“Şuşa ili” tədbirləri şəhərə xoş ovqat bəxş edir

Şuşa Azərbaycanın incisi, Qarabağın

gözüdür, bizim qədim abidələrimiz olan, qədim

dövlətçiliyimizin şəhəridir. Şuşa təkcə şuşalılar

üçün yox, bütün azərbaycanlılar üçün, Vətənini,

millətini sevən hər bir vətəndaş üçün əziz bir

şəhərdir, əziz bir torpaqdır, əziz bir qaladır, əziz

bir abidədir.

Heydər ƏLIYEV Ümummilli lider

“Şuşa Azərbaycan şəhəridir. Şuşanın təməlini hamımız yaxşı bilirik, 1752-ci ildə Pənahəli xan qoymuşdur və gələn il biz Şuşanın 270-ci ildönümünü təntənəli şəkildə qeyd edəcəyik. İşğala baxmayaraq, Şuşa Azərbaycan ruhunu saxlaya bildi. Şuşaya gələn hər bir insan bunu görür. Hətta dağılmış vəziyyətdə, hətta işğal dövründə vandalizmə məruz qalmış şəkildə Şuşa öz ruhunu, öz qamətini saxlaya bildi, əyilmədi, sınmadı, bizi gözləyirdi, biz gəlməli idik və biz gəldik.

Müzəffər xalq kimi gəldik. Danışıqlar yolu ilə yox, Ermənistan tərəfindən edilə biləcək hansısa güzəşt nəticəsində yox, döyüş meydanında, qan tökərək, şəhidlər verərək, fədakarlıq göstərərək gəldik və öz ərazi bütövlüyümüzü bərpa etdik və milli ləyaqətimizi bərpa etdik”. Dünya Azərbaycanlılarının Həmrəyliyi Günü və Yeni il münasibətilə xalqa müraciəti zamanı bu fikirləri səsləndirən Ali Baş Komandan İlham Əliyev 2022-ci ili “Şuşa ili” elan etdi. 2022-ci il yanvarın 5-də isə Prezident bununla bağlı sərəncam imzaladı.

Mühüm siyasi və tarixi əhəmiyyət kəsb edən bu sərəncam dövlət başçısının xalqımızın tarixi və mədəni dəyərlərimizə xüsusi diqqətinin, böyük ehtiramının göstəricisidir. 2022-ci ilin Azərbaycanda “Şuşa ili” elan edilməsi, həmçinin Şuşanın bu günü və gələcəyi ilə bağlı kompleks tədbirlərin həyata keçirilməsi üçün mühüm əhəmiyyətə malikdir. Eyni zamanda, bütün dünyaya verilən mesaj, Azərbaycanın Vətən müharibəsində şanlı Qələbəsinin təntənəsidir.

Bu il Şuşanın 270 illiyinin qeyd olunacağı tarix kimi simvolikləşmir. Həm də ümummilli lider Heydər Əliyevin əsasını qoyduğu Vaqif məqbərəsinin 40 illiyidir. Və yenə də bu il ümummilli lider Heydər Əliyevin əsasını qoyduğu, idealları və istiqlal təlimi ilə yoğurub hasilə gətirdiyi Yeni Azərbaycan Partiyasının 30 illiyidir. Bütün bu rəqəmlərin ayrılıqda hər biri və birlikdə hamısı Azərbaycanın bugünü deməkdir, qazanılan Zəfər, müzəffər ordu və qalib Ali Baş Komandan deməkdir.

Nazirlər Kabinetinin təsdiq etdiyi “Şuşa ili ilə bağlı Tədbirlər Planı”na əsasən, bu ilin may ayından başlayaraq, Azərbaycanın mədəniyyət paytaxtında genişmiqyaslı möhtəşəm tədbirlər təşkil edilməyə başlanıb. Azərbaycan tarixinin, elm və mədəniyyətinin təbliğinin önə çıxdığı bu tədbirlərdə xarici ölkələrdən gələn qonaqlara ölkəmizin inkişafı, azad edilmiş ərazilərdə görülən işlər barədə ətraflı məlumat verilir,

2022-ci il mayın 12-də V “Xarıbülbül” Beynəlxalq Folklor Festivalının açılışı baş tutdu. Mərasimin açılışında Prezident İlham Əliyev və Birinci vitse-prezident Mehriban xanım Əliyeva, mədəniyyət, ictimaiyyət nümayəndələri, xarici qonaqlar iştirak etdilər. Festivala 10 ölkədən müxtəlif folklor üslublarında musiqiçilər, rəqs kollektivləri, həmçinin Azərbaycanın müxtəlif regionlarından folklor kollektivləri qoşulmuşdu. Festival çərçivəsində Cıdır düzündə Azərbaycanda yaşayan müxtəlif xalqların musiqi yaradıcılığı “Azərbaycan musiqisində multikulturalizm” mövzusunda təqdim edildi, eləcə də, xalq mahnıları və klassik musiqidən ibarət proqram təşkil olundu.

Festival tədbirlərinə Azərbaycan, Mali, Türkiyə, Özbəkistan, Gürcüstan, Tunis, Misir və Pakistandan olan musiqiçilər, rəqqasə və müğənnilər dəvət edilmişdi. Üç gün ərzində festival səhnəsində təkcə Azərbaycanın deyil, həmçinin dəvət olunmuş digər ölkələrin ən yaxşı musiqi kollektivlərinin uğurlu çıxışları dinləyicilər tərəfindən böyük rəğbətlə qarşılandı. Onlar öz ölkələrinin folklorunu, xalq musiqisinin digər müasir musiqi janrları ilə sintezini məharətlə təqdim etdilər.

Bizim muzey də “Şuşa ili” çərçivəsində silsilə tədbirlər keçirir. Belə tədbirlərdən biri Beynəlxalq Muzeylər Günü ərəfəsində təşkil edilən “Şuşa musiqiçiləri” sərgisidir. 200 eksponatın yer aldığı sərgidə Şuşa şəhərində dünyaya göz açan və musiqi mədəniyyətimizə töhfələr verən sənətkarlardan şair, musiqişünas, rəssam Mir Möhsün Nəvvabın şəxsi əşyaları, xanəndələr Keçəçioğlu Məhəmmədin qavalı, Məşədi Məmməd Fərzəliyevin, Məcid Behbudovun, Cabbar Qaryağdıoğlunun, Xan Şuşinskinin fotoşəkilləri, bəstəkarlar Üzeyir Hacıbəyli, Zülfüqar Hacıbəyov, Niyazi, Süleyman Ələsgərov, Əşrəf Abbasov və başqalarının not yazıları və digər qiymətli materiallar nümayiş olunur. Həmçinin, muzeyin zəngin kolleksiyalarından xeyli eksponatlar Azərbaycan Milli İncəsənət Muzeyində təşkil olunmuş “Mədəniyyətimizin incisi – Qarabağ” sərgisində nümayiş edilir. Eləcə də sosial şəbəkələrdə “Şuşa musiqiçiləri” rubrikasında hər həftə muzeyin kolleksiyalarından materiallar təqdim olunur.

Tarixdən məlumdur ki, XVIII əsrin II yarısından Şuşa musiqi mərkəzinə çevrilib. Şuşada, Cıdır düzündə “Xarıbülbül” Beynəlxalq Folklor Festivalının keçirilməsi Azərbaycan mədəniyyətinin, tarixi-mədəni irsimizin möhtəşəm təbliğinin, azad olunmuş torpaqlarda oyanışın hələ başlanğıcıdır. Bundan sonra Azərbaycanda bayram bayrama qarışacaq, Böyük Qadışın təntənəsi uzun müddət dünyaya əks-səda salacaq.

Alla BAYRAMOVA,

Azərbaycan Musiqi Mədəniyyəti Dövlət Muzeyinin direktoru, sənətşünaslıq üzrə fəlsəfə doktoru, Əməkdar mədəniyyət işçisi

Xalq qəzeti .- 2022.- 11 iyun.- S.10.