Cəlilabad: Qanunçuluq qətiyyətlə qorunur

Azərbaycan polisi təkcə səriştə, cəsarət və intellektual səviyyəsi ilə deyil, həm də güclü Vətən sevgisi və dövlətçiliyə sədaqəti ilə seçilir. Ölkəmizin hər yerində olduğu kimi, Cəlilabad rayonunda da hüquq-mühafizə orqanlarının güc strukturu olan polis sabitliyi, əmin-amanlığı, insan hüquq və azadlıqlarını qorumağı hər şeydən uca tutur, cinayətkarlıqla mübarizədə qətiyyət göstərir.

Cəlilabad Rayon Polis Şöbəsinin rəisi, polis polkovniki Rəhim Novruzov bizimlə söhbətində şəxsi heyətin qanunçuluğun keşiyində ayıq-sayıq dayandığını və bunun da nəticəsində kriminogen durumun yaxşılaşdığını, rayonda cinayətkarlığın azalma tendensiyasını konkret faktlar və rəqəmlər əsasında diqqətə çatdırdı.

Cari ilin əvvəlindən rayon polis şöbəsinin inzibati ərazisində DİN və prokurorluq üzrə 341 cinayət hadisəsi qeydə alınıb, onlardan 315-i açılıb, 32 cinayət işinin icraatı dayandırılıb. Cinayətlərin açılması 88,7 faiz təmin edilib. Əvvəlki illə müqayisədə cinayət hadisələri 43 fakt, yəni 13 faiz azalıb. Bunun başlıca səbəbi aparılmış profilaktik tədbirlərlə əlaqədardır.

Vətəndaşlardan qanunsuz saxlanılan silah və sursatın yığılması diqqət mərkəzindədir. Belə ki, ilin əvvəlindən 2 ədəd AK-74 tipli avtomat, 3 ədəd ov tüfəngi, 3 ədəd tapança, 1 ədəd əl qumbarası, 1 ədəd minaaxtaran, 4 ədəd avtomat sandığı, 1142 ədəd avtomat patronu, 1 ədəd süngü-bıçaq, 1 ədəd top mərmisi tapılaraq aidiyyəti üzrə təhvil verilib. On bir ayda axtarışda olan 91 nəfərin 61-i tutularaq məsuliyyətə cəlb edilib.

Sahə inspektorları, yetkinlik yaşına çatmayanlarla profilaktika işinin təşkili qrupu, post-patrul xidməti taqımı, dövlət yol polisi bölməsinin əməkdaşları hüquq pozuntularına qarşı mübarizəni əzmlə davam etdirirlər.

Məlum olduğu kimi, Cəlilabad xarici ölkə ilə sərhəd rayonudur. Narkotik maddə qaçaqmalçılığı ilə məşğul olanlar bu bölgədən də tranzit yol kimi istifadə etməyə çalışırlar. Belələrinə qarşı mübarizə çətin və risklidir. Lakin heç nədən çəkinməyən Cəlilabad polisi narkotik qaçaqmalçılığının qarşısına möhkəm sipər çəkə bilir.

Narkotik tranziti və alveri ilə məşğul olanlar bu rayonda özlərini heç də rahat hiss etmir, kompleks əməliyyat-axtarış tədbirlərinin davamlı həyata keçirilməsi nəticəsində ifşa olunur və qanun qarşısında cavab verirlər.

...Polis orqanlarında nümunəvi xidməti ilə daim seçilən polkovnik Rəhim Novruzov ötən ilin noyabrında Cəlilabad şöbəsinə rəis təyin edildikdən sonra ilk növbədə məhz narkotik maddələrin qanunsuz dövriyyəsinə “müharibə” elan etdi. İlk nəticəni çox gözləmək lazım gəlmədi. Bir ailə üzvlərinin narkotik alveri ilə məşğul olması barədə faktlar hərtərəfli yoxlanıldı. Əməliyyat planı hazırlandı. Qəfil başlarının üstü kəsdirilən ana və oğul — Cəlilabad şəhəri, M.Hadi küçəsi, ev 202-də yaşayan 1954-cü il təvəllüdlü Əsmə Mətləb qızı Qarayeva ilə 1985-ci il təvəllüdlü Seymur Salman oğlu Qarayev 1 kiloqram 435 qram narkotik vasitə olan heroinlə tutuldular. Bu cinayətə görə məhkəmənin qərarı ilə Əsmə Qarayeva beş il, oğlu Seymur isə 12 il azadlıqdan məhkum edildilər.

...Başqa bir qadın isə özünün gələcək kürəkəni ilə birlikdə cinayət başında yaxalandı. Yanvarın 11-də Cəlilabad şəhəri, Səfa Axundov küçəsi, ev 78-də yaşayan, 1968-ci ildə Salyanda anadan olmuş Aygün Əlqayıt qızı Rzayeva qızının nişanlısı, 1985-ci il təvəllüdlü Asim Şəmsəddin oğlu Hüseynovla birlikdə 52,6 qram heroini və 103,8 qram tiryəki satarkən polis əməkdaşları tərəfindən tutuldular. Hər ikisi cinayət məsuliyyətinə cəlb edildi.

...Növbəti ayda — fevralın 20-də rayonun Alar kəndində daha bir narkotik satıcısı “arzu”suna çata bilmədi. 1976-cı ildə Tovuzda doğulmuş Biləsuvar şəhər sakini Emin Fəxrəddin oğlu Əzimov 9 kiloqram 705 qram həşişi burada şərti alıcıya satarkən yaxalandı. Aldığı on bir illik azadlıqdan məhrumolunma cəzası onun cinayət törədərək böyük günaha batdığını düşünməsi üçün güman ki, gen-bol bəs edəcək.

...Cəlilabad Rayon Polis Şöbəsinin əməkdaşları may ayının 8-də bir gecədə iki uğurlu əməliyyat keçirərək narkobiznesə ağır zərbə endirdilər. Həmin gecə nə az, nə çox — 30 kiloqramdan artıq həşiş qətranı müsadirə edildi.

Daxil olan məlumatlar əsasında əməliyyat tədbirlərinə başlayan polislər ilk öncə gecə saat 3 radələrində Cəlilabad şəhəri ərazisində 1970-ci il təvəllüdlü, əvvəllər Qazaxıstan Respublikasında narkotik maddəsi ilə məhkum olunmuş Gülməmmədli kənd sakini Bəhruz Şücaət oğlu Hətəmovu və 1959-cu ildə anadan olmiuş Uzuntəpə kənd sakini Vaqif Bədir oğlu Buludovu 15 kiloqram 645 qram həşişlə tutdular. Qrup təşkil edən cinayətkar dostlar Rusiya Federasiyasına satmağa apardıqları narkotiklə və öz azadlıqları ilə beləcə vidalaşmalı oldular.

Üç saat sonra isə polislərdən ibarət qrup artıq rayonun Alar kəndində növbəti əməliyyatda idi. 1979-cu ildə Gürcüstan Respublikasında doğulmuş Rusiya Federasiyasının vətəndaşı Rəfael Rəhim oğlu Xəlilov “qara bazar”da 50 min manatlıqdan da baha dəyərləndirilən 14 kiloqram 915 qramlıq həşiş ilə elə yaxalandı ki, ruhu da incimədi. Rafaelin sonradan dediyinə görə, o, Rusiyanın Yekaterinburq şəhər bazarında tanış olduğu İran vətəndaşı Sabirlə qaz vurub-qazan doldurmaq barədə sövdələşibmiş. Sabir iranlı həmyerlisi Mərifətə bu məqsədlə zəng edib. Narkotik vasitə Biləsuvarda qanunsuz yolla sərhəddən keçirilib və “mal”ı əldə edən Rafael az sonra Alar kəndi ərazisində özü də ələ keçib.

Əlbəttə, heç bir əməliyyat polis işçiləri üçün təhlükəsiz ötüşmür. Onlar hər bir çətinliyə — yuxusuzluğa, yorğunluğa, hətta silahlı müqavimətə belə fədakarlıqla sinə gərir, əməliyyatların uğurlu nəticələnməsi naminə yüksək peşəkar keyfiyyətlərini göstərirlər. Ən çətin və təhlükəli əməliyyatların hamısında şöbə rəisi Rəhim Novruzov qrupun önündə gedir. Dediyinə görə, bu, polis işçilərini daha da ürəkləndirir, qətiyyətli edir.

Elə oktyabrın 13-də, yağışlı bir payız gecəsi, saat 01 radələrində sərhəd zonasına yaxın Dələli kəndi ərazisində keçirilmiş növbəti əməliyyat buna əyani misaldır. Həmin gecə İran İslam Respublikasının vətəndaşı Şəhramın və onun adları məlum olmayan daha üç həmyerlisinin satış məqsədilə ölkəmizə külli miqdarda narkotik maddə gətirmələrinin qarşısı alınıb. Rəisin rəhbərliyi ilə oraya gələn əməliyyat qrupuna cinayətkarlar silahlı müqavimət göstəriblər. Şəhramın dəstəsi polisə atəş aça-aça geri qaçıb sərhədi keçməyə müvəffəq olsa da, “mal”ı xilas edə bilməyib. Nəticədə polis hadisə yerindən 15 kiloqram 535 qram həşiş qətranını götürüb.

...Cəlilabad şəhəri, C.Cabbarlı küçəsi, 30 saylı evdə yaşayan 57 yaşlı Aynur Əhmədağa oğlu Əhmədov isə dekabrın 1-də ataların “Su qabı suda sınar” məsəlini şəxsən öz təcrübəsində təsdiqləyib. Özü də narkotik düşkünü olan Aynur satmaq istədiyi 40 qram heroin maddəsinin güdazına gedib. Hazırda iş üzrə istintaq aparılır.

Göründüyü kimi, Cəlilabad Rayon Polis Şöbəsinin şəxsi heyəti cinayətkarlığa, xüsusən də narkotiklərlə bağlı cinayətlərə qarşı qətiyyətlə mübarizə aparır. Əgər ötən il narkotiklərin satışı, saxlanması və əkini ilə əlaqədar 76 cinayət olmuşdusa, bu ilin 11 ayında 65 cinayət qeydə alınıb. Tutulan heroin, həşiş, tiryək və marixuana maddələrinin həcmi ötən il cəmi 20 kiloqram 876 qram olduğu halda, bu il 72 kiloqram 017 qram təşkil edib. Yəni 3,4 dəfə artıq. Uğur göz qabağındadır.

Cəlilabad polisi digər ağır cinayətlərin, qətl hadisələrinin üstünün açılması üzrə də bir sıra uğurlu əməliyyatlar keçirib. Mart ayının 4-də Göytəpə şəhər sakinləri — 75 yaşlı Həmdulla Ağayevlə həyat yoldaşı, 58 yaşlı Xədicə Əliyevanın qəddarlıqla öldürülməsi hadisəsini götürək. Bu hadisə kiçik əyalət şəhərində böyük həyəcana səbəb olmuşdu. Cinayəti törədən şəxs Cəlilabad polislərinin gərgin zəhməti və fədakarlığı nəticəsində düz 1 ay 19 gündən sonra Bakı şəhərində saxlanılıb. Onun həm ağır qətlləri törətdiyi, həm də sonra oğurluq etdiyi mənzillərdə çemodanların üstündə bıçaqla “T” işarəli eyni “avtoqraf”ları qoyması əməliyyatçıların izə düşməsinə kömək edib. Bu işlə bağlı istintaq getdiyindən hələlik təfsilatını açıqlamır, saxlanılan şəxsin adını çəkmirik. Qalsın məhkəmədən sonraya.

Əli NƏCƏFXANLI

Xalq qəzeti.-2008.-18 dekabr.- S.6.