Avropa Şurasının Baş katibi parlamentdə çıxış edib

Milli Məclisin iclasında

Avropa Şurasının Baş katibi parlamentdə çıxış edib

Dünən Milli Məclisin növbəti iclası keçirildi. İclasa sədrlik edən birinci vitse-spiker Ziyafət Əsgərov gündəliyi səsə qoydu. Sonra deputatlar gündəliyə münasibətlərini açıqladılar, rəy və təkliflərini bildirdilər.

Cari məsələlərin müzakirəsindən sonra beynəlxalq münasibətlər və parlamentlərarası əlaqələr daimi komissiyasının sədri Səməd Seyidov “Azərbaycan Respublikası hökuməti ilə Meksika Birləşmiş Ştatları hökuməti arasında diplomatik pasporta malik vətəndaşların vizadan azad olunması haqqında ”sazişin təsdiq edilməsi barədə" Azərbaycan Respublikası Qanununun layihəsini təqdim etdi. Bildirdi ki, bu, çox böyük əhəmiyyət kəsb edən bir sənəddir. Komissiyanın iclasında da geniş müzakirə edilib. Qeyd olunub ki, belə sazişlərin imzalanması ölkəmizin digər dövlətlərlə əlaqələrini daha da möhkəmləndirəcək. Həmçinin Azərbaycan Respublikası hökuməti və Slovakiya Respublikası hökuməti arasında gömrük məsələləri üzrə əməkdaşlıq və qarşılıqlı yardım haqqında" sazişin təsdiq edilməsi də vacib sayıldığından deputatlar hər iki sənədi yekdilliklə qəbul etdilər.

“İşgəncələrə və digər qəddar, qeyri-insani və ya ləyaqəti alçaldan rəftar və ya cəza əleyhinə Konvensiyanın fakültətiv protokolunun təsdiq edilməsi haqqında” qanun layihəsi barədə məlumat verən S.Seyidov sənədin ölkəmiz üçün vacib olduğunu bildirdi. Belə konvensiyalara qoşulmaqla ölkəmiz Avropa və dünya birliyinə inteqrasiyasını daha da sürətləndirir. Protokolun məqsədi işgəncələrin və digər qəddar, qeyri-insani, yaxud ləyaqəti alçaldan rəftar və cəza növlərinin qarşısının alınması üçün azadlıqdan məhrum edilmiş şəxslərin saxlanıldığı yerlərə müstəqil beynəlxalq və milli orqanlar tərəfindən mütəmadi başçəkmələr sisteminin yaradılmasından ibarətdir. Digər vacib məqamları da özündə əks etdirən Fakültətiv Protokolun təsdiq edilməsi ölkəmizdə insan haqlarının qorunmasına böyük diqqət göstərməsindən xəbər verir.

Deputatlar bu sənədi də yekdilliklə qəbul etdikdən sonra “Nüvə terrorçuluğu əməlləri ilə mübarizə haqqında” Beynəlxalq Konvensiyanın təsdiq edilməsi barədə qanun layihəsi müzakirəyə çıxarıldı. Qeyd olundu ki, bu sənəd Milli Məclisin təhlükəsizlik və müdafiə məsələləri daimi komissiyasının iclasında geniş müzakirə olunub. Bu sənəd 2005-ci il sentyabrın 15-də Nyu-York şəhərində imzalanmışdır. Beynəlxalq Konvensiya imzalanan zaman Azərbaycan tərəfindən bəyanat verilmişdir. Həmin bəyanatda bildirilir: “Azərbaycan Respublikası bəyan edir ki, Ermənistan Respublikası tərəfindən işğal olunmuş ərazilərində konvensiyanın müddəalarının həyata keçirilməsinə həmin ərazilər işğaldan azad olunana qədər təminat vermək iqtidarında deyildir”.

Bu sənədin də zəruriliyini təsdiqləyən deputatlar sonra Azərbaycanın milli təhlükəsizlik orqanlarının 90 illiyi (1919-2009) yubiley medalının təsis olunması haqqında qanun layihəsinin təsdiqinə səs verdilər.

“Torpaq islahatı haqqında” Qanuna, Torpaq Məcəlləsinə və İnzibati Xətalar Məcəlləsinə dəyişikliklər və əlavələr edilməsi barədə qanun layihəsini parlamentin aqrar məsələlər daimi komissiyasının sədri Eldar İbrahimov təqdim etdi. Qeyd olundu ki, sözügedən dəyişiklik Xəzər dənizinin sahillərində aparılan tikintilərlə bağlıdır. Bu vaxta qədər Xəzər dənizinin 80-130 metrlik məsafəsinə qədər tikinti aparılmasına icazə verildiyini diqqətə çatdıran komissiya sədri dedi ki, dəyişikliyə əsasən həmin məsafə 20-50 metrə qədər azaldılıb. E.İbrahimov bunu Xəzər dənizi sahillərində kifayət qədər ev tikildiyini və qanunvericiliyə dəyişikliyin edilməsi ilə əhalinin mülkiyyət hüququnun qorunmasına xidmətlə əlaqələndirdi.

Qanun layihəsi ciddi müzakirələrə səbəb olsa da sonda qəbul edildi.

Azərbaycanda səfərdə olan Avropa Şurasının Baş katibi Terri Devis günün ikinci yarısında Milli Məclisin iclasına qatıldı. Özünü Azərbaycanın böyük dostu hesab edən Avropa rəsmisi Avropa Şurasına üzv ölkələrin mədəniyyət nazirlərinin Bakıda beynəlxalq konfransının keçirildiyini yüksək qiymətləndirərək dedi: “Bu gün Avropa Azərbaycanda görüşür, sabah isə dünya Azərbaycanda görüşəcək”.

Müzakirəyə çıxarılmış digər qanun layihələri barəsində də müvafiq qərar qəbul olundu.

Əliqismət BƏDƏLOV.

Xalq qəzeti.-2008.-3 dekabr.-S.6.