Sumqayıt: inkişaf dinamik xarakter almışdır

Ümummilli lider Heydər Əliyevin müəyyənləşdirdiyi sosial-iqtisadi inkişaf strategiyasının uğurla davam etdirilməsi nəticəsində ölkəmiz son illərdə iqtisadi artım üzrə dünyada lider dövlətə çevrilmişdir. Yola saldığımız 2008-ci il Azərbaycan Prezidenti cənab İlham Əliyev tərəfindən 2003-cü ildə müəyyən edilmiş iqtisadiyyatın inkişaf tempinin sürətləndirilməsi strategiyasının həyata keçirilməsinin növbəti mərhələsi kimi ölkəmizin yeni tarixinə yazılmışdır. Dünya tarixində maliyyə və iqtisadi böhran ili kimi qalacaq 2008-ci il Azərbaycan üçün növbəti uğurlu il olmuşdur.

Prezident İlham Əliyevin sədrliyi ilə Nazirlər Kabinetinin 2008-ci ildə sosial-iqtisadi inkişafın yekunlarına həsr olunmuş iclasında qeyd edilmişdir ki, ölkəmizdə iqtisadi artım sürəti həmişəki kimi yüksək olmuş və ümumi daxili məhsul il ərzində 11 faiz artmışdır. Ümumi daxili məhsulun adambaşına düşən nominal həcmi 2003-cü ilə nisbətən 5 dəfə artmışdır. Son beş ildə ölkədə 766 min yeni iş yeri açılmışdır ki, bunların 548 mini daimidir.

Sumqayıtda keçirilən illik hesabat yığıncağında ölkənin inkişafı ilə bağlı əsas göstəricilərə diqqət cəlb edilmişdir. İcra hakimiyyətinin başçısı Vaqif Əliyev bildirmişdir ki, irimiqyaslı iqtisadi islahatlar, qazanılan uğurlar gənclik şəhəri Sumqayıtın da hərtərəfli və dinamik inkişafına geniş imkanlar yaratmışdır. Şəhər sakinlərinin rifah halının yaxşılaşdırılmasına, sosial problemlərin həllinə, infrastrukturun təkmilləşdirilməsinə yönəldilmiş bütün layihələr ölkə Prezidentinin Sumqayıta olan xüsusi diqqət və qayğısı nəticəsində öz həllini tapmışdır və bu istiqamətdə bir çox işlər uğurla davam etdirilməkdədir. Ötən dövr Sumqayıt üçün ilk növbədə cənab İlham Əliyevin şəhərimizə növbəti səfəri ilə əlamətdar olmuşdur. Ölkə başçımız ulu öndər Heydər Əliyevin əzəmətli abidə kompleksini ziyarət etmiş, şəhərin 47-ci məhəlləsində inşa edilmiş Paralimpiya İdman Kompleksinin açılışında iştirak etmiş və XIII Paralimpiya Oyunlarında ölkəmizi təmsil edəcək idmançılar və onların məşqçiləri ilə görüşmüş, Qarabağ müharibəsi əlilləri, şəhid ailələri və Çernobıl qəzası əlilləri üçün tikilmiş yaşayış binasının istifadəyə verilmə mərasimində iştirak etmiş, Nəsimi adına mədəniyyət və istirahət parkında, 3-cü mikrorayonda Sülh və Bakı küçələrinin kəsişməsindəki parkda şəhər sakinləri ilə görüşüb söhbət etmişdir. Ölkə başçımız Sumqayıtın günü-gündən abadlaşdığını, inkişaf etdiyini qeyd etmiş, onun gözəl və müasir bir sənaye şəhərinə çevriləcəyinə əminliyini vurğulamışdır.

2008-ci ildə ölkəmizin öz yüksək inkişaf dinamikasını və bu sahədə dünyada liderlik mövqeyini qoruyub saxlamasında Sumqayıtın da özünəməxsus mühüm rolu olmuşdur. Sumqayıtlılar şəhər iqtisadiyyatının yüksələn xətt üzrə inkişafını təmin etmişlər. Ümumilikdə şəhər üzrə məhsul buraxılışı və göstərilən xidmətlərin həcmi son 5 il ərzində 3 dəfədən çox artaraq 2 milyard 60 milyon manatdan çox olmuşdur. Ümumi məhsul buraxılışının həcmi əvvəlki illə müqayisədə 34,8 faiz, 2003-cü illə müqayisədə isə 3,6 dəfə artaraq 580 milyon manat təşkil etmişdir. Ümumi məhsul buraxılışının adambaşına düşən nominal həcmi 2003-cü ilə nisbətən 4 dəfə artaraq 1930 manat həddini ötmüşdür.

Yeni, çoxsaylı təsərrüfat subyektlərinin yaradılması, sənaye sahələrinin bərpası sahibkarlara yaradılan əlverişli şərait nəticəsində mümkün olmuşdur. Elə buna görə məhsul istehsalının həcmində qeyri-dövlət sektorunun payı artmaqda davam etmiş və hesabat dövründə 70 faizdən çox olmuşdur. Şəhərdə kiçik və orta sahibkarlar tərəfindən 134 ticarət, 1 istehsal sahəsi, 15 iaşə və 36 xidmət obyekti tikilib istifadəyə verilmişdir.

Şəhərin iqtisadi yüksəlişinin əsas bazası olan sənaye sahəsində istehsal olunmuş məhsulun həcmi il ərzində 20 faiz, son 5 ildə isə 3 dəfədən çox artaraq ümumilikdə 1 milyard 350 milyon manat təşkil etmişdir. Ayrı-ayrı sahələrin inkişafına bütün maliyyə mənbələri hesabına qoyulmuş investisiyaların həcmi 5 ildə 1 milyard 355 milyon manat, 2008-ci ildə əsaslı vəsait qoyuluşu 150 milyon manat olmuşdur ki, bu vəsaitlər sənaye sahələrinin yenidən qurulmasına və sosial yönümlü tədbirlərə yönəldilmişdir.

2008-ci ildə sənaye sahələrində çalışan işçilərin sayı 6 faiz artmış, onların orta aylıq əmək haqqı 35 faiz artaraq 250 manat olmuşdur. Ümumilikdə son 5 ildə şəhər əhalisinin nominal aylıq əmək haqqı 4 dəfədən çox artmışdır.

Alüminium və boru istehsalının artırılması istiqamətindən bir sıra işlər həyata keçirilmiş, məhsul istehsalı 30 faizdən çox artmışdır. İlkin alüminium istehsalının həcmi 25 min ton, boru yayılmasının həcmi 5 min tondan çox artırılmışdır.

“Xovlu iplik” və Sumqayıt “Trikotaj” ASC-lərində əsaslı təmir və yenidənqurma işləri davam etdirilmişdir. Sumqayıt “Trikotaj” ASC-də ilkin mərhələdə həcmi gündə 5 ton olmaqla pambıq iplik saplar hazırlanması nəzərdə tutulur. İplik istehsalı üçün İtaliya və Almaniyadan avadanlıqlar gətirilmişdir. Hazırda quraşdırma işləri aparılır. Müəssisəyə bu istiqamətdə 100 nəfərdən çox işçi cəlb edilmişdir.

“Xovlu iplik” ASC-də gündəlik həcmi 12 ton olmaqla iplik istehsalı nəzərdə tutulur. Müəssisənin korpuslarından köhnə avadanlıqlar çıxarılmış, istehsal sahələrinin dam örtüyü yeni metal konstruksiyalar quraşdırmaqla dəyişdirilmiş, yeni avadanlıqların bir hissəsi alınıb gətirilmişdir, onların kompleksləşdirilməsi işləri aparılır. Hazırda bu sahədə 80 nəfərdən çox işçi çalışır.

Şüşə lifli boru istehsalı zavodu olan “Azkompozit” MMC-də diametri 2000 mm olan borularla yanaşı, kiçik diametrli boruların hazırlanması istiqamətində tədbirlər görülmüş və istehsalına başlanılmışdır.

İl ərzində “Superfosfat” ASC-də əsasən sulfat turşusu istehsal edilmişdir. Fasilələrlə işləməyinə baxmayaraq, müəssisədə məhsulun istehsal həcmi əvvəlki illə müqayisədə 2 dəfədən çox artmışdır.

Bununla belə ötən il “Məişət malları” və “Sumqayıt Aşqarlar” Açıq Səhmdar Cəmiyyətləri öz imkanlarından xeyli aşağı səviyyədə işləmişlər. “Azərstar” MMC tərəfindən idarəetməyə götürülmüş “Sumqayıt Kompressorları” ASC-də istehsal fəaliyyətinin bərpa edilməsi istiqamətində tədbirlər görülməmişdir. Elektrik kabelləri istehsalı və texnologiyalar parkı müəssisəsinin isə tikinti-quraşdırma işləri davam etdirilir. Bu müəssisədə mis və alüminium ərintisi, müxtəlif diametrli elektrik naqillərinin istehsalı nəzərdə tutulmuşdur. Hazırda 3 iri korpusun tikintisi başa çatdırılmış və daha 3 korpusun tikintisi üçün işlər aparılır. Tikinti-quraşdırma işlərinə 500 nəfərdən çox işçi cəlb edilmişdir. “Bismak”Qida Sənaye Kompleksində yeni şokolad emalı sahəsi və hazır məhsul anbarı tikilib başa çatdırılmışdır. “Tac Holdinq” və “Elitar” MMC-də məhsul istehsalının və çeşidlərinin artırılması ilə bağlı əlavə avadanlıqlar quraşdırılmışdır.

Yeni Beton körpü konstruksiyalar zavodunun korpusu tikilmiş və qəlib quraşdırılmışdır. Beton emalı zavodu alınmış, quraşdırılmasına başlanılmışdır.

Ötən il şəhər ərazisində “Azərsun” Holdinqin və “Azərkarton” MMC-nin xam kağız emalı sahəsinin inşasına başlanılıb. Bu müəssisələrdə əsasən karton və kağız istehsalı nəzərdə tutulur. Avadanlıqlar alınıb gətirilmiş, tikinti-quraşdırma işlərinə 100 nəfərdən çox işçi cəlb edilmişdir.

Hesabat ilində şəhərdə 4600-dən çox yeni iş yeri yaradılmışdır. Bunların 2100-dən çoxu daimi iş yeridir. Ümumilikdə 2003-cü ilin oktyabr ayından etibarən şəhərdə 36500-ə qədər iş yeri yaradılmışdır ki, bunların da 18900-ə yaxını daimidir.

Məruzəçi daha sonra qeyd etmişdir ki, artıq 2004-2008-ci illəri əhatə edən “Azərbaycan Respublikası regionlarının sosial-iqtisadi inkişafı Dövlət Proqramı”nın icrası başa çatmışdır. Dövlət Proqramında Sumqayıt üzrə müəyyən edilən 11 tədbirin tam əksəriyyəti yerinə yetirilmiş, metallurgiya sənayesinin inkişafı, toxuculuq sənayesinin bərpası, istilik-elektrik stansiyasının inşası və yeni ötürücü xətlərin çəkilməsi, su təchizatı və kanalizasiya xətlərinin yaxşılaşdırılması, eləcə də sosial məsələlərin həlli istiqamətində kompleks tədbirlər görülmüşdür.

Dövlət Proqramı üzrə Sumqayıt sənaye kompleksinin inkişafı nəzərə alınmaqla, sosial-məişət obyektlərinin və əhalinin etibarlı enerji təchizatını təmin etmək məqsədilə 517 mvt gücü olan yeni elektrik stansiyası inşa edilib başa çatdırılmışdır.

Şəhər ərazisində 5 il ərzində 50-dən çox yeni orta və iri istehsal müəssisəsi, 100-dən artıq iri xidmət və 1000-dən çox kiçik istehsal və xidmət sahəsi tikilib istifadəyə verilmişdir.

İlin əvvəlindən şəhər ərazisində inşası aparılan yeni obyektlərdən sutkalıq gücü 200 min kubmetr olan çirkab suları üçün təmizləyici qurğuda işlər qrafik üzrə həyata keçirilməkdədir. Burada artıq iki əsas şöbə tikilib başa çatdırılmış, kollektor quraşdırılmışdır.

Sumqayıtda hüquqi şəxs qismində 1800-dən çox müəssisə və 10 mindən artıq fiziki şəxs fəaliyyət göstərir. Sahibkarlığın inkişafına istiqamətlənmiş layihələrin maliyyələşməsində bank filiallarının müstəsna rolu var. Hazırda şəhərdə 27 mərkəzi bankın filialları var və bunların tam əksəriyyəti 5 il ərzində fəaliyyətə başlamış müasir ofislərdə yerləşmişdir.

Ötən dövr ərzində şəhərdə ölkə başçısının birbaşa dəstəyi ilə bir çox layihələr həyata keçirilmişdir.

Şəhid ailələri və Qarabağ müharibəsi əlilləri üçün altı, həmçinin Ermənistandan gəlmiş qaçqınlar üçün bir yaşayış binası tikilib istifadəyə verilmişdir. Eyni zamanda şəhərdə mənzil sıxlığının aradan qaldırılması üçün 30-dan çox yüksək mərtəbəli özəl yaşayış binaları inşa edilmişdir.

Vaqif Əliyev hesabat məruzəsində abadlıq-quruculuq işlərinə də xüsusi yer ayırmışdır. O, demişdir ki, son beş ildə Sumqayıtın yollarına və küçələrinə 2,7 milyon kvadratmetrdən çox asfalt döşənmiş, şəhərin Sahil və Çerkassı küçələri tamamilə yenidən qurulmuş, 260 yaşayış binası əsaslı təmir edilmiş, 240-a yaxın yaşayış binasının fasad divarları rənglənmiş, şəhərin giriş hisəsindəki 12 mərtəbəli binaların fasadı müasir üslubda yenidən qurulmuş, qəza vəziyyətində olan 28 bina əsaslı təmir edilmiş, 800-dən çox yaşayış binasında 750 min kvadratmetrə yaxın dam örtüyü təmir edilmiş, məhəllə və mikrorayonların ərazilərində 1500-dən çox oturacaq qoyulmuşdur. Şəhər ərazisində 200 binanın aşağı şəbəkə üzrə içməli su və kanalizasiya xətti təmir edilmiş, 650-dən çox yaşayış binasının zirzəmisinin suyu qurudulmuş, şəhərin yaşayış massivlərində 50-yə yaxın xeyir-şər yerləri tikilib əhalinin istifadəsinə verilmişdir. H.Zeynalabdin və Corat qəsəbələrində asfaltlama işləri aparılmışdır.

2008-ci ildə “Sülh göyərçini” kompleksinin ətrafı tam abadlaşdırılmış və pilləli fəvvarələr tikilib istifadəyə verilmişdir. “Heydər parkı” ərazisində müasir tipli yeni musiqili fəvvarə sakinlərin sevimli istirahət yerinə çevrilmişdir. “Qələbə” abidəsi monumental şəkildə yenidən quraşdırılmışdır. Şəhərin 10 və 13-cü mikrorayonlarının əraziləri əsaslı surətdə yenidən qurulmuş, kommunikasiyalar təmir edilmiş, Babək və Ü.Hacıbəyov küçələri tərəfdən böyük ərazilərə üzlük daş döşənmiş, sakinlər üçün yeni istirahət guşələri yaradılmışdır. Hacı Zeynalabdin qəsəbəsində M.Müşfiqin və Dədə Qorqudun abidələri tikilmişdir.

Xalqımızın ümummilli lideri Heydər Əliyevin adını daşıyan park yenidən qurulmuşdur. C.Məmmədquluzadənin, C.Cabbarlının büstü, N.Gəncəvinin, Nəsiminin heykəli, ölkəmizin ərazi bütövlüyü uğrunda gedən döyüşlərdə itkin düşmüş əsgər və zabitlərin xatirəsinə monument, şəhərin giriş hissəsində “Tərəqqi” monumenti ucaldılmış, işıqlandırma sistemi yaradılmış, “Lüdviqshafen” parkında yenidənqurma işləri aparılmışdır.

Son illər ərzində şəhər əraazisində dövlət orqanlarının Sumqayıt şöbələri və regional idarələri üçün inzibati binaların inşa edilməsinə başlanılmışdır. Bu binalar həm də şəhərin gözəlliyinə yeni rəng qatır.

Son illər ərzində şəhərdəki liftlərin əksəriyyəti əsaslı təmir edilmiş, yeni liftlər quraşdırılmışdır. Şəhər ərazisinin işıqlandırılması istiqamətində 1100-dən çox yeni dirək basdırılmış, 160 min poqonometr kabel çəkilmiş, 5000-dən çox müasir elektrik fanarı quraşdırılmışdır.

Əhalinin su, təbii qaz, elektrik enerjisi ilə təminatının və digər kommunal xidmətlərin daha da yaxşılaşdırılması istiqamətində bir sıra tədbirlər həyata keçirilmişdir. H.Zeynalabdin qəsəbəsindən Sumqayıta gələn 10 km uzunluğunda istismara yararsız şollar su xəttinin çəkilişi yekunlaşmaq üzrədir. Ceyranbatan su anbarından şəhərə gələn iri diametrli magistral su xəttinin 10 və 12-ci mikrorayonların ərazisindən keçən hissəsinin dəyişdirilməsi işləri davam edir. Bütövlükdə isə son illər ərzində şəhər və onun qəsəbələrinin ərazisində 35 kilometrə yaxın müxtəlif diametrli yeni su xətləri və 10 kilometrdən çox kanalizasiya şəbəkəsi, yağışqəbuledici xətləri çəkilərək istifadəyə verilmişdir.

Şəhərə verilən qazın həcmi kifayət qədər olsa da, bəzi yaşayış məntəqələrinin təminatı yaxşılaşmamışdır. Xüsusən ilin sonuna yaxın H.Zeynalabdin və Corat qəsəbələrinin, İnşaatçılar massivinin, 6-cı mikrorayon, 3, 20, 21 və birləşmiş məhəllələrin sakinləri tərəfindən qazın azlığı ilə əlaqədar şikayətlər olmuşdur.

İl ərzində “Sumqayıtelektrikşəbəkə” ASC tərəfindən çoxlu sayda güc transformatorları dəyişdirilmiş, kilometrlərlə kabel xətləri yenisi ilə əvəz olunmuş, abonentlərin 97,7 faizinin mənzillərində sayğac quraşdırılmışdır. İl ərzində əhaliyə verilən elektrik enerjisinin dəyərinin ödənişi 101,8 faiz təşkil etmişdir, bu, əvvəlki illə müqayisədə 51,5 faiz çoxdur. Məktəblərin, tibb müəssisələrinin, inzibati və yaşayış binalarının istiliklə təmin edilməsi məqsədilə xeyli iş görülmüşdür.

Sumqayıtda ətraf mühitin istehsal və məişət tullantılarından qorunması, onların zərərli təsirlərinin azaldılması istiqamətində tədbirlərin həyata keçirilməsi təmin edilmişdir. Bu sahədə maddi-texniki baza gücləndirilmiş və cənab Prezidentin tapşırığı ilə şəhərimizə 7 ədəd kommunal təyinatlı xüsusi texnika ayrılmışdır. Bununla belə şəhərdə tullantıların idarə olunmasının təkmilləşdirilməsinə, əlavə istehsal sahələrinin yaradılmasına, inkişaf etmiş ölkələrin qabaqcıl iş təcrübələrinin tətbiqinə böyük ehtiyac yaranmışdır. Bu işdə dönüş yaratmaq məqsədilə Mənzil-kommunal Təsərrüfatı İstehsalat İstismar Birliyinin bazasında “Sumqayıt Şəhər Təmizlik Departamenti” yaradılmışdır.

Bütün avtomat telefon stansiyalarında müasir avadanlıqlar quraşdırılmış və onların əhatə etdiyi ərazilərdə genişzolaqlı sürətli internetə olan tələbat təmin edilmişdir. Şəhərdə yeni NGN tipli şəbəkənin quraşdırılması ilə bağlı bütün hazırlıq işləri başa çatdırılmışdır. Cari ilin birinci yarısında bu şəbəkə quraşdırılacaq və onun istifadəyə verilməsi ilə şəhərin telefon şəbəkəsinin tam şəkildə elektronlaşdırılması yekunlaşacaq.

Daha sonra Vaqif Əliyev təhsil, səhiyyə, mədəniyyət və idman sahələrinin uğurlarından bəhs etmişdir.

—Ötən il Sumqayıtın təhsil sistemində 2 yeni məktəb binası — əqli və fiziki cəhətdən qüsurlu uşaqlar üçün xüsusi internat məktəbində 260 yerlik, Tuğ zavodu ərazisində qəza vəziyyətində olan 42 nömrəli məktəb üçün 400, 9 nömrəli məktəb üçün 300, 19 nömrəli məktəb üçün 600 və “İstedad” liseyi üçün 400 yerlik əlavə tədris korpusları tikilmişdir.

Bütün məktəblərdə cari təmir işləri aparılmışdır. 29 və 31 nömrəli məktəblər, 44 nömrəli uşaq bağçası isə əsaslı təmir olunmuş, 17 məktəbdə daxili istilik sistemi yenidən qurulmuş, maddi-texniki baza möhkəmləndirilmişdir.

Hazırda öz ölçüləri ilə müasir Olimpiya Kompleksindən fərqlənməyən 1 saylı UGİM-də, Uşaqların və Yeniyetmələrin Yaradıcılıq Mərkəzində əsaslı təmir və yenidənqurma işləri davam etməkdədir.

Ötən il şəhər orta ümumtəhsil məktəblərini bitirmiş məzunlardan təxminən 93 faizi ali məktəblərə sənəd vermiş, onlardan 35 faizi tələbə adını qazanmışdır. Qəbul imtahanlarında 600-dən çox bal toplayanların sayı şəhər üzrə keçən illə müqayisədə təxminən 30 faiz artaraq 142 nəfərə çatmışdır ki, bu da 2003-cü illə müqayisədə 5 dəfə çoxdur.

Təbiət Elmləri Təmayüllü Gimnaziyanın məzunu Elvin Dadaşov qəbul imtahanlarında mütləq nəticə göstərərək 700 bal toplamışdır. Ali məktəblərə qəbul zamanı yüksək nəticələr göstərmiş tələbələr şəhər icra hakimiyyətində qəbul edilmiş, onlara pul mükafatları verilmişdir. Ailə vəziyyəti nəzərə alınaraq Elvin Dadaşova Azərbaycan Prezidenti tərəfindən mənzil verilmişdir. 2008-ci ildə 5 nəfər yüksək bilik nümayiş etdirən məzunumuz Prezident təqaüdünə layiq görülmüşdür. Artıq bu şərəfə nail olanların sayı 42 nəfərdir. Respublika üzrə ali məktəblərə qəbul imtahanlarında ən yaxşı nəticə göstərmiş ilk 4 məktəbdən üçü Sumqayıt məktəbləridir. Prezidentin sərəncamı ilə təsis olunmuş “İlin ən yaxşı məktəbi” müsabiqəsində qalib gəlmiş 50 məktəbdən 3-ü, “İlin ən yaxşı müəllimi” müsabiqəsində isə qalib gəlmiş 100 müəllimdən 4-ü Sumqayıtdandır.

Respublikamızda ilk dəfə olaraq Sumqayıtda şəhər icra hakimiyyəti tərəfindən məktəblilərin yay düşərgələri təşkil edilmiş və artıq 6 ildir ki, bu düşərgələr fəaliyyətdədir. Ötən il 44 məktəbdə düşərgələrə 2200 şagird cəlb olunmuşdur.

Şəhər əhalisinə göstərilən tibbi xidmət sahəsində müəyyən irəliləyişlərə nail olunmuşdur. Zəruri inventar və avadanlıqla təchiz edilmiş 9 ədəd “Mersedes” markalı təcili yardım maşını alınmışdır. Təcili Tibbi Yardım Xəstəxanasında yenidənqurma başa çatdırılmış, müasir texnika və avadanlıq quraşdırılmışdır. Uşaq xəstəxanasında əsaslı təmir davam etdirilir. İl ərzində ayda 2 dəfə olmaqla əhali ilə 23 görüş, 11 səyyar tibbi müayinələr keçirilmiş, ehtiyacı olan xəstələrə köməklik göstərilmişdir. Şəhərin sanitar-gigiyenik vəziyyəti nəzarətdə saxlanılmış, kütləvi şəkildə yoluxucu xəstəliklər qeydə alınmamışdır. Sumqayıtda özəl səhiyyə müəssisələrinin də yaradılması vüsət almışdır. Hazırda 13 özəl klinika, müayinə, diaqnostik mərkəz, 70 özəl stomotoloji kabinet, 42 özəl aptek fəaliyyət göstərir.

Sumqayıtın Tarixi Muzeyində əsaslı təmir və yenidənqurma işləri davam etdirilir. S.Vurğun adına Mərkəzi kitabxananın əsaslı təmiri başa çatdırılmış, müvafiq inventar və texniki avadanlıqla təchiz edilmişdir. N.Nərimanov adına Mədəniyyət evində əsaslı təmir işləri aparılmış, binanın fasadında müasir işıqlandırma sistemi quraşdırılmışdır.

Hesabat dövründə H.Ərəblinski adına Sumqayıt Dövlət Musiqili Dram Teatrının 40 illik yubileyi qeyd edilmişdir. Azərbaycan Prezidentinin sərəncamı ilə teatrın işçilərindən 2 nəfərə xalq artisti, 6 nəfərə əməkdar artist, 3 nəfərə əməkdar mədəniyyət işçisi fəxri adları verilmiş, 6 nəfər “Tərəqqi” medalı ilə təltif olunmuş, 4 aktyora Azərbaycan Prezidenti tərəfindən mənzil verilmişdir.

Sumqayıtın zəngin idman ənənələri var. Şəhərin 17-ci mikrorayon ərazisində müasir Olimpiya İdman Kompleksinin tikintisi davam etdirilir, 2 saylı UGİM-in bazasında süni örtüklü otüstü xokkey meydançası tikilmişdir.

Pekində keçirilmiş Yay Olimpiya oyunlarında şəhərin bir idmançısı-boksçu Şahin İmranov bürünc, Paralimpiya oyunlarında isə cüdoçular İlham Zəkiyev qızıl, Tofiq Məmmədov və Kərim Sərdarov gümüş medallar qazanmışlar. Prezident İlham Əliyev idmanın inkişafında xidmətlərinə görə məşqçi Əhməddin Rəcəblini, Pekin Yay Olimpiya Oyunlarında yüksək nailiyyətinə görə Şahin İmranovu və onun məşqçisi Eldar Əbilovu “Tərəqqi” medalı ilə mükafatlandırmış, Paralimpiya çempionu İlham Zəkiyev isə “Şöhrət” ordeni ilə təltif edilmiş və Azərbaycan Prezidentinin xüsusi təqaüdünə layiq görülmüşdür.

İl ərzində icra başçısı tərəfindən 158 vətəndaş qəbul edilmiş, aparata 5656 müraciət daxil olmuşdur. Şəhərin 15 idarə və təşkilatı rəhbərlərinin yaşayış massivlərində sakinlərlə 360 görüşü keçirilmiş, bu görüşlərdə 12 min sakin iştirak etmiş, 1400-ə yaxın məsələ qaldırılmışdır. Bu məsələlərin bir qismi ilə əlaqədar yerində izahat verilmiş, 900-ə qədər məsələnin həlli ilə bağlı aidiyyatı üzrə təşkilatlara məktublar göndərilmiş və icrası nəzarətə götürülmüşdür.

Əhatəli və məzmunlu hesabat məruzəsindən sonra müzakirələr keçirilmiş, idarə və təşkilat rəhbərləri çalışdıqları sahələrin fəaliyyətindən bəhs etmişlər. Prezidentin İcra Aparatının məsul işçisi Canpolad Musayev yığıncaqda çıxış edərək ölkəmizin daxili və xarici siyasəti, qazanılan uğurlar, layihələrin önəmi barədə danışmış, dövlət başçısının prioritet verdiyi məsələlərə diqqəti cəlb etmişdir. O, cari ildə qarşıda duran vəzifələri də nəzərə çatdırmış, sumqayıtlılara işlərində uğurlar arzulamışdır.

Sonda Azərbaycan Prezidenti İlham Əliyevə müraciət qəbul edilmişdir.

Əli NƏCƏFXANLI,

Xalq qəzeti.-2009.-12 fevral.-S.5.