Azərbaycan xalqı öz görkəmli oğlunun

xatirəsini böyük ehtiram və hörmətlə yad edir

Dahi azərbaycanlını soydaşlarımızla yanaşı, türk dünyası, müsəlman ölkələri və bütün sülhsevər insanlar birlikdə andılar

İyirminci əsrin yetişdirdiyi dahi şəxsiyyətlərdən, görkəmli siyasətçilərdən və böyük insanlardan birinin anım gününü yaşadıq. Dünyasını dəyişməsinin beşinci ildönümündə daha möhtəşəm və daha əzəmətli görünən Heydər Əliyevin xatirəsinə həsr edilmiş bu yazının ilk cümləsində xalqımızın yetişdirdiyi deyil, bilavasitə “əsrin yetişdirdiyi dahi şəxsiyyət” ifadəsini işlətdik. Çünki Heydər Əliyev öz titanik ictimai-siyasi fəaliyyəti ilə təkcə azərbaycanlıların və türk dünyasının deyil, bütövlükdə dünyanın əmin-amanlığına, çiçəklənməsinə xidmət etmişdi. Onu Tanrı böyük bir missiya ilə göndərmiş, bütöv bir əsr yetişdirmişdir və biz — azərbaycanlılar onun adı ilə yüz illər, min illər boyu fəxr edəcəyik.

2003-cü ilin soyuq dekabrında dünya siyasətinin öndə gedən liderlərindən biri əbədiyyətə qovuşanda hər birimizin ürəyindən soyuq giziltilər keçmişdi. Ancaq dünyanın ən görkəmli dövlət və hökumət xadimlərinin bizim ümummilli liderimiz haqqında söylədiyi fikirlər hər bir azərbaycanlının ruhuna qüvvət, qəlbinə təpər gətirmişdi. Həmin fikirləri kimlər söyləmişdi? “Heydər Əliyev Cənubi Qafqazda uzun müddət ərzində ən əsas şəxsiyyət olmuşdur” — deyən ABŞ Prezidenti Corc Buş, “Bütün dünyada layiqli hörmət və böyük nüfuz qazanmış görkəmli dövlət xadimi həyatdan getmişdir” — söyləyən Rusiya Federasiyasının Prezidenti Vladimir Putin, “Heydər Əliyev Azərbaycanın böyük lideri idi. O, böhranlar dövründə öz ölkəsinə sabitlik gətirdi. Azərbaycan xalqı onun qoyduğu irs ilə fəxr edə bilər” — qənaətini dilə gətirən Böyük Britaniyanın Baş naziri Toni Bleyer misilsiz bir həmkar səmimiyyəti, siyasətçi etirafı nümayiş etdirmişdilər. Planetin müxtəlif problemlərini təmsil edən bu üç siyasətçinin, dövlət başçısının azərbaycanlıların ulu öndərinə verdiyi qiymət həmin günlər regionun bütün kütləvi informasiya vasitələri tərəfindən dönə-dönə yazılmış və səsləndirilmişdi.

Yəni Heydər Əliyev kiçik bir region üçün deyil, bütün dünya miqyasında əhatəli siyasi fəaliyyəti olan lider idi. Deməli onun yeri, məkanı təkcə Azərbaycan və Qafqaz deyil, bütün dünya idi. Ancaq həmin günlər dünyanın tamamilə başqa bir qütbünü — Afrikanı təmsil edən, BMT-nin sabiq Baş katibi Butros-Butros Qali Heydər Əliyevin yerini, məkanını xeyli dərəcədə konkretləşdirmişdi: “Heydər Əliyev böyük şəxsiyyətdir... onun yeri həmişə ürəyimin başındadır”. Bu sitatlardan sonra ümummilli liderimizin bütün dünyada qazandığı nüfuzun, inam və etimadın miqyasını ifadə etmək üçün heç bir şərhə, izaha ehtiyac qalmır.

Yazının bundan sonrakı hissəsini qələmə almaq üçün isə qardaş Türkiyə Cümhuriyyətinin Baş naziri Rəcəb Tayyib Ərdoğanın bir ifadəsini yada salmaq zərurəti yaranır. Cənab Ərdoğanın ifadəsi belədir: “Türk və dünya tarixində şərəfli yer tutmuş Heydər Əliyevin xatirəsi bütün dünyada həmişə ehtiramla yad ediləcəkdir. Ancaq onun xatirəsinə göstərilən ən böyük ehtiram bu insanın qurub-yaratdığı dövlətin daha da qüdrətləndirilməsi, əməllərinin daha geniş şəkildə davam etdirilməsi olacaqdır. Bunu isə azərbaycanlılar edəcəklər”. Böyük məntiq, dərin təfəkkür və qardaş təəssübkeşliyi ilə söylənilən fikirlər idi. Yəqin ki, cənab Ərdoğan beş il əvvəl söylədiyi bu fikirlərin bugünkü Azərbaycan tarixinin reallıqları olmasından böyük məmnunluq hissi keçirir. Çünki Heydər Əliyevin böhranlardan çıxardığı, nicat və qurtuluş gətirdiyi Azərbaycan dövləti bu gün az qala bütün göstəricilər üzrə dünyanın ən öndə gedən ölkəsinə çevrilir.

Bu gün artıq müstəqil Azərbaycan beynəlxalq aləmdə öz sözünü xahiş və minnətlə söyləmir, bütün tribunalardan aparıcı söz sahibi kimi çıxış edir. Planetin Qərbi ilə Şərqini, Şimalı ilə Cənubunu iqtisadi cəhətdən birləşdirən möhtəşəm transmilli nəqliyyat dəhlizləri Azərbaycanın iştirakı olmadan reallaşdırıla bilmir. Bu, Heydər Əliyevin ən böyük arzularından idi. Bu gün Azərbaycan adambaşına düşən ümumi daxili məhsul istehsalının artım tempinə, yoxsulluq səviyyəsinin azaldılmasına, yeni iş yerlərinin yaradılmasına, əcnəbi sərmayələrin cəlb edilməsinə, informasiya-kommunikasiya texnologiyalarının geniş şəkildə tətbiqinə, hərtərəfli islahatların daha da dərinləşdirilməsinə, cəmiyyət həyatının bütün sahələrində şəffaflığın artırılmasına, qloballaşma prosesindən kənarda qalmamasına, tolerantlığın daha dönməz xarakter almasına və onlarla başqa göstəriciyə görə dünya ölkələri arasında liderliyini qoruyur. Bu, ulu öndər Heydər Əliyevin ən böyük arzularının reallığa çevrilməsi deməkdir.

Azərbaycan xalqı, Azərbaycan dövləti və ümummilli liderimizin siyasi kursunu çox böyük ustalıqla davam etdirən Prezident İlham Əliyev dahi Azərbaycan siyasətçisinin bütün arzu və istəklərini ardıcıllıqla reallaşdırır. Prezident İlham Əliyev özünün bütün çıxış və nitqlərində səmimiyyətlə qeyd edir ki, Heydər Əliyevin plan və proqramlarını Azərbaycan xalqı reallığa çevirir. Xalqın istənilən nümayəndəsi — çilingərdən tutmuş akademikə qədər hər bir fərd isə ulu öndərin siyasi kursunun davam etdirilməsinə, onun arzu və istəklərinin gerçəkləşdirilməsinə görə Prezident İlham Əliyevə minnətdarlıq edir. Bu isə dövlət başçısı ilə xalq arasındakı qarşılıqlı etimadın təzahürü idi. Ulu öndərimiz müstəqil Azərbaycanın rəhbərliyinə qayıtdığı ilk gündən başlayaraq ömrünün sonuna qədər xidmət etdiyi amallardan biri də xalq-dövlət, dövlət-xalq qarşılıqlı etimadının yaradılması idi. Prezident İlham Əliyev və Azərbaycan xalqı artıq buna nail olmuşdur.

Azərbaycan xalqı öz ulu öndərinin dünyasını dəyişməsinin beşinci ildönümü günlərində də möhtəşəm bir mütəşəkkillik nümayiş etdirdi. Dünyanın bütün ölkələrindəki diaspor təşkilatlarımız, diplomatik nümayəndəliklərimiz, xaricdə təhsil alan tələbələr, işgüzar dairələrin təmsilçiləri — ümumiyyətlə, bütün soydaşlarımız yaşadıqları ölkə, şəhər və qəsəbələrdə ulu öndərin xatirəsini dərin ehtiramla yad etdilər. Moskva, Nyu-York, Sankt-Peterburq, Vaşinqton, Ankara, Paris, Tehran, Berlin, London, Brüssel, Təbriz, Qahirə, İstanbul, Oslo, Kiyev, Tbilisi, Minsk... Ulu öndərin xatirəsinin anıldığı ünvanlardan gələn xəbərlər demək olar ki, dünyanın əksər guşələrini əhatə edir.

Ən möhtəşəm tədbirlər isə təbii ki, müstəqil Azərbaycanda, onun paytaxtı Bakı şəhərində keçirildi. Hələ bir həftə əvvəl ölkənin bütün şəhər və rayonlarında, kənd və qəsəbələrində, əmək kollektivləri və təhsil müəssisələrində xatirə tədbirləri keçirilirdi. Dekabrın 12-də Bakıda — Fəxri Xiyabanda keçirilən möhtəşəm anım tədbiri isə görkəmli dövlət xadimi Nikolay Baybakovun bir ifadəsini yada saldı: “Mən Azərbaycanı, Azərbaycan xalqını Heydər Əliyev qədər sevən ikinci adam tanımıram. Mən Azərbaycan xalqı tərəfindən Heydər Əliyev qədər sevilən bir adam da tanımıram”. Çox haqlı fikirlərdir. Ulu öndərin əbədiyyətə qovuşmasının beşinci ildönümü münasibəti ilə paytaxtda keçirilən anım tədbirləri sübut etdi ki, xalq Heydər Əliyevin xatirəsini necə əziz tutur, onun irsinə nə qədər məhəbbətlə yanaşır.

Azərbaycan Respublikasının Prezidenti İlham Əliyev, Milli Məclisin deputatları, dövlət və hökumət rəsmiləri, elm, incəsənət xadimləri, yaradıcı ziyalılar, din xadimləri, respublikanın hər yerindən gəlmiş ictimaiyyət nümayəndələri, xüsusən, sadə insanlar ulu öndərin xatirəsini yad etmək üçün Fəxri Xiyabana gəldilər, məzarı önünə tər gül dəstələri qoyaraq ruhuna dualar oxudular. Bu anım günündə Azərbaycan gəncliyinin göstərdiyi mütəşəkkillik isə gələcək nəsillərin Heydər Əliyev siyasi kursuna göstərəcəyi sədaqətin, etimadın təzahürü kimi qəbul edilirdi. Keçirilən bütün tədbirlərdə yekdil fikir isə belə idi: “Nə qədər ki, Azərbaycan var, Heydər Əliyev də olacaqdır...”

İttifaq MİRZƏBƏYLİ

Xalq qəzeti.-2008.-14 dekabr.- S.1.