Kimsəsiz uşaqlar öz himayədarlarının görüşünə gəldilər

“Müqəddəs kitablarda qeyd edilir ki, istənilən qayğıkeşlik və himayədarlıq əməlləri öz sahibinə mükəmməl savab qazandırır. Ancaq uşaqlara, xüsusən, kimsəsiz körpələrə dayaq olmaq, onların problemlərinin həllinə yardım etmək savabların ən böyüyüdür. Bu baxımdan Bakının Xətai rayonundakı 3 saylı uşaq evinin sakinlərinə daim qayğı göstərən tanınmış ziyalı və iş adamı Hacı Fərhad Mirzənin savabı daha çoxdur”. Bu fikirləri uşaq evinin ən fəal sakinləri ilə birlikdə adı çəkilən qayğıkeş ziyalının görüşünə gəlmiş direktor Zöhrə ana söyləmişdir. Tədris və tərbiyə müəssisəsinin rəhbəri öz fikirlərini konkret faktlarla əsaslandıraraq demişdir ki, Azərbaycan və Türkiyənin müxtəlif qurumlarının Hacı Fərhadın fəaliyyətini yüksək qiymətləndirməsi ədalət nümunəsidir.

Bəs uşaqları Hacı Fərhadın görüşünə gətirən hansı səbəb idi? Qeyd edək ki, özünün məşhur “Kəlamlar” kitabı ilə bir çox müsəlman ölkələrində çoxsaylı oxucuların böyük rəğbətini qazanmış Hacı Fərhad Mirzə 2008-ci ildə ölkə və beynəlxalq miqyaslı bir neçə mükafata və fəxri ada layiq görülmüşdür. Türk Dünyası Araşdırmaları Uluslararası Elmlər Akademiyasının Yüksək Yönətim Kurulu müxtəlif vaxtlarda tanınmış ziyalı və iş adamını akademiyanın fəxri üzvü seçmiş (o, əvvəllər bu qurumun fəxri professoru idi), Türkiyə–Azərbaycan qardaşlıq münasibətlərinin daha da möhkəmləndirilməsindəki xidmətlərinə görə onu akademiyanın “Beynəlxalq qızıl ulduz” medalına layiq görmüşdür.

Ənənəvi illik hesabatların çoxsaylı müzakirələrdən keçirilməsindən, xüsusən, “Kəlamlar” kitabının türkcəyə və ingiliscəyə tərcüməsi uğurlu alındıqdan sonra isə akademiyanın ekspertləri azərbaycanlı ziyalını “İlin kültür adamı” fəxri adına layiq görmüşlər. Bu il fevral ayının 4-də Ankaradan daha bir şad xəbər gəlmişdir. Akademiyanın Yüksək Yönətim Kurulu Hacı Fərhad Mirzəni “Dünya kültürünə hizmət” beynəlxalq mükafatına layiq görmüşdür. Qurumun rəhbəri, professor Ata Atunun və baş katib Məlahət Ecevitin imzasıyla Bakıya ünvanlanan məktubda göstərilir ki, professor Hacı Fərhad Mirzənin yaradıcılığı 2008-ci ildə beynəlxalq aləmdə yüksək qiymətləndirilmişdir. Odur ki, akademiyanın ekspertləri dünya mədəniyyətinə xidmət etmiş azərbaycanlı ziyalını bu mükafata layiq görmüşdür.

Xəbərin Bakıya çatmasından bir həftə sonra Hacının qayğı göstərdiyi və himayədarlıq etdiyi çoxsaylı təşkilatlardan birinin — paytaxtdakı 3 saylı uşaq evinin kollektivi öz himaydarlarını təbrik etməyə gəlmişldir. Dünyanın müxtəlif ölkələrində olmuş, çoxsaylı mükafatlara layiq görülmüş, qiymətli hədiyyələr almış Hacı Fərhad kimsəsiz uşaqların ona gətirdiyi hədiyyəni indiyədək aldığı hədiyyələrin ən dəyərlisi kimi qiymətləndirmişdir. Bu, uşaq evi sakinlərinin üç rəngli muncuqlardan kətan üzərində yaratdıqları Azərbaycan Respublikasının Dövlət gerbidir.

İttifaq MİRZƏBƏYLİ

Xalq qəzeti .-2009.-15 fevral.-S.8.