Azərbaycan Bakıda keçiriləcək “ADEX” və “Securex Caspian” hərbi sərgisinə hazırlaşır

 

Sentyabrın 6-dan 8-dək Azərbaycan Respublikası Müdafiə Sənayesi Nazirliyinin (MSN) təşəbbüsü və təşkilatçılığı, Azərbaycan Respublikası Müdafiə Nazirliyinin dəstəyi ilə Bakı Ekspo Mərkəzində IV Azərbaycan Beynəlxalq Müdafiə Sərgisi “ADEX” keçiriləcək. Tədbirin təşkilati işlərinin icrası “Caspian Event Organisers” (CEO) şirkətinə həvalə edilib.

Qeyd edək ki, COVID-19 pandemiyası ilə əlaqədar yaranan fasilədən sonra sərgi yenidən təşkil olunur.

Müasir silah və texnika sərgisi olan “ADEX” Azərbaycanın və dünya şirkətlərinin hərbi-sənaye komplekslərinin gücünü və qüdrətini Bakı şəhərində nümayiş etdirəcək.

26 ölkədən 200-dən çox şirkəti bir araya gətirəcək “ADEX” Bakı Ekspo Mərkəzinin üç pavilyonunu və açıq sahəsini əhatə edəcək. İştirakçılar arasında Bolqarıstan, Çin, Fransa, İtaliya, Niderland və digər ölkələrin müdafiə sektorunun aparıcı şirkətləri olacaqlar. İordaniyadan olan şirkətlərin də ilk dəfə qatılacağı builki sərgidə Türkiyə, Belarus, İran, İsrail, Qazaxıstan, Pakistan, Rusiya və digər ölkələr milli stendləri ilə iştirak edəcəklər.

İran Bakıda keçiriləcək IV ADEX Beynəlxalq Müdafiə Sərgisində milli pavilyonla çıxış edəcək. Sərgidə İrandan 6 təşkilat və müəssisə – “Aviasiya Sənayesi ORG”, “İran Elektronika Sənayesi”, “Dəniz Sənayesi ORG”, “Milli Coğrafi Təşkilat”, “İran Müdafiə Nazirliyi İxrac Mərkəzi” (Mindex) və “Müdafiə Sənayesi İstehsalçılar Birliyi” (SASAD) təşkilatı ilə təmsil olunacaq. İran Müdafiə Nazirliyinin tabeliyində İxrac Mərkəzi olaraq fəaliyyət göstərən “Mindex” İran müdafiə sənayesinin istehsalı olan məhsulların xarici dövlətlərə ixrac edilməsində əsas rol oynayır. Mərkəzin açıqladığı məlumatlara görə, “Mindex” İranın müdafiə sənayesi təşkilatlarının bir neçə çeşiddə istehsal etdiyi məhsullarla 40-a yaxın ölkə arasında işini da­vamlı olaraq genişləndirir.

Əvvəlki illərdə olduğu kimi, Belarus hərbi sənaye komplek­si bu il də Bakıda keçiriləcək IV ADEX-2022 Beynəlxalq Müdafiə Sərgisində geniş təmsil olunacaq. Belarusu sərgidə “Beltexeksport” QSC-nin rəhbərliyi altında 12 şirkət və dövlət müəssisəsi təmsil edəcək. Bakı Ekspo Mərkəzində keçirləcək ADEX-2022 sərgisində Belarusun “558-ci Aviasiya Təmiri Zavodu”, ABC, AQAT, “Belspetsvneshtechnika”, “Diaproyektor Roqaçevski Zavodu”, “Kamvol”, “Minsk Traktor Zavodu”, “Orşa Təyyarə Təmiri Za­vodu”, “Zenit-BelOMO”, “KB Radar”, “140-cı Təmir Zavodu” və “LEMT BelOMO” şirkətləri öz məhsullarını və xidmətlərini təqdim edəcəklər. Belarus şirkətlərinin stendində ən yeni müdafiə texnologiyaları, atəş sistemləri, döyüş geoməlumat sistemləri, optik və elektro-optik ci­hazlar, müxtəlif tipli hava hücumun­dan müdafiə vasitələri, radiolokasiya sistemləri və s. daxil olmaqla Bela­rus müdafiə sənayesinin imkanları təqdim ediləcək.

İsrailin “Aeronautics Group” şirkəti ADEX-2022 beynəlxalq müdafiə sənayesi sərgisində “Orbiter-4” pilotsuz uçuş aparatının (PUA) yeni modifikasiyasını və yeni hazırlanan “Trojan” adlı PUA-nın təqdimatını keçirəcək. “Aeronautics Group” mühəndisləri tərəfindən təkmilləşdirilimiş “Orbiter-4” PUA sələfindən fərqli olaraq vertikal qalxma və enmə xüsusiyyətlərinə malikdir. Bu isə onu şəxsi heyət tərəfindən qısa zaman ərzində ha­vaya qaldırılmasına kömək edir.

“Aeronautics Group” şirkətinin çətin taktiki tapşırıqları yerinə yetirmək üçün yeni hazırladığı VTOL tipli “Trojan” PUA həm ISR (Intelli­gence, Surveillance and Reconnais­sance), həm də WAPS (Wide-Area- Persistent-Surveillance) imkanlarına sahib çoxyönlü və dinamik həldir. Sistem dəqiq, etibarlı, real vaxt si­tuasiya məlumatlılığını təmin etmək üçün qabaqcıl analitika imkanları ilə birlikdə çoxsaylı sensorlardan istifadə edir. “Trojan”nın UHP (Un­manned Hover Plane) konfiqurasi­yasında hazırlanması ona 2,5 saat havada qalma müddəti, sürətli uçuş və 150 kilometrə qədər uçuş uzaq­lığı, həmçinin çəkisi 12 kiloqrama qədər olan çoxsaylı faydalı yükləri daşımaq imkanı verir. PUA əlverişsiz hava şəraitində həm gecə, həm də gündüz vaxtı tapşırıqları yerinə yetirmək qabiliyyətinə malikdir.

Sərginin baş sponsoru İordaniyanın “Jadara Equipment & Defense Systems”, qızıl sponsoru Türkiyənin TUSAŞ, bürünc sponsoru isə Türkiyənin “ASFAT” şirkətləridir.

Qeyd edək ki, Azərbaycanın İkinci Qarabağ müharibəsində qazandığı şanlı Zəfərdən sonra “TEKNOFEST”in ardınca ilk dəfə keçiriləcək “ADEX” sərgisi müzəffər ordumuzun bu qələbəsində müstəsna rol oynayan müasir silahların əhəmiyyətini, ölkəmizin hərbi sənaye kompleksinin qüdrətini vurğulamaq üçün xüsusi önəm kəsb edir.

Azərbaycan Respublikası MSN-in stendləri Bakı Ekspo Mərkəzinin birinci və üçüncü zallarında yerləşdiriləcək. Burada yerli istehsal olan ən son silah və hərbi texnika nümayiş etdiriləcək. Tədbir iştirakçı­ları ölkənin müdafiə kompleksindəki yeniliklərlə, həmçinin Azərbaycan Silahlı Qüvvələrinin mövcud və artmaqda olan imkanları ilə tanış olacaqlar.

Azərbaycan Respublikasının Minatəmizləmə Agentliyi (ANAMA) “ADEX” sərgisində Qarabağda həyata keçirilən fəaliyyətlə bağlı təqdimatlar, əməliyyatlar zamanı zərərsizləşdirilmiş mina və partla­mamış hərbi sursatların maketləri, həmçinin ən son beynəlxalq standartlar və metodologiyalara cavab verən avadanlıqlar təqdim olunacaq. “ADEX” sərgisində agentlik tərəfindən ərazilərin tədqiqat işlərində dronlarla top­lanmış məlumatın süni intellekt vasitəsilə emalını təmin edən və humanitar minatəmizləmədə dünya təcrübəsində ilk dəfə geniş miqyas alan texnologiyadan istifadəsi ilə bağlı məlumat veriləcək.

“ADEX” ilə paralel olaraq, hüquq-mühafizə, sərhəd, xilasetmə, yanğınsöndürmə və xüsusi xidmət orqanları üçün ləvazimatların, kompleks mühafizə sistemlərinin və silahların perspektivli modellərini nümayiş etdirəcək 13-cü Beynəlxalq Daxili Təhlükəsizlik, Mühafizə və Xilasetmə “Securex Caspian” sərgisi də keçiriləcək. Bu sərgi Azərbaycan Respublikası MSN, Azərbaycan Respublikasının Dövlət Təhlükəsizliyi Xidməti, Azərbaycan Respublikası Fövqəladə Hallar Nazirliyi, Azərbaycan Respublikası Daxili İşlər Nazirliyi və Azərbaycan Respublikası Dövlət Sərhəd Xidmətinin dəstəyi ilə təşkil olunur.

“Securex Caspian” sərgisində siqnalizasiya və əhalini xəbərdaretmə vasitələri, krimina­listik optik alətlər, qəza-xilasetmə vasitə və avadanlıqları, yanğın təhlükəsizliyi avadanlığı və s. bölmələr təqdim olunacaq. “Se­curex Caspian” sərgisi dövlətin, cəmiyyətin və vətəndaşların daxili təhlükəsizliyinin təmin edilməsi üçün əlverişli şəraitin yaradılması, həmçinin yeni müqavilələrin imza­lanmasına geniş imkanlar yarada­caq.

“ADEX” və “Securex Caspian” sərgilərin keçiriləcəyi üç gün ərzində IV Azərbaycan Beynəlxalq Müdafiə və Təhlükəsizlik Konfransı (pilotsuz sistemlər, kibertəhlükəsizlik, hərbi tibb sahəsində innovasiyalar və s. aktual mövzularda sessiyalar keçiriləcək), hərbi orkestrin çıxışları, hərbi mövzularda VR oyunları və digər tədbirlər təşkil ediləcək.

Bundan başqa, sərgi iştirakçıları ilə beynəlxalq heyətlərin, həmçinin Azərbaycanın müvafiq qurumlarının nümayəndələri arasında ikitərəfli görüşlərin keçiriləcəyi gözlənilir.

 

Rizvan FİKRƏTOĞLU

 

Xalq qəzeti.- 2022.- 19 avqust.- S. 3.