Ordu quruculuğu bu gün də prioritet istiqamətdir

 

Bundan sonra Azərbaycan yalnız inkişaf, tərəqqi yolu ilə gedəcək. Bundan sonra da biz ordu quruculuğu işində əməli addımlar atacağıq, ordumuzu daha da gücləndirəcəyik.

 

İlham ƏLİYEV

 

Azərbaycan Respublikasının Prezidenti

 

Prezident İlham Əliyevin Azərbaycana rəhbərliyə başladığı ilk gündən diqqət yetirdiyi prioritet istiqamətlərdən biri də torpaqlarımızın erməni işğalından azad edilməsi idi. Bunun üçün iqtisadiyyatın dinamik inkişafının təmin olunması, ölkənin gücləndirilməsi, sabitliyin möhkəmləndirilməsi və bütün bunlarla yanaşı, hərbi quruculuğun davamlı şəkildə aparılması daim diqqət mərkəzində saxlanılırdı. Yalnız bütün bu məqsədlərin gerçəkləşməsi ilə düşmən əsarətindəki torpağımız azad edilə bilərdi. Xatırladaq ki, Prezident İlham Əliyev hələ 2003-cü ildə andiçmə mərasimində çıxış edərkən, bu məsələ ilə bağlı fikirlərini diqqətə çatdırmışdı: “Azərbaycanda ordu quruculuğu sahəsində də böyük işlər görülmüşdür. Ölkəmizdə güclü ordu yaradılmışdır və bu proses davam edəcəkdir. Bu məsələ daim mənim diqqət mərkəzimdə olacaqdır. Azərbaycanın çox güclü ordusu olmalıdır. O, qarşıda duran bütün məsələləri həll etmək iqtidarında olmalıdır. Əminəm ki, Azərbaycanın iqtisadi potensialı ordumuzun ən yüksək standartlara cavab verməsinə və qarşıda duran bütün vəzifələrin yerinə yetirməsinə imkan verəcəkdir”.

 

Vətən müharibəsinə kimi ötən 17 il ərzində sadalanan vəzifələr yüksək səviyyədə reallaşdırıldı. Prezident İlham Əliyev qarşıya qoyduğu və bəyan etdiyi strateji hədəfləri gerçəkləşdirmək üçün bu müddətdə istər beynəlxalq miq­yasda, istərsə də ölkə daxilində məqsədyönlü, ardıcıl, düşünülmüş siyasət həyata keçirdi, iqtisadiyyatı dinamik inkişaf yoluna çıxardı və “güclü dövlət” konsepsiyasını real­laşdırmağa nail oldu. Dövlətimizin başçısı bununla bərabər, uzaqgörən siyasəti ilə xalqımızın birliyini, ətrafında sıx birləşməsini reallaşdırdı, respublikada sabit­liyin, əmin-amanlığın təməlini getdikcə möhkəmləndirdi. Eyni zamanda, ordunun gücləndirilməsi ilə bağlı olduqca mühüm işlər gör­dü, silahlı qüvvələrimizdə keyfiyyət və kəmiyyət dəyişikliklərinin yaranmasını reallaşdırdı. Məhz 2016-cı ilin aprelin 2-də, bundan iki il sonra – 2018-ci ilin mayında, nəhayət, 2020-ci il iyul ayının 12-16-da düşmənin təcavüzkar hərəkətinin qarşısının mərdliklə alınması ordumuzun güc-qüdrətinin gerçəkləşməsinin bariz ifadəsi idi. Vətən müharibəsində Azərbaycanın parlaq qələbəsi isə silahlı qüvvələrimizin nəyə qadir olduğunu bir daha bütün dünyaya göstərdi: Ordumuz düşmənin uzun illər ərzində qurduğu, keçilməz hesab edilən müdafiə xətlərini qəhrəmanlıqla yardı, Ermənistanın hava hücumundan müdafiə sistemi və hərbi hava qüvvələrini sıradan çıxartdı. İşğalçı qüvvələrə ağır zərbələr endirdi, onların çoxlu sayda canlı qüvvəsi və hərbi texni­kasını məhv etdi.

 

Azərbaycan Prezidenti İlham Əliyev Dünya Azərbaycanlılarının Həmrəyliyi Günü və Yeni il münasibətilə müraciətində də ordumuzun mövcud vəziyyətinə toxunaraq, İkinci Qarabağ müharibəsində si­lahlı qüvvələrimizin misilsiz qəhrəmanlıqlar nümayiş etdir­diyini, əsgər və zabitlərimizin mərdliyi, peşəkarlığı sayəsində işğala son qoyulduğunu, doğ­ma torpaqlarımızın düşməndən təmizləndiyini və beləliklə, tarixi zəfər çaldığımızı vurğulayıb. Dövlətimizin başçısı daha sonra deyib: “Bu Zəfər bizim tariximizdə əbədi qalacaq. Azərbaycan xalqı artıq dünyada müzəffər xalq kimi, Azərbaycan dövləti isə müzəffər ölkə kimin tanınır. Onu da bildirməliyəm ki, 2021-ci ildə Azərbaycana olan ənənəvi dəstək və hörmət daha da artdı və bunun başlıca səbəbi İkin­ci Qarabağ müharibəsindəki zəfərimiz, müharibə dövründə bütün müharibə qaydalarına riayət etməyimiz və müharibədən sonra özümüzü ləyaqətlə aparmağımız idi”.

 

Ölkə rəhbəri müraciətində Azərbaycanın öz hərbi gücünü bundan sonra da artıracağını diqqətə çatdıraraq, qeyd edib ki, respublikamızda 2021-ci ildə də bu istiqamətdə əməli addımlar atılıb, yeni silahlar, texnikalar alınıb və alınacaq: “Eyni zaman­da, hərbi birləşmələrimizin hazırlıq işinə də böyük əhəmiyyət verilir. İkinci Qarabağ müharibəsində bütün dünya Azərbaycanın hərbi gücünü gördü, Müdafiə Nazir­liyinin xüsusi təyinatlıları artıq bütün dünya tərəfindən tanındı, onların qəhrəmanlığı, fədakarlığı, peşəkarlığı dastana çevrildi. Onu da bildirməliyəm ki, bu il artıq Azərbaycanda yeni hərbi birləşmə yaradılmışdır - Komando Qüvvələri. Bu Komando Qüvvələri istənilən hərbi vəzifəni icra etməyə hazırdırlar, onların sayı durmadan artır və artacaq. Beləliklə yeni çe­vik, peşəkar və çox böyük imkan­lara malik olan silahlı birləşmənin yaradılması onu deməyə əsas ve­rir ki, biz hər an öz torpaqlarımızı, öz sərhədlərimizi qorumağa hazır olmalıyıq. 2021-ci ildə Ermənistan- Azərbaycan sərhədində baş ver­miş bəzi insidentlər onu göstərdi ki, Azərbaycan üstünlüyü tam öz əllərində saxlayır”.

 

Dövlətimizin başçısının vurğu­ladığı kimi, İkinci Qarabağ sava­şından sonra da ordu quruculuğu uğurla davam etdirilib. İşğaldan azad olunan ərazilərimizdə yeni hərbi hissələr, hərbi şəhərciklər salınıb. Bu sahəyə xüsusi önəm verilməsi hərbçilərin xidmət şəraitini daha da yaxşılaşdırmaq, bütün bölgələrdə əksər hərbi hissələri standartlara uyğun qur­maq məqsədi daşıyıb.

 

Hadrut qəsəbəsində bir müddət bundan əvvəl yeni hərbi hissənin açılması da bunun bariz ifadəsidir. Yeri gəlmişkən, həmin hərbi hissənin açılması bu bölgə üçün strateji əhəmiyyət daşıyır. Əvvəla ölkənin təhlükəsizliyini qoruyur, digər tərəfdən azad edilən keçmiş Dağlıq Qarabağ Muxtar Vilayətinə aid ərazidə yerləşir. Eyni zamanda, bu hərbi hissənin fəaliyyətə başlaması Azərbaycanın müharibədən sonra ordu quruculuğu prosesini da­yandırmadığını və orduya ayrılan xərclərin azalmadığını, əksinə, artırıldığını göstərir.

 

Müharibədən sonra imzalanan yeni kontraktlar da uğurla icra edilir. Belə ki, yeni müqavilələr əsasında artıq Azərbaycan Ordusunun təchizatı üçün respub­likaya ən müasir silahlar, texnika­lar gətirilir və dünya da bundan xəbərdardır.

 

Prezident İlham Əliyev Had­rutda yeni hərbi hissənin açılışı mərasimində bununla bağlı deyib: “Biz bunu heç vaxt gizlətmirdik və işğal dövründə hərbi paradlarda dəfələrlə nümayiş etdirmişdik. Həm hərbi texnikanın alınması, həm hərbi xərclərin artırılması, eyni zamanda, hərbçilərin maaş­larının artırılması, – bütün bunlar göz qabağındadır, - onu göstərir ki, müharibə başa çatsa da, ordu quruculuğu prosesi dayanmaya­caq. Əksinə, müharibə təcrübəsi bizə göstərdi ki, güclü yerlərimiz haradadır və qüsurlarımız ha­radadır. Müharibə dövründə qüsurlarımız çox deyildi, amma olub. Ona görə müharibə bizim üçün əvəzolunmaz təcrübə idi. Müharibədən sonra həm müasir tələblərə cavab verən silah-sursat, texnikalar alınır, eyni zamanda, yeni silahlı birləşmələr yaradılır...”.

 

Prezident İlham Əliyev çı­xışında vurğulayıb ki, Hadrut­da fəaliyyətə başlayan hərbi hissədə yeni hərbi birləşmənin nümayəndələri, komando qüvvələri yerləşir. Komando Briqa­dasının yaradılması Azərbaycan üçün yenilikdir. Respublikamızın digər ərazilərində də artıq ko­mando briqadaları yaradılır və bu briqadalar istənilən hərbi vəzifəni icra etməyə qadirdir.

 

Yüksək təlim keçən, yüksək iradə göstərən və Vətən uğrunda özlərini fəda etməyə hazır olan öv­ladlarımız bu briqadalarda xidmət edəcəklər. Bu, Azərbaycan Ordu­sunun gücünü daha da artıracaq. Belə briqadaların sayı getdikcə artırılacaq, minlərlə hərbçimiz bu hərbi hissələrdə xidmət keçəcək. Beləliklə, Azərbaycanın əsgər və zabitləri bundan sonra da öz peşəkarlığını, yüksək mənəvi ruhunu qoruyacaqlar.

 

Hərbi ekspertlərin bildirdiyinə görə, Komando briqadaları peşəkar hərbçilərdən qurulmuş, ən yeni silah və avadanlıqlar­la təchiz olunmuş müntəzəm hazırlıqlı, yüksək hərəkətli de­sant-hücum qruplaşmalarıdır. Onlar günün istənilən vaxtında, silahlı münaqişələrin istənilən əməliyyat mühitində, istənilən potensial döyüş əməliyyatları teatrında, o cümlədən dağ-meşə məkanlarında, eləcə də məskunlaşmış ərazilərdə dərhal döyüşə hazır olur. Bu, ümumilikdə silahlı qüvvələrin döyüş hazır­lığının əhəmiyyətli dərəcədə artırılmasını ifadə edir. Komando briqadaları, eyni zamanda, əsas qüvvələrdən ayrı, təcrid olunmuş halda belə müstəqil şəkildə döyüş əməliyyatlarını aparmağa qadirdir.

 

Yeri gəlmişkən, bir müddət bundan əvvəl Kəlbəcər və Laçın rayonlarında hərbi obyektlərin də istifadəyə verilməsi Vətən müharibəsindən sonra ordu quruculuğu ilə bağlı görülən işlər sırasında xüsusi önəm daşıyır. Bu, Prezident, Silahlı Qüvvələrin Ali Baş Komandanı İlham Əliyevin yüksək dağlıq ərazilərdə xidmət edən hərbi qulluqçuların sosial-məişət şəraitinin daha da yaxşı­laşdırılmasına göstərdiyi diqqət və qayğının bariz ifadəsidir.

 

Kəlbəcər və Laçın rayon­larında istifadəyə verilən hərbi obyektlərdə şəxsi heyət üçün lazımi şərait yaradılıb. Binalar bütün zəruri ehtiyacları təmin etmək məqsədilə müasir avadan­lıq, mebel və inventarla təchiz edilib. Hərbi hissələr üçün alı­nan yeni tırtıllı və xizəkli texnika vasitələri ilə qarla örtülmüş çətin relyefli ərazilərdə şəxsi heyətin, o cümlədən yüklərin fasiləsiz daşın­ması təmin olunub. Silahlanmaya yeni qəbul olunan texnikanın gücü ilə bölmələrin fəaliyyəti daha da operativ xarakter alıb.

 

Xalq qəzeti  2022.- 8 yanvar.- S.2.