Mahmud Abbas Qahirədə Qəzzə üçün sülh axtarışındadır

İsrail isə sektor ərazisinə aviasiya zərbələri endirməkdə davam edir

Fələstin muxtariyyətinin rəhbəri Mahmud Abbas dünən Misirə gəlib. Səfərdə məqsəd Prezident Hüsnü Mübarəklə Qəzzə sektorunda davamlı atəşkəsə nail olunması üçün danışıqlar aparmaqdır.

Misir İsrail və HƏMAS arasında vasitəçilik missiyasını həyata keçirir. Mahmud Abbas isə HƏMAS-ı Qəzzədə dinc sakinlərin həyatını təhlükəyə atmaqda ittiham edir və təşkilatı onun hakimiyyətinə tabe olmağa çağırır.

Fələstin administrasiyası rəhbərinin Qahirədə danışıqlar aparması əsasən İsrailin ərazisinə raket zərbələri endirilməsinə cavab olaraq Qəzzə sektorunu bombardman etməsi ilə bağlıdır. Misirin hakimiyyət orqanları İsrail nümayəndələri, İordan çayının qərb sahilinə nəzarət edən FƏTH və Qəzzə sektoruna nəzarət edən HƏMAS hərəkatlarının rəhbərləri ilə separat danışıqlar aparır. Hüsnü Mübarək Misirdən Qəzzəyə sərhəd zolağında açılmış tünellər vasitəsilə silah qaçaqmalçılığının qarşısını almaq və tərəflər arasında uzunmüddətli atəşkəsə nail olmağa çalışır.

Artıq HƏMAS nümayəndələri də danışıqlar aparmaq üçün Qahirəyə gəliblər. Ancaq Mahmud Abbas qətiyyətlə bildirib ki, HƏMAS rəhbərliyinin mövqeyinə əsaslanaraq Fələstin Azadlıq Təşkilatının üstün hakimiyyətini qəbul etməyənlərlə danışıqlara girməyəcək. Hazırda FƏTH və HƏMAS 2007-ci ilin ortalarında ikincilərin Qəzzədə hakimiyyəti ələ keçirəndən sonra düşmənçilik edirlər. Mahmud Abbas dəfələrlə bəyan edib ki, opponentləri fələstinlilərin taleyini təhlükə qarşısında qoyur, onların müstəqil dövlət yaratmaq ümidlərini heçə endirir.

Qeyd edək ki, keçən həftənin bazar günü İsrail aviasiyası HƏMAS-ın Qəzzənin mərkəzi hissələrindəki obyektlərinə zərbələr endirib, eyni zamanda, Misirə açılan tunelləri bombardman edib. Ölən və yaralananlar barədə məlumat verilməyib. Şahidlərin sözlərinə görə, aviazərbələrin əsas hədəfi polis sahə məntəqəsinin boş qalmış binası olub, ətrafda yaşayan sakinlər evlərini tərk etmək məcburiyyətində qalıblar.

İsrailin Baş naziri Ehud Olmert bazar günü hökumətin iclasında bəyan edib ki, ölkəsinin hərbi qüvvələri Qəzzə tərəfdən atılan raket zərbələrinə qeyri-proporsional cavab verəcək. Rəsmi Tel-Əvivin açıqladığı məlumata görə, fevralın 1-də ölkə ərazisinə Qəzzədən azı 4 raket atılıb. Onlardan biri Eşkol şəhərindəki iki uşaq bağçasının arasında partlayıb. Məlumata görə, şənbə günü atılan bir raket Aşkolen şəhərinin yaxınlığına düşüb. Ondan əvvəlki günlərdə isə daha iki raket atıldığı qeydə alınıb. Zərbələr nəticəsində ölən və yaralanan olmayıb.

İsrail tərəfi tələb edir ki, ölkənin raket atəşinə tutulmasına son qoyulmalıdır. Həmçinin Qəzzəyə qeyri-leqal yollarla silah-sursat gətirilən kanallar bağlanmalıdır. HƏMAS-ın tələbi isə ondan ibarətdir ki, Qəzzə ilə sərhəddəki keçid məntəqələri açılmalı, sektorun ilyarım bundan əvvəl başlanmış blokadasına son qoyulmalıdır. Hazırda beynəlxalq ictimaiyyət Yaxın Şərqdə daimi sülh yaradılması istiqamətində səylərini davam etdirir. Misir isə bu məqsədlərin reallaşdırılması üçün İsrail tərəfi və HƏMAS-la danışıqlar aparır. Mahmud Abbasın Misirə hazırkı səfəri də bu məqsədə xidmət edir.

Paşa ƏMİRCANOV

Xalq qəzeti.-2009.-3 fevral.-S.6.