Bakının Nizami rayonunda soyqırımı günü ilə bağlı tədbir keçirilmişdir

Erməni millətçiləri tərəfindən xalqımıza qarşı həyata keçirilən soyqırımı və təcavüzkar siyasətinin təqribən iki əsrə yaxın tarixi var. Ötən iki yüz il ərzində azərbaycanlıları tarixi torpaqlarından didərgin salmaqla bu ərazilərdə “böyük Ermənistan” dövləti yaratmaq kimi sərsəm fikrə düşən erməni qaniçənləri xalqımıza qarşı misilsiz vəhişilklər törətmiş, şəhər və kəndlərimizi viran qoymuş, yüz minlərlə günahsız soydaşımızı qətlə yetirmişlər. Erməni tarixçilərinin və ideoloqlarının uydurduğu axmaq və rəzil siyasətin fəlakətli nəticələrini, çox təəssüf ki, bu gün də hiss edir, onun ağrı-acılarını yaşayırıq. Hələlik isə yeganə təsəllimiz ondadır ki, bu gün xalqımız, nəhayət, geriyə boylanmaq və olub-keçənləri qiymətləndirmək, necə deyərlər, tarixin süzgəcindən keçirmək fürsəti qazanmışdır. Bu fürsəti bizə ulu öndərimiz Heydər Əliyevin qeyd etdiyi kimi, ən böyük tarixi nailiyyətimiz sayılan müstəqilliyimizin əldə olunması vermişdir.

Soyqırımı gününün qeyd olunmasının təşəbbüskarı da məhz ümummilli liderimiz Heydər Əliyev olmuşdur. Belə ki, Heydər Əliyevin 1998-ci il martın 26-da imzaladığı fərmana əsasən hər il martın 31-i Azərbaycanlıların Soyqırımı Günü kimi dövlət səviyyəsində qeyd edilir. Artıq bu tarixi sənədin imzalanmasından on bir il keçir. Ötən dövrdə bir çox qaranlıq mətləblərə aydınlıq gətirilmiş, tarixi saxtalaşdıranların maskaları yırtılmış, ermənilərin xalqımıza qarşı törətdikləri misilsiz vəhşiliklər, soyqırımı haqqında dünya ictimaiyyətinə lazımi məlumatları çatdırmaq imkanı qazanılmışdır.

31 Mart - Azərbaycanlıların Soyqırımı Günü ölkəmizin hər yerində olduğu kimi, paytaxtın Nizami rayonunda da geniş qeyd edildi. Soyqırımı günündə rayon icra hakimiyyətində keçirilən mərasimdə erməni qaniçənlərinin havadarlarına arxalanaraq xalqımızın başına gətirdikləri tarixi müsibətlərdən bəhs olundu.

Tədbiri giriş sözü ilə açan Nizami Rayon İcra Hakimiyyətinin başçısı Mehbalı Əliyevin təklifi ilə soyqırımı faciəsi qurbanlarının, torpaqlarımızın azadlığı və dövlət suverenliyimizin qorunması uğrunda canlarını fəda etmiş soydaşlarımızın, eləcə də ulu öndərimiz Heydər Əliyevin əziz xatirələri bir dəqiqəlik sükutla yad olundu. Sonra M.Əliyev ermənilərin xalqımıza qarşı törətdikləri soyqırımı aktınını acı nəticələrindən və 70 illik sovet imperiya rejiminin bu tarixi cinayətin ört-basdır edilməsi üçün həyata keçirdiyi məkrli siyasətdən danışdı. Tədbirdə görkəmli tarixçilərin, siyasətçilərin iştirak etdiyini diqqətə çatdıran natiq hamını fəal müzakirəyə səslədi.

Tarixçi alim, Bakı Dövlət Universitetinin dosenti Boran Əziz Nizami Rayon İcra Hakimiyyətində soyqırımı günü ilə bağlı keçirilən mərasimi yüksək qiymətləndirdi. Son dərəcə hiyləgər, məkrli bir düşmənə qarşı mübarizədə hamını birləşməyə səsləyən alim tarixi faktlar əsasında gəldiyi nəticələrin maraqlı məqamları üzərində geniş dayandı. Qeyd olundu ki, mart soyqırımı kimi qeyd etdiyimiz tarixi faciənin əsası hələ çox-çox əvvəllər qoyulmuşdur. Azərbaycanlıların ermənilər tərəfindən kütləvi şəkildə qırılması XX əsrin 17-18-ci illərində daha intensiv şəkil almışdır. Təkcə 1918-ci il martın 30-dan aprelin 2-dək Bakıda 15 minədək soydaşımız qanına qəltan edilmişdir. Bütövlükdə isə 1918-1920-ci illərdə Azərbaycan xalqına qarşı həyata keçirilmiş soyqırımı aktı nəticəsində mindən çox yaşayış məntəqəmiz yerlə yeksan edilmiş, 550 min nəfərdən artıq soydaşımız qanına qəltan olunmuşdur. Bu qanlı tarixdən əvvəl və sonra xalqımıza qarşı törədilmiş bütün müsibətlərin kökünün çox-çox dərinliklərə gedib çıxdığını bildirən natiq Azərbaycan torpaqlarında ermənilərin yerləşdirilməsi ilə tarixi facələrimizin əsasının qoyulduğunu diqqətə çatdırdı. Ötən dövr ərzində ermənilərin havadarlarına arxalanaraq Azərbaycan torpaqlarını ələ keçirmək üçün həyata keçirdikləri məkrli işğalçı siyasətini konkret tarixi faktlar və dəlillər əsasında isbat edən B.Əziz faciələrimizin əsas səbəbini tarixi unutqanlığımızla əlaqələndirdi. 1918-ci ilin mart qırğınının səbəblərini konkret tarixi faktlar əsasında açıqlayan natiq erməni quldurları tərəfindən soyqırıma məruz qalan soydaşlarımızın xatirəsini əziz tutmağın, bu tarixi ədalətsizlikdən ibrət dərsi götürməyən bugünkü və gələcək nəsillərimizin müqəddəs borcu olduğunu diqqətə çatdırdı.

Tədbirdə iştirak edən politoloq, Milli Məclisin deputatı Aydın Mirzəzadə Qafqazda ermənilərin fəallaşdıqları o tarixi dövrün siyasi mənzərəsi haqqında geniş məlumat verdi. Qeyd olundu ki, çar və bolşevik Rusiyasının Qafqazda yeritdiyi bədnam və məkrli siyasətdən istifadə edən ermənilər azərbaycanlıları fiziki və mənəvi terrora məruz qoymuşlar. Xalqımızın böyük oğlu, görkəmli siyasətçi, ulu öndərimiz Heydər Əliyevin qətiyyəti sayəsində ermənilərin bir çox planlarının puça çıxdığını bildirən politoloq 31 Mart - Azərbaycanlıların Soyqırımı Günü elan olunması ilə bağlı fərmanın tarixi gerçəklikləri zündə tam ehtiva etdiyini diqqətə çatdırdı. Çünki 1918-ci ilin mart ayında bolşevik maskası altında gizlənmiş daşnak Şaumyan və onun başçılıq etdiyi bandit təşkilatı xalqımıza qarşı misli görünməmiş soyqırımı siyasəti həyata keçirmişdir.

Natiq onu da bildirdi ki, bütün tarixi haqsızlıqlara baxmayaraq, bu gün Azərbaycan xalqı yaşayır, ölkəmiz Cənubi Qafqazın sürətlə inkişaf edən bir dövlətinə çevrilmişdir.

Geniş müzakirə şəraitində keçən tədbirdə fikir və mülahizələrini bildirən digər natiqlər ermənilərin xalqımıza qarşı törətdikləri tarixi cinayətlər, qanlı terror aktları barədə söhbət açdılar. Qeyd olundu ki, beynəlxalq aləm ermənilərin işğalçılıq və təcavüzkar siyasətini pisləməli, xalqımıza qarşı törədilmiş soyqırımı aktını tanımalı, bütün tarixi ədalətsizliklərin qarşısının alınması üçün səy göstərməlidir.

Mirbağır YAQUBZADƏ

Rafiq SALMANOV

Xalq qəzeti.- 2009.- 1 aprel.- S.5.