Hökməli: yeniləşir, gözəlləşir

Abşeron rayonunun tarixində 2005-ci ilin ikinci yarısı xüsusi əhəmiyyət daşıyır. Zakir Fərəcovun rayona rəhbər təyin olunmasından sonra bu rayonun həyatında yeni, həm də uğurlu bir mərhələ – inkişaf mərhələsi başlayır. Bu inkişaf eyni zamanda böyüklüyündən – kiçikliyindən asılı olmayaraq, rayonun bütün yaşayış məntəqələrini əhatə edir.

Ötən beş il ərzində Hökməli qəsəbəsində sosial-iqtisadi inkişafın sürətləndirilməsi istiqamətində bir sıra əsaslı tədbirlər həyata keçirilmiş, illərlə yığılıb qalmış problemlərin həll edilməsi üçün əhəmiyyətli tədbirlər həyata keçirilmişdir. Əlbəttə, əsas məsələ arzu və istəyin, qurub-yaratmaq həvəsinin ötəri yox, güclü olmasıdır, çünki belə olan halda hər bir çətinliyin, müşkülün öhdəsindən gəlmək mümkün olur.

Hökməlililərin böyük hörmət və ehtiramla yanaşdıqları bələdiyyənin sədri Mirnemət Miradıyevi əhali arasında sevdirən nüfuzunu artıran əsas amil onun qəsəbənin problemlərinin həllinə ürəklə girişməsi və camaatın qayğılarına, dərd-sərlərinə şərik çıxmasıdır.

Hökməli qəsəbəsində son illər ərzində görülən işlərin keyfiyyətini artıran əsas amillərdən biri də səylərin birləşdirilməsidir. Atalar demişkən, el bir olsa dağ oynadar yerindən. Hökməli Abşeron rayonunun su sarıdan korluq çəkən yaşayış məntəqələrindən biridir. Buna görə də qəsəbənin ilk növbədə su ilə təchizatı ilə bağlı həyata keçirilmiş təbirləri qeyd etmək yerinə düşər.

Belə ki, son illər burada sahəsi 80 kvadratmetrdən ibarət, iki nasoslu su nasosxanası tikilib istifadəyə verilmiş, diametri 100 millimetrlik, 500 metr uzunluğunda su xətti yenisi ilə əvəz olunmuş, qaçqınlar üçün salınmış yeni yaşayış massivində 800 metr uzunluğunda su xətti çəkilmişdir. Hökməli sakinlərinin mavi yanacağa olan tələbatını yaxşılaşdırmaq məqsədilə sahəsi 36 kvadratmetr olan qazpaylayıcı stansiya tikilmiş və 1500 metr uzunluğunda yeraltı qaz xətti yerüstü qaz xətti ilə əvəz edilmişdir.

Qaçqınlar üçün salınmış yeni yaşayış massivində 300 millimetr diametrində 13000 metr uzunluğunda kanalizasiya xətti çəkilmişdir.

Ərazinin səliqəyə salınması, abadlıq-quruculuq işlərinin sürətləndirilməsi üçün əhəmiyyətli addımlar atılır. Bu addımlardan biri də küçələrə 30000 kubmetr qum-çınqıl əsasının verilməsidir ki, bunun da nəticəsində daxili yollarda insanların və avtomobillərin hərəkəti xeyli yaxşılaşmışdır. Əlbəttə, qeyd edildiyi kimi, bu istiqamətdə işlərin daha qətiyyətlə aparılması qəsəbənin sosial-iqtisadi inkişafına hesablanmış fəaliyyət planında əsas yerlərdən birini tutur. Çünki məlum həqiqətdir ki, yolu abad olmayan yerin heç bir yaxşı işindən danışmağa dəyməz.

Hökməli qəsəbəsində elektrik enerjisi ilə təminatda yaranmış boşluqları və çətinlikləri aradan qaldırmaq üçün son illər iki 1000 kv-lıq, beş 400 kv-lıq,iki 250 kv-lıq, ümumilikdə doqquz ədəd transformator alınaraq quraşdırılmışdır. Bundan başqa qəsəbədə və Hökməli bələdiyyəsinin ərazisi olan “Atyalı” yaşayış massivində 7 metr hündürlüyündə 16 ədəd dirək basdırılmış, 6 kilometr elektrik naqili çəkilmiş və 600 metr uzunluğunda köhnə elektrik naqili yenisi ilə əvəz olunmuşdur.

Hökməli qəsəbə bələdiyyəsində sosial məsələlərin, xüsusilə də qayğıya möhtac insanların problemlərin həllinə mühüm əhəmiyyət verilir. Buna misal olaraq qeyd etmək lazımdır ki, bələdiyyənin vəsaiti hesabına üç imkansız ailəyə ev tikilmiş, səkkiz evin dam örtüyü dəyişdirilmiş, 480 imkansız ailənin 43500 manat həcmində elektrik enerjisindən, 200 ailənin 12000 manat həcmində qazdan, 80 ailənin 2400 manat həcmində sudan istifadəyə görə yaranmış borcları ödənilmişdir. Hər il əlamətdar günlərdə və müqəddəs bayramlarda “Atyalı” yaşayış massivində yaşayan 1000 ailəyə, həmçinin imkansız, əlil və şəhid ailələrinə maddi yardımların edilməsi artıq ənənə halını almışdır.

Sahəsi 100 kvadratmetrlik, 5 otaqlı polis məntəqəsinin tikintisi, tibb məntəqəsinin və orta məktəbin qazanxanalarının tikilib istifadəyə verilməsi son illər qəsəbədə görülmüş işlərin yalnız bir qismidir. Sakinlərə tibbi xidmətin səviyyəsini yüksəltmək üçün müstəsna əhəmiyyət kəsb edən işlərdən biri də sözsüz ki, iki ambulatoriyanın tikilməsidir. Bu ambulatoriyalardan biri müasir standartlar səviyyəsində tikilərək istifadəyə verilmiş, digərində isə tikinti aparılır. Hökməli qəsəbəsində, eləcə də bələdiyyənin ərazisinə daxil olan yeni yaşayış massivlərində küçə və dalanların, evlərin ünvanlaşdırılmasını da təqdirəlayiq hal saymaq olar.

İllər boyu baxımsız qalmış qəsəbə uşaq bağçasının, klubun və kitabxananın əsaslı təmir olunması isə hökməlililərin ürəyincə olmuş, “Atyalı” yaşayış massivində nəqliyyat xidmətinin səviyyəsini və keyfiyyətini yüksəltmək üçün iki ədəd avtobusun verilməsi, məişət tullantılarının mütəmadi olaraq təmizlənməsi və ərazidən daşınması sakinlərin ölkə, rayon və yerli rəhbərliyə qarşı inam və etimadının daha da yüksəlməsinə əsaslı surətdə təsir göstərmişdir. Qəsəbə orta məktəbinin, eləcə də ərazidə yerləşən Qubadlı rayon 3 saylı Xanlıq orta və Laçın rayon Qozlu kənd orta məktəblərinin həyətlərinin asfaltlaşdırılması və mişar daşı ilə hasara alınması, həmçinin 3 saylı Xanlıq orta məktəbinə əlavə olaraq iki sinif otağının tikilməsi və bu məktəblərdə oxuyan min şagirdə mütəmadi olaraq hər Yeni il bayramı münasibətilə bayram hədiyyələrinin verilməsi, yeni dərs ilində şagirdlərin dərs və idman ləvazimatları ilə təmin olunmaları təhsilə xüsusi diqqət və qayğı ilə yanaşmadan xəbər verir. Əlbəttə, Hökməli qəsəbəsində bələdiyyənin fəaliyyətindən, sosial-iqtisadi inkişafın sürətindən, görülmüş işlər barədə kifayət qədər danışmaq olar. Çünki həcm də, keyfiyyət də çoxdur. Ancaq onu xüsusi qeyd etmək yerinə düşər ki, burada yalnız görülmüş işlərlə arxayınlaşıb qalmırlar, fəaliyyət proqramını daha çox uğurlu gələcəyə hesablayırlar.

Səməd HÜSEYNOĞLU,

“Xalq qəzeti”nin bölgə müxbiri

Xalq qəzeti.- 2009.- 20 dekabr.- S. 6.