Nəfəs və zərb alətlərinə maraq çoxalıb

Artıq bir neçə ildir ki, Bakı Şəhər Mədəniyyət və Turizm İdarəsi nəzdində şəhərimizdəki uşaq musiqi və incəsənət məktəblərinin direktorlar şurası fəaliyyət göstərir. Yanvarın 30-da şuranın təqvimi iş planına əsasən V.Mustafazadə adına 2 saylı uşaq incəsənət məktəbində nəfəs və zərb alətləri ixtisası üzrə dərs alan şagirdlərin konserti oldu.

On gün bundan öncə başa çatmış seçim turunda 50-ə yaxın gənc istedad iştirak etsə də, direktorlar şurası yalnız 22 ifaçıya konsertdə öz məharətlərini göstərmək imkanı verdi. Əgər 4-5 il bundan öncə respublikamızda nəfəsli alətlərə maraq az idisə, bu gün artıq bu sözü demək olmaz. Əksər musiqi məktəblərimizdə bu alətlərə maraq çoxalmışdır. Bu, ilk növbədə Mədəniyyət və Turizm Nazirliyinin bu sahəyə yönəltdiyi diqqət və qayğının nəticəsidir. 2006-cı ildə nazirliyin xətti ilə Yaponiyadan ölkəmizə bir çox nəfəsli alətlər, o cümlədən klarnet, trombon, fleyta, qaboy, saksafon, zərb alətlərindən silafon, vibarafon, eləcə də metolofon gətirilərək uşaq musiqi məktəblərinə hədiyyə verilmişdir.

Son illərdə istedadlı gənclərin çoxaldığını nəzərə alan möhtərəm Prezidentimiz İlham Əliyev onların yaradıcılıq həvəsini stimullaşdırmaq üçün gənc istedadlara Prezident təqaüdü təsis etmişdir. “Artıq bu sahədə də incəsənətimizi dünya ölkələrində təmsil edəcək layiqli musiqiçilərimizin yetişməsi bizi sevindirir” — deyə konserti açan şuranın sədri Rafiq Əzizov daha sonra — bu gün ölkəmizdə 5 simfonik orkestrin fəaliyyət göstərdiyini, məhz bu istedadların sayəsində belə kollektivlərin yaxın gələcəkdə 7-8-ə çatacağına ümid etdiyini dedi.

Konsertdə respublika Mədəniyyət və Turizm Nazirliyinin elm və təhsil sektorunun müdiri Vaqif Babayev, Bakı Şəhər Mədəniyyət və Turizm İdarəsinin şöbə müdiri İntiqam Əliyev, musiqi məktəblərinin direktorları, eləcə də valideynlər iştirak edirdilər.

Konsertdə L. və M. Rastropoviçlər adına 21 nömrəli UMM-nin IX sinif şagirdi Prezident təqaüdçüsü Sabir Rəsulovun, “Moskva-2008 – Yeni adlar” beynəlxalq müsabiqəsinin diplomantı, 24 nömrəli UMM-nin V sinif şagirdi Elçin Əliyevin, Ş.Ələkbərova adına 20 nömrəli UMM-nin II sinif şagirdi Mehdi Mehdiyevin, Ə.Bakıxanov adına 6 nömrəli UMM-nin V sinif şagirdi Zaur Hacıyevin, Q.Qarayev adına 8 nömrəli UMM-nin V sinif şagirdi Xasay Əliyevin və digər istedadların çıxışları tamaşaçılar tərəfindən hərarətlə qarşılandı.

Rafiq SALMANOV

Xalq qəzeti.-2009.-1 fevral.-S.8.