Yüksək keyfiyyət, aşağı qiymət
“İndi konkret işlər dövrüdür, peşəkarların özünü göstərməsi dövrüdür. Azərbaycan cəmiyyətinə real surətdə xeyir verən və gələcəkdə də xeyir verəcək adamların, Azərbaycanın müstəqilliyini sözdə deyil, əməli işlə möhkəmləndirən savadlı və bilikli adamların dövrüdür”.
Prezident İlham Əliyevin bu sözlərdə ifadə olunmuş siyasəti nəticəsində son illərdə ölkəmizdə bacarıqlı sahibkarların sayı durmadan artır. Söhbət elə iş adamlarından gedir ki, onların səmərəli fəaliyyəti ölkədə sosial-iqtisadi durumun möhkəmlənməsinə, tələbata uyğun infrastrukturun yaradılmasına, yeni iş yerlərinin açılışına, ümumiyyətlə xalqın rifahının yüksəlməsinə köməkdir.
Həmin sahibkarlardan biri olan Gülməmməd Qasımov, son illərdə sürətlə inkişaf etmiş tikinti-təmir sahəsində çalışır. O, ali təhsilli avtonəqliyyatçı və hüquqşünasdır. Hər iki sahədə uğurla çalışıb, təcrübə toplayıb. Azərbaycanda özəl bölməyə geniş meydan verilməsi onu biznesə qoşulmağa, müstəqil şirkət yaratmağa həvəsləndirib. Tikinti-quruculuq sahəsinin dinamik inkişafı, abadlıq və bərpa işlərinin fəallaşması, saysız-hesabsız sosial obyektlər tikilməsi G.Qasımovun bu istiqamətdə özünü sınamaq seçiminə səbəb olub. Beləliklə, o, 2006-cı ildə “Optimal qapılar” adı ilə bu gün məşhurlaşmış bir şirkət təsis edib. Məqsəd əla keyfiyyətli tikinti-təmir və mebel aksesuarlarını təqdim etmək olub. Şirkət ilk gündən ciddi rəqabət şəraitində bazarda aparıcı mövqe tutmağa başlayıb.
Hazırda burada “100 ən yaxşı mallı” keyfiyyət nişanı daşıyan Rusiya “Optim” fabrikinin istehsal etdiyi müxtəlif növ qapılar təqdim olunur. Təbii ağacdan, klassik və müasir uslubda hazırlanan, rəngdə, dizaynda, ölçüdə bir-birindən seçilən bu qapılar ən ciddi və tələbkar zövqü oxşayır, möhkəmliyi, davamlı və rahat olması kimi yüksək göstəriciləri ilə hər kəsi razı salır. Deyilənlər geniş çeşiddə kupe-şkaflara da aiddir. Satılan mallar şirkət tərəfindən çatdırılır və quraşdırılır, onlara zəmanət verilir.
Bu gün bazarda şirkətin məhsullarına böyük tələbat var. Bunun səbəbi qiymətlərin münasib, optimal, xidmətin yüksək olmasıdır. Alıcıların bir qismi otellər, istirahət mərkəzləri, ayrı-ayrı iri müəssisələrdir. Gəncə Pedaqoji Universiteti, Sərhəd Qoşunlarının hospitalı kimi iri və nüfuzlu müəssisələrin təmiri zamanı “Optim” markadan geniş istifadə olunmuşdur. Şirkətdə 20-yə yaxın adam çalışır. Son vaxtlar əmək haqları dəfələrlə artırılmışdır. Kollektiv üzvlərinin sosial məsələləri də öz həllini vaxtında tapır.
Gülməmməd Qasımov Prezident İlham Əliyevin ölkədə yeni iş yerlərinin açılması proqramına dəstək olmaq, iş həcminin genişlənməsi, regionlarda filialların yaradılması ilə bağlı geniş tədbirlər nəzərdə tutulduğunu söylədi.
O, dünyada baş verən böhranın öz işinə, ümumiyyətlə, Azərbaycan iqtisadiyyatına ciddi ziyan verməyəcəyinə əmin olduğunu bildirdi. Sonda müsahibmiz ölkədəki siyasi sabitliyin və iqtisadi inkişafın, özəl bölməyə dövlət qayğısının həlledici rolunu vurğuladı:
— Ulu öndər Heydər Əliyev sahibkarlığın inkişafına böyük qayğı ilə yanaşırdı. Bu sahədə onun apardığı islahatların əhəmiyyəti misilsizdir. Prezident İlham Əliyev həmin siyasəti uğurla davam etdirir, iş adamlarına hərtərəfli kömək göstərir, onların problemlərini diqqət mərkəzində saxlayır. Nəticədə, özəl sahənin ölkə iqtisadiyyatına, xüsusən, qeyri-neft sahələrinə qoyduğu investisiyalar artır. Dövlət başçısının iqtisadiyyatın güclənməsi ilə bağlı gördüyü ciddi tədbirlər sahibkarları yeni uğurlara ruhlandırır, nailiyyətləri artırmağa kömək edir, şəffaf fəaliyyətə yol açır. Biz bu diqqət və qayğını əməli işlərlə cavablandırırıq.
Gülçin Quliyeva
Xalq qəzeti.-2009.-8 fevral.-S.7.