Edilli soyqırımının əks-sədası

İşğalçı Ermənistanın I Qarabağ müharibəsi zamanı kütləvi surətdə qətlə yetirdiyi əsir və girovların bir qisminin naməlum aqibətinə işıq salan Xocavəndin Edilli kəndində aşkar edilmiş kütləvi məzarlıqlar barədə məlumatlar xarici mediada geniş əks-səda doğurmaqdadır.

Edilli məzarlıqları mövzusuna daha geniş və həssaslıqla münasibət bildirən Türkiyənin aparıcı kütləvi informasiya vasitələri Azərbaycanın işğaldan azad edilmiş Xocavənd rayonunda aparılan qazıntı işləri zamanı aşkarlanan, 12 azərbaycanlı hərbçinin olduğu ehtimal edilən cəsədlərdən ibarət kütləvi məzarlıq barədə geniş məlumat yayıb.

Anadolu və DHA xəbər agentlikləri, “TRT Haber”, “TGRT”, “TRT Avaz”, “CNN Türk” və başqa telekanallar, “Milliyet”, “Yeni akıt”, “Star” və digər qəzetlər başda olmaqla, ölkənin aparıcı media qurumları erməni vandalizminin daha bir nişanəsindən bəhs edərək işğaldan azad olunan Azərbaycan torpaqlarında üzə çıxarılan növbəti insanlıq əleyhinə cinayətdən bəhs ediblər. Türkiyə mətbuatı ermənilərin bu amansızlığını bəşəri cinayət kimi dəyərləndirib.

Türkiyə mediası yazır ki, cəsədlərin üstündəki geyimlər və əşyalar onların Azərbaycan hərbçiləri olduğunu təsdiqləyir. Diqqətə çatdırılır ki, meyitlərin əksəriyyətinin baş sümüklərində güllə deşikləri aşkarlanıb. Bu fakt əsir azərbaycanlı hərbçilərin erməni cəlladlar tərəfindən yaxın məsafədən vurulduqlarını təsdiqləyir. Türkdilli ictimaiyyətə məlumat verilib ki, Ermənistanın əsassız iddiaları ilə yaranan Birinci Qarabağ savaşında 3 min 890 azərbaycanlı hərbçi və mülki şəxs itkin düşüb.

Moldovanın xəbər portalları Xocavənd rayonunun Edilli kəndi ərazisində Azərbaycan Ordusunun hərbi qulluqçularının kütləvi dəfn edildiyi məzarlıqla bağlı mövzuya geniş yer ayırıb.

Bu ölkənin “Noi”, “Dosarmedia” və digər xəbər portallarında dərc olunan məqalələrdə faktla bağlı Azərbaycanın Hərbi Prokurorluğunda müvafiq maddələr üzrə cinayət işinin açıldığı qeyd olunub. Bildirilib ki, istintaqla Birinci Qarabağ müharibəsi zamanı Azərbaycan ərazilərində qanunsuz fəaliyyət göstərmiş erməni separatçı rejimin silahlı hərbi birləşmələri və Ermənistan silahlı qüvvələri tərəfindən 1993-cü ildə milli zəmində Azərbaycan Ordusunun hərbi qulluqçuları olması ehtimal edilən əsir düşmüş 25 şəxsin öldürülməsi və Xocavənd rayonunun Edilli kəndi ərazisində kütləvi dəfn edilməsi müəyyən edilib.

İstintaq zamanı Xocavənd rayonunun Edilli kəndi ərazisinə bu il fevralın 23-26-da baxış keçirilərkən kütləvi məzarlıqdan 7 şəxsə aid, sentyabrın 14-30-da isə 18 şəxsə aid insan sümük qalıqları aşkar edilərək götürülüb. İş üzrə zəruri ekspertizalar təyin edilməklə sümük qalıqlarından nümunələr götürülüb və məhkəmə molekulyar-genetik tədqiqatına təqdim edilib.

Azərbaycanın Xocavənd rayonunun Edilli kəndində 1990-cı illərin əvvəlinə aid kütləvi məzarlıq aşkarlanması barədə xəbərlər Fransanın “durabull-products” portalında dərc olunmuş “Azərbaycan 1990-cı ilə aid kütləvi məzarlıq aşkarladığını deyir” adlı məqalədə yer alıb.

Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyevin “Twitter” səhifəsində paylaşımına istinad edilərək yazılıb: “Edilli kəndində 1-ci Qarabağ müharibəsi zamanı Ermənistan tərəfindən işgəncələrə məruz qalaraq öldürülmüş Azərbaycan hərbçilərinin kütləvi məzarlığı tapılıb”.

Həmin “Twitter”ə istinadla 4000 azərbaycanlının Birinci Qarabağ müharibəsindən itkin düşdüyü və bu günədək onlardan heç bir xəbər olmadığı göstərilib.

Azərbaycanın Xocavənd rayonunun Edilli kəndində aşkarlanmış 2-ci kütləvi məzarlıqla bağlı “20 Minutes”, “Le Preogres” portallarında da məqalələr dərc olunub. Məqalələrdə Edilli kəndində işgəncə verilmiş 25 cəsəd olan kütləvi məzarlıqdan, Birinci Qarabağ müharibəsindən itkin düşmüş 4000 azərbaycanlı haqqında hələ də məlumat olmamasından, Ermənistanın kütləvi məzarlıqların yerini açıqlamaqdan imtina etməsindən yazılıb.

Hazırladı:T.RÜSTƏMOV

Xalq qəzeti 2022.- 8 oktyabr.- S.7.