On dörd il yolu gözlənilən medal

— 20 Yanvar faciəsindən sonra Füzuli tamam dəyişdi. Qarabağ cəbhəsində vəziyyətin getdikcə gərginləşməsi ona daha pis təsir edirdi. Elə hey deyirdi ki, biz bu problemin həllini uşaqlarımıza saxlamamalıyıq.

Azərbaycan Prezidenti İlham Əliyevin 2008-ci il 25 iyun tarixli sərəncamı ilə ölümündən sonra “Hərbi xidmətlərə görə” medalı ilə təltif edilmiş Füzuli Heydər oğlu Quliyevin həyat yoldaşı Gülbəniz Quliyeva bizimlə söhbətinə belə başladı. Dedi ki, Bərdənin Dəymədağlı kəndində yaşayırdıq. Qarabağda müharibə şiddətlənirdi. Füzuli daha dözə bilmirdi. Və bir gün bizimlə vidalaşıb cəbhəyə yollandı. “Qurtuluş” taborunda döyüşürdü. Tezliklə komandirin müavini oldu. Hamı onun qəhrəmanlığından danışırdı. Arabir evə də baş çəkirdi.

Gülbəniz xanımın həyat yoldaşı ilə bağlı xatirələri bitib-tükənmir. Xatirələr çözələndikcə gah kövrəlir, gah gülümsəyir, o anları təkrar-təkrar yenidən yaşayır:

— Sonuncu dəfə evə gələndə çox tutqun idi. Görürdüm ki, uşaqlarla oynayanda da qəribə hallar keçirir. Elə bil onlardan ayrılmaq istəmirdi. Yola düşəndə çox kədərli görünürdü. Dedi ki, bilmək olmaz, bu müharibədir, uşaqları sənə tapşırıram, onları yaxşı böyüt. Ağladım. Elə məni gözü yaşlı qoyub getdi. Çox keçmədi, 1994-cü il yanvarın 20-də cənazəsini gətirdilər.

Füzulinin dəfn mərasimində döyüş dostları, yüksək çinli komandirləri iştirak etdilər. Hamı onun qəhrəmanlığından, vətənpərvərliyindən danışdı. Onu da dedilər ki, Füzuli Quliyevin yüksək dövlət təltifi üçün sənədlər hazırlanır.

Bu da bir təskinlik idi. Amma Gülbəniz xanımı indi daha çox Füzulinin vəsiyyətinə əməl etmək düşündürürdü: “...Uşaqları sənə tapşırıram, onları yaxşı böyüt”. Üç körpələri vardı: Aygın, Elnur, Aynur. Hələ dünyanın yaxşı-yamanını dərk etməyən bu uşaqlar nələr baş verdiyini doğru-dürüst anlaya bilmirdilər.

...Füzulisiz keçən günlər, aylar nə qədər sıxıntılı olsa da zaman ötürdü, il-ilə qovuşurdu. Daha uşaqlar da böyümüşdü, köçüb Bakıda yaşayırdılar. Gülbəniz xanım da fərəh hissi keçirirdi ki, həyat yoldaşının vəsiyyətinə düzgün əməl edib, tərbiyəli övladlar böyüdüb. Və bir gün...

Gülbəniz xanım danışır:

— 2008-ci ilin noyabr ayının 20-si idi. Mənə zəng vurub dedilər ki, Bərdə Rayon Hərbi Komissarlığına gəlməlisən. Nə məsələ olduğunu bilməsəm də təcili getdim. Məlum oldu ki, Azərbaycan Prezidenti İlham Əliyev 2008-ci il 25 iyun tarixli sərəncamı ilə Füzulini “Hərbi xidmətlərə görə” medalı ilə təltif edib. Böyük bir mərasim qurulmuşdu. Medalı mənə təqdim etdilər. Bu təltifin yolunu düz 14 il idi gözləyirdik. Doğrudan da, heç kəs unudulmurmuş, heç nə yaddan çıxmırmış. Bütün ailəmiz adından dövlət başçımıza minnətdarıq.

...Yenə acılı-şirinli xatirələr, yenə Füzulili, Füzulisiz ötüşən illər. Gülbəniz xanım kövrələ-kövrələ danışır, göz yaşlarını saxlaya bilmir. İndi bu göz yaşlarında kədər olduğu kimi, sevinc də var. Füzulinin Vətən qarşısında xidmətləri dövlət başçısı İlham Əliyev tərəfindən yüksək qiymətləndirilmişdir.

Vahid İMANOV

Xalq qəzeti.-2008.- 28 dekabr.- S.7.