Ordu quruculuğumuz yeni çağırışlara cavab olaraq davam etdirilir

Biz ordu quruculuğu sahəsində öz işlərimizi davam etdiririk. Çünki biz görürük ki, yeni imzalanmış kontraktlara ehtiyac var. Ən müasir hərbi texnika və silahların alınması üçün bu il dürüstləşmə zamanı hərbi xərclərimiz artıb. Nə qədər lazımdırsa, o qədər də artıracağıq. Çünki biz müharibə nədir, işğal nədir yaxşı bilirik və təhlükə nədir onu da yaxşı bilirik. Hər an hazır olmalıyıq ki, öz hüququmuzu istənilən yolla təmin edək.

İlham ƏLİYEV

Azərbaycan Respublikasının Prezidenti

İstənilən müstəqil ölkənin mükəmməl silahlı qüvvələri, nizami ordusu və qarşıya çıxan hansısa məsələni həll etmək üçün müasir arsenalı, cəbbəxanası olmalıdır. Azərbaycan üçün isə bu zərurət başqa dövlətlərə nisbətən iki-üç dəfə artıqdır. Çünki biz iki əsrdir ki, öz torpaqlarımızda erməni fitnə-fəsadları – soyqırımı, deportasiya, terror, təxribat və işğallarla üz-üzəyik. Üstəlik, mənfur düşmənin beynəlxalq aləmdəki havadarları da yüz illərdir ki, məhz işğalçıya dəstək verirlər. Yəni bu gün dünyada mükəmməl ordu, müasir cəbbəxana bizə çox lazımdır.

Bu zərurətin miqyasını hamıdan yaxşı bilən ulu öndər Heydər Əliyev 1993-cü ilin yayında xalqın təkidi ilə hakimiyyətə qayıdışından sonra ordu quruculuğu istiqamətində mühüm addımlar atmışdı. 1994-cü il mayın 12-də atəşkəs haqqında müqavilə imzalandıqdan sonra Azərbaycanda ordu quruculuğu daha da sürətləndi, silahlı qüvvələrin maddi-texniki təminatının yaxşılaşdırılmasına, şəxsi heyətin mənəvi-psixoloji hazırlığının artırılmasına, döyüş ruhunun yüksəldilməsinə diqqət artırıldı.

Ordu quruculuğu ilə bağlı genişmiqyaslı islahatlara başlandı. 1993-cü ilin sonlarından başlayaraq həyata keçirilmiş xüsusi tədbirlər nəticəsində Milli Ordu quruculuğu keyfiyyətcə yeni mərhələyə qədəm qoydu, qısa müddətdə vahid komandanlığa tabe olan nizami ordu formalaşdırıldı. Azərbaycanın Silahlı Qüvvələri müasir hərbi texnika ilə təchiz edildi, möhkəm nizam-intizam, yüksək döyüş ruhu ilə seçilən, düşmənə sarsıdıcı zərbə vurmağa qadir olan bir ordu yaradıldı. İndi hər bir azərbaycanlı fəxrlə deyə bilir ki, Milli Ordumuz müstəqil dövlətimizin ən böyük dayağı, xalqımızın təhlükəsizliyinin və ölkəmizin ərazi bütövlüyünün təminatçısıdır.

Ulu öndərin başladığı hərbi islahatları ardıcıl və prinsipiallıqla davam etdirən Prezident İlham Əliyevin həyata keçirdiyi tədbirlərin nəticəsi göz qabağındadır. İşğalçı dövlətin ordusu darmadağın edilmiş, düşmən diz çökdürülmüş, kapitulyasiya aktına imza atmış və Azərbaycanın ərazi bütövlüyü bərpa edilmiş, silahlı qüvvələrimiz dünyanın ən yaxşıları sırasına qaldırılmışdır. Ancaq dövlət başçımız bu faktların mövcudluğunu görə-görə ordumuzun daha da müasirləşdirilməsi, yeni silah və sursatların alınması, üstəlik, bir çox hərbi ləvazimatların məhz ölkəmizdə istehsal edilməsi istiqamətində uğurlu addımlar atmaqdadır.

Bu il iyulun 15-də – 2022-ci ilin altı ayının sosial-iqtisadi yekunlarına və qarşıda duran vəzifələrə həsr edilmiş toplantıda geniş nitq söyləyən dövlət başçımız fəxrlə yada saldı ki, bu altı ay ərzində hərbi sahədə də islahatlar aparılıb. Struktur islahatları aparılıb, hərbi təhsildə islahatlar aparılıb. Təlimlərlə bağlı ciddi addımlar atılıb. Yeni silahlı birləşmələr yaradılıb. Yeni kontraktlar imzalanıb, hərbi texnika, silah-sursat alınır və alınacaq.

Dövlət başçımız xatırladıb ki, bizim bu il artan iqtisadi və maliyyə imkanlarımızın bir hissəsi məhz bu məsələlərə istiqamətləndirilib: “Büdcəyə əlavələr edildi, dürüstləşmə edildi və orada hərbi xərclər əhəmiyyətli dərəcədə artırıldı. Nə üçün? Deməli, buna əsas var. Biz hərbi xərclərimizi keçən il bu ilin büdcəsi təsdiq olunanda təsbit etmişdik və hesab edirdik ki, bu, kifayətdir. Ancaq... biz hesab edirik ki, hərbi xərcləri artırmaq lazımdır. Bu artım məhz yüksək texnoloji imkanları olan silahların alınmasına xərclənəcək”.

Prezident İlham Əliyevin fikrincə, ordu quruculuğu deyəndə təkcə peşəkar hərbçilər yetişdirmək və müasir silah-sursata malik olmaq nəzərdə tutulmur. Buraya gənclərin hərbi-vətənpərvərlik tərbiyəsi, hərbçilərin sosial müdafiəsi məsələləri də daxildir ki, bu məsələlər də ölkəmizdə yüksək səviyyədə öz həllini tapır. Hərbçilərin həm xidmət, həm də mənzil şəraiti haqqında bir çox məlumatlar var.

Dövlət başçımız xatırladır: “Azərbaycanda bu sahədə görülən işlər deyə bilərəm ki, dünyada nadir hallarda təkrarlanır. İndi qüsursuz xidmət edən hərbçilərə dövlət tərəfindən mənzillər verilir. Bizim bütün hərbi şəhərciklərimiz əsaslı şəkildə təmir edilir, onun haradasa 90 faizi yenidən qurulub. O cümlədən azad edilmiş torpaqlarda nə qədər böyük işlər görülüb– hərbi şəhərciklər, bazalar, hərbi təyinatlı yollar, infrastruktur – biz bunu o ağır iqlim şəraitində edirik. Əlbəttə ki, müharibədə qəhrəmanlıq göstərmiş hərbçilərin sosial problemləri daim diqqət mərkəzindədir və müvafiq göstərişlər verilmişdir. Əmək və Əhalinin Sosial Müdafiəsi Nazirliyi bu müddət ərzində, müharibədən sonrakı dövr ərzində böyük işlər görüb, bunu hamı bilməlidir. Müharibədə əlil olmuş, demək olar ki, bütün hərbçilər artıq ən müasir protezlərlə təmin olundular”.

Hamının bildiyi faktdır ki, müharibədən sonra bir çox şəhid ailələrinə və müharibə əlillərinə dövlət tərəfindən mənzillər verildi. Bu il Bakı şəhərində həmin məsələ artıq tam həll olunacaq. Keçən il 3 min mənzil və fərdi ev verilmişdir, bu il 1500 mənzil və ev verilir. Bütövlükdə, Birinci və İkinci Qarabağ müharibələrinin şəhid ailələrinə və müharibə əlillərinə 12 min 500 mənzil verilib. Ermənistanda nə qədər verilib? Sıfır! Bir koma da verilməyib, bir daxma da verilməyib. Yəni, əlbəttə, biz Ermənistanla özümüzü heç cür müqayisə etmək istəmirik. Amma bu, reallıqdır.

Bütün bu “xırda” detalların nəzərə alınmasının nəticəsidir ki, Azərbaycan xalqı 30 ilə yaxın müddət ərzində gözlədiyi tarixi günlərini yaşadı. Həyat göstərdi ki, İlham Əliyev vaxtında addımlar atdı, ordunun və xalqın bütün gücünü səfərbər edərək bir “dəmir yumruq” yaratdı və düşmənin başını əzdi.

Dövlət başçımız 44 günlük müharibənin başa çatmasından cəmi 20 gün sonra – Azadlıq meydanında keçirilən Zəfər paradındakı nitqində demişdi: “Müharibə dövründə mən deyirdim ki, bizim dəmir yumruğumuz həm birliyimizi, həm də gücümüzü təcəssüm etdirir. Bu dəmir yumruq düşmənin belini qırdı, düşmənin başını əzdi. Bu gün biz qəhrəman xalq kimi bu bayramı qeyd edirik. Azərbaycanın müzəffər Ordusu öz tarixi missiyasını yerinə yetirdi, Ermənistanı məğlub etdi. Ermənistan ordusu, demək olar ki, yoxdur, məhv edilib. Bundan sonra əgər erməni faşizmi bir daha baş qaldırsa, nəticə eyni olacaq. Yenə Azərbaycanın “dəmir yumruğ”u onların belini qıracaq”.

Bu qeydləri dövlət başçımızın ötən il aprelin 26-da Cəbrayıl rayonunda Dövlət Sərhəd Xidmətinin hərbi hisəsinin açılışında səsləndirdiyi fikirlərlə tamamlamaq istərdik: “Əfsuslar olsun ki, Ermənistanda baş qaldıran revanşist qüvvələr yenə də bizə qarşı ittihamlarla çıxış edərək, bizə qarşı ərazi iddiası irəli sürürlər. Onlara, bax, buradan xəbərdarlıq etmək istəyirəm ki, bu çirkin əməllərdən əl çəksinlər, yoxsa onların axırı pis olacaq. Biz Vətən müharibəsi dövründə kimin kim olduğunu göstərdik. “Dəmir yumruq” düşmənin başını əzdi... Biz öz sərhədimizi qoruyuruq və bundan sonra da qoruyacağıq. Hər bir ölkənin sərhədi onun dövlət rəmzlərindən biridir. Azərbaycan öz sərhədlərini, ərazi bütövlüyünü tam bərpa edib. Bizim silahlı qüvvələrimiz rəşadət, qəhrəmanlıq göstərərək Vətən müharibəsində zəfər çaldılar”.

İttifaq MİRZƏBƏYLİ

Xalq qəzeti .- 2022.- 1 sentyabr.- S.3.