AŞPA-nın qış sessiyasında Ermənistanla

bağlı ciddi müzakirələr aparılacaq

Ermənistan parlamentinin Avropa Şurası Parlament Assambleyasındakı nümayəndə heyətinin rəhbəri David Arutunyan bu günlərdə yerli kütləvi informasiya vasitələrinə verdiyi açıqlamasında deyib ki, nüfuzlu beynəlxalq təşkilatın qış sessiyasında Ermənistanla bağlı ciddi müzakirələr aparılacaq. O, bundan çox narahat olduğunu bildirib.

D.Arutunyan AŞPA-nın Ermənistanda prezident seçkilərindən əvvəl və sonra baş vermiş hadisələrlə bağlı bir neçə dəfə müzakirələr keçirdiyini xatırladıb. Həmin müzakirələr zamanı ölkədə insan hüquq və azadlıqlarının ciddi şəkildə pozulması, müstəqil mətbuatın fəaliyyətinə məhdudiyyətlər qoyulması, insanların sərbəst toplaşmalarına hakimiyyət tərəfindən süni əngəllər yaradılması dəfələrlə tənqid olunmuş, prezident seçkilərinə qatılmış müxalifət nümayəndələrinə təzyiqlər göstərilməsi, hakimiyyətin namizədinə səs verilməsində seçicilərə zorakılıq göstərilməsi, seçki prosesinə müdaxilələr olunması pislənilmişdir. O deyib ki, martın 1-2-də dinc aksiya keçirən insanların gülləbaran edilməsinin və bunun da nəticəsində çoxlu sayda mitinq itşirakçısının vəhşicəsinə qətlə yetirilməsinin AŞPA-nın sessiyalarında müzakirəyə çıxarılması, bunun insan hüquq və azadlıqlarının kobud surətdə pozulması kimi qiymətləndirilməsi ölkənin beynəlxalq aləmdəki nüfuzunu heçə endirib. O, AŞPA-nın Ermənistanda baş vermiş xoşagəlməz hadisələrin araşdırılması və bu hadisələri törədənlərin, xüsusilə də təşkilatçıların hələ də müəyyənləşdirilib qanuni cəzalandırılmaması ilə əlaqədar verdiyi vaxtın başa çatdığını diqqətə çatdırıb. Hətta, AŞPA-nın bununla əlaqədar 1609 nömrəli qərarı olduğunu da xatırladıb.

D.Arutunyan Ermənistanda martın 1-də dinc əhalinin vəhşicəsinə qətlə yetirilməsi ilə əlaqədar digər beynəlxalq təşkilatların da narahatçılığından söhbət açıb və deyib ki, insan haqlarının müdafiəsi ilə məşğul olan beynəlxalq təşkilatlardan Amnesty İnternational da öz hesabatlarında bu hadisəni ciddi şəkildə pisləyib. Hər iki beynəlxalq təşkilat bu hadisələri törədənlərin hələ də həbs olunmamalarından narahatçılıqlarını bildirir və qeyd edirlər ki, qətli törədənlər dövlət məmurları tərəfindən müdafiə olunurlar. Digər tanınmış təşkilatlar da bu problemin, həmçinin Ermənistanda söz və mətbuat azadlığının qarşısının kobud şəkildə alınmasının AŞPA-nın qış sessiyasında müzakirəyə çıxarılmasını tələb edirlər. O bildirib ki, Amnesty İnternational təşkilatının eksperti Lourens Broyersin açıqlamaları daha ciddi təşviş doğurur. Ekspert deyib: “Bizi ən çox narahat edən Ermənistanda həbs olunanların vəhşicəsinə döyülməsi, həmçinin onların məhkəmələrinin beynəlxalq standartlara cavab verməməsidir”. Eksperti narahat edən məsələlərdən biri də mart hadisələrinin təşkilatçılarının hələ də azadlıqda qalmaları, həbs olunanların isə öz haqlarını tələb edənlərin olmasıdır. Bununla hakimiyyət dinc əhalini qorxu altında saxladığını bir daha təsdiqləyir.

Ermənistanda müstəqil mətbuatın fəaliyyətinə qoyulmuş məhdudiyyətlərin hələ də aradan qaldırılmadığı və həqiqəti yazanların müxtəlif bəhanələrlə həbs edilməsi, onlara təzyiqlər göstərilməsi AŞPA-nı narahat edən məsələlərdən biridir. D.Arutunyan deyib ki, prezident seçkiləri ərəfəsində və seçkidən sonra bu məsələnin daha da kəskinləşməsi, bəzi qəzet redaktorlarının əsassız həbs olunması və bəzilərinin döyülməsi adi hala çevrilmişdi. Avropa Şurası bu məsələyə çox ciddi fikir verir. Çünki ölkəmiz bu quruma daxil olarkən bir sıra öhdəliklər götürüb. Həmin öhdəliklərdən biri də müstəqil mətbuatın fəaliyyətinə geniş meydan verilməsi idi. Lakin bu məsələ hələ də beynəlxalq təşkilatların istədiyi səviyyədə deyil. O deyib ki, artıq Ermənistan AŞPA-da götürdüyü öhdəlikləri yerinə yetirməyən dövlət kimi tanınır. Bu da sessiyalar dövründə öz mənfi təsirini göstərir.

AŞPA-nın Ermənistan qarşısında qoyduğu vəzifələrdən biri də ölkədə fəaliyyət göstərən siyasi institutlara normal iş prinsipinin yaradılmamasıdır. Qış sessiyasına qədər aradan qaldırılması nəzərdə tutulan nöqsanlardan biri də bu idi. Təəssüflə qeyd olunub ki, bu sahədə də ürəkaçan heç bir iş görülməyib. Ümumiyyətlə, D.Arutunyan qış sessiyasına əliboş getdiklərini bildirib. O deyib ki, AŞPA-nın qarşıya qoyduğu vəzifələrin heç biri yerinə yetirilməyib. Ona görə də müzakirələrin gərgin keçəcəyi və bu dəfə Ermənistana hər hansı bir sanksiyanın tətbiq ediləcəyi gözlənilir. Çünki prezident seçkilərindən sonra ölkədə insan haqlarının müdafiəsi istiqamətində beynəlxalq təşkilatların hesabatlarında göstərilən nöqsanların aradan qaldırılmasına cəhd göstərilməyib.

Jurnalistlərin “Ermənistan üçün hansı sanksiyalar tətbiq oluna bilər”— sualına D.Arutunyan “Biz səsvermə hüququndan məhrum oluna bilərik. Çünki 9 aydır ki, AŞPA-nın və digər beynəlxalq qurumların ölkəmiz haqqında dedikləri nöqsanlara əhəmiyyət verilmir. Yəqin onların da səbrləri buna çatmayacaq” — deyə cavab verib. Daha sonra bildirib ki, Avropa Şurası üzvlüyə qəbul etdiyi ölkələrin bir-birlərinin sərhədlərinə hörmətlə yanaşmalarına da ciddi diqqət yetirir. Bu da qış sessiyasında ciddi müzakirə obyektinə çevrilə və bizim üçün ciddi problemlər yarada bilər.

Əliqismət BƏDƏLOV

Xalq qəzeti.-2008.-19 dekabr.- S.2.