Şirvan: zəhmət sığal çəkir onun hüsnünə

2008-ci ildə Azərbaycan Respublikasının şəhərləri sırasına bir yeni ad da əlavə olundu — Şirvan şəhəri. Ölkəmizin ən qədim və ən zəngin bölgələrindən birinin adı sayılan “Şirvan” sözünü yaşatmaq Əli Bayramlı şəhərinin qismətinə düşdü. Bunu bir növ qədimliklə müasirliyin sintezi kimi də xarakterizə etmək olar. Çünki “Şirvan” adı nə qədər qədimlərə gedirsə, Əli Bayramlının da şəhər kimi tarixçəsi müasirdir. Ancaq burada ziddiyyət yox, qəribə vəhdət var. Sanki bu yeni adla tariximizə münasibətdə düzgün bir addım da atılmış oldu. Şəhər icra hakimiyyətinin başçısı Mərdan Camalov 2008-ci ildə görülmüş işlərlə bağlı söhbətə başlayarkən dedi:

— 2008-ci ildə biz şəhər sakinləri olaraq məhz şəhərimizə Şirvan adının verilməsini ən böyük uğur sayırıq. Möhtərəm Prezidentimizin də şəhər sakinləri ilə görüş zamanı çox haqlı olaraq vurğuladığı kimi, bu ad böyük məsuliyyət və şərəfdir. Biz də çalışırıq ki, bu məsuliyyətin ağırlığını həmişə şərəflə daşıyaq, doğrulda bilək. 2008-ci ildə görülmüş işlərlə bağlı isə öncə onu deyə bilərəm ki, iqtisadiyyatın əsas sahələrində istehsal olunmuş məhsul və xidmətlərin həcmi əvvəlki ilə nisbətən faktiki qiymətlərlə 1,2 faiz artaraq 264,0 milyon manat olmuşdur ki, bu da 2003-cü ilin müvafiq dövrü ilə müqayisədə 2 dəfə çoxdur. Məhsul və xidmətlərin həcmində sənaye məhsulunun payı 89,9 faiz olmuşdur.

Ümumi məhsul buraxılışında xüsusi çəkiyə malik olan sənaye sahələrində fiziki şəxslərin də fəaliyyəti nəzərə alınmaqla 237 milyon manatlıq məhsul istehsal edilmişdir ki, bu da 2003-cü ilin müvafiq dövrü ilə müqayisədə 2,1 dəfə artım deməkdir.

İstehsal olunmuş məhsulun 26,8 faizi dövlət, 73,2 faizi isə qeyri-dövlət müəssisələrinin və fiziki şəxslərin payına düşür. Qeyri-dövlət bölməsində məhsul buraxılışı 93,5 faiz artmışdır.

Keçən ilin müvafiq dövrü ilə müqayisədə şəhərdə xam neft istehsalı 9,0 faiz, meyvə-tərəvəz şirələri istehsalı 58,0 faiz, təmizlənmiş duru bitki yağları 6,2 faiz, pambıq yağı 12,0 faiz, çörək və çörək məmulatı 72,2 faiz, şirniyyat məmulatı 71,4 faiz, quyu avadanlığı 2,5 dəfə artmışdır.

Müdafiə Sənayesi Nazirliyinin tabeçiliyində olan “Telemexanika” zavodunda istehsal prosesinin tənzimlənməsi, işçilərin iş şəraitinin yaxşılaşdırılması üçün xeyli işlər görülmüşdür. Zavodun 2, 3, 4 saylı korpuslarında tam yararsız 1626 kvadratmetr sahəsi olan inzibati və məişət otaqları yüksək səviyyədə təmir edilmiş, ətrafda abadlaşdırma işləri aparılmış, 1,2,3,4 saylı istehsal korpuslarının 22000 kvadratmetr dam örtüyü əsaslı təmir edilmişdir. Eyni zamanda, su nasosxanası və qazanxana istifadəyə verilmiş, material və hazır məhsul anbarları tikilmişdir. Yeni texnologiyanın tətbiqi istiqamətində məqsədyönlü işlər görülmüşdür. Cari ilin sonuna kimi 3 növ məhsul istehsalının rotor xətti ilə həyata keçirilməsi tam başa çatdırılacaqdır. Eyni zamanda, ilin axırına kimi 2 növ sursat buraxılışı üzrə 2 xətt hazırlanıb istifadəyə veriləcək, 1200 kvadratmetr sahəsi olan istehsal korpusu əsaslı təmir olunacaqdır. Cari ildə zavodda 72 iş yeri açılmış, işçilərin əmək haqqı 3 dəfə artırılmışdır.

Cari ildə tikinti müəssisələri tərəfindən yerinə yetirilmiş işlərin həcmi 7,9 milyon manatdan artıq olmuşdur ki, bu da 2003-cü ilin müvafiq dövrü ilə müqayisədə 5,2 dəfə çoxdur. Ümumilikdə cari ildə istifadəyə verilən əsas fondların dəyəri 552,2 min manat təşkil etmişdir ki, bu da əvvəlki ilin müvafiq dövrü ilə müqayisədə 65 faiz çoxdur.

Əsas kapitala yönəldilən investisiyanın həcmi qeyd olunan dövrdə 13,5 milyon manat olmuşdur ki, bunun da 10 milyon manatını (73,3 faizi) istehsal təyinatlı, 3,5 milyon manatını isə (26,7 faizi) qeyri-istehsal təyinatlı obyektlərə qoyulan investisiya təşkil etmişdir. Tikinti-quraşdırma işlərinin həcmi ümumi investisiyanın 36,2 faizi qədər olmuşdur.

Azərbaycan Respublikası regionların sosial-iqtisadi inkişafı (2004-2008-ci illər) Dövlət Proqramının uğurla yerinə yetirilməsi daim diqqət mərkəzində olmuşdur.

Şəhid ailələri, Qarabağ müharibəsi, 20 Yanvar və Çernobıl əlilləri üçün şəhərin 28 May küçəsində 4 mərtəbəli, 16 mənzilli yaşayış binasının tikintisinə başlanılmışdır.

Şəhərdə sahibkarlığın inkişafı üçün olduqca münbit şərait yaradılmışdır. Özəl qurumlar cəlb edilməklə şəhər ərazisində 526 mənzilli 9 yaşayış binasının tikintisi davam etdirilmişdir.

Cari ilin 9 ayında sahibkarlara ümumilikdə 8 milyon 278 min manat kredit verilmişdir. Eyni zamanda, kənd təsərrüfatı məhsulları istehsalçılarına 549 adda 4 milyon 588 min manat dəyərində kənd təsərrüfatı texnikası və gübrə satılmışdır.

Baş Şirvan kollektorunda 1 milyon manatdan artıq bərpa işləri görülmüşdür.

“Azərenerji” Tikinti-Təmir MMC tərəfindən 220 kilovatlıq Şirvan İES-Salyan elektrik ötürücü xəttinin inşası davam etdirilir, hazırda bu istiqamətdə Salyan rayonu ərazisində işlər davam etdirilir.

5 sentyabr 2008-ci ildə şəhərdə keçirilən əmək yarmarkasına 368 boş iş yeri təqdim edilmişdir. 222 işsiz vətəndaş işlə təmin olunmuş, 15 nəfər peşə hazırlığına cəlb edilmişdir.

Cari ildə şəhərdə 840 nəfər işlə təmin olunmuşdur ki, onlardan 745-i daimi iş yerləridir. Ümumilikdə 2003-cü ildən indiyə qədər 7501 nəfər işlə təmin edilmişdir ki, onlardan 4152-i daimi iş yerləridir.

Məlumdur ki, Azərbaycanda idmanın inkişafı Prezidentimizin daim diqqət mərkəzindədir. Bu sahədə Şirvan şəhərində də xeyli işlər görülmüş və görülməkdədir. Heydər Əliyev prospektindəki şəhər Mərkəzi stadionu və qapalı əl oyunları kompleksinin tikintisi Dövlət Neft Şirkəti tərəfindən davam etdirilir. Görülən işlərin həcmi 2,2 milyon manat təşkil etmişdir. S.Zeynalov küçəsində Gənclər və İdman Nazirliyinin xətti ilə müasir standartlara cavab verən “Mini futbol” meydançası istifadəyə verilmişdir.

Oktyabrın 4-də hörmətli Prezidentimiz tarixi səfəri zamanı 2009-cu ildə şəhərimizdə ən müasir olimpiya kompleksinin tikintisi üçün göstəriş vermişdir.

Cari ilin müvafiq dövründə avtomobil nəqliyyatı sahəsində fəaliyyət göstərən fiziki şəxslər tərəfindən 203 min ton, yaxud 2003-cü ilin müvafiq dövrünə nisbətən 30,7 faiz çox yük, 11 milyon nəfər və ya 50 faiz çox sərnişin daşınmışdır. Rabitə müəssisələri əhaliyə, müəssisə və təşkilatlara faktiki qiymətlərlə 645 min manat dəyərində və ya 2003-cü ildə olduğundan 3 dəfə çox rabitə xidməti göstərmişlər.

Görülmüş xidmətlərin 87,6 faizi telekommunikasiya, 13,2 faizi isə poçt müəssisələri tərəfindən yerinə yetirilmişdir. Cari ilin 9 ayında 418 abonentə yeni telefon çəkilmiş, stansiyanın tutumu 256 nömrə artırılmış, 1 May, N.Nərimanov və Energetik küçələrində tam kabelləşmə işi başa çatdırılmışdır.

Poçt xidmətinin yaxşılaşdırılması məqsədilə şəhərdə 1,2,3, 6 saylı poçt şöbələri üçün yeni binalar tikilib istifadəyə verilmişdir. Hazırda şəhərdə hər 100 ailənin sərəncamında 84 stasionar və hər 100 nəfərin sərəncamında 34 mobil telefon nömrəsi vardır.

Şəhər iqtisadiyyatının başqa sahələrində olduğu kimi, ticarət və xidmət sektorunda da son illərdə əldə olunmuş inkişaf dinamikası davam etdirilmişdir. Ticarət və xidmət şəbəkələrindən əhaliyə 68 milyon manatlıq xidmət göstərilmişdir. Pərakəndə əmtəə dövriyyəsi 55 milyon manat olmuşdur ki, bu da 2003-cü ilin müvafiq dövrü ilə müqayisədə 2,6 dəfə, əhaliyə göstərilən pullu xidmətin həcmi 11 milyon manat olmaqla 2003-cü ilə nisbətən 3,1 dəfə çox olmuşdur.

2008-ci ilin 9 ayında ticarət şəbəkələrindən hər bir şəhər sakini orta hesabla 728 manatlıq və ya əvvəlki ilin eyni dövründəkindən 231 manat çox müxtəlif istehlak malları almışdır. Bu da əhalinin maddi rifah halının getdikcə yaxşılaşmasını əks etdirən real göstəricidir.

Şəhərdə dövlət əmlakının özəlləşdirilməsi istiqamətində müəyyən işlər görülmüş, cari ildə 14 əmlak özəlləşdirilmiş, özəlləşdirmədən respublika büdcəsinin xüsusi hesabına 153 min manat vəsait köçürülmüşdür.

Təhsil müəssisələrinin maddi-texniki bazasını möhkəmlətmək və təhsilin keyfiyyətini yaxşılaşdırmaq daim diqqət mərkəzində saxlanılmışdır. Təhsil Nazirliyinin ayırdığı vəsait hesabına 2 saylı orta məktəbdə əsaslı təmir işləri başa çatdırılmışdır. Ümumtəhsil məktəbləri üçün 3308 manat dəyərində bərk, 2119 manat dəyərində isə yumşaq inventar alınmışdır.

Əhalinin sağlamlığının qorunması istiqamətində də xeyli işlər görülmüşdür. Şəhər Mərkəzi Xəstəxanasının yoluxucu xəstəliklər şöbəsinin yerləşdiyi bina Səhiyyə Nazirliyinin ayırdığı vəsait hesabına əsaslı təmir edildikdən sonra mart ayında səhiyyə naziri hörmətli Oqtay Şirəliyevin iştirakı ilə həmin şöbənin açılışı olmuşdur. Uşaq Birləşmiş Xəstəxanasının stasionar şöbəsində və travmatalogiya şöbəsində əsaslı təmir və yenidənqurma işləri aparılmışdır.

Xəstəxananın bütün korpus və şöbələrini istiliklə tam təmin etmək məqsədilə qazanxana tikilmiş, 1200 metr boru alınmış, yeni qaz xətti çəkilmiş və son tamamlama işləri görülmüşdür.

Şirvan şəhərinin ekoloji vəziyyətini yaxşılaşdırmaq məqsədilə Neftçilər, Hacıqəhrəmanlı və Bayramlı qəsəbələrinin hüdudlarında mövcud olan 20 hektar sahə neft-lay sularından, gölməçələrdən, torpaq anbarlarından təmizlənərək abadlaşdırılmışdır.

Azərbaycan Respublikasının Prezidenti möhtərəm İlham Əliyevin 2007-ci ilin dekabr ayının 24-də etdiyi səfər, görülən işlərlə şəxsi tanışlığı, tapşırıq və tövsiyələri şəhərimizin inkişafını sürətləndirmiş, hazırlanmış tədbirlər planına uyğun olaraq 2008-ci ildən başlayaraq tikinti-quraşdırma, təmir, yenidənqurma və abadlıq işlərinin həcmi artırılmışdır.

2008-ci ilin yanvar ayının 1-dən keçən müddət ərzində büdcədən ayrılmış vəsait hesabına şəhərin Bayramlı qəsəbəsindəki Sabir küçəsinə, eyni zamanda H.Cavid, Mehmandarov, Z.Tağıyev, M.Füzuli, H.Əliyev, Vidadi, F.Cavadov, Neftçilər və digər küçələrə 420 min manat dəyərində 32 min kvadratmetrdən artıq asfalt örtük qoyulmuşdur.

“Azərbaycan xalqının ümummilli lideri Heydər Əliyevin 85 illik yubileyi haqqında” Azərbaycan Respublikası Prezidenti İlham Əliyevin 11 mart 2008-ci il tarixli sərəncamına əsasən şəhərin “Heydər Əliyev parkı”nda yenidənqurma işləri aparılmışdır. Parkın ərazisində yerləşən Yeni Azərbaycan Partiyasının inzibati binasında müasir tikinti materiallarından istifadə etməklə əsaslı təmir işləri görülmüşdür.

İ.Qayıbov küçəsində, uzun müddət baxımsız qalmış istirahət parkında da əsaslı təmir işləri aparılmış, sakinlərin asudə vaxtının səmərəli keçirilməsi üçün səhnə kompleksi tikilmiş, uşaq əyləncə mərkəzi yaradılmış, yeni oturacaqlar və işıq dirəkləri quraşdırılmışdır. Park əhalinin istirahət mərkəzinə çevrilmişdir.

Heydər Əliyev meydanının cənub hissəsində “Heydər Əliyev muzeyi”nin inşası başa çatdırılmış, muzeydə son tamamlama və abadlıq işləri görülür.

46 saylı Şirvan Seçki Dairəsinin inzibati binası da əsaslı təmir olunmuşdur.

F.Eynullayev küçəsində 1 hektar ərazidə sakinlərin mədəni istirahəti üçün “Nümunəvi məhəllə” salınmışdır. Eyni zamanda, İbrahimov küçəsindəki məhəllənin abadlaşdırılması məqsədilə 1,8 hektar ərazidə uşaq əyləncə mərkəzi, idman qurğuları quraşdırılmış, 2 bağlı istirahət guşəsi, 1 dairəvi istirahət mərkəzi yaradılmışdır.

Möhtərəm dövlət başçımız İlham Əliyevin təməlini qoyduğu “Cənub” Elektrik Stansiyasında da tikinti-quraşdırma işləri davam etdirilmişdir. Ayrılmış ərazidə inzibati binanın və yeməkxananın özüllərinin beton işləri başa çatmışdır. “Cənub” Elektrik Stansiyasının tikintisi ilə əlaqədar şəhərin T.İsmayılov küçəsində yeni 60 mənzilli 5 mərtəbəli yaşayış binası tikilib istifadəyə verilmişdir. Şirvan şəhər mərkəzi mədəniyyət evinin dam örtüyü metal keramikadan olmaqla yenidən qurulmuş, suvaq işləri, fasadın ağ layla üzlənməsi işi görülmüşdür. Hazırda son tamamlama işləri aparılmışdır.

2008-ci ildə bələdiyyə tərəfindən şəhərin küçə və meydanlarının abadlaşdırılması məqsədilə 504 min manat həcmində tikinti-təmir və abadlıq işləri yerinə yetirilmişdir.

Dövlət Miqrasiya Xidmətinin Şirvan Regional Miqrasiya İdarəsinin inzibati binası istifadəyə verilmiş, Daşınmaz Əmlakın Dövlət Reyestri Xidmətinin Şirvan şəhər Ərazi İdarəsinin inzibati binası yaxın günlərdə istifadəyə veriləcəkdir.

Şirvan şəhər Maliyyə İdarəsinin tikintisi davam etdirilmişdir.

Müasir memarlıq üslubunda Şirvan şəhər Regional Ədliyyə şöbəsinin inzibati binasının tikintisinə başlanılmışdır.

Şirvan şəhəri bu gün tikinti meydançasını xatırladır desəm, əlbəttə, yanılmaram.

Apardığımız abadlıq, tikinti və quruculuq işləri ölkə Prezidentinin daim diqqət mərkəzində olmuşdur. 24 dekabr 2007-ci il tarixində şəhərimizə tarixi səfəri zamanı dövlət başçısı görülən işlərə yüksək qiymət verərək demişdir: “Əli Bayramlıda aparılan abadlıq və quruculuq işləri məni ürəkdən sevindirir”.

Qeyd etmək istəyirəm ki, şəhər ərazisində aparılan tikinti-quraşdırma, təmir, yenidənqurma və abadlıq işləri bu gün də sürətlə davam etdirilir.

Əhalinin fasiləsiz elektrik enerjisi alması tam təmin edilmişdir. Bu məqsədlə 400 kilovat gücündə yeni yarımstansiya quraşdırılmış, 4 ədəd transformator əsaslı təmir edilmiş və 3500 metr uzunluğunda elektrik naqilləri dəyişdirilmiş və təmir edilmişdir.

Qaz təsərrüfatında da nəzərəçarpacaq müsbət dəyişikliklər əldə edilmişdir. Korroziyaya uğramış 1640 poqonometr müxtəlif qaz xətti çəkilmiş və ya təmir edilmiş, 1 qaz tənzimləyici şkaf təmir edilmiş, 310 qaz sayğacı quraşdırılmışdır.

Qış mövsümü ilə əlaqədar olaraq əhalinin təbii qaz və elektrik enerjisi ilə tam təmin olunması üçün bütün tədbirlər görülür.

Şirvan şəhər Mənzil Təsərrüfatı İdarəsinin balansında olan binaların ətrafında əvvəlki illərdən mövcud olmuş qeyri-qanuni tikililərin, qarajların, çəpərləmələrin sökülməsi davam etdirilmişdir.

Rəqəmlərdən göründüyü kimi, bütün sahələrdə-tikinti, nəqliyyat, xidmət, abadlıq və quruculuq sahəsində irəliləyiş geniş vüsət almışdır və bu, onu deməyə əsas verir ki, gələcəkdə də şəhərin hərtərəfli inkişafı yüksək templə davam etdiriləcəkdir.

Bunu xüsusi vurğulamaq istəyirəm ki, möhtərəm Prezidentimiz tərəfindən Şirvan şəhərində aparılan abadlıq və quruculuq işlərinə verilən yüksək qiymət məsuliyyətimizi bir daha artırmışdır. Bizə göstərilən etimada cavab olaraq bütün imkanlarımızı səfərbər edərək işimizi bundan sonra da tələb olunan səviyyədə qurmağa, vaxtında və keyfiyyətlə yerinə yetirməyə çalışacağıq.

İcra başçısının dediklərinə yalnız bunu əlavə etmək qalır: Şirvan şəhərində həyata keçirilən tədbirlər sakinlərin əhval-ruhiyyəsinə, yaşayış tərzinə doğrudan da xeyli müsbət təsir göstərir. İndi burada insanlar yaxın keçmişdə olduğu kimi gün batmamış evlərinə getməyə tələsmirlər, həm də şəhərin aylı, işıqlı gecələrini seyr etməkdən doymurlar. Çünki bu şəhərin gecəsinin də, gündüzünün də öz romantikası var.

Səməd HÜSEYNOĞLU

Xalq qəzeti.-2008.-21 dekabr.- S.5.