Sabirabad təkcə yerləşdiyi
bölgənin deyil, ümumilikdə Azərbaycan
Respublikasının sayılıb-seçilən
rayonlarındandır. Öz əzmkarlıqları, dövlətçiliyə
sədaqət prinsipini əsas amala çevirmələri ilə
fərqlənən sabirabadlılar həmişə zəhmətləri
ilə çətin işlərin öhdəsindən layiqincə
gələ bilmişlər. Bu da maraqlı məqamdır ki,
rayonun bütün iqtisadi göstəriciləri həmişə
diqqətlə izlənilir. Əlbəttə, bunun konkret, həm
də obyektiv səbəbləri var. Ən əsas səbəb
isə, heç şübhəsiz ki, Sabirabadın strateji əhəmiyyətə
malik olması ilə bağlıdır. Təsadüfi
deyil ki, hələ sovetlər dönəmində Sabirabad əməkçilərinin
qazandığı uğurlar respublikanın
hüdudlarını da aşaraq ittifaq səviyyəsində
özünəməxsus yer tuturdu. İndi isə, necə deyərlər,
dövran dəyişib - sosializmdən bazar
iqtisadiyyatının mühüm rol oynadığı
başqa bir ictimai formasiyaya keçilib. Ancaq
sabirabadlıların işgüzarlığı, zəhmətsevərliyi
dəyişməyib. Məhz buna görədir ki, 2008-ci ili
uğurla başa vuran rayonların siyahısında
Sabirabadın da adı var. Rayon İcra Hakimiyyətinin
başçısı Heydər Abbasovun dediyi kimi, dövlət
başçısının yaratdığı şərait,
göstərdiyi diqqət və qayğı ancaq və ancaq
nailiyyətə, uğura sövq edir. Ötən ilin
sosial-iqtisadi inkişafı istiqamətində rayonda
görülmüş işlərdən bəhs edən icra
başçısı dedi:
— Möhtərəm
Prezidentimizin fəaliyyətinin əsas istiqamətlərindən
biri də görülən işlərlə yerində
tanış olmaq üçün vaxtaşırı rayonlara
səfərə çıxmasıdır. Regionların
sosial-iqtisadi inkişafını daim diqqət mərkəzində
saxlayan ölkə başçısı Dövlət
Proqramının icrasına bilavasitə nəzarət etmək
məqsədilə dəfələrlə regionlara səfər
edib. Təkcə Sabirabad rayonuna 2 dəfə gələn
dövlət başçısının rayonumuza ötən
il sentyabrın 26-dakı səfəri daha əlamətdar oldu.
Hörmətli Prezidentimiz rayonda olarkən Heydər Əliyev
adına muzeyin, Olimpiya İdman Kompleksinin, Gənclər mərkəzinin
açılış mərasimində iştirak etdi, Alkapon və
Lift zavodları, “Aqrolizinq” müəssisəsi ilə
tanış oldu və ictimaiyyətlə
görüşündə rayonda görülən işləri
yüksək qiymətləndirərək dedi: “Sabirabad yeni
dövrünü yaşayır”. Bu yüksək qiymət
sabirabadlıların böyük ruh yüksəlişinə
səbəb olmuşdur. Məhz buna görədir ki, 2008-ci
ilin 15 oktyabrında keçirilmiş prezident seçkilərində
seçki hüququ olan vətəndaşların 58664 nəfəri,
yəni 70 faizi iştirak etmiş, seçicilərin 82,5 faizi
möhtərəm İlham Əliyevə səs vermişdir. Yüksək
fəallığı ilə seçilən sabirabadlılar
İlham Əliyevə səs verməklə ölkəmizin
xoşbəxt gələcəyinə səs verdiklərini qətiyyətlə
bəyan etmişlər. Bu gün iftixarla demək olar ki,
möhtərəm Prezidentimizin rayonumuza diqqət və
qayğısı sayəsində son 5 ildə çox
böyük işlər görülmüşdür. “Azərbaycan
Respublikası regionlarının sosial-iqtisadi inkişafı
Dövlət Proqramında (2004- 2008-ci illər)” qarşıya
qoyulan vəzifələr uğurla icra olunmuşdur.
Sənaye və kənd
təsərrüfatı istehsalının dəstəklənməsi
nəticəsində son beş ildə ümumdaxili məhsulun
real həcmi 2,9 dəfə, kənd təsərrüfatı məhsulları
istehsalı 2,2 dəfə, sənaye istehsalı 3 dəfə
artmış, 2008-ci ildə isə müvafiq olaraq 14 faiz, 28
faiz və 2 dəfə artım qeydə
alınmışdır. Müxtəlif növ lift və seyf
qapıları, alkapon istehsalı ilə məşğul olan
“Qafqaz Mexaniki Təmir”, sutkada 500 ton sement istehsal edən
“Muğan Sement”, dünya standartlarına uyğun kafel, metlaq və
kəpric istehsal edən “Muğan 2" zavodları, ildə 20
milyon ədəd müxtəlif növ kisə istehsal etmək
gücündə olan ”Qafqaz Yumşaq Tara" fabriki, “Qafqaz
Avto” nəqliyyat müəssisəsi, Bulaqlı kəndində
“Aqrolizinq” mərkəzi yaradılmış, Sənaye Törəmə
müəssisəsinin fəaliyyəti bərpa olunmuşdur. Sabirabad
şəhərində “Hacı və Rəsul”, Cavad,
Salmanlı, Minbaşı, Çiçəkli kəndlərində
müxtəlif növ kənd təsərrüfatı məhsullarının
emalı müəssisələri açılmış,
Nizami kəndində pambıq və Qaratəpə kəndində
biyan qəbulu məntəqələri fəaliyyətə
başlamışdır.
Həyata keçirilən
tədbirlər nəticəsində Sabirabadda yeni
yaradılmış və istehsal fəaliyyətləri bərpa
olunmuş müəssisələrin hesabına əhalinin məşğulluğu
təmin edilmişdir. Son beş ildə 272 müəssisə
yaradılmış, 15 müəssisənin fəaliyyəti bərpa
olunmuşdur. Dövlət Proqramında nəzərdə
tutulan 10218 əvəzinə 14372 iş yeri
açılmışdır. Təkcə ötən il 73
müəssisə açılmış, 2757 iş yeri
yaradılmışdır ki, bunun da 784-ü daimidir.
Dövlət
Proqramında nəzərdə tutulan aqrar sahənin
inkişafı istiqamətində də mühüm işlər
həyata keçirilmişdir. Taxılçılığın
inkişafı təmin edilmişdir. Ötən 5 il ərzində
457 min ton taxıl istehsal olunmuşdur. Təkcə keçən
il bu sahədə hər hektarın məhsuldarlığı
36,5 sentnerə çatdırılmışdır ki, bu da
respublikada ən yüksək göstəricilərdən
biridir.
Heyvandarlıq və
quşçuluq məhsulları istehsalı və emalı
inkişaf etdirilmişdir. Son 5 ildə iribuynuzlu mal-qaranın
sayı 18,5 min baş artaraq 106,4 min başa
çatdırılmışdır. Davarlar 42,2 min baş
artaraq 163,8 min baş, ev quşları 132,6 min baş artaraq
683,5 min baş olmuşdur. Həmin dövr ərzində 46 min
ton ət (diri çəkidə), 312,4 min ton süd, 147 milyon
990 min ədəd yumurta istehsal edilmişdir.
Əvvəlki illər
kimi 2008-ci il də Sabirabad rayonu üçün iqtisadi, sosial
və mədəni sahələrdə yüksəliş ili
olub. Böyük tikinti, quruculuq, abadlıq işləri
aparılıb. Ölkə başçısının
göstərişi ilə ötən 5 ildə rayona
ayrılmış 1,3 milyon manat vəsaitdən səmərəli
istifadə edilərək 67 kənddə 122,2 kilometr
uzunluğunda kəndarası yollara çınqıl
döşənmiş, şəhərin küçələrinə
asfalt vurulmuş, yaşayış binalarının üst
örtüyü dəyişdirilmiş, hasarlar çəkilmiş,
səkilərə üzlük daşlar döşənmiş,
çoxlu sayda suvaq, rəngləmə və digər tikinti,
quruculuq, abadlıq işləri görülmüşdür.
Heydər Əliyev abidə-muzey
kompleksində böyük yenidənqurma işləri
aparılmışdır. Ərazisi 1,9 hektar olan bu kompleksdə
hər cür şəraiti olan muzey tikilib istifadəyə
verilmişdir.
3,3 hektar ərazini əhatə
edən Heydər Əliyev adına mədəniyyət və
istirahət parkında da əsaslı tikinti-abadlıq işləri
aparılmışdır. Ümummilli lider Heydər Əliyevin
büstü qoyulmuş, müasir tipli üstü
örtülü səhnə və qarşısında 5 min nəfərlik
meydança inşa olunmuş, gənclərin asudə
vaxtının səmərəli təşkili
üçün mini futbol meydançası və Gənclər
mərkəzi tikilmişdir.
Heydər Əliyev
prospektində şadlıq evi və ticarət mərkəzini
özündə birləşdirən “Kür-Araz” kompleksi
tikilib istifadəyə verilmişdir. Prospekt boyu bütün
ticarət obyektlərində yenidənqurma işləri
aparılmış, burada yerləşən ikimərtəbəli
7 yaşayış binasının üst örtüyü dəyişdirilmiş,
ətrafına hasar, kanalizasiya və su xəttləri çəkilmişdir.
Prospekt boyu ticarət obyektlərinin qarşı tərəfinə
üzlük daşlar döşənmişdir. Şərq
memarlıq üslubunda “Giriş qapı” kompleksi də inşa
olunmuş, burada 3 fəvvarə və müasir tipli
işıqlandırma sistemi
quraşdırılmışdır. Əlil və şəhid
ailələri üçün hər cür şəraiti
olan 16 və 24 mənzilli yaşayış binaları istifadəyə
verilmişdir. Daxili imkanlar hesabına magistral
avtomobil yolu boyunca 16 dayanacaq tikilmiş, Kürkəndi kəndində
səkilər salınmış, Güdəcühür kəndində
1941-1945-ci illər Böyük Vətən müharibəsi
iştirakçılarının xatirəsinə
ucaldılan, uzun müddət baxımsız qalmış abidə
yenidən qurulmuşdur. Qalaqayın kəndində isə
Qafqaz Holdinq MMC-yə gedən yola 2 kilometrlik asfalt örtük
döşənmişdir.
Şəhərin əksər
küçələri
asfaltlaşdırılmışdır. 6 küçədə
gecə işıqlandırılması təşkil
edilmişdir. Heydər Əliyev prospektində mövcud
hasarın 200 kvadratmetr hissəsi ağ daşlarla üzlənmiş,
220 kvadratmetri isə suvanmışdır. Heydər Əliyev,
Muğan prospektlərində və 4 küçədə səkilər
ağ daşlarla üzlənmişdir. Prospekt
boyu yerləşən bütün fərdi yaşayış
evlərinin və 20 Yanvar küçəsindəki 10, 12 və
15 saylı yaşayış binalarının üst
örtüyü dəmir-keramik şifer materialı ilə dəyişdirilmiş,
binaların balkonları təmir edilmişdir. Şəhərin
mərkəzi stadionunda oturacaqların və digər
qurğuların təmiri keyfiyyətlə
aparılmış, ərazinin gecə işıqlanması təmin
edilmişdir.
Prezident İlham Əliyevin
müəyyən etdiyi iqtisadi siyasətə uyğun olaraq
sahibkarlığın inkişafına dövlət dəstəyi
də artmışdır. Sahibkarlığın
inkişafı məqsədilə bank-kredit təşkilatları
tərəfindən 6 milyon 145 min manat məbləğində
mikro kreditlər verilmişdir. Özəl banklar tərəfindən
də sahibkarlara müxtəlif həcmdə güzəştli
kreditlər ayrılmışdır.
Sahibkarlar üçün
informasiya təminatı, məsləhət xidmətləri
göstərən mərkəzlərin yaradılması da səmərəlidir.
Ötən il rayon mərkəzində 5 saylı Ərazi
Vergilər İdarəsinin vergi ödəyicilərinə xidmət
göstərən terminalın açılışı
sahibkarların işini asanlaşdırmışdır. Onlar
hesabatlarını daha Şirvan şəhərində yerləşən
vergilər idarəsinə deyil, birbaşa terminala təqdim
edirlər. Hesabatların vaxtında və düzgün
hazırlanmasında sahibkarlara rayonda fəaliyyət göstərən
“Sahibkarlara xidmət servisi” yaxından köməklik göstərir.
Yerli əhəmiyyətli
problemlərin həllində qeyri-dövlət sektorunun
potensialından da geniş istifadə olunmuşdur. Son 2 ildə
AzKİL-in maliyyə dəstəyi ilə rayonun 22 kəndində
yollar təmir edilmiş, 2 tibb məntəqəsi tikilmiş,
elektrik xətləri çəkilmişdir. “Bir bələdiyyə-azı
bir layihə” təşəbbüsünə həvəslə
qoşulan bələdiyyələr bir çox sosial layihələr
həyata keçirmişlər.
Ümumilikdə 148,7
kilometr uzunluğunda kəndarası yollar təmir edilmiş, Əsədli
kəndində elektrik xəttinin çəkilişinə,
Ulacalı kəndində suvarma nasoslarına birbaşa elektrik
xəttinin bərpasına, Qəzli kəndində 80 metr
uzunluğunda piyada körpüsünün çəkilməsinə,
Qalaqayın kəndində əlavə sinif otaqlarının,
Mürsəlli və Osmanlı kəndlərində tibb məntəqələrinin
tikintisinə nail olunmuşdur.
Aqrar sferanın
inkişafına yönəldilmiş bir sıra qərarlar bu
sahədə çalışan sahibkarlar tərəfindən
rəğbətlə qarşılanmışdır. Dövlət
başçısının “Aqrar bölmədə lizinqin
genişləndirilməsi sahəsində əlavə tədbirlər
haqqında”, “Kənd təsərrüfatı məhsulları
istehsalçılarına dövlət dəstəyi
haqqında” sərəncamları, Nazirlər Kabinetinin
müvafiq qərarları aqrar bölmənin inkişafına
zəmin yaratmışdır. 2008-ci ildə buğda və digər
kənd təsərrüfatı məhsulları
istehsalçılarına 2,9 milyon manat vəsait ödənilmişdir.
Bütün vəsait plastik kartlar vasitəsilə verilmişdir.
Kənd əməkçilərinə 50 faiz güzəştlə
1500 ton omonium nitrat gübrəsi, 70 faiz güzəştlə
22 ton superfosfat gübrəsi satılmışdır. Ümumilikdə
isə son illər məhsul istehsalçılarna güzəştlə
10 min tona yaxın gübrə verilmişdir.
Nazirlər Kabinetinin
“Alınmış mineral gübrələrin ölkə
daxilində paylanması mexanizminin təkmilləşdirilməsi
üçün ayrı-ayrı bölgələri əhatə
etməklə regional loqistiks bazaların
yaradılmasının layihələndirilməsi və
tikintisi” barədə 22 sentyabr 2008-ci il tarixli qərarına əsasən
rayonun Qaratəpə kəndinin ərazisində tutumu 12 min ton
olan bazanın tikintisinə başlanmışdır. Həmin
ərazidə kənd təsərrüfatı məhsulları
istehsalçılarına xidmət göstərəcək
yeni Aqroservisin tikintisi də aparılır.
Aqrar sahəyə
dövlət dəstəyinin nəticəsidir ki, rayonun kənd
təsərrüfatında istehsal olunmuş ümumi məhsulun
dəyəri də artmışdır. Belə ki, 2006-cı
ildə 73,9 milyon manat həcmində kənd təsərrüfatı
məhsulları istehsal edilmişdirsə, 2007-ci ildə bu rəqəm
83,1 milyon manat, 2008-ci ildə isə 106,4 milyon manat təşkil
etmişdir. Bu da əvvəlki illə müqayisədə 28
faiz çoxdur. Əkin sahələrinin həcmi də son illərdə
artımla davam etmişdir. 2007-ci ildə 55330 hektar əkin
yerinin 96 faizindən, 2008-ci ildə isə 98 faizindən istifadə
olunmuşdur.
Torpaqlardan istifadənin
yaxşılaşdırılması üçün
qabaqcıl təcrübənin öyrənilib yayılması
diqqət mərkəzində olmuşdur. Pay
torpaqlarının könüllülük əsasında birləşdirilməsi
və iri təsərrüfatların təşkili istiqamətində
Axısxa kəndinin təcrübəsi razılıqla
qarşılanmışdır. Çox yaxşı haldır
ki, torpaq istifadəçiləri 700 hektar pay
torpağını 5 iri təsərrüfatda birləşdirib
toxumçuluq təsərrüfatı yaratmışlar. Xırda
ailə və fermer təsərrüfatlarının
könüllülük əsasında kooperasiyada birləşməsi
çox vacib məsələlərdən biridir və bu, pay
torpağı sahiblərinə sərfəlidir.
Dövlət
başçısının tapşırığına əsasən
kənd təsərrüfatı məhsullarının sərbəst
satışına əlverişli şərait
yaradılması bu sahəyə marağı
artırmışdır. Sabirabadlı məhsul
istehsalçıları Bakı şəhərində
keçirilən satış yarmarkasında fəal iştirak
etmişlər. Yarmarkada 10 min tondan çox müxtəlif
növ məhsul satılmışdır. Qaratəpə, Həşimxanlı,
Güdəcühür, Quruzma, Moranlı, Qaralar və digər
kəndlərin sahibkarları tərəfindən yarmarkaya
çıxarılan məhsullar alıcıların rəğbətini
qazanmışdır.
Əkinçiliyin inkişafı
düzgün suvarma ilə bağlıdır. Hər il rayonda
67 min hektar sahədə suvarma işləri aparılır. Bu
mühüm işlə Mexaniki Suvarma və Suvarma Sistemləri
idarələri məşğul olur. Keçən il bu müəssisələr
410 kilometrə qarşı 590 kilometr uzunluğunda su
kanalının lildən təmizlənməsini təmin
etmişlər.
Suvarmanın
yaxşılaşdırılması üçün digər
vasitələrdən də istifadə edilir. Qaratəpə kəndində
Dünya Bankının vəsaiti hesabına 857 min manat dəyərində
xüsusi layihə həyata keçirilmişdir. Hazırda belə
layihələr rayonun Cavad, Qaragünə, Nizami ərazi
vahidliklərində yerinə yetirilir. Layihələrin
ümumi dəyəri 3 milyon manatdan çoxdur.
Suvarma qədər əhəmiyyətli
digər sahə meliorativ tədbirlərin
aparılmasıdır. Torpaqlardan səmərəli istifadəni
təşkil etmək üçün rayon ərazisində 3
min kilometr məsafədə kollektor-drenaj şəbəkəsi
çəkilmişdir. Şəbəkə sisteminə
Sabirabad Meliorasiya İdarəsi, Baş Mil-Muğan Kollektoru
İstismarı İdarəsi, Baş Şirvan
Kollektorlarının İstismarı İdarəsi,
Aşağı Muğan Meliorativ Sistemləri İdarəsi
xidmət göstərir. Onlar ümumilikdə 2008-ci ildə
270 kilometr uzunluğunda kollektorları təmizləmişlər.
Dövlət
başçısının diqqət və
qayğısı sayəsində son beş ildə Sabirabadda
ümumilikdə 640 şagird yerlik Kürkəndi, Əsgərbəyli,
Çöl Ağammədli kəndlərində yeni məktəb
binaları, Hacıbəbir, Surxayoba, Güdəcühür kənd
məktəblərində əlavə sinif otaqları tikilib
istifadəyə verilmiş, 43 məktəbdə əsaslı,
ayrı-ayrı məktəblərdə 103 dəfə cari təmir
işləri aparılmışdır. Ötən il isə
müvafiq olaraq bu rəqəmlər 2 və 53 olmuşdur.
Hazırda təhsil şöbəsi üçün inşa
olunan inzibati binada son tamamlama işləri aparılır, Balahəşimxanlı
kəndində yeni məktəb binasının tikintisi,
M.Müşfiq adına şəhər orta məktəbinin əsaslı
təmiri davam etdirilir.
Həmin dövrdə
Heydər Əliyev Fondunun təşəbbüsü ilə
“Yeniləşən Azərbaycana yeni məktəb” devizi
altında Axtaçı-Muğan və Həşimxanlı kənd
məktəbləri üçün binalar tikilmiş və zəruri
avadanlıqlarla təchiz edilmişdir. Hazırda rayonda 85
ümumtəhsil məktəbi, 22 məktəbəqədər
və 5 məktəbdənkənar tədris müəssisəsi
fəaliyyət göstərir. 28460 şagirdin təlim-tərbiyəsi
ilə 2381 müəllim məşğul olur. Şagirdlər
dövlət vəsaiti hesabına 152 adda 72 min dərslik və
dərs vəsaiti ilə təmin edilmiş, 75 məktəbə
614 ədəd kompyuter dəsti, 14 ədəd nootbuk
verilmişdir. Təhsil müəssisələrinin
əsas göstəricilərindən biri də məzunlarının
ali məktəblərə qəbuludur. Ötən il
respublikamızın ali təhsil ocaqlarına məzunlardan 193
nəfəri test üsulu ilə daxil olmuş, onlardan 7 nəfəri
600-dən yuxarı , 28 nəfəri isə 500-dən
yuxarı bal toplamışdır. İki tələbə Azərbaycan
Respublikası Prezidentinin təqaüdünə layiq
görülmüşdür.
Rayonda səhiyyə sahəsində
də əsaslı işlər həyata keçirilmişdir.
Ötən 5 ildə dövlət vəsaiti hesabına 5
feldşer-mama məntəqəsi tikilib, 2 kənd sahə xəstəxanasında,
4 həkim ambulatoriyasında əsaslı, 34 tibb məntəqəsində
cari təmir işləri aparılmış, onların
maddi-texniki bazası möhkəmləndirilmişdir. 131 həkim,
473 orta tibb işçisi müalicə-profilaktika işini
canlandırmışdır. Kəskin yoluxucu xəstəliklər
— difteriya, qara yara, tetanus aşkar edilməmişdir. Vərəm
xəstəliyindən ölüm faizi son beş ildə
azalmışdır. Vərəmin aşkarlanma dərəcəsi
ölkə üzrə göstəriciyə uyğundur.
Digər mühüm sahələrdən
biri də əhaliyə mədəni xidmətin təşkilidir.
Rayonda bu sahədə bir sıra tədbirlər həyata
keçirilmişdir. Ötən 5 ildə dövlət vəsaiti
hesabına mədəniyyət müəssisələrinin
43-ü əsaslı təmir olunmuşdur. 2008-ci ildə
Moranlı, Rüstəmli mədəniyyət evləri əsaslı
təmir edilmiş, 12 mədəniyyət evində və 8
kitabxanada cari təmir işləri aparılmışdır. Milli-mənəvi irsimizin qorunub saxlanılması
işinə də diqqət artırılmışdır.
Şıxlar kəndində “Baba Səmid” türbəsi təmir
edilərək lazımi avadanlıqlarla təchiz edilmiş, təməli
1657-ci ildə qoyulan Qalaqayın kənd məscidində,
1900-cü ildə inşa edilmiş şəhərin köhnə
“Şamaxı” məscidində təmir işləri
aparılmışdır.
Qaçqın və məcburi
köçkünlərin də yaşayış şəraitinin
yaxşılaşdırlması istiqamətində bir sıra
əsaslı tədbirlər həyata keçirilmişdir. Zəngilan
rayonundan olan 161 məcburi köçkün ailəsi
üçün Rüstəmli qəsəbəsi
salınmış, orada onlara hər cür şərait
yaradılmışdır. Şəhriyar düşərgəsində
yaşayan köçkünlər üçün isə
müasir üslubda ağ daşlardan ticarət mərkəzi
tikilib istifadəyə verilmişdir. Şəhriyar və
Güdəcühür düşərgələrində tibb
məntəqələri zəruri avadanlıq və ləvazimatlarla
təchiz edilmiş, onların müayinə və müalicəsi
üçün əlverişli şərait
yaradılmışdır. Köçkünlər il boyu
fasiləsiz elektrik enerjisi və içməli su ilə təmin
edilmişlər. Məcburi köçkünlərin məşğulluğunu
artırmaq üçün onların istifadəsinə 365
hektar əkinə yararlı torpaq sahəsi verilmiş,
heyvandarlıqla məşğul olan qaçqın və məcburi
köçkün ailələrinə isə 309 hektar
örüş sahəsi ayrılmışdır.
Son illər əhaliyə
göstərilən ticarət, nəqliyyat və rabitə xidmətləri
xeyli yaxşılaşdırılmışdır. Sahibkarlara
yaradılan münbit şərait hesabına xeyli sayda
geniş və görkəmli ticarət obyektləri inşa
olunmuşdur. Keçmişdə kolxoz bazarı kimi tanınan
ticarət müəssisəsi yenidən qurulmuşdur.
2008-ci ildə rabitə
xidmətinin də səviyyəsi artmışdır. Mərkəzi
ATS vasitəsilə Kürkəndi kəndi
telefonlaşdırılmışdır. Həşimxanlı,
Xəlfəli, Bulaqlı, Güdəcühür kəndlərində
yeni ATS binaları tikilib istifadəyə verilmişdir. Qaratəpə,
Şəhriyar, Ulacalı, Şıxsalahlı, Həşimxanlı,
Mürsəlli, Cavad, Əhmədabad, Qalaqayın, Nizami,
Yolçubəyli kəndlərində elektron ATS-lər, 10
ucqar kənddə peyk telefon stansiyası
quraşdırılmışdır. Çoxlu sayda
rekonstruktiv təmir işləri aparılmışdır.
Rayon mərkəzində 6 internet klub
yaradılmışdır. Zəngilan rayonundan
olan məcburi köçkünlər üçün
salınmış Rüstəmli qəsəbəsində,
Qaralar, Muradbəyli, Xəlfəli, Məmişlər,
Hacıbəbir kəndlərində yeni poçt binaları
tikilib istifadəyə verilmişdir. 2009-cu ildə Həsənli,
Narlıq, Şəhriyar və Nizami kəndlərində
poçt binalarının tikintisi
planlaşdırılmışdır. Cari ildə poçt
şöbələrində kiçik bank-maliyyə xidmətləri
göstərilməsi də nəzərdə tutulmuşdur.
Əhalinin su ilə təchizatını
yaxşılaşdırmaq üçün bir sıra tədbirlər
həyata keçirilmişdir. Mərkəzi nasos
stansiyalarında, hidrotexniki qurğularda, su və kanalizasiya xətlərində
təmir-bərpa işləri aparılmış, şəhərin
A.Səhhət küçəsinə yeni su xətti çəkilmişdir.
Bu
siyahını uzatmaq da olar. Ancaq atalar demişkən,
min eşitməkdənsə bir görmək
yaxşıdır. Yolunu Sabirabaddan salan hər kəsi
qısa müddət ərzində bu qədər yeniləşmənin,
dəyişikliyin baş verməsi mütləq təəccübləndirər
və heyrətləndirər...
Səməd HÜSEYNOĞLU,
Xalq qəzeti.- 2009.- 8 aprel.- S.4.