Moldova parlamentinə seçkilərdə kommunistlər qalib gəldilər

Son bazar günü Moldovada parlament seçkiləri keçirilib. İlkin nəticələrdən məlum olub ki, ötən seçkilərdə olduğu kimi, bu dəfə də kommunistlər digər partiyaların təmsilçilərini üstələyiblər.

Mərkəzi Seçki Komissiyasının sədri Yevgeni Ştirbu elan edib ki, ölkədə səsvermə hüququ olan vətəndaşların 59 faizi seçkilərdə iştirak edibdir. Ölkə qanunvericiliyinə görə, seçicilərin əlli faizi iştirak edərsə səsvermə baş tutmuş hesab olunur.

Moldovada dövlət başçısını parlament seçir. Ən son məlumatlara görə, kommunistlər ümumi səslərin təqribən 50 faizini əldə ediblər. Beləliklə, onlar 101 yerlik parlamentdə 56 deputat yeri əldə edə biliblər. Lakin kommunistlərin öz namizədlərini prezident seçmək üçün onlara minumum 61 səs lazımdır. Belə çıxır ki, kommunistlərin bu dəfə başqa deputatların dəstəyinə ehtiyac yaranıb. Xatırladaq ki, prezident seçmək üçün parlamentdə üç dəfə seçvermə proseduru keçirilə bilər. Əks təqdirdə parlament buraxılmalıdır.

Son səsvermənin nəticələrinə görə, kommunistlərdən sonrakı yerləri 12,16 faizlə liberal-demokratlar və 9,3 faizlə “Bizim Moldova” alyansı tutublar. Hər iki siyasi qurum kommunistlərdən fərqli olaraq qərbyönlü siyasi xətti ilə seçilir və Moldovanın Avropa Birliyinə daxil edilməsinin tərəfdarı kimi çıxış edir. Seçkilərdə 15 partiya parlamentdə təmsil olunmaq üçün mübarizə aparsa da, digər partiyalar 6 faizlik seçki barajını keçə bilməyiblər.

Qeyd edək ki, səsvermənin ilkin nəticələri seçkilər ərəfəsində keçirilmiş rəy sorğularının göstəricilərindən ciddi fərqlənmir. Müxalifət liderləri bildiriblər ki, dövlət başçısı seçmək üçün onların kommunistlərlə koalisiyaya girmək fikirləri yoxdur. Liberal - demokratların rəhbəri Vlad Filat dünən bir daha bəyan edib ki, “biz həmişə demişik ki, kommunistlərin cinayətkar rejimi ilə ittifaqa girmək fikrimiz yoxdur”.

Kommunistlərin lideri Vladimir Voronin artıq iki dəfə prezident vəzifəsini icra etdiyi üçün Moldova Konstitusiyasına görə üçüncü dəfə dövlət başçısı seçilə bilməz və bu ayın sonuna kimi onun prezident səlahiyyətləri başa çatır. V.Voronin öz yerinə namizəd hazırladığını bildirsə də, onun adını hələ açıqlamayıb. Siyasi müşahidəçilər hazırkı dövlət başçısının ya parlamentin spikeri ya da Rusiyada olduğu kimi baş nazir postunu tutacağını güman edirlər. V.Voronin Modovanının dövlət televiziyasına verdiyi müsahibədə də vurğulayıb ki, o, bundan sonra da bu ölkədə baş verən siyasi hadisələrin mərkəzində qalmaq niyyətindədir.

Beynəlxalq müşahidəçilər Moldovada son parlament seçkilərində əvvəlki seçkilərə nisbətən proqres əldə olunduğunu bildiriblər.

M. HACIXANLI

Xalq qəzeti.- 2009.- 7 aprel.- S. 6.