Azərbaycanlı alim Bəkir Çobanzadə adına mükafata layiq görülmüşdür

Azərbaycan Dövlət Pedaqoji Universitetinin əməkdaşı, filologiya elmləri doktoru Mahmud Allahmanlı Ukrayna Respublikasında kırımtatarların böyük şairi, ədəbiyyatşünas və dilçi alimi Bəkir Çobanzadə adına mükafata layiq görülüb. Mükafatın təqdimatı ilə bağlı mərasim Bəkir Çobanzadənin anadan olduğu Qarasubazarda keçirilib.

Mərasimdə Ali Məclisin, Nazirlər Kabinetinin rəhbər nümayəndələri, Kırımtatar Yazıçılar Birliyinin sədri, universitet rəhbərləri, İ.Qasprinski adına kitabxananın direktoru, Ukraynadakı Azərbaycan diasporunun nümayəndələri iştirak ediblər.

Kırımtatar ədəbiyyatının tədqiqatçısı Mahmud Allahmanlı bu mükafatı kırımtatarların qüdrətli sənətkarı “Aşıq Ömərin həyat və yaradıcılığı” adlı monoqrafiyasına görə almışdır. Onu da qeyd edək ki, o bu mükafata layiq görülən ilk xarici ölkə vətəndaşıdır. Mərasimdə M. Allahmanlı Kırımtatar ədəbiyyatının problemləri ilə bağlı məruzə etmiş, ədəbi, mədəni, tarixi əlaqələrdən və gələcək tədqiqat planlarından danışmışdır. Sonda azərbaycanlı laureatın şərəfinə Azərbaycan xalq mahnıları səslənmişdir.

Almaz ÜLVİ

Xalq qəzeti.- 2009.- 12 iyul.- S. 6.