Odlu ürəyin döyüntüləri

Müstəqil Azərbaycan Respublikası Demokratik Cümhuriyyətin varisi kimi bir çox dəyərləri bərpa etmişdir. 1997-ci il mart ayının 23-də ümummilli lider Heydər Əliyevin sərəncamı ilə 28 mart günü Azərbaycan təhlükəsizlik orqanlarının əməkdaşlarının peşə bayramı kimi tarixə düşdü.

Hər bir xalq öz ölkəsinin və qurduğu dövlətin möhkəm, etibarlı olması üçün qanunlardan və digər hüquqi institutlardan istifadə edir. Bəşəriyyət tarixində çox güclü dövlətlər, nəhəng imperiyalar hökm sürmüş, tarixdə iz qoymuş və sonradan xarici müdaxilə, ya da daxili amillər nəticəsində çökmüşdür. Dövlətin möhkəm olması üçün güclü ordu ilə yanaşı, onun xüsusi xidmət, təhlükəsizlik orqanının da olması mütləq və vacib lazımdır.

Azərbaycan Yazıçılar Birliyinin üzvü, hərbi jurnalist, polkovnik İlqar Quliyevin müxtəlif illərdə qələmə aldığı məqalə, oçerk və müsahibələrin toplandığı “Odlu ürəyin döyüntüləri” kitabı məhz dövlətin möhkəm olması yolunda çalışanların fədakar işinə həsr edilmişdir. Kitabda demokratik cümhuriyyətin qurulması və beynəlxalq aləmdə tanınması istiqamətində atılan addımlar, bolşeviklərin və digər riyakar qüvvələrin gənc respublikaya qarşı məkrli və təcavüzkar niyyətlərinin, habelə onlara əlaltılıq edən daşnakların pozuculuq fəaliyyətinin qarşısını almaq üçün həm peşəkar ordunun, həm də müstəqil əks-kəşfiyyat funksiyalarını yerinə yetirəcək xüsusi xidmət orqanının yaranmasına ciddi ehtiyac duyulan dövrdən danışılmaqla yanaşı, ölkəyə qarşı törədiləcək kəşfiyyat pozuculuq əməllərinin qarşısını almaqdan ötrü 1919-cu il mart ayının 28-də Hərbi Nazirıiyın Baş Qərargahının general-kvartirmeyster şöbəsində kəşfiyyat və əks-kəşfiyyat bölməsinin yaradılmasından da ətraflı söz açılır.

1919-cu il iyunun 11-də Dövlət Müdafiə Komitəsinin əks-kəşfiyyat bölməsinin “Əksinqilab ilə Mübarizə Təşkilatı”nın yaradılması, bu qurumun ilk rəisi M. Şeyxzamanlının rəhbərliyilə əhali arasında pozuculuq fəaliyyəti aparmağa cəhd edən xarici qüvvələrin xəfiyyələrini ifşa etmək üçün görülən mühüm işlər kitabda verilən “Kəşfiyyat və əks-kəşfiyyatdan MTN-ə qədər” məqaləsi xüsusi maraq və lakonik dillə qələmə alınmışdır.

Ölkədə müstəqillik əldə edildikdən sonra DTK arxivlərindən hazırlanaraq mətbuata ayaq açan materiallara toxunan müəllif ulu öndər Heydər Əliyevin yenidən hakimiyyətə qayıdaraq parçalanmaqda olan Azərbaycanı xilas etməsinə, onun səriştəli dövlətçilik idarəçiliyi sayəsində respublikada maraqları kəsişən qüvvələrin sabitliyi pozmaq, cəmiyyəti çalxalamaq, qarşıdurma yaratmaq cəhdlərinin qarşısını qətiyyətlə almasına böyük önəm verir. “Şanlı məktəbin yetirmələri” adlı başlıq altında toplanmış “General sözü”, “İnam itməyəndə”, “Kəşfiyyatçı ömrü”, “Odlu ürəyin döyüntüsü”, “Vətən üçün doğulmuşdu”, “İki cəbhənin veteranı”, “Haqqı nahaqqa verməyən insan” və digər portret cizgilərdə generallar Mustafa Nəsirov, İskəndər Allahverdiyev, Firudin Hüseynov, polkovniklər Maqsul Məmmədov, Musa Qocayev, Sevlan Qasımov, Məhəmməd Həmidov, müharibə veteranı Əhəd Şəmsizadənin həyat və fəaliyyətləri haqqında maraqlı faktları oxuculara çatdırmaqla onların dövlətimizin bütövlüyü naminə gördüyü işlərdən, fədakarlıqlardan söz açır.

“Sərhəd”dən seçmələr” başlığı altında toplanmış “Ulu öndərin şah əsərlərindən biri”, “ Bir amalın yolçusu”, “Sitəm”, “Səsinin sehri ilə ucalan qadın”, “Söz mülkünün nəhənği”, “Ağır itki”, “Zəlilər”, “Aldanmışlar” adlı publisistik məqalələrində İ. Quliyev müxtəlif insan talelərinə müraciət edərək öz ürək çırpıntılarını yana-yana sətirlərə köçürmüşdür. Ümummilli liderin şəxsi təşəbbüsü, səyi və rəhbərliyi altında layihələşdirilən və tikintisi başa çatdırılan MTN-in inzibati binasını ulu öndərin əsərlərindən biri adlandıran müəllif onun gördüyü hər bir işin əvəzsiz olduğunu xüsusi olaraq diqqətə çatdırır. İstər Anarın 60 illik yubileyinə, Ofelya Sənaniyə, istər Xəlil Rza Ulutürkün ağır itkisinə, istərsə də Azərbaycanda istiqlalın qələbəsindən sonra çox mühüm dövlət işində çalışan Mahmud Səfikürdski, 1937-ci ildə repressiyaya uğramış Ənvər Yusifoğluna həsr etdiyi və MTN əməkdaşlarının fəaliyyəti nəticəsində normal həyata qayıdan vətəndaşların faciəsini qələmə aldığı oçerklərdə müəllif kimliyini sübut etmiş hər yazıda, hər sətirdə doğma torpağı uğrunda, lazım gələrsə, “qələmini süngüyə çevirməyə” qadir vətəndaş mövqeyini saxlamışdır.

İnanırıq ki, müəllifin bundan əvvəl nəşr olunmuş “İstiqlalın sabahına doğru”, “Burdan vətən görünür”, “İtirilmiş sevgi” kitabları kimi bu yeni kitabı da oxucular tərəfindən rəğbətlə qarşılanacaq.

Zərifə BƏŞİRQIZI

Xalq qəzeti.- 2009.- 18 iyul.- S. 6.