— Mənim oğlumun
“kommunxozda” nə işi var?! Rayon icra hakimiyyəti
başçısının şöbə müdirinə
“kömək edin, məşğulluq mərkəzinə deyin,
oğluna bir iş versinlər” göstərişindən sonra
Lalə Rüstəmova etiraz edir, sakitləşmək bilmirdi.
“Nə olsun ki, oğlum orta təhsillidir. O nəyə görə
fəhlə işləməlidir?”
İcra hakimiyyətinin
başçısı, qəbulda iştirak edən digər
strukturların rəhbərləri qadına nə qədər
izah etsələr belə, dediyini deyirdi.
Başçının
qəbuluna gələn Nazilə Hüseynovanın da “məntiqi”
maraqlı idi:
— Bu torpaqlar 1987-ci ildən
məndədir. Onu mənim əlimdən kim
ala bilər?! İstədiyim vaxt əkəcəyəm
də, biçəcəyəm
də.
Qəbulda qeyd olundu ki,
N.Hüseynova əvvəlcə 23 sot, daha sonra 55 sot
torpağı zəbt edib. İndi bələdiyyə
torpaqlarının hərraca
çıxarıldığı bir vaxtda məlum olur ki,
qadının heç bir sənədi yoxdur və o, uzun illərdir
bu torpaqdan qeyri-qanuni istifadə edir.
...Gədəbəy
Rayon İcra Hakimiyyəti başçısının qəbulunda
ən müxtəlif peşə sahiblərini,
imkansızları, qocaları, qadınları gördüm. Maraqlıdır
ki, qəbul otağına daxil olub özlərini təqdim etməzdən
qabaq başçı onların demək olar ki,
hamısını tanıyırdı. Adlarını (hətta
ləqəblərini də) familiyalarını, iş,
yaşayış yerlərini, ailə vəziyyətlərini əla
bilirdi. Əslində bu, qəbula gələnlərlə isti
münasibət, ünsiyyət yaratmaq üçün
çox yaxşı cəhətdir. Amma bir fakt
faktlığında qalır ki, şikayət edənin bir
çoxu özünü haqlı sayır. Hiss olunur ki, bəzilərinin
qanunlardan, qaydalardan xəbərləri yoxdur. Daha çox
torpaq mübahisələri, iş problemləri, qonşu-qohum
münasibətləri gündəmə çıxır. Bir
sıra hallarda rayon məhkəməsinin
çıxardığı qətnamələrin icra
olunmaması və ya vaxtında icra olunmaması yuxarı
orqanlara şikayətlərin yazılması ilə nəticələnir.
Vətəndaşların
bəzisi hələ də öz qeyri-qanuni tələblərini
yerli icra orqanlarına deyil, yuxarı orqanlara yazmaqla həll
olunacağını düşünür və bu yolla istədiklərinə
nail olmaq istəyirlər. Məsələn, keçən il
rayonun Slavyanka kəndindən 130 müraciət daxil olub. Onun təxminən
70 faizdən çoxu yuxarı orqanlara göndərilib. Yaxud
Plankənddən il ərzində yuxarı orqanlara 50 müraciət
daxil olduğu halda, rayon icra hakimiyyətinə cəmi 10 məktub
yazılıb. Düzyurdda 165 məktubdan 144-ünü (!) Prezident
Administrasiyasına, Milli Məclisə, Nazirlər Kabinetinə
və digər respublika təşkilatlarına göndərilmiş
məktublar təşkil edir.
Niyə belədir?
Yuxarıda bunun bir səbəbini izah etdik. Digər səbəb
hüquqi biliklərin zəif təbliği ilə əlaqədardır.
Rayonun müvafiq təşkilatları, xüsusilə
hüquq-mühafizə orqanları bu işdə fəallıq
və təşəbbüskarlıq göstərməlidirlər.
Yerlərdə müxtəlif görüşlərə,
sual-cavab gecələrinə çox böyük ehtiyac var. Doğrudur,
rayon icra hakimiyyətinin başçısı Kamran Rzazadə
daim kabinetdə əyləşən rəhbərlərdən
deyil. O, tez-tez müxtəlif kəndlərə gedir, adamlarla
görüşür, onların problemləri,
qayğıları ilə maraqlanır. İcra hakimiyyəti
başçısının Parakənd, Əliismayıllı,
Poladlı ərazisi üzrə nümayəndəlikləri də
vətəndaşlarla müntəzəm izahat işləri
apardıqları üçün son iki ildə həmin
nümayəndəliklərdən şikayət xarakterli
müraciətlərin sayı minimuma enmişdir. Amma şəhər,
Düzyurd, Slavyanka və digər nümayəndəliklər
haqqında bunları demək çətindir.
Yaxşı iş varsa, yazmağa nə lüzum?
Gədəbəyin
inkişafı elə sürətlə gedir ki, rayonun
ayrı-ayrı kənd və qəsəbələrini bəzən
tanımaq olmur. Yol, körpü, su, telefon, qaz, işıq
problemləri həll olunur, yeni iş yerləri
açılır, torpaqdan bol məhsul
götürülür, imkansızlara yardım göstərilir,
yeni mənzillər tikilir.
Təqaüdçülər
və digər imtiyazlı kateqoriyadan olan adamlar, büdcədən
maliyyələşən təşkilatların işçiləri
öz pullarını plastik kartlar vasitəsilə bankomatlardan
alırlar. Hazırda rayonun 7 müxtəlif yerində belə
bankomatlar var. Yaxın vaxtlarda onların sayı daha
artırılacaq.
Son illər bir-birinin
ardınca o qədər gözəl, yaraşıqlı,
geniş və işıqlı məktəb binaları tikilib
istifadəyə verilib ki, sadalamaqla qurtaran deyil. Xarxar kəndində
bu günlərdə istifadəyə verilmiş məktəb
binası ilə tanış olduq. Nəyi yoxdur?! Kompyuterlərdən
tutmuş ən müxtəlif idman avadanlıqlarınadək.
Əvvəlki binaya baxanda adam inana bilmir ki, burada necə dərs
keçiblər. Amma indi tamamilə başqa mənzərədir.
Yeri gəlmişkən
qeyd edək ki, yeni məktəb binalarının tikilib istifadəyə
verilməsinə baxmayaraq, hələ də bir sıra tədris
müəssisələrində öz işinə laqeyd
yanaşan, müasir dövrlə ayaqlaşmayan müəllimlər
var. Biz keçən yazılarımızın birində bu
barədə söhbət açmışdıq. Bu dəfə
məsələni bir qədər də dərindən
araşdırdıq. Rayon təhsil şöbəsinin müdiri
Ramiz Məmmədov dedi ki, Təhsil Nazirliyi, rayon icra hakimiyyəti,
Heydər Əliyev Fondu Gədəbəydə təhsilin
maddi-texniki bazasının
yaxşılaşdırılmasına xüsusi diqqət və
qayğı göstərir. Son 5 ildə 65 məktəb əsaslı
təmir olunub və ya yenidən tikilib. Amma hələlik tədrisdə
istədiyimizə tam nail ola bilməmişik. Müəllimlərimiz
arasında hazırlıqsız, öz üzərində
işləməyənlər də var. Belə bir fakt
narahatlıq doğurmaya bilməz ki, rayonun ümumtəhsil məktəblərində
çalışan müəllimlərin 28 faizi pensiya
yaşına çatmışlardır. Onların 169 nəfərinin
70-dən çox yaşı var. Özü də dərs
yükləri kifayət qədərdir. Təbii ki, bu müəllimlərin
bir çoxu nəinki müasir tələblərə cavab verə
bilmir, həm də onların fiziki durumu,
sağlamlığı narahatçılıq doğurur. Təkcə
son vaxtlar 4 nəfər yaşlı müəllimin elə
sinif otağında, dərs dediyi zaman dünyasını dəyişməsi
ürəkağrıdan məqamlardandır.
...Gədəbəydə
yaxşı işlər çoxdur. Bütün bunlar
adamların sabaha daha ümidlə baxmasına imkan verir. Rayon
icra hakimiyyətinin ictimai-siyasi şöbəsinin müdiri Ləzgi
Zeynalov söhbət zamanı dedi ki, yaxşı iş varsa,
heç yazmağa lüzum da olmayacaq. Gədəbəydə
isə belə işlər son illər çoxalıb.
Xüsusilə Azərbaycan Respublikasının Prezidenti cənab
İlham Əliyev 2006-cı ilin noyabrında Gədəbəyə
səfərə gəldikdən sonra bu inkişaf, bu yüksəliş
daha qabarıq hiss olunur. Əhalisinin sayı 93 min nəfərə
yaxın olan Gədəbəy təkcə zəngin təbii sərvətləri
ilə deyil, iqtisadiyyatının və kənd təsərrüfatının
dinamik inkişafı, abadlıq, quruculuq işlərinə
geniş meydan verilməsi ilə seçilir. Əgər
beş il qabaq rayonda 48 min tondan bir qədər çox kartof tədarük
olunmuşdursa keçən il bu rəqəm 200 min tonu
keçmişdir. Digər kənd təsərrüfatı məhsullarının
istehsalı nəzərəçarpacaq dərəcədə
artmış, heyvandarlıq inkişaf etmişdir. Yaxud
2003-cü ildə orta aylıq əmək haqqı 48,8 manat
olduğu halda, keçən il bu rəqəm 212 manata
çatmışdır. Son 5 ildə 7200 iş yeri
açılmış, onlardan 1874-ü daimi olmuşdur.
Əhaliyə göstərilən
səhiyyə xidməti durmadan yaxşılaşır. Doğrudur, burada da problemlər
var. Xüsusilə tibb
kadrlarına ehtiyacın
olması müəyyən
işlərin tam həyata
keçirilməsinə öz
mənfi təsirini göstərir. Amma maddi-texniki baza
sürətlə inkişaf
edir. Akademik Zərifə Əliyeva adına mərkəzi
rayon xəstəxanasının yeni korpusları, Ağamalı, Novoivanovka, Rüstəm Əliyev kənd xəstəxanaları
yenidən tikilmiş və ən müasir avadanlıqlarla təchiz edilmişdir. Qoşabulaq, Slavyanka, Düz Rəsullu, Novosaratovka kənd sahə xəstəxanaları
əsaslı təmir
olunaraq öz görkəmini tamamilə
dəyişdirmişdir. Yeri gəlmişkən
qeyd edək ki, rayon mərkəzi xəstəxanasının baş
həkimi Ramiz Pirverdiyevin uzun illik təcrübəsi, təşkilatçılığı sayəsində səhiyyədəki
uğurlar artmaqdadır.
R.Pirverdiyev söhbət zamanı
bu işlərin görülməsində səhiyyə
naziri Oqtay Şirəliyevin, rayon icra
hakimiyyətinin başçısı
Kamran Rzazadənin və digər xeyirxah adamların adlarını çəkdi.
Mədəniyyət,
idman qurğularına “ikinci həyat” verilməsi, müxtəlif
təşkilatlar üçün yeni inzibati binaların
tikintisi, qaz, elektrik xətlərinin, yolların
salınması, körpülərin inşası və sair
işlər Gədəbəyi tanınmaz dərəcədə
dəyişdirib.
“Qarşıda hələ çox iş var...”
Rayon icra hakimiyyətinin
başçısı K.Rzazadə gələcək işlərdən
söhbət açır. Deyir ki, tezliklə qızıl
zavodunun işə düşməsi rayonun infrastrukturunu tamamilə
dəyişdirəcəkdir. Görün nə qədər
adam işlə təmin olunacaq. Maaşları da yüksək.
Növbəti beş ildə
də Gədəbəyin sürətli inkişafı nəzərdə
tutulub. 2009-2013-cü illərin sosial-iqtisadi inkişaf
proqramında rayonda məktəb tikintisi, yeni EATS-lərin
quraşdırılması, körpü və keçidlərin
tikintisi, səhiyyə və mədəniyyət obyektlərinin
inşası, 110 kilovoltluq Zəyəm-Gədəbəy
elektrik verilişi xəttinin çəkilməsi, mədəniyyət
abidələrinin bərpası, bir sözlə, rayonun
infrastrukturunun yeniləşməsi istiqamətində daha
böyük tədbirlərin həyata keçirilməsi
gözlənilir.
Uğur olsun, Gədəbəy!
Hamlet QASIMOV
Xalq qəzeti.- 2009.- 25 aprel.- S. 4.