazaxın 7 kəndi ilə bağlı məsələnin delimitasiya mövzusu olduğunu və DSX-nin delimitasiya üzrə müvafiq komissiyada fəaliyyət göstərdiyini vurğulayıb. Bildirib ki, delimitasiya işi başa çatdıqdan sonra demarkasiya işləri həyata keçiriləcək.

Qeyd olunub ki, 2020-ci il sentyabrın 27-də başlanan Vətən müharibəsi zamanı cənab Prezidentimiz, Silahlı Qüvvələrimizin müzəffər Ali Baş Komandanının DSX qarşısında qoyduğu döyüş tapşırıqlarının uğurlu icrası üçün bütün qüvvə və vasitələr tam səfərbər edilib. DSX-nin hərbi qulluqçuları Azərbaycan-İran dövlət sərhədinin 132 kilometrlik hissəsinin, Füzuli, Cəbrayıl, Zəngilan və Qubadlı rayonlarının, Hadrut qəsəbəsinin və Şuşa şəhərinin azad olunmasında şücaət və qəhrəmanlıq göstəriblər.

DSX-nin bütün sahələrində ardıcıl həyata keçirilən islahatların səmərəliliyi ilk növbədə xidməti göstəricilərdə öz əksini tapıb. Azərbaycan sərhədçiləri tərəfindən son bir il ərzində 448 nəfər sərhəd pozucusu, 861 nəfər sərhəd rejim pozucusu saxlanılıb, 2594 nəfər hüquq-mühafizə orqanları tərəfindən axtarışda olan, 5 nəfər özgəsinə məxsus, 289 nəfər saxta sənədlə dövlət sərhədini pozmağa cəhd edərkən saxlanılıb. Ümumi dəyəri təxminən 76 443 870 manat olan qaçaqmalın, o cümlədən 95151 ədəd psixotrop dərman preparatının və 1 ton 14 kq 275 qram narkotik vasitələrin dövlət sərhədindən keçirilməsinin qarşısı alınıb. Azərbaycana qarşı kəşfiyyat-pozuculuq fəaliyyətinin aşkarlanması istiqamətində həyata keçirilən tədbirlər nəticəsində xarici xüsusi xidmət orqanları tərəfindən əməkdaşlığa cəlb edilən 1 nəfər Azərbaycan vətəndaşı saxlanılmış və 6 nəfər şübəli şəxs qismində müəyyənləşdirilib. Terrorçuluğa qarşı mübarizə çərçivəsində 6 nəfər şəxs saxlanılıb. Qanunsuz müqrasiya, qaçaqmalçılıq, o cümlədən narkotik qaçaqmalçılığı ilə məşğul olan 14 mütəşəkkil cinayətkar dəstə zərərsizləşdirilib.

İşğaldan azad edilmiş ərazilərdə dövlət sərhədinin mühafizə və müdafiəsinin təşkili məqsədilə 19 yeni hərbi hissə kompleksi, 110 sərhəd-döyüş məntəqəsi, İranla dövlət sərhədində işğaldan azad olunmuş ərazilərdə 14 sərhəd zastavasının fəaliyyəti bərpa olunub. "Eyvazlı" və "Qazançı" dövlət sərhədindən buraxılış məntəqələri inşa edilib. Füzuli Beynəlxalq Hava Limanında sərhəd nəzarətinin işi təşkil olunub. 1452 hektar ərazi mina və partlamamış sursatlardan təmizlənmiş, nəticədə 1530 ədəd piyada əleyhinə, 1762 ədəd tank əleyhinə mina və 245 ədəd partlamamış hərbi sursat aşkarlanaraq zərərsizləşdirilib. İşğaldan azad edilmiş ərazilərdə 104 km məsafədə yeni yollar çəkilmiş, 223,7 km məsafədə yolların əsaslı və cari təmiri həyata keçirilib. Sahil Mühafizəsində Azərbaycan Respublikasının dəniz sərhədlərinin еtibаrlı mühаfizəsinin təmin edilməsi, Хəzər dənizində rеjim qаydаlаrınа nəzаrətin gücləndirilməsi və xilasetmə tədbirlərinin həyata keçirilməsi zamanı 8 halda 12 nəfər dənizdə batma təhlükəsindən xilas edilib. Sərhəd naryadları tərəfindən sərhəd pozucularına qarşı təlimata uyğun silah tətbiq olunması nəticəsində 2 halda 2 nəfər yaralanıb, 5 halda 5 nəfər sərhəd pozucusu zərərsizləşdirilib. Azərbaycan-Rusiya dövlət sərhədində demarkasiya işləri davam etdirilmiş, 142 ədədi əsas və 44 ədədi köməkçi olmaqla 186 ədəd sərhəd nişanı quraşdırılıb.

Vətən Müharibəsində Dövlət Sərhəd Xidmətinin şəhid olmuş hərbi qulluqçularının ailə üzvlərinə lazımi diqqət və qayğının göstərilməsi, yaralanmış hərbi qulluqçuların DSX Hərbi Hospitalında, respublikamızın ixtisaslaşmış tibb müəssisələrində müayinəsi, müalicəsi, reabilitasiyası təmin olunmuş və onlardan ağır yaralanmış (xəsarət almış) hərbi qulluqçuların xarici ölkələrdə müalicəsi təmin edilmişdir.

Rizvan FİKRƏTOĞLU

Xalq qəzeti.- 2022.- 17 avqust.- S.6.