Nur şəhərinin nurlu günləri

Şairlərin sevə-sevə vəsf edərək “nur şəhəri” adlandırdıqları Mingəçevirdə son bir ildə yeni quruculuq ab-havası yaranmışdır. Şəhərdə gedən tikinti-abadlıq işləri öz vüsəti ilə sanki Mirgəçevirin ilk quruculuq illərini xatırladır. Aparılan quruculuq işlərinin panoramı zəngin və çoxşaxəlidir. Şərq giriş qapısı, klassik memarlıq üslubunda salınan park şəbəkələri, Heydər Əliyevin yadigarı olan şəhər avtovağzal kompleksinin müasir üslubda bərpası, “Nur şəhəri” təqdimat kompleksi, ecazkar Heydər Əliyev parkı, göz oxşayan fəvvarələr, böyük zövqlə salınan yaşıllıqlar zolağı, əkilən bəzək kolları, dekorativ ağaclar, yaraşıqlı yolüstü piyada keçidi və s. Qısa müddətdə 100 yaşayış binasının dam örtüyü dəyişdirilmiş, 107 bina təmir olunmuş, 30 km asfalt örtüyü salınmış, 600 yeni işıq dirəyi quraşdırılmışdır.

Bir il ərzində 2,5 km su, 1 km kanalizasiya, 1,3 km qaz kəməri çəkilmiş, 11,8 km yeraltı elektrik kabelləri yeniləri ilə əvəz olunmuşdur.

Son dövrlər ölkəmizin hər yerində — hər bir şəhər və rayonunda aparılan böyük quruculuq və abadlıq işlərindən ruhlanan mingəçevirlilər sanki bu bir ildə yeniləşmə prosesinin ön cərgəsinə çıxmağa can ataraq daha həvəs və əzmlə çalışırlar. Cari ilin altı ayı ərzində şəhərdə ümumi məhsul istehsalı ötən ilin eyni dövrü ilə müqayisədə 1,6 faiz, sənaye məhsulunun istehsalı 1,9 dəfə, orta aylıq əməkhaqqı 38,6 faiz, əsas kapitala yönəlmiş investisiyanın miqdarı 8,8 dəfə, əmtəə dövriyyəsi 33 faiz, pullu xidmətin həcmi 22 faiz artmış, 3 yeni müəssisə, 10-dan çox idarə, 5 yeni bank filialı, 50-dən artıq ticarət və xidmət obyektləri açılmışdır. Gündə 150 kompyuter dəsti istehsal edən zavod qısa müddətdə ölkəmizin təhsil ocaqlarına 26 mindən çox elektron cihaz göndərmişdir. Bu, dövlətimizin təhsil müəssisələrini informasiya və kommunikasiya texnologiyaları ilə təmin etmə proqramına çox böyük töhfə olmuşdur.

Nəinki Qafqazda, ümumən MDB məkanında analoqu olmayan “Kür” avarçəkmə bazasında tikinti-bərpa işləri yüksək templə davam etməkdədir. Müasir dünya standartları səviyyəsində qurulan bu bazanın sayəsində Mingəçevirdə avarçəkmə idmanı üzrə möhtəşəm beynəlxalq yarışların, Avropa və dünya birinciliklərinin keçiriləcəyi gün uzaqda deyil.

Bütün bunlar son bir ildə — şəhər icra hakimiyyətinə cənab Mübariz Ağayevin rəhbərlik etdiyi dövrdə görülmüş işlərin yalnız bir hissəsidir. Ümumilikdə isə Mingəçevirdə 2003-2008-ci illər ərzində 40-dan artıq sənaye, sosial, mədəniyyət, təhsil, səhiyyə obyektləri tikilib istifadəyə verilmiş, bununla da şəhərdə fəaliyyət göstərən müəssisələrin ümumi sayı 285-ə çatmışdır.

Mingəçevir Politexnik İnstitutu, Azərbaycan Müəllimlər İnstitutunun Mingəçevir filialı, Bakı İslam Universitetinin Mingəçevir şöbəsi, Mingəçevir Tibb Məktəbi, Mingəçevir Turizm Kolleci və Türk liseyi kimi ali və orta təhsil ocaqları şəhərimizin sakinləri ilə yanaşı respublikamızın müxtəlif bölgələrindən gəlmiş gənclərin yüksək peşə ixtisaslarına yiyələnmələri üçün səmərəli fəaliyyət göstərirlər.

Şəhər icra hakimiyyətinin təşəbbüsü ilə 1948-1955-ci illərdə Mingəçevirdə aparılan inşaat-quruculuq işlərinə rəhbərlik etmiş İslam İslamzadənin, eləcə də şəhərin salınmasında onunla çiyin-çiyinə çalışaraq Mingəçevirin şərəfli tarixini yazmış əmək qəhrəmanları Qafar Xəlilov, Bəhlul Bayramov, Sarvan Salmanov, İsa Salahov, Qəşəm İsmayılov, Rəsul Balakişiyev, Məhərrəm Dadaşov, Qriqori Kuzmin, İvan Kiyasko, Əhmədfərid Əfəndiyev kimi insanların — şəhərin ilk qurucularının əziz xatirəsini əbədiləşdirmək, eyni zamanda, sıraları ildən-ilə seyrəlmətdə olan veteranlara diqqət və qayğı göstərmək məqsədilə “İlk Qurucular” parkı yaradılmışdır. Qəlblərə rahatlıq gətirən yaşıllıq, gül-çiçək kolları, yaraşıqlı oturacaqlar, işıqlandırma qurğuları və cazibədar fəvvarələr qısa zamanda bu parkı mingəçevirlilərin sevimli istirahət guşəsinə çevirmişdir. “İlk Qurucular” parkının gənc nəslin təlim-tərbiyəsində, onların qəlbində ötən nəsillərin əməllərinə görə minnətdarlıq duyğularının baş qaldırmasında da müstəsna rol oynayacağı şübhəsizdir. Gənclər görürlər ki, öz ömürlərini xalqın rifahı, Vətənin çiçəklənməsinə həsr etmiş insanların əməlləri heç zaman unudulmur.

Ulu öndərimiz Heydər Əliyev Mingəçeviri “halal insanlar şəhəri” adlandırmışdı. Ümummilli liderimizin yüksək etimad ifadə edən həmin sözlərini doğrultmağa çalışan mingəçevirlilərin yaradıcı əməyini möhtərəm Prezidentimiz cənab İlham Əliyev də yüksək qiymətldəndirmişdir: “Çox sevindirici haldır ki, Mingəçevir inkişaf edir, yaşayır və burada özəl sektor möhkəmlənir, yeni iş yerləri açılır. Mingəçevirdə regional proqramlar uğurla həyata keçirilir. Ümumiyyətlə, Mingəçevirdə gördüklərimiz bir daha təsdiq edir ki, seçdiyimiz inkişaf strategiyası Azərbaycanın milli maraqlarına tam cavab verir”.

Möhtərəm Prezidentimizin mingəçevirlilərin əməyinə verdiyi yüksək qiymət bizim ürəyimizdə böyük qürur hissi doğurur.

Ölkəmizin inkişaf strategiyasının əyani bir nümunəsi olan Mingəçevirin bu günü barədə bu qısa qeydlərimi şəhərin icra başçısı Mübariz Ağayevin sözləri ilə bitirmək istərdim: “Prezident İlham Əliyevin rəhbərliyi altında uğurla həyata keçirilən regionların sosial-iqtisadi inkişafı üzrə Dövlət Proqramının birinci mərhələsi Mingəçevirdə aparılan genişmiqyaslı quruculuq işlərində də öz əksini tapmışdır. Son bir ilin nəticələri hər şeydən əvvəl büsbütün yeniləşən şəhərimizin indiki durumunda özünü göstərir. Mingəçevir kəhkəşanlar məkanının nadir incisinə çevrilir. Yeni yaradılan hər şey şəhərin hüsnünü daha da gözəlləşdirir, müasirləşdirir, insanlara zövq verir, qəlblərini iftixar hissi ilə döyündürür”.

Adil KƏRİMOV,

müəllim

Mingəçevir şəhəri

Xalq qəzeti.- 2009.- 16 iyul.- S. 4.