Təbiət gözəllik, sağlamlıq, xoşbəxtlik qaynağıdır

İnsan təbiətin şah əsəridir. Onun sağlamlığı, xoşbəxtliyi təbiətin pozulmaz qanunlarına uyğun yaşamaqdadır. Ekoloji problemlərin kəskinləşməsi ilə artan xəstəliklərdən, bəlalardan yaxa qurtarmağın yolu min illərdən bəri sınaqdan çıxmış təbii həyat tərzini qorumaq, təbiətlə sıx təmasda bədəni möhkəmləndirməkdir. Xəstələnəndə isə təbii üsullarla müalicəyə üstünlük verilməlidir. Təəssüf ki, bütün bunlara o qədər də məhəl qoymur, alternativ müalicə üsullarına çox da inanmırıq.

Qeyri-adi duyumu və güclü zəkası olan insanlar kainatın görunən və görünməyən qaynaqları ilə rabitə yaratmaqla özlərində başqalarında olmayan qabiliyyətlər formalaşdıra bilirlər. Belə insanlar zaman və məkan ölçülərini aşa bilir, gücsüz və xəstələrin həyat funksiyalarını bərpa edə bilirlər. Xalqımızın bu gün də “türkəçarə”, “xalq təbabəti” adı ilə tanıdığı bu cür şəfa, müalicə üsulları çağdaş elmi səhiyyə çevrəsinə daxil edilərək, “alternativ müalicə üsulları” adlandırılaraq öyrənilir, xəstəliklərin sağaldılmasında geniş istifadə olunur.

Azərbaycanda da tarixən belə şəfalı insanlar olub, xalqın xidmətində dayanıblar. Heç bir diaqnoz qoyan aparatdaxili göstərən cihaz olmadığı dövrdə xalq təbibləri sınıqları, çıxıqları, candakı və ruhdakı fəsadları əllərin təması və xüsusi duyumla aşkar edib asanlıqla sağaldıblar. Belə qabiliyyət sahibləri barədə bu gün də el-obadan soraqlar gəlir, hətta kütləvi informasiya vasitələrində məlumatlar eşidilir.

Onlardan biri, ixtisasca geoloq olan , qeyri-adi duyumu və təcrübəsi ilə illərdən bəri insanlara şəfa bəxş edən Faiq Allahyarov son vaxtlar qəzet və jurnallarda, teleradioda tez-tez çıxışlar edir, elm adamlarını birgə səmərəli əməkdaşlığa dəvət edir. Soydaşımız qəti əmindir ki, təbabətdə hələ də carəsiz sayılan bir sıra xəstəlikləri onun təklif etdiyi müalicə üsullarını öyrənib elmin inkişafına tətbiq etməklə milyonlarla insanı vaxtsız ölümün caynağından xilas etmək olar. Faiq bu yaxınlarda “ATV” və “ANS” telekanalları vasitəsilə alimləri, həkimləri birgə əməkdaşlığa dəvət etmişdir. Bizimlə söhbətində də o, təbii üsullarla müalicəyə geniş meydan açılmasının zəruriliyini vurğuladı.

— Siz özünüzdəki qeyri-adi bacarığı ilk dəfə necə hiss etmisiniz?

— Dəqiq yadımda deyil, amma onu bilirəm ki, mən hazırkı təcrübəni damla-damla yığmışam, çətinliklərdən qorxmamışam. Əldə etdiyim nailiyyətin dərinliyinə qədər mənasını anlamağa çalışmışam. Hər halda Allah-taalanın mənə verdiyi duyum, bilik, səbr və həvəs bir yerə cəmləşib insanlara sağlamlıq, gümrahlıq gətirməyə səsləyib. Sirr deyil ki, bəzi insanlar anadangəlmə xüsusi istedada, bacarığa malikdir. Bunu bəxş edən varlıq isə Allahdır. Mən, sadəcə, ötürücüyəm. Sonsuz şəfa qaynağı Ulu Yaradandır, onun yaratdığı təbiətdir.

— Siz çətin sağalan, bəzən də çarəsiz görünən xəstəliklərin müalicəsi ilə məşğulsunuz. Bu böyük risk, məsuliyyət deyilmi?

— Mən, əsasən, qadın döş şiş xəstəlikləri, əsəblə bağlı fəsadlar, onurğa sütunu ətrafında yaranmış problemlər, daxili orqanlarda baş vermiş pozuntular, xroniki baş ağrıları, yorğunluq və s. kimi xəstəliklərin müalicəsi ilə məşğul oluram. Mən xəstəyə dəqiq diaqnoz qoya bilir və etdiyim müalicəyə zəmanət verirəm. Hərdən elə xəstəliklər də var ki, mən onların elmi adını bilmirəm, lakin təcrübədə onların səmərəli müalicəsinə nail oluram. Nəzərə alın ki, mən müalicə zamanı nəinki dərman tətbiq etmirəm, əksinə, onların istifadəsini orqanizm üçün təhlükəli hesab edərək qadağan edirəm. Lakin bəzi xəstəliklərin müalicəsində nadir dərman bitkilərinin kökündən, baldan, çiçəklərdən istifadə edirəm.

— Sizin kimi xalq bilicilərini ekstrasens kimi də qələmə verənlər var.

— Mən məşğul olduğum sahənin adının nə olduğunu deyə bilmərəm. Məncə, bu barədə fikir yürütmək alimlərin işidir. Qoy onlar ayırd etsinlər. Qədim zamanlardan belə fəaliyyət xalq təbabəti adlanıb. Mənim öz müalicə prinsipim var: orqanizmə fiziki müdaxiləyə ən son hallarda müraciət, insana ziyan gətirən kimyəvi dərmanlardan imtina, müalicəni təbiətin özündə tapmaq.

— Siz fəaliyyətinizi elmi əsaslarla qurmaq, nəticələrinizi alimlərlə müzakirə etmək üçün vaxtaşırı KİV-də çıxışlar edirsiniz, əks-sədası olurmu?

— Təəssüf ki, bu məsələ mənim yaralı yerimdir. İllərdən bəridir ki, çalışıram alimlər mənim əldə etdiyim nəticələri öyrənib tibb elminin inkişafına tətbiq etsinlər. Dəfələrlə qəzet, televiziya, radio vasitəsilə bütün səlahiyyətli orqanlara müraciət etmişəm. Onları elmi müzakirəyə dəvət etmişəm,məndə olan qabiliyyətin öyrənilməsini xahiş etmişəm. Lakin indiyədək bu arzu olaraq qalmaqdadır. Biganəlik, sayğısızlıq hələ də davam edir. Axı mən faktlarla müalicəmin daha səmərəli olduğunu sübut edirəm. Ölümə “məhkum” xəstəyə yaşamaq ümidi verirəm, riskli əməliyyatlardan yan keçməyə nail oluram.

Bütün bunlar kimyəvi maddələrin iştirakı olmadan baş verir. Mən məhz bu səmərəni nəzərə alaraq, ixtisaslı həkimlərin iştirakı ilə müalicə prosesini nəzarətdə saxlayaraq, elmi cəhətdən əsaslandıraraq, tibb elminə töhvə verməkdə israrlıyam. Əlaqə telefonumu bir daha xatırladıram: 441–75–99.

— Sizin müalicənizin müsbət nəticəsi, bəlkə, xəstələrin inamı ilə bağlıdır?

— Ola bilər, hansısa xəstə məhz mənə inanaraq, emosional halda immun sisteminin fəallaşması nəticəsində sağalır. Bütün hallarda şəfalı insanlara, həkimlərə inam olmalıdır. Təcrübə sübut edir ki, bu amil çox müsbət nəticələr verir. Mən kortəbii, əsassız müalicə aparmağın tam əleyhinəyəm. Xəstəyə güclü təsir və onda inam yaratmaq çox vacibdir. Təəssüf ki, bəzi fırıldaqçı adamlar xəstələrin taleyi ilə oynayır, onları müvəqqəti olaraq aldadırlar, sonrası isə faciəli olur.

— Deyirlər isti də, soyuq da sağlamlıq üçün təhlükəlidir.

— Ümumiyyətlə, günəş şüası cox olduqda insan orqanizmi üçün təhlükəlidir. Hamı özünü günəş şüasından, xüsusilə, günorta vaxtı qorumalıdır. Eləcə də davamlı soyuq insanda ciddi fəsadlar yaradır. Təəssüf ki, bəzi insanlar bu amillərə barmaqarası baxırlar. Bu da mənfi nəticələrə gətirib çıxara bilir.

— Maraqlı hallardan biri odur ki, siz xəstələrinizə heç bir qida qadağası qoymursunuz...

— Allah-taala insanın beynini elə şəkildə proqramlaşdırmışdır ki, o özü orqanizmə lazım olan maddələri, vitaminləri dəqiq bilir və onu istəyir. Lakin israfçılıq da orqanizmə ziyandır. Hər şeyin artığı yaxşı nəticə vermir. Sözsüz, təbii və təzə qidalar olduqca faydalıdır. Süni maddələrdən uzaq olmaq məsləhətdir. Avropada süni ərzaq istehsal edən müəssisələr cərimə olunur. Bu əbəs yerə deyil. Orqanizm təbiətin məhsuludur, o, yalniz təbiətdən güc alır, onunla hərtərəfli təmasa can atır.

— Sizcə, təbabət niyə bəzi xəstəlikləri sağalda bilmir?

— Təbabət, sanki, başqa elmlərlə müqayisədə axır vaxtlar geri qalır. Məsələn, radiolokasiya və ya rabitə texnoloğiyasının inkişaf tempi ilə müqayisədə tibb elmi xeyli geridir. Bir neçə xəstəlik üzun illərdir ki, əlacsız görünür, hər il milyonlarla insan vaxtsız ölür. Hesab edirəm ki, tibb elmi hərtərəfli inkişaf etdirilmir. İnkişaf etmiş ölkələr — ABŞ, Çin, Yaponiya, Almaniya, Fransa kimi dövlətlərdə yollar axtarılır. Bu ölkələrdə xalq təbabətinə xüsusi yer ayırırlar və sözsüz, müsbət nəticələr əldə edirlər.

Mən bunu alqışlayıram və istəyirəm ki, ölkəmizdə də xalq təbabətinə, təbii üsullarla müalicəyə diqqət göstərilsin, meydan açılsın.

20 ildən artıq bir dövrdə çox sayda naümid xəstəni sağaltmışam. Onların əksəriyyəti bu gün də yaşayır. Mənə inanmayanlar və müalicəni yarımçıq saxlayanlar isə təəssüf ki, mümkün olan şəfanı almayıb bəzən həyatı vaxtsız tərk edirlər. Bu isə məni çox ağrıdır. Axı əlacsız görünən xəstələri sağaltmaq mümkündür.

— Maraqlı söhbətə görə təşəkkür edirik.

Tahir AYDINOĞLU,

Elçin SƏFƏROV

Xalq qəzeti.-2008.-28 dekabr.- S.6.