Qobustan qazmaçıları yeni nailiyyətlərin sorağındadır

Azərbaycanın quru və dəniz sahələrindəki neft-qaz yataqları uzun illər istismar edilməsinə baxmayaraq, burada çıxarılması mümkün olan ehtiyatlar hələ çoxdur. Həmin ehtiyatları aşkara çıxarmaq, onların hasilatına imkan yaratmaq bilavasitə axtarış-kəşfiyyat və istismar qazmasından asılıdır. Məhz bu səbəbdən son illər Dövlət Neft Şirkətinin rəhbərliyi tərəfindən qazma işlərinin artırılmasına xüsusi qayğı və diqqət göstərilir. Qazma işlərinin intensivliyini artırmaq məqsədilə şirkətin tərkibində yaradılmış Kompleks Qazma İşləri Tresti artıq bu sahədə böyük uğurlar qazanmışdır. Təkcə onu demək kifayətdir ki, 2008-ci ilin on bir ayında trest üzrə nəzərdə tutulmuş 144730 metr əvəzinə 163194 metr qazma işi aparılaraq plan tapşırığına 112,8 faiz əməl olunmuşdur. Bütövlükdə isə yeraltı zənginliyə yol açan qazmaçılar Dövlət Neft Şirkəti tərəfindən qarşıya qoyulmuş illik tapşırıqları noyabrın 15-də yerinə yetirməyə müvəffəq olmuşlar.

Kompleks Qazma İşləri Trestinin qabaqcıl, zəngin ənənələrə malik müəssisələrindən sayılan Qobustan Kəşfiyyat-Qazma İşləri İdarəsinin kollektivinə də qazanılmış bu uğurlardan xüsusi pay düşür. Məlumat üçün bildiririk ki, Qobustan qazmaçıları “Lökbatan”, “Puta”, “Qalmas”, “Muradxanlı” və “Cəfərli” sahələrində istismar, Ağstafa rayonunda yerləşən “Cahandar” sahəsində isə kəşfiyyat qazma işləri həyata keçirirlər. Son zamanlar dövlət qayğısına əməli işlə cavab verən qazmaçılar istismar və kəşfiyyat qazması üzrə tapşırıqlara bir qayda olaraq vaxtından əvvəl və keyfiyyətlə əməl edirlər. Təkcə belə bir faktı qeyd etmək yetərlidir ki, idarənin kollektivi Kompleks Qazma İşləri Tresti tərəfindən tapşırılan 18052 metr illik qazma planını sentyabrın 10-da yerinə yetirməyə müvəffəq olmuşdur. Bu da trest üzrə ən yaxşı göstəricidir. 2008-ci ilin 11 ayında isə planda nəzərdə tutulan 16360 metr əvəzinə 240070 metr qazma işləri aparan qazmaçılar tapşırığa 147,1 faiz əməl etmişlər. Ötən ilin müvafiq dövrü ilə müqayisədə 358 metr artıq qazma işləri aparan Qobustan qazmaçıları hesabat dövründə sifarişçi neft və qazçıxarma idarələrinə planda nəzərdə tutulan 13 əvəzinə 15 quyu təhvil vermişlər. Bu isə 2007-ci ilin eyni dövrünə nisbətən 4 quyu çoxdur.

Cari ilin yanvar-noyabr aylarında qazmada hesabat sürəti 349 metr-gəzgah ay olmuşdur ki, bu da əvvəlki ilin müvafiq dövri ilə müqayisədə xeyli artıqdır. Qeyd etmək lazımdır ki, qazma işlərinin təşkili qazmanın vaxt balansı ilə səciyyələnir ki, bu da özünü məhsuldar vaxtda büruzə verir. 2008-ci ilin 11 ayında idarə üzrə qazmanın ümumi vaxt balansında məhsuldar vaxt 89,3 faiz, qeyri-məhsuldar vaxt isə 10,7 faiz təşkil etmişdir.

2008-ci ilin əvvəlindən Qobustan qazmaçıları Ə.Əmirov adına Neft və Qazçıxarma İdarəsinin neftçilərinə 11 quyu təhvil verimişlər ki, bu nəzərdə tutulduğundan 2 quyu çoxdur. Bundan əlavə, hesabat dövründə qazıntısı başa çatdırılmış 4 quyu Muradxanlı iriləşdirilmiş sahəsinin neftçilərinə təhvil verilmişdir. Bir faktı da qeyd etmək lazımdır ki, ilin ötən dövrü ərzində İmişli rayonundakı “Cəfərli” sahəsində təhvil verilmiş iki quyu məhsuldarlığı ilə seçilir. Belə ki, Həmin quyulardan sutkada təqribən 30-40 ton neft hasil edilir.

Kəşfiyyat qazma işləri sahəsində son illər böyük uğurlara imza atan kollektiv hazırda Ağstafa rayonundakı “Cahandar” sahəsində kəşfiyyat quyusunu layihə dərinliyinə çatdırmaq üzrədir. Artıq həmin quyuda 3050 metrədək qazma işi aparılıb, quyuya 9 düymlük kalon buraxılıb. Qalan 200-250 metrlik qazma işinin isə gələn ilin fevrlında başa çatdırılması nəzərdə tutulur. Onu da deyək ki, 2009-cu ildə həmin sahədə daha bir kəşfiyyat quyusunun qazıntısına dair sifariş alınmışdır.

Qobustan Kəşfiyyat-Qazma İşləri İdarəsinin qazmaçıları hazırda Naxçıvan Muxtar Respublikasında yerləşən “Böyükdüz” sahəsində yeraltı qaz anbarının yaradılması üçün nəzərdə tutulan 1200 metrlik kəşfiyyat quyusunda da qazma işlərini artıq uğurla başa çatdırmışlar. Xatırladaq ki, Qaz Əməliyyatları İdarəsi tərəfindən gələn il burada layihə dərinliyi təqribən 2 min metr olan daha bir quyu sifariş edilmişdir.

İdarə qazma ilə yanaşı, yeraltı qaz saxlama anbarı üçün quyularda əsaslı təmir işlərini də həyata keçirir. Cari ilin yanvar-noyabr aylarında Qaz Əməliyyatları İdarəsinin sifarişi ilə Kalmas sahəsində 18 quyuda əsaslı təmir işləri yüksək keyfiyyətlə başa çatdırılmışdır. Bundan əlavə, hazırda idarənin təmirçiləri “Kürsəngi” sahəsində vaxtilə istismarı dayandırılmış quyunun bərpası istiqamətində iş aparırlar. Bütövlükdə isə qazma işlərinin intensivliyini getdikcə artıran Qobustan qazmaçıları indi “Lökbatan” sahəsində dörd, “Cəfərli”də üç, “Cahandar”da isə bir quyunun qazıntısını davam etdirir, təmir işləri sahəsində fədakarlıqla çalışırlar.

Son zamanlar qazma işlərinə dair sifarişlərin getdikcə artması, texniki-iqtisadi göstəricilərin yaxşılaşması sosial sferada da bir sıra mühüm tədbirlərin həyata keçirilməsinə imkan yaradır. Bu da qazmaçıların iş şəraitinin və güzəranının getdikcə yaxşılaşmasına səbəb olur. İdarənin rəisi Əli İsayevin bildirdiyinə görə, Dövlət Neft Şirkəti və Kompleks Qazma İşləri Tresti rəhbərliklərinin gündəlik qayğı və diqqəti sayəsində bütün idarələrdə olduğu kimi, burada da işçilərin rifah halının və əmək şəraitinin yaxşılaşdırılması ön plana çəkilir. 2008-ci ilin əvvəlindən etibarən qazma işləri həyata keçirilən bütün buruqlar əsaslı təmir olunmuş, yerlərdə lazımi abadlıq işləri başa çatdırılmışdır. Hazırda isə idarənin inzibati binasının həyətində analoji işlərə başlanılıb.

Qazmaçıların mənzil şəraitinin yaxşılaşdırılmasına da diqqət getdikcə artırılır. Bu il idarənin iki əməkdaşına yeni mənzillərin açarları təqdim olunub. Yaxın vaxtlarda isə Salyan şəhərində dörd mərtəbəli 32 mənzilli bina qazmaçıların sərəncamına veriləcəkdir.

Hazırda Qobustan Kəşfiyyat-Qazma İşləri İdarəsində 1360 nəfər çalışır. Onların orta aylıq məvacibi təxminən 550 manat təşkil edir. Bundan əlavə, ARDNŞ-in işçilərinə maddi yardım verilməsi haqında əsasnaməyə uyğun olaraq burada işçilərə bir sıra maddi yardımlar göstərilir, qazmaçıların istirahətinin səmərəli təşkili istiqamətində lazımi tədbirlər görülür. Bütün bunlar Qobustan qazmaçılarını yeni nailiyyətlərə ruhlandırır.

Mirbağır YAQUBZADƏ

Xalq qəzeti.-2008.-24 dekabr.- S.6.