Müəllim hazırlığı təhsil islahatının vacib komponentidir

“Təhsil millətin gələcəyidir” –deyirdi ulu öndər Heydər Əliyev. Bu böyük şəxsiyyətin başladığı təhsil islahatı bu gün çox uğurla davam etdirilir. Son beş ildə ölkəmizdə 1600-ə yaxın yeni məktəb inşa edilmiş, məktəblərə informasiya texnologiyaları gətirilmiş, təhsilin məzmunu əsaslı şəkildə yeniləşmiş, dərslik problemi həll edilmiş, bir sözlə, milli təhsilimiz yeni inkişaf yoluna qədəm qoymuşdur.

Söz yox ki, islahatların aparılması təhsilin bütün sahələrini əhatə etmişdir. O cümlədən müəllim hazırlığı sahəsində də əsaslı yeniliklər yaradılmışdır. Ümummilli lider Heydər Əliyevin xüsusi qayğısı nəticəsində müəllim hazırlığı diqqət mərkəzində olmuşdur. Belə ki, ulu öndər Heydər Əliyev 2000-ci il iyunun 13-də Azərbaycan Müəllimlər İnstitutunun yaradılması haqqında fərman imzalamışdır. Bu institutun və onun 11 filialının yaradılmasında məqsəd məktəbdənkənar tərbiyə müəssisələri və ibtidai siniflər üçün, eləcə də müxtəlif fənlər üzrə müəllimlər hazırlanmasını, habelə müəllimlərin ixtisaslarının artırılması, təkmilləşdirilməsi və yenidən hazırlanmasını təmin etməkdən ibarət idi. Müəllim əməyinə yüksək qiymət verən ulu öndər onları savadlı, yüksək dünyagörüşünə malik, müasir proseslərdən baş çıxaran bir mütəxəssis kimi görmək istəyirdi. Ona görə də bu dahi şəxsiyyətin xüsusi fərmanı ilə əsası qoyulmuş Azərbaycan Müəllimlər İnstitutu yarandığı vaxtdan müəllim kadrlarının yetişdirilməsində mühüm rol oynamağa başlamışdır. Bu institutun və onun ayrı-ayrı filiallarının yetişdirdiyi kadrlar bu gün ölkəmizin müxtəlif guşələrində çalışmaqla, təhsilimizin inkişafına öz köməkliklərini göstərirlər.

Qeyd edim ki, ötən beş ildə müəllim hazırlığına, onların ixtisaslarının artırılmasına və yenidən hazırlanmasına dövlətimiz tərəfindən xüsusi dəstək verilmişdir. Cənab Prezidentimiz İlham Əliyevin müəllim kadrların hazırlanmasına göstərdiyi diqqət artıq öz bəhrəsini verməkdədir. “2005-2009-cu illər üçün Azərbaycan Respublikasının ümumtəhsil məktəbləri şəbəkəsinin pedaqoji kadr təminatı üzrə İnkişaf Proqramı”nın qəbul olunması bu sahədə mühüm tədbirlərin həyata keçirilməsini zəruri şərt kimi qarşıya qoydu. Proqramın həyata keçirilməsi üçün 5,4 milyon manat vəsait nəzərdə tutulmuşdur ki, bu da 5 ildə ümumtəhsil məktəblərinin ehtiyac olan 7 min kadrla təmin olunması, ixtisaslı kadr korpusunun yenidən hazırlanması, müəyyənləşdirilmiş kontingentin ixtisasının artırılması, yerlərdə gənc mütəxəssislər üçün müvafiq iş şəraitinin yaradılması, dövlət ali və orta ixtisas məktəblərini bitirmiş, rayon mərkəzlərindən 20 km-dən artıq məsafədə yerləşən məktəblərə göndəriş almış və dərhal əmək fəaliyyətinə başlayan gənc mütəxəssislər üçün həvəsləndirici tədbirlərin həyata keçirilməsini təmin etməli idi. Artıq bu sahədə çox ciddi addımlar atılmışdır. Azərbaycan Müəllimlər İnstitutunun Zaqatala rayon filialı da bu proqramın reallaşmasına öz töhfələrini vermişdir. Müəllimlər İnstitutunun Zaqatala filialı son illər əsaslı şəkildə yeniləşmişdir. Təhsil naziri Misir Mərdanov və institutun rektoru Aqiyə Naxçıvanlı filialımızın fəaliyyəti ilə daim maraqlanır, hər vaxt lazımi köməklik göstərirlər. Məlumat üçün bildirim ki, filialımızda 2008-2009-cu tədris ilində tələbələrin sayı 343 nəfərə çatmışdır. Filialımızda hazırda pedaqoji fakültə iki kafedra vardır. Müasir təlim metodları, kredit sistemi kabinetləri yaradılmışdır.

Filialımızın yerləşdiyi bina da bir vaxtlar bərbad vəziyyətdə idi. Bu gün artıq binamız tam təmir olunmuşdur. Yaraşıqlı auditoriyalar, elektron kitabxana, akt zalı, kompyuter kabineti, yeməkxana yüksək səviyyədə təmir olunub, istifadəyə verilmişdir. Əlbəttə, bütün bunlar təhsilin keyfiyyətinə öz müsbət təsirini göstərir. Filialımızda yüksək ixtisaslı professor müəllim heyəti çalışır. Onların hər biri çalışır ki, hazırladığımız kadrlar cəmiyyətdə özlərinə layiqli yer tutaraq, yeni nəslin təlim-tərbiyəsində fəal iştirak etsinlər.

Biz yaxşı başa düşürük ki, respublikamızda müəllimlərin sayının son beş ildə 11 min nəfər artması kadr seçiminin ciddiləşməsinə səbəb olmuşdur. İndi yalnız yüksək hazırlıqlı müəllim kadrları cəmiyyətdə özünə yer tuta biləcək. Ona görə də çalışırıq ki, hazırladığımız kadrlar öz peşələrini dərindən öyrənsinlər, pedaqoji prosesin incəliklərindən baş çıxarsınlar.

Bəzən deyirlər ki, bu qədər pedaqoji kadrlara ehtiyac yoxdur. Ancaq mən təhsil nazirinin müəllimlərin qurultayında dediyi bir fikri diqqətə çatdırmaq istəyirəm: “Əgər 5 il əvvəlki dövrə nəzər salsaq, kənd yerlərində 7 min nəfərədək pedaqoji kadra ehtiyac yaranması ciddi narahatlıq doğurur”. Doğrudan da, indi bu problem qismən həll olunub. Bizim filialı bitirmiş məzunların əksəriyyəti kənd yerlərində işləməyi üstün tuturlar. Çünki dövlətimiz tərəfindən ucqar kənd yerlərində işləməyə göndərilən müəllimlərə xüsusi güzəştlər edilir, onlar üçün lazımi şərait yaradılır.Bu mənada mən təkcə bizim filialın deyil, ölkənin müxtəlif regionlarında fəaliyyət göstərən filialların da böyük xidmətləri olduğunu nəzərə çapdırmaq istəyirəm.

Bu il birinci siniflərdə kurrikulum tətbiq olundu. Bunu nəzərə alaraq, biz də tələbələrimizə kurrikulumun mahiyyəti, bu islahatın keçirilməsinin əhəmiyyətini dərindən mənimsəmək üçün xüsusi dərslər keçirilməsini təmin etdik. İndi artıq bizim məzunlar kurrikulumla dərs aparmaqda çətinlik çəkməyəcəklər. Yeni kurrikulumun özəlliklərindən biri də odur ki, ibtidai sinif müəllimləri xarici dil bilmək və tədris etmək səriştəsinə malik olmalıdır. İndi həmin kurrikulumda xarici dilin tədrisinə ana dilinə ayrılan vaxt qədər saat ayrılmışdır. İbtidai siniflərdə bu fənnin tədrisinin məsuliyyəti ibtidai sinif müəllimlərinin üzərinə düşdüyündən onlar xarici dilə bir ixtisas fənni kimi yiyələnməli olacaqlar. Biz istəyirik ki, məzunlarımız ancaq savadlı mütəxəssis kimi deyil, həm də yaradıcı, düşünən, öz problemlərini müəyyənləşdirib həll edə bilən, pedaqoji ustalığa və tədqiqatçılıq qabiliyyətinə malik olan bir şəxs kimi yetişsinlər.

Zaman bizim qarşımıza yeni tələblər qoyur. Təhsildə hər an yeniləşmə, tərəqqi baş verir. Ona görə biz işimizi elə qurmağa çalışırıq ki, zamanla ayaqlaşa bilək.

Bu günlər ölkəmizdə məktəbəqədər təhsil müəssisələrində və ümumtəhsil məktəblərində baş verən yeniləşməni biz aydın görürük. Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyeva təhsilimizin inkişafına, yeni məktəblərin, uşaq evlərinin tikilməsinə daim yardım göstərir. Biz də tikilən bu yeni məktəblərdə çalışacaq yeni düşüncəli, yüksək hazırlıqlı müəllim kadrları hazırlamağa borcluyuq. Vəzifə borcundan əvvəl bu bizim vətəndaşlıq borcumuzdur. Çünki müstəqil Azərbaycanımızın gələcəyini quracaq insanların tərbiyə olunub yetişməsində bizim hazırladığımız müəllim kadrların üzərinə çox mühüm məsuliyyət düşür.

Dövlət başçımız cənab İlham Əliyevin müəllimə, bütövlükdə təhsilə göstərdiyi qayğı və diqqətə biz öz əməli işimizlə cavab verməyə çalışacağıq. Filialımızda hazırlanan pedaqoji kadrların ölkəmizin hansı guşəsində çalışmasından asılı olmayaraq, cənab Prezidentimizin etimadını doğruldacağına əminik. Çünki onlar yüksək vətənpərvərlik ruhunda tərbiyə olunurlar.

Tovuz EMİNLİ,

Azərbaycan Müəllimlər

İnstitutu Zaqatala

filialının direktoru

Xalq qəzeti.-2008.-3 dekabr.-S.6.