Suraxanıda anım mərasimi

Rayon İcra Hakimiyyətində Xocalı soyqırımının 17-ci ildönümünə həsr olunmuş “dəyirmi masa” keçirilmişdir.

Tədbiri giriş sözü ilə Rayon İcra Hakimiyyətinin başçısının birinci müavini Hüseyn Həsənov açmışdır. Natiq bildirmişdir ki, 1992-ci il fevralın 26-da Xocalıda baş verənlər Azərbaycan xalqının yaddaşından heç vaxt silinməyəcəkdir. Çünki həmin vaxt bütöv Azərbaycan xalqına qarşı soyqırımı aktı həyata keçirilmiş, bəşəriyyətin ən böyük faciələrindən biri törədilmişdir. Bu cinayətin səbəbkarı isə Azərbaycan torpaqları hesabına “Böyük Ermənistan” qurmaq xülyasına düşmüş, xalqımıza qənim kəsilmiş ermənilərdir.

Xocalı faciəsi ermənilərin Azərbaycan xalqına qarşı apardığı uzun müharibənin tərkib hissəsidir. Amma bu faciə özünün dəhşəti ilə ermənilərin törətmiş olduğu digər cinayətlərdən köklü surətdə fərqlənir. 17 il bundan əvvəl Xocalıda 613 nəfər qətlə yetirildi, 1275 nəfər əsir və girov düşdü, 56 nəfər xüsusi qəddarlıqla öldürüldü. Şəhərin özü isə talan edildi və dağıdıldı.

“Dəyirmi masa”da Azərbaycan Milli Elmlər Akademiyasının Tarix İnstitutunun direktor müavini, tarix elmləri doktoru Cəbi Bəhramov “Böyük Ermənistan” qurmaq xülyasına düşmüş ermənilərin törətdikləri vəhşiliklər haqqında ətraflı söhbət açmışdır.

Tədbirdə Rayon İcra Hakimiyyəti başçısının müavini Əhməd Talıbov, ictimaiyyətinin nümayəndələri faciənin dəhşətləri barədə danışmışlar.

“Dəyirmi masa”dan sonra Q.Abbasov adına mədəniyyət sarayında Xocalı faciəsinə həsr olunmuş “O qızın göz yaşları” adlı ədəbi-bədii kompozisiya göstərilmişdir.

Vaqif BAYRAMOV

Xalq qəzeti.-2009.-27 fevral.-S.6.