Azərbaycan mətbuatı daim dövlətin diqqət və qayğısı ilə əhatə olunur

 

Azərbaycan jurnalistikası inkişaf edir və cəmiyyətdə çox müsbət rol oynayır. Azərbaycanda bütün azadlıqlar təmin olunur, o cümlədən söz azadlığı və siz jurnalistlər bunu yaxşı bilirsiniz. Azərbaycanda minlərlə mətbuat orqanı var ki, qey­diyyatdan keçib sərbəst fəaliyyət göstərir. Bu gün Azərbaycan jurnalistikası cəmiyyəti narahat edən problemləri üzə çıxarır, çox dəyərli təhlillər aparır və ümumiyyətlə, ölkəmizin inkişafında çox müsbət rol oynayır.

 

İlham ƏLİYEV

 

 Azərbaycan Respublikasının Prezidenti

 

Biz – mətbuat təmsilçilərinin hər biri son üç gündə Milli Mətbuat Günü münasibətilə yüzlərlə təbrik almışıq. Təkcə ailə üzvlərimiz, dost-tanışlarımız, həmkarlarımız deyil, imzamızı tanıyan çoxlu sayda soydaşlarımız da zəng edərək və ya sosial şəbəkə vasitəsilə bizi təbrik edirlər. Fikrimcə, bu, cəmiyyətin mətbuatı diqqət mərkəzində saxladığının göstəricisidir.

Ancaq biz təkcə cəmiyyətin deyil, dövlətin də daimi diqqət mərkəzindəyik. Bunu Prezi­dent İlham Əliyevin media nümayəndələrinə 22 iyul 2022-ci il tarixli müraciəti də sübut etdi. Dövlət başçımız həmin müraciətlə həm bizə ünvanlanan çoxsaylı təbriklərin ən alisinə imza atdı, həm də qalib dövləti, tarixi qü­rurunu bərpa etmiş xalqı təmsil edən mətbuatımızın qarşısında daha böyük, daha yeni vəzifələrin dayandığını xatırlatdı.

Əslində, bu fakt ulu öndər Heydər Əliyevin on illər əvvəl təməlini qoyduğu ənənənin yaşadılmasıdır. Hamımız bilirik ki, ümummilli lider daim mətbuat təmsilçiləri ilə ünsiyyətdə olur, onların sözünü, səsini eşitməyə xüsusi maraq göstərirdi. Prezident İlham Əliyev isə özünün dediyi kimi, həmişə çalışıb və çalışır ki, jurnalistlərə öz dəstəyini göstərsin. Onun jurnalistlərlə çoxsaylı görüşləri, səmimi söhbətləri də bunu göstərir. Sosial problemlərini həll edə bilməyən jurnalistlər üçün binaların tikilməsi də Prezidentin həmin siyasətinin bir təzahürüdür.

Son otuz – qırx ildə ölkəmizdə gedən bütün ictimai-siyasi proseslərin axarında olan sadə vətəndaş kimi canlı şahidəm ki, Azərbaycan dövləti daim azad mətbuatın inkişafında maraqlı olub və inanıram ki, bundan sonra da fəal olacaq. Jurnalistlərin rahat yaşaması və sərbəst fəaliyyət göstərməsi üçün lazım olan bütün şərait yaradılıb və bu qısa yazıda onları sadalamaq istəmirəm.

Qərəz, dövlət başçımız media nümayəndələrinə ünvanladı­ğı sonuncu müraciətində yazır ki, vətənpərvərlik, yüksək milli şüur, ali məqsədlər uğrunda cəmiyyətimizin səfərbər olun­masına layiqli töhfələr vermiş Azərbaycan jurnalistləri hər zaman prinsipiallıq nümayiş etdirməli, saxta və yalan məlumatlara söykənən kampaniyaların qlobal səviyyədə vüsət aldığı bir şəraitdə Azərbaycanın dövlətçilik maraqla­rını uca tutmalı, vətəndaşlarımızın dolğun və düzgün məlumat əldə etmək hüquqlarını təmin etməli, cəmiyyətimizin tərəqqisi naminə var gücləri ilə çalışmalıdırlar.

Builki Mətbuat Günü bizim üçün ona görə daha əlamətdardır ki, müstəqillik dövrümüzdə ilk dəfə Azərbaycan jurnalistləri Ermənistanın 30 ilə yaxın da­vam edən işğalından sonra öz peşə bayramlarını ölkəmizin mədəniyyət paytaxtı, milli mətbuatımızın inkişafında xüsusi yeri olan, Qarabağın tacı Şuşa şəhərində qeyd edirlər. Xatırla­daq ki, iyulun 22-də Milli Mətbuat Günü ilə bağlı Şuşada Beynəlxalq Media Forumu keçirilirdi. Dövlət başçımız məhz həmin faktı qabar­daraq yazır ki, bu ilk tədbir zəngin ənənələrə malik Azərbaycan medi­asının tarixində əlamətdar hadisə olacaqdır.

Dövlət başçımızın bu müraciəti əvvəlki anoloji sənədlərdən çox fərqlənir. Çünki beynəlxalq aləmdə müşahidə etdiyimiz elmi-texni­ki tərəqqi mətbuat vasitələrinin fəaliyyətinə də özünəməxsus təsir etmişdir. İndi jurnalistlərdən təkcə istedad, yaradıcılıq qabiliyyəti tələb olunmur. İndi mətbuat təmsilçisindən daha çox keyfiyyətlər – çeviklik, operativlik, informasiya texnologiyaları ilə işləmək bacarığı da tələb olunur.

Prezidentin müraciətində oxuyuruq: “ Kommunikasiya vasitələrinin transformasiya mərhələsini yaşadığı, rəqəmsal platformaların və sosial media alətlərinin öz əhatə dairəsini genişləndirdiyi hazırkı dövrdə milli informasiya resursları­mızın potensialının və qlo­bal informasiya şəbəkəsində mövqelərinin gücləndirilməsi baş­lıca vəzifələrdən biridir. Son illər həyata keçirilmiş islahatlar media fəaliyyətinin qanunvericilik baza­sının təkmilləşdirilməsi, iqtisadi əsaslarının möhkəmləndirilməsi, jurnalistlərin sosial təminatının yaxşılaşdırılması, dövlətin kom­munikasiya siyasətinin müa­sir dövrün tələblərinə uyğun həyata keçirilməsi, jurnalistika sahəsində çevikliyin, peşəkarlığın yüksəldilməsi, cəmiyyətimizi narahat edən mənfi təzahürlərin aradan qaldırılması, media­nın beynəlxalq əlaqələrinin genişləndirilməsi və dost ölkələrlə birgə platformaların yaradılması məqsədi daşımış, bu sahədə nəzərəçarpacaq irəliləyiş əldə edilmişdir”.

Artıq 18 aydır ki, həm özümüz, həm də beynəlxalq aləmdəki tərəfdaşlarımız xüsusi bir məmnunluqla qeyd edirik ki, Azərbaycan mətbuatı 44 gün­lük İkinci Qarabağ müharibəsi dövründə xalqa, dövlətə, orduya və Ali Baş Komandana sədaqətin yüksək nümunələrindən birini yaratmışdır. Cənab Prezident isə həmin məqamı bu şəkildə ifadə edir: “Vətən müharibəsi zamanı Azərbaycan mediası informasiya cəbhəsində mübarizə apararaq, kütləvi dezinformasiya hücum­larının qarşısının alınmasında, cəmiyyətimizin operativ və düzgün məlumatlandırılmasında böyük rol oynamışdır. Media resursla­rımız Azərbaycan həqiqətlərini, o cümlədən işğal dövründə ermənilərin tarixi torpaqlarımız­da törətdikləri misli görünməmiş vəhşilikləri və vandallığı beynəlxalq ictimaiyyətə çatdırmaq üçün fəaliyyətlərini yorulmadan davam etdirirlər”.

Bu sətirləri ictimai-siyasi fəaliyyətinin bütün məqamlarında nikbinlik nümayiş etdirməyi baca­ran və həmin keyfiyyətlərinə görə bütün hədəflərinə nail olan dövlət başçımızın bizim haqqımızda danışarkən də nümayiş etdirdi­yi nikbin notlarla tamamlamaq istəyirik: “Əminəm ki, Azərbaycan jurnalistikası əldə olunmuş uğurların inkişaf etdirilməsi, cəmiyyətimizin davamlı tərəqqisi və xalqımızın xoşbəxt gələcəyi üçün bundan sonra da öz səylərini əsirgəməyəcək!”

 

İttifaq MİRZƏBƏYLİ

 

Xalq qəzeti $g 2022.- 23 iyul.- S.4.