Azərbaycana yaxın və dost Moldova

 

Biz Moldova ilə sıx qarşılıqlı fəaliyyətin davam edəcəyinə ümid bəsləyirik. Bizim fəal əməkdaşlıq edə biləcəyimiz mövzular, sahələr çoxdur. Əsas odur ki, ölkələrimiz arasında dostluq münasibətləri həm ticari-iqtisadi sahədə, həm investisiya sferasında və bütün başqa sahələrdə qarşılıqlı fəaliyyəti inkişaf etdirmək üçün yaxşı bazadır. Moldova bizə yaxın, dost dövlətdir.

 

İlham ƏLİYEV

 

Azərbaycan Respublikasının Prezidenti

 

Əslində, Moldova ilə əməkdaşlığımızın zəngin tarixi var. Ancaq ölkələrimizin müstəqillik əldə etməsindən sonrakı proseslərə nəzər salsaq, görərik ki, ötən il dekabrın 21-də rəsmi Kişinyovun Azərbaycanın dövlət müstəqilliyini tanımasının 30 ili tamam olmuşdur. Bu il mayın 18-də isə diplomatik münasibətlərimizin 30 ili tamam olacaq.

 

Xüsusilə vurğulanmalı məqamlardan biri odur ki, Moldova daim Azərbaycanın ərazi bütövlü­yünü tanımış, bizim haqq işimizi dəstəkləmiş və keçmiş Dağlıq Qa­rabağ münaqişəsinin dinc yolla ni­zamlanması ilə bağlı bir sıra rəsmi görüşlərə evsahibliyi etmişdir. Məsələn, ulu öndər Heydər Əliyev Ermənistan Prezidenti Robert Köçəryanla 6 oktyabr 2002-ci ildə, Prezident İlham Əliyev isə Serj Sarkisyanla 8-9 oktyabr 2009-cu ildə Kişinyovda görüşmüşlər.

 

Ancaq xüsusilə yada salınma­lı daha bir məqam var. Belə ki, Prezident İlham Əliyevin ötən il dekabrın 15-də Brüsseldə Mol­dova Respublikasının Prezidenti xanım Maya Sandu ilə görüşü əməkdaşlığımızın yeni müstəvidə, həm də daha səmərəli şəkildə da­vam etməsinə zəmin yaratmışdır. Həmin görüşdə “Ümid edirəm ki, ölkələrimiz arasında münasibətlər müsbət məcrada inkişaf etməyə davam edəcək. Bu baxımdan, şəxsi təmaslar çox vacib rol oyna­yır” – deyən Azərbaycan Prezi­denti əlavə etmişdi ki, ölkələrimiz arasında münasibətlərin müsbət məcrada inkişaf etməsi üçün şəxsi təmaslar çox vacib rol oynayır: “ Hesab edirəm ki, biz bir-birimizə təklif edə biləcəyimiz çoxlu malları müəyyən edə bilərik. Enerji əməkdaşlığı məsələsində bilirsiniz ki, biz Avropa təsisatları ilə fəal işləyirik, Avropa İttifaqına üzv dövlətlərlə əməkdaşlıq və yeni bazarlara çıxış bizim üçün böyük əhəmiyyət kəsb edir. Buna görə düşünürəm ki, bu məsələ ilə bağlı ümumi zəmini tapacağıq”.

 

Prezident Maya Sandu ölkəsinin qaz böhranı keçirdiyi müddətdə onlara dəstək olduğumuza görə Azərbaycan rəhbərliyinə minnətdarlığını bildirərək demişdi ki, biz enerji sektorunda əməkdaşlığımızı müzakirə etmək istəyirik: “Əlbəttə ki, biz biznes baxı­mından əməkdaşlığımızın dərinləşdirilməsi, ticarət mübadiləsi sahəsində əməkdaşlıq üçün imkanları araşdırmaqda həmişə maraqlıyıq. Biz Moldo­vada biznes mühitinin yaxşılaş­dırılmasında çox maraqlıyıq. Biz insanlarımız üçün daha çox iş yerləri yaratmaq istəyirik. Biz xarici investorların cəlb edilməsində və istənilən digər ölkələr kimi yeni bazarların tədqiqində maraqlıyıq. Beləliklə, mən təmasların yaradıl­ması və biznes forumlarını təşkil etməklə biznesmenlərimizə bir-biri ilə ünsiyyət yaratmağa kömək im­kanını görürəm ki, hər iki ölkənin vətəndaşlarına kömək edə bilək”.

 

Dövlət başçılarının həmin görüşündən heç iki ay keçməmiş Moldova Respublikası Baş naziri­nin müavini, Xarici İşlər və Avropa­ya İnteqrasiya naziri Niku Popes­ku rəsmi səfərlə Bakıya gəldi və bir neçə mühüm görüşdə kifayət qədər geniş gündəliyi əhatə edən müzakirələr aparıldı. Azərbaycan Prezidenti İlham Əliyev fevralın 10-da cənab Popeskunu qəbul edərkən də Moldova Prezidenti Maya Sandu ilə Brüsseldə keçir­diyi görüşü xatırladı və ölkələrimiz arasında əməkdaşlığın hərtərəfli inkişafı üçün böyük potensialın olduğunu vurğuladı.

 

Dost ölkənin rəsmisi dövlətlərimiz arasında diplomatik münasibətlərin olduğu 30 ilə yaxın müddətdə həmrəylik prinsipindən çıxış edərək, Azərbaycan və Moldovanın daim bir-birinin ərazi bütövlüyünü və suve­renliyini dəstəklədiyini diqqətə çatdırıb. Niku Popesku iqtisadi, ticarət, sərmayə qoyuluşu, kənd təsərrüfatı, enerji sahələrində və digər sferalarda əməkdaşlıq üçün geniş imkanların olduğunu bildirib, bu sahələrdə konkret layihələrin həyata keçirilməsinin vacibliyini vurğulayıb.

 

Bir gün əvvəl – fevralın 9-da isə Azərbaycan Respublikasının Xarici İşlər naziri Ceyhun Bayra­mov Niku Popesku ilə görüşüb. Ceyhun Bayramov moldovalı həmkarına bölgədə mövcud münaqişə sonrası vəziyyət, üçtərəfli bəyanatların icrası və bu xüsusda, Azərbaycan tərəfindən atılan addımlar, delimitasiya pro­sesi, habelə işğaldan azad edilmiş ərazilərdə həyata keçirilən bərpa və yenidənqurma işləri ilə bağlı məlumat verib.

 

Rəsmi məlumatda bildirilir ki, tərəflər iqtisadi, ticarət, ener­ji, humanitar, mədəni və digər sahələrdə ikitərəfli əlaqələrin inkişafı üçün mövcud potensial­dan istifadə olunmasını müzakirə ediblər. Həmçinin görüşdə iqtisadi münasibətlərə xüsusi diqqətin ayrılmasının önəmli olduğu qeyd edilib və Azərbaycan Respub­likası ilə Moldova Respublikası arasında iqtisadi əməkdaşlıq üzrə Birgə Hökumətlərarası Komis­siyanın fəaliyyətinin əhəmiyyət kəsb etdiyi vurğulanıb. Eləcə də, iki ölkə arasında çoxtərəfli plat­formalarda (BMT, ATƏT, Avropa Şurası, QDİƏT, GUAM və “Şərq Tərəfdaşlığı” təşəbbüsü) həyata keçirilən uğurlu əməkdaşlıq və beynəlxalq təşkilatlar çərçivəsində qarşılıqlı dəstəyin davam etdirilməsi ətrafında fikir mübadiləsi aparılıb.

 

Niku Popesku mətbuat konf­ransında xatırladıb ki, Moldo­vada Azərbaycanın 130 şirkəti fəaliyyət göstərir: “Biz bu sayın artmasında maraqlıyıq”. O, bildirib ki, azərbaycanlı həmkarı ilə görüşdə, həmçinin iki ölkə arasında kənd təsərrüfatı və digər sahələrdə biznes əlaqələrinin genişləndrilməsindən, mobil operatorlar üçün rouminq xərclərinin aradan qaldırılmasından danışılıb. Nazir xüsusilə vurğulayıb ki, “Şərq Tərəfdaşlığı çərçivəsində gözəl əməkdaşlığımız var. Pande­miya dövründə Azərbaycan bizə kömək etdi, dəstək göstərdi. Biz bunu yüksək qiymətləndiririk və buna görə təşəkkür edirik”.

 

Fikrimizcə, bu məqamda bəzi faktları xatırlatmaq üçün Azərbaycan– Moldova əməkdaşlığının tarixçəsinə nəzər salsaq, yerinə düşər. Məsələn, Azərbaycan Respublikasının Mol­dova Respublikasındakı səfirliyi 2005-ci il oktyabrın 5-də açılmış­dır. Moldova Respublikasının Azərbaycan Respublikasındakı səfirliyi isə həmin il noyabrın 1-də fəaliyyətə başlamışdır. Ölkələrimiz arasında əlaqələr müxtəlif sahələr üzrə inkişaf edir, yüksək səviyyəli və digər səfərlər qarşılıqlı formada həyata keçirilir. Parlamentlərarası əlaqələr və qanunvericilik sahəsində əməkdaşlıq inkişaf edir. BMT, AŞ, ATƏT, QDİƏT, GUAM və digər beynəlxalq və regional təşkilatlar, eləcə də MDB çərçivəsində Azərbaycan və Moldovanın mövqeləri yaxındır, ölkələr həmin təşkilatlarda mütəmadi məsləhətləşmələr aparır və ənənəvi olaraq, bir-birinə qarşılıqlı dəstək verirlər.

 

2017-ci il iyunun 21-də Moldova Respublikasının Prezidenti cənab İqor Dodon Azərbaycanda rəsmi səfərdə olmuşdur. Sonrakı il martın 15-də isə cənab Dodon VI Qlobal Bakı Forumunda iştirak etmək üçün ölkəmizə gəlmişdir. Cənab Dodon 2019-cu ilin martında keçirilən VII Qlobal Bakı Forumunda da iştirak etmişdir. İndiyədək iki ölkə arasında 59 sənəd imzalanmışdır. Azərbaycandan Moldovaya plastik məmulatlar, meyvə şirələri, boyaq maddələri və sair məhsullar ixrac olunur. Moldovadan Azərbaycana isə dərman preparatları, şüşə qab­lar, nasoslar, kağız məmulatları, mal əti və digər məhsullar gətirilir.

 

Azərbaycan və Moldova Avropa İttifaqının MDB ölkələri ilə münasibətlərinin yaxşılaşdırlma­sına yönəldilmiş təşəbbüs olan “Şərq tərəfdaşlığı”çərçivəsində uğurlu əməkdaşlıq edirlər.

 

İttifaq MİRZƏBƏYLİ

 

Xalq qəzeti .- 2022.- 12 fevral.- S.4.