Kondoliza Raysı Brüsseldə çətin danışıqlar gözləyir

Bu həftə ABŞ dövlət katibi Kondoliza Rays NATO-nun Brüssel sammitində iştirak edəcək. Sammitdə alyansın Rusiya ilə münasibətləri, eləcə Ukrayna və Gürcüstanın təşkilata qəbulu məsələlərinin müzakirəyə çıxarılacağı gözlənilir.

Bundan sonra isə Rays Hindistana yola düşəcək. Ağ evdən verilən məlumatlara görə, dövlət katibinin səfəri dünən Londondan başlayıb. O, burada Böyük Britaniyanın Baş naziri Qordon Braun və xarici işlər naziri Devid Milibendlə görüşüb. Görüşdə son günlər Hindistanda baş vermiş faciəli hadisələr müzakirə olunub. “Dövlət katibinin Hindistana səfəri bir daha təsdiq edir ki, Birləşmiş Ştatlar hind xalqı ilə həmrəydir. Biz ekstremistlərin məsuliyyətə cəlb edilməsi üçün birgə fəaliyyət göstəririk”, – deyə Ağ evin rəsmi nümayəndəsi Dana Perino bildirib.

Qeyd edək ki, noyabrın 30-da ABŞ Prezidenti Corc Buş Hindistanın Baş naziri Manmohan Sinqxə zəng edərək baş vermiş hücum nəticəsində çoxsaylı insan tələfatı ilə əlaqədar başsağlığı verib. ABŞ Dövlət Departamentinin məlumatına görə, Hindistanın Bombey əyalətinin Mumbai şəhərində həlak olan xaricilər arasında beş ABŞ vətəndaşı da olub.

Xalq qəzeti.- 2 dekabr.- 2008.- S. 7.