Avropa Şurası Parlament Assambleyasının qış sessiyasında

Azərbaycanın AŞPA-dakı nümayəndə heyəti ayrı-ayrı ölkələrə münasibətdə ikili standartları yolverilməz hesab edir

Avropa Şurası Parlament Assambleyasının qış sessiyası öz işini başa vurdu. Hər dəfə olduğu kimi bu sessiyada da Azərbaycan nümayəndə heyətinin üzvləri fəal olmuş, ölkəmiz üçün mühüm əhəmiyyət kəsb edən məsələlər qaldırmış, bir sıra sənədlərin yayılmasına nail olmuşlar.

Qış sessiyasının yekunları bir daha təsdiqlədi ki, AŞPA bu dəfə də ikili standartlarından əl çəkmir, ölkələr arasında ayrı-seçkilik edir. Bu qurum qarşısına götürdüyü öhdəlikləri yerinə yetirən, insan hüquq və azadlıqlarının müdafiəsi istiqamətində uğurlu işlər görən, müstəqil mətbuatın fəaliyyətinə geniş meydan ayıran ölkələrdə “siyasi məhbus” axtarışına çıxır. Ancaq bu təşkilat qarşısında götürdüyü öhdəlikləri yerinə yetirməyən, beynəlxalq hüququn norma və prinsiplərinə hörmətsizlik edən, AŞPA-nın qərarlarını saya salmayan Ermənistana qarşı heç bir sanksiya tətbiq etmir. Əksinə, Ermənistana əvvəlki illərdə olduğu kimi vəziyyəti düzəltmək üçün yenə də vaxt verildi. Qış sessiyasının işində iştirak edən digər ölkələrin deputatları da AŞPA-nın Ermənistana qarşı yumşaq mövqeyinə etiraz edərək ciddi tədbir görülməsini tələb etmişlər.

Azərbaycanın Avropa Şurası Parlament Assambleyasındakı nümayəndə heyətinin rəhbəri Səməd Seyidov qurumun qış sessiyasının yekunu ilə əlaqədar danışarkən dedi ki, Azərbaycan Avropa Şurası qarşısında üzərinə götürdüyü öhdəliklərin hamısını vaxtlı-vaxtında, ləyaqətlə yerinə yetirib. Yalnız “Alternativ xidmət haqqında” Qanun qəbul edilməyib. Bu da mövcud reallıqlardan irəli gəlir. Çünki Azərbaycan Ermənistanla müharibə şəraitindədir.

Səməd Seyidov daha sonra dedi:

— Avropa Şurasının üzvü olan 47 ölkədən kimsə deyə bilməz ki, Azərbaycan öz üzərinə götürdüyü öhdəliklərin tam yerinə yetirilməsində hansısa bir problem yaradıb. Qeyd etdiyim kimi, bu öhdəliklər sırasında yerinə yetirilməyən “Alternativ xidmət haqqında” Qanundur. Bu da Avropa Şurasının ekspertləri ilə birlikdə işlənilib, lakin mövcud reallıqla əlaqədar hələlik qəbul edilməyib. Mövcud reallıqlar barəsində də məlumat verdim. Ancaq buna baxmayaraq, hətta bu öhdəliyin də yerinə yetirilməsində Azərbaycan israrlıdır. Lakin Azərbaycan öz tərəfindən Avropa Şurası ilə münasibətləri yüksək səviyyədə təşkil etməklə yanaşı, bu qurumdan da təxminən eyni münasibəti gözləyir. Avropa Şurası ilə münasibətlərində normal əməkdaşlıq gözləniltilərində olan Azərbaycan tamamilə başqa, heç bir normal məntiqə uyğun olmayan münasibətləri və həqiqətləri görür. Heç kim üçün sirr deyil ki, Azərbaycanda keçirilmiş son seçkilər, xüsusilə prezident seçkiləri bütün dünya ictimaiyyəti tərəfindən demokratik, ədalətli, beynəlxalq standartlara uyğun şəkildə keçirilmiş seçkilər kimi qəbul edilib. Bunu təkcə Azərbaycan əhalisi yox, Avropada fəaliyyətdə olan və Avropanı təmsil edən deputatların, ekspertlərin və politoloqların rəyləri də təsdiqləyirlər. Bu günlərdə Azərbaycan Televiziyasında Böyük Britaniyada tanınmış və hamı tərəfindən hörmət edilən lord Tomsonun çıxışını yəqin ki, çoxları izləyib. O dedi ki, Azərbaycanda keçirilmiş prezident seçkiləri Avropa standartlarına uyğun şəkildə təşkil olunmuş və ən demokratik, şəffaf şəkildə keçirilmiş seçkilər kimi qiymətləndirilməlidir. Bu şəkildə, yüksək səviyyədə qiymətləndirilən ölkəni siyasi məhbuslarla dolu olan, günahsız insanları vəhşicəsinə qətlə yetirilən, müstəqil mətbuata qadağalar qoyan, hətta interneti bağlayan, qeyri-hökumət təşkilatlarının inkişafına şərait yaratmayan, onları ölkədən kənara buraxmayan, insan hüquq və azadlıqlarını kobud şəkildə pozan ölkə ilə bir sıraya qoymaq qeyri-obyektiv və dözülməz münasibətdir.

Avropa Şurasının qış sessiyasında Ermənistan məsələsi müzakirə olunmuşdur. Bizim gözlədiklərimiz ondan ibarət idi ki, heç olmasa, bu dəfə Ermənistanı tənqid etsinlər. Axı bu ölkədə baş verən biabırçılıqılar barəsində Avropa Şurasının mükəmməl məlumatı var. Hamıya məlumdur ki, Ermənistana bu qurum tərəfindən himayədarlıq edilir və dəstəklənir. Heç olmasa, görüntü xatirinə, hansısa prosesləri düzgün şərh etmək imkanını saxlamaq naminə Ermənistanı tənqid edəydilər. Xəbər verildiyi kimi Ermənistanda 100-dən çox insan siyasi əqidəsinə görə həbs edilib. Ötən il martın 1-də dinc aksiya keçirilən zaman 12 nəfər vəhşicəsinə qətlə yetirilib. Digər nöqsanlar da göz qabağındadır. Qış sessiyasının başlanmasından bir qədər əvvəl Ermənistanda olmuş AŞPA-nın həmməruzəçiləri bütün bunlar barəsində kifayət qədər faktlar toplamışdılar. Lakin qış sessiyasında bu barədə bir kəlmə də olsun danışılmadı. Heç olmasa, qurumun rəhbərliyi etiraf edərdi ki, Ermənistanla bacara bilmirlər, ona görə də bu ölkəni səsvermə hüququndan məhrum edə bilmirlər. Dəstək verməklə, gözdən pərdə asmaqla, iki ölkəni — biri inkişaf edən Azərbaycanı, onun yaxşı cəhətlərini görməməklə, digər ölkənin — Ermənistanın mənfi cəhətlərini görməməzliyə vurmaqla bir-birinə yaxınlaşdıraraq eyniləşdirmək ikili standartdır və beynəlxalq təşkilatın düzgün olmayan mövqeyidir.

Azərbaycan nümayəndə heyəti bu barədə öz etirazını qəti şəkildə bildirdi. Bununla yanaşı, qeyd etmək istərdim ki, Avropa Şurasının Azərbaycanda problemlər axtarmaq və ölkəmizi Ermənistanla eyniləşdirmək siyasəti aparıldı. Azərbaycanda guya siyasi məhbuslarla bağlı 10 il bundan əvvəl həll olunmuş problemləri yenidən gündəmə gətirmək fikrinə düşüblər. Ermənistanda bir nəfər də olsun siyasi məhbus “tapmayan” Avropa Şurasının sənədlərində siyasi əqidələrinə görə həbs olunan insanlar “azadlıqdan məhrum olunmuş insanların problemi” kimi qiymətləndirilir. Azərbaycanda isə demokratik proseslərin sürətlə inkişaf etdiyi, insan hüquq və azadlıqlarının qorunması istiqamətində qətiyyətli addımlar atıldığı bir vaxtda ölkəmizdə “siyasi məhbus”ların mövcudluğu ilə bağlı məruzəçinin təyin olunması cəhdləri üzə çıxır. Ona görə də Azərbaycan nümayəndə heyəti bu məsələlərlə bağlı möhtərəm Prezidentimizin, parlament sədrinin və özünün mövqeyini Avropa Şurasına çatdıraraq bildirdi ki, belə bir proses, belə ədalətsizlik davam edərsə, bu qurumla münasibətlər dəyişdirilməlidir. Hesab edirəm ki, hər bir təşkilat hadisələri obyektiv qiymətləndirməlidir. Azərbaycanı süni şəkildə cəzalandırmaq, Ermənistanla eyniləşdirmək ədalətsizlik, haqsızlıqdır.

Avropa Şurasında bəzi deputatların mövqeyi Azərbaycan reallıqlarını, həqiqətlərini görməməkdən ibarətdir. Biz Avropa Şurasının prezidenti ilə də görüşdük və münasibətimizi onun da diqqətinə çatdırdıq. Qeyd etdik ki, mövcud münasibət Azərbaycana qarşı təzyiq məqsədi daşıyır və ölkəmizi tutduğu yoldan döndərməyə cəhd göstərilir. Azərbaycan öz inkişaf yolundan geri çəkilən deyil, tutduğu yolu da heç vaxt dəyişməyəcək.

Söhbəti yazdı:

Əliqismət BƏDƏLOV

Xalq qəzeti.-2009.-8 fevral.-S.3.