Texniki Universitetdə elmi-texniki konfrans

Dünən Azərbaycan Dövlət Texniki Universitetində ənənəvi elmi-texniki və tədris-metodiki konfrans öz işinə başlamışdır. Konfransı giriş sözü ilə açan Texniki Universitetin rektoru, professor Havar Məmmədov bildirdi ki, ənənəvi olaraq, konfranslarda elm, texnika və istehsalat nümayəndələri də iştirak edirlər. Bu konfransda isə AMEA-nın Radiasiya Problemləri İnstitutunun direktoru, AMEA-nın müxbir üzvü, əməkdar elm xadimi, kimya elmləri doktoru professor Adil Qəribov iştirak edir.

Azərbaycan Respublikasının iqtisadiyyatının yüksək templi inkişafı elm və texnikanın tərəqqisinə təkan verir. Konfransda ediləcək məruzələri analiz etdikdə elm və texnikanın, demək olar ki, bütün müasir istiqamətlərinin onlarda əks olduğunu görmək olar. Bunlara telekommunikasiyadan başlayaraq maşınqayırma sənayesində tətbiq edilən yeni texnologiyaları da aid etmək olar.

“Sevindirici haldır ki, bizim müəllim və magistrlərin işləri istehsalatda qəbul olunur. Bu il universitetimizin müəllimləri ilə istehsalat nümayəndələrinin bir neçə görüşü keçirilmişdir. Bundan əlavə, məzunlarımıza istehsalatda yüksək tələbat olduğunu da qeyd etmək istəyirəm.

Ümidvaram ki, əldə olunan nəticələrlə kifayətlənməyib, daha yeni nailiyyətlər uğrunda çalışacağıq.

Bütün görülən işlər və əldə etdiyimiz nailiyyətlər möhtərəm Prezidentimiz cənab İlham Əliyevin bizə göstərdiyi qayğının yüksək təzahürüdür. Bugünkü konfransın açılışı cənab Prezidentimizin ad gününə təsadüf edir. Biz hörmətli Prezidentimizə gələcək işlərində daha böyük uğurlar arzulayırıq.

Konfransın gedişində 391 məruzə dinləniləcək. Tədbirdə professor-müəllim heyəti və aspirantlarımızla yanaşı, digər təşkilatların nümayəndələri də məruzələrlə çıxış edəcəklər. Bundan əlavə, konfransda Türkiyə və Misir Ərəb Respublikasından olan dissertantlarımız da çıxış edəcəklər”.

Sonra Azərbaycan AMEA-nın Radiasiya Problemləri İnstitutunun direktoru, AMEA-nın müxbir üzvü, əməkdar elm xadimi, kimya elmləri doktoru, professor Adil Qəribov “Müasir enerji mənbələri və nüvə enerjisinin perspektiv enerji təminatında rolu” mövzusunda çıxış etdi.

Eyni zamanda Texniki Universitetin kafedra müdiri, texnika elmləri namizədi, dosent V.Musayev “Tədris prosesində kompyuter texnologiyaları” mövzusunda geniş məruzə etdi.

Dünən həmçinin konfransın işi bölmələrdə də davam etdirilmişdir.

Konfrans dekabrın 26-dək davam edəcək.

M. MÜKƏRRƏMOĞLU

Xalq qəzeti.-2008.-25 dekabr.- S.10.