“Xocalı soyqırımı rabitəçilərin yaddaşında”

Rabitə və İnformasiya Texnologiyaları Nazirliyi tərəfindən “Xocalı soyqırımı rabitəçilərin yaddaşında” adlı kitab çap edilib.

Kitabda 1992-ci ilin qarlı fevral günlərində erməni silahlı quldurlarının rus hərbi birləşmələri ilə birlikdə Azərbaycanın Xocalı şəhərinə hücumu nəticəsində şəhərin işğal edildiyi son anadək öz vəzifə borclarını fədakarlıqla yerinə yetirmiş rabitəçilərin başına gələn müsibətlər geniş yer tutur. Sonrakı bölmələrdə silahsız insanların, xəstə qocaların, körpə uşaqların zülmət gecədə buz bağlamış çaydan keçərək dəstə-dəstə qarlı dağlara, meşələrə üz tutmasının, məşəqqətli günlərin, dəhşətli əzabların canlı şahidi və iştirakçısı olmuş əzabkeş xocalıların faciəsindən söz açılır.

Ulu öndər Heydər Əliyevin Xocalı soyqırımı ilə əlaqədar etdiyi çıxışlardan parçalar, imzaladığı sərəncamlar, ölkə Prezidenti İlham Əliyevin soyqırımla bağlı xalqa müraciətləri, bir sıra rəsmi sənədlər, Qarabağ tarixi ilə bağlı faktlar, zəngin və geniş məlumatlar, münaqişənin başlanma səbəbləri, xarici ölkələrin nüfuzlu təşkilatlarının və kütləvi informasiya vasitələrinin Xocalı faciəsi barədə xəbərləri də kitabda öz əksini tapıb.

M. MÜKƏRRƏMOĞLU

Xalq qəzeti.-2009.-27 fevral.-S.8.