Obama Rusiyaya nüvə arsenalının azaldılmasını
təklif etdi
ABŞ prezidenti Barak
Obama nüvə arsenalının yarıyadək
azaldılmasıyla bağlı Rusiya tərəfinə təklif
göndərib. Böyük Britaniyada nəşr edilən
“Times” qəzetinin yazdığına görə, Ağ evin
yeni sahibi hər iki ölkənin malik olduğu nüvə
silahlarının sayının 80 faizə qədər
azaldılmasını vacib hesab edir.
Təklif olunan ixtisarlara
görə, hər iki ölkənin nüvə
başlıqlarının sayı mindən artıq
olmamalıdır. Qəzetin məlumatına görə,
adı çəkilən məsələ ilə əlaqədar
xüsusi komitə də yaradılacaq. Həmin komitəyə
ölkənin keçmiş prezidenti Bill Klintonun
dövründə ABŞ-ın nüvə məsələlərinin
həlli ilə məşğul olan rəsmi nümayəndəsi
Qari Seymur başçılıq edəcək. Maraqlıdır
ki, bu məsələdəki məsləhətləşmələrə
dövlət katibi Hillari Klinton rəhbərlik edə bilər.
Ehtimallara görə,
burada əsas məqam Buş administrasiyası dövründə
ABŞ tərəfindən Avropanın əksər ölkələrində
yerləşdirilən Raket Əleyhinə Müdafiə (RƏM)
sistemindən imtina edilib-edilməyəcəyi məsələsidir.
Hansı ki, rəsmi Moskva adı çəkilən sistemlərin
yerləşdirilməsinin qəti əleyhinədir. Rusiya tərəfi
Amerika raketlərinin öz sərhədləri
yaxınlığında yerləşdirilməsini ölkənin
təhlükəsizliyi üçün arzuolunmaz olduğunu bəyan
edir. Hətta Rusiya prezidenti Dmitri Medvedev buna cavab olaraq uzaq mənzilli
“İsgəndər” raketlərini Avropa ilə həmsərhəd
olan ərazilərə yerləşdirilməsi barədə
xüsusi tapşırıq vermişdi.
Həmçinin o da qeyd
olunur ki, nüvə arsenalının azaldılması ilə
bağlı olacaq bu razılaşma Böyük Britaniyaya da
şamil ediləcək. Məlumat üçün deyək
ki, bu ölkə 160 ədəd nüvə
başlığına malikdir.
Xatırlatmaq yerinə
düşər ki, seçkiqabağı
çıxışlarında Barak Obama Avropa qitəsində
RƏM-lərin yerləşdirilməsinə etiraz etməyəcəyini
bildirmişdi. Lakin bu o halda baş verə biləcək ki, həmin
sistemin lazımi effekti verə biləcəyi sübut olunsun.
Göründüyü
kimi, ABŞ-la Rusiya arasında ciddi fikir ayrılıqları
mövcuddur. Bunu nəzərə alan yeni prezident Barak Obama
yaxın aylarda Rusiyaya səfər etmək fikrindədir. Ehtimallara
görə, Obama Moskvaya apreldə yola düşəcək.
Sözsüz ki, səfər zamanı əsas müzakirə
mövzusu Raket Əleyhinə Müdafiə Sistemi və
nüvə arsenalının azaldılması olacaq.
Mahmud QƏZƏNFƏROĞLU
Xalq qəzeti.-2009.-5 fevral.-S.6.