Sosial proqramlar böyük uğurla həyata keçirilir

Dövlətin əsas vəzifələrindən biri əhalinin həyat səviyyəsini yüksəltmək, onun sosial müdafiəsini təmin etmək və bu sahədə müxtəlif məsələləri həll etməkdir. Sosial yardım insanların yaşayış səviyyəsinin təmin edilməsinə, əhalinin sağlamlıqla bağlı və digər sosial problemlərinin aradan qaldırılmasına dövlət qayğısıdır.

Müstəqil ölkəmizdə həmin istiqamətdə işlər həmişə dövlətimizin diqqətindədir və bu fəaliyyət günü-gündən vüsət alır.

Üç il əvvəl Azərbaycanda sosial müdafiə sahəsində dünyanın aparıcı ölkələrinin təcrübəsinə əsaslanmış və dövlət yardımlarının ünvanlılığının təmin edilməsi istiqamətində daha bir addım atılaraq ünvanlı sosial yardım sistemi tətbiq olunmağa başlanmışdır.

Bu məqsədlə ölkəmizdə üç il əvvəl “Ünvanlı dövlət sosial yardımı haqqında” Qanun qəbul edilmişdir. Bu sənəd sosial yardım sahəsində zəruri olan bir sıra məsələlərin həllinə yol açdı. Bu, ünvanlı sosial yardım təminatı ilə yoxsulluğun azaldılması, yardımın vətəndaşların real ehtiyaclarına uyğun olaraq ünvanlı metodlarla təyin edilməsi və subyektin dəqiq seçimi, maliyyə vəsaitlərindən səmərəli istifadə edilməsi, sosial yardımın ədalətlilik prinsipləri əsasında həyata keçirilməsinə şərait yaratdı. Bütün bunlar isə sosial yardımın əhalinin həmin yardıma ehtiyacı olan təbəqəsinə çatdırılmasına səbəb oldu.

Nərimanov rayonunda da ünvanlı dövlət sosial yardımının tətbiqi və bu işin səmərəli təşkil edilməsi sahəsində zəruri fəaliyyət həyata keçirilir. 2008-2009-cu illərdə ünvanlı dövlət sosial proqramı ilə əlaqədar mərkəzə 2958 ailədən müraciət daxil olmuş və ümumilikdə 12187 nəfərədən ibarət 2948 ailəyə ünvanlı sosial yardım təyin edilmişdir. Vurğulamaq lazımdır ki, bu prosesdə heç bir aztəminatlı ailə kənarda qalmamış və onlar dövlətimizin qayğısından bəhrələnmişlər.

Mərkəzimizin kollektivi bundan sonra da öz vəzifəsini günün tələbləri səviyyəsində quracaq və dövlətimizin, insanlarımızın rifah halının durmadan yaxşılaşmasına yönəlmiş sosial siyasətini layiqincə icra etmək üçün əlindən gələni əsirgəməyəcək.

Ağa HƏSƏNOV,

Nərimanov Rayon Əhalinin

Sosial Müdafiə Mərkəzinin direktoru

Xalq qəzeti.- 2009.- 3 iyul.- S. 7