Azərbaycanın qüdrətli ordusu var

Xəbər verildiyi kimi, Milli Məclisin deputatlarından Həvva Məmmədova, Baba Tağıyev, Aydın Həsənov, Fuad Muradov, Rövşən Rzayev və bir qrup mətbuat nümayəndəsi Füzuli rayonundakı “N” saylı hərbi hissədə olmuş, əsgər və zabitlərlə görüşmüş, onların şəraitləri ilə yaxından tanış olmuş, birgə nahar etmişlər.

Əməkdaşımız deputatlardan Həvva Məmmədova və Baba Tağıyevlə görüşüb səfər təəssüratları barədə ətraflı məlumat vermələrini xahiş etmişdir.

Həvva MƏMMƏDOVA, Milli Məclisin deputatı:

— Bildiyiniz kimi, Azərbaycan ərazisinin 20 faizi işğal altındadır. Ermənistanın Azərbaycana təcavüzü bu gün də davam edir. Bir milyondan artıq soydaşımız qaçqın və məcburi köçkün kimi ağır şəraitdə yaşayır. Buna baxmayaraq, Azərbaycanın çox güclü, qüdrətli Milli Ordusu var. Bu ordu işğal altında olan torpaqlarımızı hər an azad etməyə qadirdir. Lakin biz münaqişənin sülh yolu ilə nizamlanmasını istəyirik. Bu, dövlət başçımızın yeritdiyi siyasətin prioritetini təşkil edir. Möhtərəm Prezidentimiz, Azərbaycan Silahlı Qüvvələrinin Ali Baş Komandanı cənab İlham Əliyev dəfələrlə bəyan edib ki, bizim siyasətimiz sülh siyasətidir. Əgər bu, bir səmərə verməsə, biz o zaman işğal altında olan ərazilərimizi Milli Ordumuzun gücü ilə azad edəcəyik. Biz buna qadirik. Milli Ordumuzun şəraiti, əsgər və zabitlərin əhval-ruhiyyəsi ilə yaxından tanış olmaq məqsədilə Füzuli rayonundakı “N” saylı hərbi hissəyə getdik. Ümumiyyətlə, hər birimizin arzusu, istəyi döyüşən ordumuzla əlbir olmaqdan ibarətdir. Onlara mənəvi dayaq olmalı, yüksək əhval-ruhiyyə bəxş etməliyik. Hesab edirəm ki, Milli Orduya həm parlamentin, həm də ictimaiyyətin diqqəti güclənməlidir. Biz “N” saylı hərbi hissənin bir neçə bölüyündə olduq. Baş çəkdiyimiz bölüklərdə əsgərlərlə görüşdük, onların döyüş hazırlıqları ilə yaxından tanış olduq. Şahidi olduq ki, bu gün əsgərlərimiz ən müasir silahlarla silahlanıblar. Onların geyimləri, ərzaq təminatları, yatacaq yerləri çox yaxşıdır. Biz, hətta onlarla birlikdə nahar da etdik. Gördüklərimiz həm deputatları, həm də mətbuat nümayəndələrini məmnun etdi. Bir daha əmin olduq ki, Azərbaycan Prezidentinin, Silahlı Qüvvələrin Ali Baş Komandanının, Müdafiə Nazirliyinin, təcrübəli generalların və digərlərinin ordu quruculuğu sahəsindəki əməyi hədər getməyib. Həqiqətən də, bizim güclü, nizami ordumuz formalaşıb. Getdiyimiz yer hərbi səhra şəraitindədir. Ancaq gəlin görək belə bir yerdə necə hərbi hissə yaradılıb? Əsgər və zabitlər üçün necə şərait qurulub? Oradakı nizam-intizam, əsgər-zabit münasibəti, mehribançılıq, səmimiyyət adama çox xoş təsir bağışlayır. Bütün bunlarda bizimlə bərabər hərbi hissədə olan korpus komandiri, general Mahmud Həmzəyevin rolu böyükdür. Biz hərbi hissə və bölük komandirlərinin əsgərlərlə xoş münasibətlərinin şahidi olduq.

Bilirsinizmi, hərbin öz qanunları, tələbləri var. Heç kim bu qanunlardan, tələblərdən kənara çıxa bilməz. Hər bir əsgər və zabitin ən birinci borcu qanunlara riayət etməkdir. Biz bu qayda-qanunlara ciddi əməl olunmasının, yüksək əhval-ruhiyyəli hərbçilərimizin döyüş hazırlığının şahidi olduq. Çox sevindik və bir daha əmin olduq ki, etibarlı, inamlı, qüdrətli ordumuz var. Dövlətimizin yeritdiyi uğurlu daxili və xarici siyasətdən qısqanclıq hissi keçirən bəzi bədxahlar, həmçinin düşmənlərimiz Milli Ordumuzu gözdən salmaq üçün müxtəlif yalanlar, şayiələr uydurur, valideynlər arasında çaşqınlıq yaratmağa cəhd edirlər. Onlar orduda neqativ halların baş verməsi, əsgərlərlə zabitlər arasında münaqişələr yaranması, guya əsgərlərə işgəncələr verilməsi barədə yalan məlumatlar yayırlar. Təbii ki, bu, əks təbliğatların heç bir təsiri olmur. Çünki bunlar yalan üzərində qurulub. Görünür, həmin qüvvələrin Ermənistan ordusundan xəbərləri yoxdur. Ermənistanda gənclər açıq şəkildə həqiqi hərbi xidmətdən boyun qaçırırlar. Yerli əhalinin əksəriyyəti xarici ölkələrə köçür. Valideynlər də öz uşaqlarını hərbi xidmətə göndərməkdən imtina edirlər. Çünki Ermənistanın hərbi hissələrində aclıq hökm sürür. Əsgərlər soyuqdan yoluxucu xəstəliklərə tutulublar. Orduda ölüm halları ildən-ilə çoxalır. Ona görə də hakimiyyət muzdlu döyüşçülər tapır. Hazırda Ermənistan ordusunun əsasını muzdlu döyüşçülər təşkil edir. Azərbaycanın bütün sərhəd xəttində yerləşdirilmiş erməni əsgərlərinin hamısı xarici ölkələrdən gəlmiş muzdlu döyüşçülərdir. Ermənilərin hücumlarının qarşısını alarkən öldürülmüş əsgərin muzdlu döyüşçü olduğu bəlli olub. Biz cəbhə bölgəsində olarkən bunu gördük. Onlara qondarma erməni adları qoyulur və sərhəd bölgələrində yerləşdirilir. Bu gün Azərbaycan Ordusunda fərari yoxdur. Hamı həqiqi hərbi xidmətə könüllü olaraq gedir. Valideynlər öz övladlarını hərbi xidmətə göndərməkdən qürur hissi keçirirlər. Gənclərimizdə Vətənə məhəbbət, hərbi və vətənpərvərlik hissləri getdikcə güclənir. Bu inam dövlət başçımızın uğurlu xarici siyasətinin, Milli Orduya, hərbi sahənin inkişafına, nizam-intizamın möhkəmləndirilməsinə göstərdiyi diqqət və qayğının nəticəsidir. Biz cəbhə bölgəsində olarkən bunun daha yaxından şahidi olduq.

Baba TAĞIYEV, Milli Məclisin deputatı:

— Biz cəbhə bölgəsində olarkən ümumi rəyimiz belə oldu ki, əsgərlərimizin hərbi hazırlıq səviyyəsi kifayət qədər yüksəkdir. Əsgər və zabitlərin hərbi hazırlıqlarından başqa, Milli Ordumuzun kifayət qədər müasir hərbi texnika, avadanlıqlarla tam təmin olunduğunu gördük. Mən çox əminliklə deyirəm ki, Azərbaycan Ordusunun bugünkü maddi-texniki təchizat bazasının güclü olması, əsgərlərimizin milli və hərbi ruhunun düşmən əsarətindəki ərazilərimizin azad olunması üçün yüksək olması xalqımıza çox böyük ümidlər verir. Əgər sülh danışıqları nəticəsiz qalarsa, Azərbaycan Ordusu öz torpaqlarını azad etməyə qadirdir. Biz cəbhə bölgəsində olarkən əsasən nəyi müşahidə etdik? Bu, təkcə bizim bir günlük səfərimizdən sonra gəldiyimiz qənaət deyil, uzun müddət apardığımız araşdırmaların nəticəsidir. Qətiyyətlə deyə bilərəm ki, Azərbaycan torpaqları işğal altında qalmayacaq. Azərbaycan xalqı, Azərbaycan dövləti gec-tez bu işğala son qoyacaq, torpaqlarımızı düşmən əsarətindən mütləq azad edəcəkdir. Xalqımız sülhsevər olduğuna görə nahaq qan tökülməsini istəmir və işğalçıların könüllü olaraq çıxıb getmələrini tələb edir. Əgər onlar ərazilərimizi tərk etməsələr, biz qüdrətli ordumuzun gücü ilə buna nail olacağıq. Mən əminəm ki, Azərbaycan Ordusu möhtərəm Prezidentimiz, Silahlı Qüvvələrin Ali Baş Komandanı cənab İlham Əliyevin göstərişindən sonra 48 saat ərzində bütün erməni ordu birləşmələrinin istehkamlarını, qurğularını darmadağın edərək, onları düz Ermənistan sərhədlərinə qədər qovmağa qadirdir. Mən buna tam əminəm və inanıram. Cəbhədə olarkən, Milli Ordumuzun əsgər və zabitlərinin döyüş hazırlığını görərkən buna bir daha əmin oldum.

Cəbhə bölgəsindəki əsgər və zabitlərlə xeyli söhbət etdim. Kimsə şəraitdən, yeməkdən, geyimdən, əsgərlər arasında ayrı-seçkilik qoyulmasından gileylənmədi. Kimsə deyirsə ki, qabaqcadan hərbi xidmətə gələn əsgərlər yeni gələnlərə əzab-əziyyət verir, zabitlər sıravi əsgərləri incidir, bunlar uydurmadır, qazanılan uğurlara kölgə salmaq istəyənlərin böhtanlarıdır. Bu yalanlar bəzi xəstə təxəyyüllü qəzet müxbirlərinin və araqarışdıranların “məhsuludur”. Onlar əsası olmayan yalanlarla, şantajlarla ordumuzu gözdən salmağa çalışırlar. Belə xəbisliyə heç kim inanmır. Çünki valideynlərin özləri də tez-tez əsgərlərlə görüşür, onların vəziyyətləri ilə tanış olurlar. Söz yox ki, inkişaf etmiş ölkələrdə, hətta Amerika Birləşmiş Ştatlarında da orduda müəyyən çatışmazlıqlar, problemlər olur. Heç bir ölkədə ideal, nöqsansız ordu yoxdur. Əsas odur ki, Azərbaycanın güclü, qüdrətli, nizami Milli Ordusu var. Bu ordunun əsas bünövrəsi ümummilli liderimiz Heydər Əliyev tərəfindən qoyuldu və möhtərəm Prezidentimiz cənab İlham Əliyev tərəfindən daha da inkişaf etdirildi. Mən bunun şahidi oldum. Əsgər və zabitlərimizin səliqəli, isti geyimləri adamın zövqünü oxşayır. Biz orada olarkən hava çox soyuq idi. Mən əvvəl-axır əsgər paltarında oldum, hara getdiksə, bu paltarla getdim. Əsgərlərin hamısı həmin paltardan geyinmişdi. Mən havanın soyuqluğunu hiss etmədim.

Bir daha qətiyyətlə deyirəm ki, düşmənə layiqli müqavimət göstərməyə, işğal altında olan ərazilərimizi qısa vaxt ərzində azad etməyə güclü, qüdrətli ordumuz var.

Söhbəti yazdı:

Əliqismət BƏDƏLOV

Xalq qəzeti.-2009.-5 fevral.-S.4.